မ့ၢ်ယ့ၣ်ၡူးသံလၢယဂီၢ် အနီၢ်ကီၢ်ဧါ
လၢလံာ်စီဆှံအပူၤ ပဖးဘၣ်တၢ်ဂ့ၢ်လၢ ဘၣ်ဃးဒီး ပိာ်ခွါလၢအတီအလိၤတဖၣ် လၢအအိၣ်ဒီးတၢ်တူၢ်ဘၣ် “ဒ်ပဝဲအသိး” လီၤ. (ယၤကိာ် ၅:၁၇) အဒိ ဖဲ ရိမ့ၤ ၇:၂၁-၂၄ န့ၣ်တၢ်မၢဖိပီလူး တဲဝဲလၢ “တုၤယဆၢမၤတၢ်ဂ့ၤဒီး, တၢ်အၢအိၣ်ဒီးယၤလီၤ. . . . ပှၤအဖှီၣ်ယၤအံၤဧၢ.” ပနၢ်ပၢၢ် စီၤပီလူးအတၢ်ကတိၤအံၤ သ့ဝဲညီညီလီၤ. ပသ့ၣ်ညါဘၣ်လၢ စီၤပီလူးမ့ၢ် ပိာ်ခွါလၢအအိၣ်ဒီးတၢ်သးတီ ဘၣ်ဆၣ် အဝဲအိၣ်ဒီးတၢ်တူၢ်ဘၣ်လၢ အနီၢ်ကစၢ်အဖီခိၣ် ဒ်အံၤအဃိ ဖဲပဘၣ်တြီဆၢ ပတၢ်တလၢတပှဲၤအခါ ကဲထီၣ်တၢ်ဂံၢ်တၢ်ဘါလၢ ပဂီၢ်ဒိၣ်မးလီၤ.
စီၤပီလူး ပာ်ဖျါထီၣ်ဝဲ အတၢ်တူၢ်ဘၣ်လၢ အဂၤစ့ၢ်ကီးလီၤ. အဝဲတဲဝဲလၢ “ယွၤအဖိခွါတဂၤ, . . . အဲၣ်ယၤဒီးဟ့ၣ်လီၤကွံာ်အသး လၢယဂီၢ်လီၤ.” (ကလၤတံ ၂:၂၀) စီၤပီလူး နာ်ဝဲတၢ်ဂ့ၢ်အံၤ လီၤတံၢ်လီၤဆဲးလီၤ. မ့ၢ်နတူၢ်ဘၣ် ဒ်န့ၣ်စ့ၢ်ကီးဧါ. ဘၣ်သ့ၣ်သ့ၣ် နတတူၢ်ဘၣ်ဒ်န့ၣ် ထီဘိဘၣ်.
ခီဖျိလၢ လၢညါပမၤကမၣ်ဘၣ်တ့ၢ်တၢ်အဃိ ပမ့ၢ်တူၢ်ဘၣ်ဒံး လၢပလုၢ်ပပှ့ၤတအိၣ်ဘၣ်န့ၣ် ဘၣ်သ့ၣ်သ့ၣ် ပတနာ်လၢ ယဟိဝၤယွၤအဲၣ်ပှၤဒီး ပျၢ်ကွံာ်ပတၢ်ကမၣ်န့ၣ်ဘၣ်. ဒီးကကီဒိၣ်မးလၢ ပကထံၣ် ယ့ၣ်ၡူးအတၢ်ပှ့ၤက့ၤ ဒ်တၢ်ဟ့ၣ်လၢ ပဝဲတဂၤစုာ်စုာ်အဂီၢ်န့ၣ်လီၤ. မ့ၢ်ယ့ၣ်ၡူးအဲၣ်ဒိးလၢ ပကထံၣ်အတၢ်ပှ့ၤက့ၤဒ် တၢ်ဟ့ၣ်တခါအသိးန့ၣ် သပှၢ်တၢၢ်ဧါ. ဒ်သိးပကထံၣ် တၢ်ပှ့ၤက့ၤဒ်န့ၣ်အဂီၢ် တၢ်မနုၤမၤစၢၤပှၤသ့လဲၣ်. ပကသမံသမိးကွၢ် တၢ်သံကွၢ်ခံဖျၢၣ်အံၤလီၤ.
