တၢ်မၤလိ ၁၄
တၢ်သးဝံၣ် ၈ ယဟိဝၤမ့ၢ်ပတၢ်ပူၤဖျဲးလီၢ်
‘နကဘူၣ်ထီၣ်ဘါထီၣ် မတဂၤလဲၣ်န့ၣ် ဃုထၢလၢ နနီၢ်ကစၢ်’
“မ့မ့ၢ် ယၤဒီးယဟံၣ်ဖိဃီဖိန့ၣ် ပကဘူၣ်ထီၣ်ဘါထီၣ် ယဟိဝၤယွၤ.”—ၡူ ၂၄:၁၅.
တၢ်ဂ့ၢ်မိၢ်ပှၢ်
တၢ်မၤလိအံၤ ကဒုးသ့ၣ်နီၣ်ထီၣ်ပှၤ တၢ်ဂ့ၢ်လၢ ဘၣ်မနုၤအဃိ ပဆၢတဲာ်လီၤသးလၢ ပကဘူၣ်ထီၣ်ဘါထီၣ် ယဟိဝၤယွၤလဲၣ်.
၁. ဒ်သိး ပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤ မနုၤလဲၣ် ဒီးဘၣ်မနုၤအဃိလဲၣ်. (ယၡါယၤ ၄၈:၁၇, ၁၈)
ပပၢ်ယဟိဝၤယွၤန့ၣ် အအဲၣ်ပှၤဒိၣ်မး ဒီးအအဲၣ်ဒိးလၢ ပကအိၣ်မူဘၣ် မုာ်မုာ်ခုၣ်ခုၣ်လၢ ခဲအံၤဒီးခါဆူညါ. (စံၣ် ၃:၁၂, ၁၃) ဖဲအတ့လီၤပှၤအခါ အဟ့ၣ်ပှၤ တၢ်သ့တၢ်ဘၣ် ဒ်သိး ပမၤတၢ်ကသ့အါမံၤ. ဘၣ်ဆၣ် အတဟ့ၣ်ပှၤ တၢ်သ့တၢ်ဘၣ်လၢ ပကပၢလီၤ ပနီၢ်ကစၢ်သး မ့တမ့ၢ် ပကဆၢတဲာ် တၢ်အဘၣ် ဒီးတၢ်အကမၣ်လၢ ပနီၢ်ကစၢ်ဘၣ်. (စံၣ် ၈:၉; ယံး ၁၀:၂၃) အသ့ၣ်ညါဝဲလၢ ဒ်သိး ပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ် ဘူၣ်ထီၣ်ဘါထီၣ်အီၤ ဒီးဒိကနၣ် အကလုၢ်.—ဖး ယၡါယၤ ၄၈:၁၇, ၁၈.
၂. မုၣ်ကီၤလံၢ် အဲၣ်ဒိးဒုးဆိကမိၣ်ကမၣ်ပှၤ တၢ်ဂ့ၢ်မနုၤလဲၣ် ဒီးယဟိဝၤယွၤ မၤဝဲဒ်လဲၣ်.
၂ မုၣ်ကီၤလံၢ် အဲၣ်ဒိးဒုးဆိကမိၣ်ကမၣ် ပှၤဟီၣ်ခိၣ်ဖိလၢ ဒ်သိး အဝဲသ့ၣ် ကအိၣ်ဒီး တၢ်သးခုအဂီၢ် အတလိၣ်ဘၣ် ယဟိဝၤယွၤဘၣ် ဒီးအပၢလီၤ အနီၢ်ကစၢ်သးသ့. (၁ မိၤ ၃:၄, ၅) အဃိ ဒ်သိး ယဟိဝၤယွၤ ကပာ်ဖျါထီၣ်ဝဲလၢ မုၣ်ကီၤလံၢ် ကဲပှၤလၢ အတဲလံၣ်တၢ်အဂီၢ် အဟ့ၣ်အခွဲးလၢ ပှၤဟီၣ်ခိၣ်ဖိ ကပၢလီၤအသး တတီၤဖိ. ပှၤဟီၣ်ခိၣ်ဖိပၢလီၤ အနီၢ်ကစၢ်သး တသ့ဘၣ်န့ၣ် ပထံၣ်ဘၣ်ၡဲၡဲလီၤ. သနာ်က့ လံာ်စီဆှံ ပာ်ဖျါထီၣ်ဝဲ ပိာ်မုၣ်ဒီးပိာ်ခွါအါဂၤ လၢအဘူၣ်ထီၣ်ဘါထီၣ် ယဟိဝၤယွၤန့ၣ် အဒိးန့ၢ်ဘၣ် တၢ်သးခု. ဒီးလၢအဝဲသ့ၣ်အကျါ ပှၤလၢအသးခု ဒိၣ်ကတၢၢ်န့ၣ် မ့ၢ်ဝဲယ့ၣ်ၡူးခရံာ်. အဆိကတၢၢ်န့ၣ် ပကကွၢ်သကိး တၢ်ဂ့ၢ်တနီၤလၢ ဘၣ်မနုၤအဃိ ယ့ၣ်ၡူးဆၢတဲာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤလဲၣ်. ဝံၤဒီး ပကသ့ၣ်ညါဘၣ်စ့ၢ်ကီးလၢ ဘၣ်မနုၤအဃိ ပကြၢးဘူၣ်ထီၣ်ဘါထီၣ် ပပၢ်ယဟိဝၤယွၤလဲၣ်. ဒီးလၢခံကတၢၢ်န့ၣ် ပကကွၢ်ကဒါက့ၤ တၢ်ဂ့ၢ်တနီၤလၢ ဘၣ်မနုၤအဃိ ပဆၢတဲာ်လီၤသးလၢ ပကဘူၣ်ထီၣ်ဘါထီၣ် ယဟိဝၤယွၤလဲၣ်.