ယ့ၣ်ၡူးထံၣ်ဝဲ အတၢ်ပှ့ၤက့ၤဒ်လဲၣ်
ယ့ၣ်ၡူးအဲၣ်ဒိးလၢ ပကထံၣ်အတၢ်ပှ့ၤက့ၤဒ် တၢ်ဟ့ၣ်လၢ ပဝဲတဂၤစုာ်စုာ်အဂီၢ်လီၤ. ဘၣ်မနုၤအဃိ ပတဲဒ်န့ၣ်သ့လဲၣ်. ထံၣ်တမှံကွၢ် တၢ်မၤအသးဖဲ လူၤကၣ် ၂၃:၃၉-၄၃ ပာ်ဖျါထီၣ်ဝဲန့ၣ်တက့ၢ်. ပိာ်ခွါတဂၤလၢ ဘၣ်တၢ်ပျၤထီအီၤလၢ တၢ်မၤနးမၤဖှီၣ်အသ့ၣ်တၢၣ်လိၤ လၢယ့ၣ်ၡူးအကပၤန့ၣ် အၢၣ်လီၤဝဲလၢ အမၤကမၣ် တ့ၢ်တၢ်လီၤ. ထဲဒၣ်ပှၤလၢ အမၤတၢ်အၢတၢ်သီဖးဒိၣ်န့ၣ် ဘၣ်တၢ်စံၣ်ညီၣ်သံအီၤလၢ သ့ၣ်တၢၣ်လိၤလီၤ. လၢတၢ်န့ၣ်အဃိ ပှၤတဂၤအံၤ အတၢ်ကမၣ်န့ၣ် ကမ့ၢ်တၢ်ကမၣ်ဖးဒိၣ်လီၤ. အဝဲအသူၣ်ကိၢ်သးဂီၤ ဒီးဃ့ကညးယ့ၣ်ၡူးလၢ “တုၤနဟဲလၢနဘီနမုၢ်အပူၤဒီး, သ့ၣ်နီၣ်ထီၣ်က့ၤယၤတက့ၢ်.”
ဖဲန့ၣ်အဆၢကတီၢ် ယ့ၣ်ၡူးစံးဆၢက့ၤအီၤ ဒ်လဲၣ်. ထံၣ်တမှံကွၢ်လၢ ဖဲယ့ၣ်ၡူးဃၣ်ဃီၤအခိၣ် ဒီးကွၢ်ဝဲ ပှၤအၢပှၤသီတဂၤအံၤအခါ ယ့ၣ်ၡူးကတူၢ်ဘၣ်တၢ် ဆါထဲလဲၣ်န့ၣ်တက့ၢ်. ယ့ၣ်ၡူးတူၢ်ဘၣ်တၢ် ဆါမးသနာ်က့ အဝဲနံၤကမှံထီၣ် ဒီးမၤမုာ်ထီၣ် ပှၤပိာ်ခွါတဂၤန့ၣ်အသးလီၤ. အဝဲတဲဝဲလၢ “ယစံးဘၣ်နၤတီတီအံၤ, ခဲမုၢ်ဆါအံၤ နကအိၣ်ဒီးယၤလၢ ပၤရဒံစူးအပူၤလီၤ.” ယ့ၣ်ၡူး မ့ၢ်အဲၣ်ဒိးတဲဆၢက့ၤအီၤ ယိယိဖိလၢ “ပှၤကညီဖိခွါအံၤ” ဟဲဒ်သိးက “ဟ့ၣ်လီၤအသးလၢ ပှၤကညီအါဂၤအပှ့ၤ” န့ၣ်သ့ဝဲလီၤ (မးသဲ ၂၀:၂၈) ဘၣ်ဆၣ် လၢတၢ်အဲၣ်တၢ်ကွံအပူၤ ယ့ၣ်ၡူးပာ်ဖျါထီၣ်လၢ အဝဲကလုၢ်ထီၣ်သးလၢ ပှၤတဂၤအံၤအဂီၢ် စ့ၢ်ကီးလီၤ. ယ့ၣ်ၡူးတဲတၢ်ဒီးအီၤမုာ်မုာ် ဒီးသူဝဲတၢ်ကတိၤလၢအမ့ၢ် “နၤ” ဒီး “ယၤ” လီၤ. ဒီးယ့ၣ်ၡူးတဲဘၣ်အီၤလၢ အဝဲကအိၣ်ဘၣ်လၢ ဟီၣ်ခိၣ်ပၤရဒံစူးအပူၤလီၤ.