ဘၣ်မနုၤအဃိ ယ့ၣ်ၡူးဆၢတဲာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤလဲၣ်
၃. မုၣ်ကီၤလံၢ် အဲၣ်ဒိးဟ့ၣ်ယ့ၣ်ၡူးလၢ မနုၤလဲၣ် ဒီးယ့ၣ်ၡူး ဆၢတဲာ်လီၤသးဒ်လဲၣ်.
၃ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ထီဘိန့ၣ် အပာ်ဖျါထီၣ်ဝဲလၢ အဘူၣ်ထီၣ်ဘါထီၣ် ယဟိဝၤယွၤ. အဒိ ယ့ၣ်ၡူးဒိးဘျၢထံ ဝံၤအလီၢ်ခံ မုၣ်ကီၤလံၢ် တဲဝဲလၢ ယ့ၣ်ၡူး မ့ၢ်ဘါထီၣ်အီၤ ထဲတဘျီန့ၣ် အကဟ့ၣ် ယ့ၣ်ၡူးလၢ ဘီမုၢ်ခဲလၢာ်လၢ အအိၣ်လၢ ဟီၣ်ခိၣ်ချၢ. ယ့ၣ်ၡူး တဲက့ၤအီၤလၢ “မုၣ်ကီၤလံၢ်ဧၢ, ဟးထီၣ်ကွံာ်. တၢ်ကွဲးအသးအိၣ်ဝဲလၢ ‘နကဘၣ် ဘူၣ်ထီၣ်ဘါထီၣ် နကစၢ်ယဟိဝၤယွၤ ဒီးနကဘၣ်မၤထဲ အတၢ်လီၤ.’” (မး ၄:၈-၁၀) ဘၣ်မနုၤအဃိ ယ့ၣ်ၡူး ဆၢတဲာ်လီၤသး ဒ်န့ၣ်လဲၣ်. ပကကွၢ်သကိး တၢ်ဂ့ၢ်တနီၤ.
၄-၅. ဘၣ်မနုၤအဃိ ယ့ၣ်ၡူး ဆၢတဲာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤလဲၣ်.
၄ တၢ်ဂ့ၢ်ခိၣ်သ့ၣ်လၢ ယ့ၣ်ၡူးဆၢတဲာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်ဝဲခီဖျိလၢ အအဲၣ်ယဟိဝၤယွၤဒိၣ်မး. (ယိၤ ၁၄:၃၁) တကးဒံးဘၣ် ယ့ၣ်ၡူး ဆၢတဲာ်လီၤသး ဒ်န့ၣ်န့ၣ် ခီဖျိလၢ အသ့ၣ်ညါလၢ ယဟိဝၤယွၤ ကြၢးဒိးန့ၢ်ဘၣ် ပတၢ်ဘူၣ်ထီၣ်ဘါထီၣ်. (ယိၤ ၈:၂၈, ၂၉; လီၣ် ၄:၁၁) အသ့ၣ်ညါဝဲလၢ ယဟိဝၤယွၤ ဟ့ၣ်လီၤပှၤသးသမူ, ပနာ်န့ၢ်ယဟိဝၤယွၤသ့ ဒီးအဟ့ၣ်ပှၤတၢ်လၢ အဂ့ၤအါမး. (စံး ၃၆:၉; ၃၃:၄; ယၤ ၁:၁၇) ယဟိဝၤယွၤ တဲဘၣ်ယ့ၣ်ၡူး တၢ်မ့ၢ်တၢ်တီထီဘိ ဒီးတၢ်လၢအအိၣ်ဒီး ယ့ၣ်ၡူးခဲလၢာ်န့ၣ် ဟဲလၢ ယဟိဝၤယွၤအအိၣ်. (ယိၤ ၁:၁၄) မ့မ့ၢ် မုၣ်ကီၤလံၢ်န့ၣ် အတလီၤဂာ်ဒီး ယဟိဝၤယွၤ နီတစဲးဘၣ်. အဒုးအိၣ်ထီၣ် တၢ်ဒဲးဘး ဒီးတၢ်သံလၢ ပှၤဟီၣ်ခိၣ်ဖိအဂီၢ်. အကဲပှၤလၢ အလံၣ်အီၣ်တၢ် ဒီးအအဲၣ်လီၤထဲ အနီၢ်ကစၢ်သး. (ယိၤ ၈:၄၄) ယ့ၣ်ၡူးသ့ၣ်ညါ တၢ်ဂ့ၢ်တဖၣ်အံၤ ဂ့ၤဂ့ၤအဃိ အတဘၣ်သး ကွၢ်လိမုၣ်ကီၤလံၢ် ဒီးထီဒါ ယဟိဝၤယွၤ နီတဘျီဘၣ်.—ဖံလံး ၂:၅-၈.
၅ တၢ်ဂ့ၢ်အဂၤတမံၤလၢ ယ့ၣ်ၡူးဆၢတဲာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်ဝဲခီဖျိလၢ အသ့ၣ်ညါဝဲလၢ အတၢ်သးတီန့ၣ် ကကဲဘျုးဝဲအါမး. (ဧ့ၤ ၁၂:၂) ယ့ၣ်ၡူးသ့ၣ်ညါဝဲလၢ အမ့ၢ်ဆဲးအိၣ်ဒီး တၢ်သးတီန့ၣ် အကမၤလၤကပီၤ အပါအမံၤ ဒီးမၤလီၤမၢ်ကွံာ် တၢ်ဒဲးဘး ဒီးတၢ်သံလၢ မုၣ်ကီၤလံၢ် ဒုးအိၣ်ထီၣ်ဝဲ.
ဘၣ်မနုၤအဃိ ပကြၢးဘူၣ်ထီၣ်ဘါထီၣ် ယဟိဝၤယွၤလဲၣ်
၆-၇. ဆၢကတီၢ်ခဲအံၤ ဘၣ်မနုၤအဃိ ပှၤအါဂၤ တဘူၣ်ထီၣ်ဘါထီၣ် ယဟိဝၤယွၤဘၣ်လဲၣ် ဒီးဘၣ်မနုၤအဃိ ပကြၢးဘူၣ်ထီၣ်ဘါထီၣ် ထဲယဟိဝၤယွၤ တဂၤလဲၣ်.
၆ ဆၢကတီၢ်ခဲအံၤ ပှၤအါဂၤတသ့ၣ်ညါ ယဟိဝၤယွၤ အတၢ်ဂ့ၤတၢ်ဝါတဖၣ်ဘၣ်. ဒီးအဝဲသ့ၣ် တသ့ၣ်ညါ တၢ်လၢယဟိဝၤယွၤ မၤန့ၢ်လၢ အဝဲသ့ၣ် အဂီၢ်ဘၣ်အဃိ အဝဲသ့ၣ် တဘူၣ်ထီၣ်ဘါထီၣ် ယဟိဝၤယွၤဘၣ်. အဝဲသ့ၣ်န့ၣ် လီၤဂာ်ဒ်သိးဒီး ပှၤလၢစီၤပီလူး စံၣ်တဲၤတဲလီၤဝဲလၢ ဝ့ၢ်အၤသ့ၣ်အပူၤ လၢအတသ့ၣ်ညါ ယဟိဝၤယွၤဘၣ်.—မၤတၢ် ၁၇:၁၉, ၂၀, ၃၀, ၃၄.