ပနာ်သ့သပှၢ်ကတၢၢ်လၢ ယ့ၣ်ၡူးအဲၣ်ဒိးလၢ ပှၤအၢပှၤသီတဂၤအံၤ ကနၢ်ပၢၢ်ဝဲလၢ အဝဲအတၢ်ဟ့ၣ်လုၢ်ထီၣ်န့ၣ် ကဲဘျုးလၢအဂီၢ် စ့ၢ်ကီးလီၤ. ယ့ၣ်ၡူးသးအိၣ်တူၢ်လိာ်ဝဲ ပှၤမၤကမၣ်တၢ်လၢ အတအိၣ်ဒီးတၢ်ခွဲးတၢ်ယာ် လၢကမၤကစၢ်ယွၤ အတၢ်မၤဒၣ်လဲာ်န့ၣ်လီၤ. လၢတၢ်န့ၣ်အဃိ ပနာ်သ့သပှၢ်ကတၢၢ်လၢ ခရံာ်ဖိတဂၤလၢ အဒိးဘျၢထံ ဒီးအမၤကစၢ်ယွၤအတၢ်မၤတဖၣ်န့ၣ် ယ့ၣ်ၡူးကအဲၣ်ဒိးတူၢ်လိာ်အီၤလီၤ. လၢအပူၤကွံာ် ပမ့ၢ်မၤဘၣ်တၢ်ကမၣ်သနာ်က့ တၢ်မနုၤကမၤစၢၤပှၤ ဒ်သိးပကနာ်လၢ ယ့ၣ်ၡူးအတၢ်ပှ့ၤက့ၤန့ၣ် ကဲဘျုးလၢ ပဝဲတဂၤစုာ်စုာ်အဂီၢ်န့ၣ်လဲၣ်.
တၢ်မနုၤမၤစၢၤ စီၤပီလူးလဲၣ်
ခီဖျိလၢ ယ့ၣ်ၡူးဟ့ၣ်လီၤ စီၤပီလူး မူဒါလၢ ကစံၣ်တဲၤတဲလီၤတၢ်အဃိ စီၤပီလူးကနၢ်ပၢၢ်ဝဲလၢ ယ့ၣ်ၡူးသံလၢ အဂီၢ်န့ၣ်လီၤ. ဘၣ်မနုၤအဃိ ပတဲဒ်န့ၣ်သ့လဲၣ်. အဝဲတဲဝဲလၢ “ပကစၢ် ယ့ၣ်ၡူးခရံာ်လၢ အဒုးဆူၣ်ထီၣ် ယဂံၢ်ယဘါန့ၣ်, ယစံးထီၣ်ပတြၢၤ အဘျုးအဖှိၣ်လီၤ. အဂ့ၢ်ဒ်အံၤ, ပာ်ယၤလၢပှၤအကလုၢ်တီ, ဒီးပာ်ယၤလၢ တၢ်မၤအတၢ်အပူၤလီၤ. ယဲဒၣ်အံၤလၢအခီၣ်ထံးန့ၣ်, ယမ့ၢ်ပှၤဒုၣ်ဒွဲၣ်တၢ်, ဒီးပှၤမၤအၢမၤသီတၢ်, ဒီးပှၤအဒူလီၤ.” (၁ တံၤမသ့း ၁:၁၂-၁၄) စီၤပီလူးမၤတ့ၢ်ဘၣ် တၢ်ကမၣ်တဖၣ်ဘၣ်ဆၣ် ခီဖျိလၢ ယ့ၣ်ၡူးဟ့ၣ်အီၤမူဒါအံၤအဃိ ဒုးနာ်န့ၢ်အီၤလၢ ယ့ၣ်ၡူးအဲၣ်အီၤ, သးကညီၤအီၤ ဒီးနာ်န့ၢ်အီၤလီၤ. ယ့ၣ်ၡူးဟ့ၣ်လီၤ ပဝဲတဂၤစုာ်စုာ်လၢ မူဒါလၢ ပကစံၣ်တဲၤတဲလီၤ တၢ်သးခုကစီၣ်န့ၣ်လီၤ. (မးသဲ ၂၈:၁၉, ၂၀) ပဝဲစ့ၢ်ကီး ပဒိးန့ၢ်ဘၣ်မူဒါလၢ ပကဘၣ်စံၣ်တဲၤတဲလီၤပှၤဂၤအဃိ မ့ၢ်ပနာ်လၢ ယ့ၣ်ၡူးတူၢ်သံသးလၢ ပဂီၢ်စ့ၢ်ကီးဧါ.
အါဘၢၤ(ထ်) န့ၣ်ဘၣ်တၢ်ဟီထီၣ်ကွံာ်အီၤ ဘူးကအိၣ် ၃၄ နံၣ်ဝံၤအလီၢ်ခံ အဝဲဟဲက့ၤဆူ ယဟိဝၤယွၤအအိၣ်လီၤ. အဝဲတဲဝဲလၢ “ယသးပ့ၤနီၣ် တၢ်ကမၣ်လၢ ယမၤတ့ၢ်အီၤတဖၣ် တန့ၢ်ဘၣ်. ဘၣ်ဆၣ် ဖဲယစံၣ်တဲၤတဲလီၤတၢ်အခါ ယတူၢ်ဘၣ်ဒ် တၢ်မၢဖိပီလူးအသိးလီၤ. ယတူၢ်ဘၣ်လၢ တၢ်စံၣ်တဲၤတဲလီၤတၢ်မၤန့ၣ် ယ့ၣ်ၡူးဟ့ၣ်လီၤယၤအဃိ ယသးမုာ်ထီၣ်ဒိၣ်မး. ဒီးယအိၣ်ဒီး တၢ်ထံၣ်လၢအကြၢးအဘၣ် လၢယနီၢ်ကစၢ်အဖီခိၣ် ဒီးယတၢ်အိၣ်မူ လၢခဲအံၤဒီးခါဆူညါအဂီၢ်လီၤ.”—စံးထီၣ်ပတြၢၤ ၅၁:၃.
ဖဲနမၤလိလံာ်စီဆှံဒီး ပှၤအကလုာ်ကလုာ်အခါ ဒုးနာ်န့ၢ်အဝဲသ့ၣ်လၢ ယ့ၣ်ၡူးသးကညီၤအီၤ ဒီးအဲၣ်အီၤတက့ၢ်
အဲလဲန့ၣ် တချုးလၢ အမၤလိတၢ်မ့ၢ်တၢ်တီအခါ အဝဲမၤတၢ်အၢတၢ်သီအါမး ဒီးမၤဆူၣ်မၤစိးတၢ် ဒိၣ်မးလီၤ. အဝဲတဲဝဲလၢ “ယဆိကမိၣ်ဒံး တၢ်ဂ့ၢ်လၢ ယဟးမၤကီမၤခဲပှၤဂၤတဖၣ်န့ၣ်လီၤ. အဃိ တဘျီတခီၣ် ယသးအုးဒိၣ်မး. ဘၣ်ဆၣ် ယစံးဘျုးဘၣ် ယဟိဝၤယွၤလၢ အဟ့ၣ်အခွဲးလၢ ပှၤတၢ်ဒဲးဘးဖိ ဒ်သိးဒီးယၤ ကစံၣ်တဲၤတဲလီၤပှၤဂၤ လၢတၢ်သးခုကစီၣ်အဃိလီၤ. ဖဲယထံၣ်ဘၣ်လၢ ပှၤဒိကနၣ် တၢ်သးခုကစီၣ်အခါ ဒုးသ့ၣ်နီၣ်ထီၣ်ယၤလၢ ယဟိဝၤယွၤ မ့ၢ်ပှၤလၢအဂ့ၤ ဒီးပှဲၤဒီးတၢ်အဲၣ်န့ၣ်လီၤ. ယတူၢ်ဘၣ်လၢ ယဟိဝၤယွၤ သူယၤဒ်သိး ယကမၤစၢၤ ပှၤလၢအမၤတၢ်အၢတၢ်သီ ဒ်သိးဒီးယၤန့ၣ်လီၤ.”
ဖဲပလဲၤစံၣ်တဲၤတဲလီၤတၢ်အခါ မ့ၢ်ဝဲပမၤတၢ်ဂ့ၤ ဒီးပဆိကမိၣ်တၢ်လၢ အဂ့ၤတဖၣ်န့ၣ်လီၤ. ဒီးဒုးနာ်န့ၢ်ပှၤလၢ ယ့ၣ်ၡူးသးကညီၤပှၤ, အဲၣ်ပှၤ ဒီးနာ်န့ၢ်ပှၤန့ၣ်လီၤ.
ယဟိဝၤယွၤ ဒိၣ်န့ၢ်ဒံးပသး
တချုးလၢ မုၣ်ကီၤလံၢ် အဟီၣ်ခိၣ်လၢ အအၢအသီအံၤ ဘၣ်တၢ်မၤဟးဂီၤအီၤဒံးဘၣ်န့ၣ် ပကဆဲးတူၢ်ဘၣ် တၢ်သးဘၣ်ဒိ လၢဘၣ်ဃးဒီး တၢ်ကမၣ်လၢ ပမၤတ့ၢ်ဘၣ်တဖၣ်န့ၣ်လီၤ. ပတြီဆၢကွံာ် တၢ်တူၢ်ဘၣ်တခါအံၤ ကသ့ဒ်လဲၣ်.
ကၠံန့ၣ် လၢအနီၢ်ဆံးခါ အိၣ်မူဝဲတၢ်အိၣ်မူ ခံမၠိအဃိ ညီနုၢ်အဝဲတူၢ်ဘၣ်ဝဲလၢ အတၢ်ကမၣ်အိၣ်လီၤ. ဘၣ်ဆၣ် အဝဲတဲဝဲလၢ “ယသးခုဒိၣ်မးလၢ “ယွၤဒိၣ်န့ၢ်ပသး” လီၤ.” (၁ ယိၤဟၣ် ၃:၁၉, ၂၀) ဒ်ကၠံအသိး ပသ့ၣ်ညါလၢ ယဟိဝၤယွၤဒီးယ့ၣ်ၡူး နၢ်ပၢၢ်ဝဲလၢ ပမ့ၢ်ပှၤတၢ်ဒဲးဘးဖိအဃိ ပသးမုာ်ထီၣ်လီၤ. သ့ၣ်နီၣ်ထီၣ်လၢ အဝဲသ့ၣ် တကတဲာ်ကတီၤဝဲ တၢ်ပှ့ၤက့ၤလၢ ပှၤလၢပှၤပှဲၤအဂီၢ်ဘၣ်, ကတဲာ်ကတီၤဝဲလၢ ပှၤတၢ်ဒဲးဘးဖိ လၢအပီၢ်ယၢ်လီၤက့ၤအသး အဂီၢ်န့ၣ်လီၤ.—၁ တံၤမသ့း ၁:၁၅.
နမ့ၢ်ဆိကမိၣ်ထံ ယ့ၣ်ၡူးရ့ဒီး ပှၤတလၢတပှဲၤတဖၣ်ဒ်လဲၣ် ဒီးတသ့ဖဲအသ့ နမ့ၢ်မၤ တၢ်စံၣ်တဲၤတဲလီၤတၢ်မၤ လၢအဂ့ၤကတၢၢ်န့ၣ် နကနာ်လၢ တၢ်ပှ့ၤက့ၤန့ၣ် မ့ၢ်ဝဲလၢ နဂီၢ်လီၤ. နမ့ၢ်မၤဒ်န့ၣ် ဒ်စီၤပီလူးအသိး နတဲကသ့လၢယ့ၣ်ၡူး “အဲၣ်ယၤဒီးဟ့ၣ်လီၤကွံာ်အသး လၢယဂီၢ်လီၤ.”