၇ စီၤပီလူး တဲနၢ်ပၢၢ် ပှၤအိၣ်လၢ ဝ့ၢ်အၤသ့ၣ်လၢ ကစၢ်ယွၤအမ့ၢ်အတီ “ဟ့ၣ်လီၤ ပှၤခဲလၢာ်လၢ သးသမူ, ဒုးကသါပှၤ ဒီးဟ့ၣ်ပှၤတၢ်အဂၤ ခဲလၢာ်.” အဆဲးတဲဝဲ “လၢကစၢ်ယွၤ အဃိန့ၣ် ပမူ, ပဟူးပဂဲၤ ဒီးပဟဲကဲထီၣ်လၢ အဃိ.” ဒီးကစၢ်ယွၤန့ၣ် အကဲဝဲ တၢ်ဘၣ်တ့ကစၢ်လၢ “ဒုးအိၣ်ထီၣ် ပှၤဟီၣ်ခိၣ်ဖိ ကိးကလုာ်ဒဲးလၢ အအိၣ်ဝဲဆိးဝဲလၢ ဟီၣ်ခိၣ်ချၢ ခီဖျိလၢ ပိာ်ခွါတဂၤ” အဃိ ပကြၢး ဘူၣ်ထီၣ်ဘါထီၣ် ထဲကစၢ်ယွၤ တဂၤလီၤ.—မၤတၢ် ၁၇:၂၅, ၂၆, ၂၈.
၈. တၢ်လၢ ယဟိဝၤယွၤ တမၤနီတဘျီဘၣ်န့ၣ် မ့ၢ်မနုၤလဲၣ် ဒီးအအဲၣ်ပှၤန့ၣ် အပာ်ဖျါထီၣ်ဝဲဒ်လဲၣ်.
၈ ယဟိဝၤယွၤန့ၣ် အကဲဝဲ တၢ်ဘၣ်တ့ကစၢ် ဒီးတၢ်ပၢကစၢ် အဒိၣ်ကတၢၢ် လၢမူခိၣ်ဒီးဟီၣ်ခိၣ် အဃိ အမ့ၢ်မၢဆူၣ်ပှၤလၢ ပကဘူၣ်ထီၣ်ဘါထီၣ်အီၤန့ၣ် အမၤဝဲသ့. သနာ်က့ ယဟိဝၤယွၤ တမၢဆူၣ်ပှၤ နီတဘျီဘၣ်. အပာ်ဖျါထီၣ်န့ၢ်ပှၤ တၢ်အုၣ်သးလၢ အအိၣ်ဝဲနီၢ်ကီၢ် ဒီးအအဲၣ်ပဝဲ တဂၤဘၣ်တဂၤ ဒိၣ်မး. အဘၣ်သးလၢ ပှၤအါဂၤ ကကဲထီၣ်ဘၣ် အတံၤသကိး လီၤထူလီၤယိာ်. (၁ တံၤ ၂:၃, ၄) အဃိ ယဟိဝၤယွၤ သိၣ်လိနဲၣ်လိပှၤ ဒ်သိး ပကတဲဘၣ် ပှၤဂၤဘၣ်ဃးဒီး တၢ်လၢ အကမၤန့ၢ်လၢ ပှၤဟီၣ်ခိၣ်ဖိအဂီၢ် ဒ်လဲၣ်အဂ့ၢ်. (မး ၁၀:၁၁-၁၃; ၂၈:၁၉, ၂၀) ဒီးဒ်သိး ပကဘူၣ်ထီၣ်ဘါထီၣ် ဘၣ်အီၤအဂီၢ် အရဲၣ်ကျဲၤန့ၢ်ပှၤ တၢ်အိၣ်ဖှိၣ် ဒီးဟ့ၣ်ပှၤ တၢ်အိၣ်ဖှိၣ်သးပှၢ်တဖၣ်လၢ ကကွၢ်ထွဲပှၤ.—မၤတၢ် ၂၀:၂၈.
၉. ယဟိဝၤယွၤ ပာ်ဖျါထီၣ် အတၢ်အဲၣ်လၢ ပှၤဟီၣ်ခိၣ်ဖိကိးဂၤဒဲး အဖီခိၣ်ဒ်လဲၣ်.
၉ ယဟိဝၤယွၤ ပာ်ဖျါထီၣ် အတၢ်အဲၣ်လၢ အလီၤကမၢကမၣ်လၢ ပှၤလၢအတနာ်အီၤဘၣ် အဖီခိၣ်ခီဖျိ အဟ့ၣ်အဝဲသ့ၣ် တၢ်လၢအဂ့ၤစ့ၢ်ကီး. ဆိကမိၣ်ကွၢ် တၢ်ဂ့ၢ်အံၤ, လၢအနံၣ်လၢအကထိတဖၣ် အတီၢ်ပူၤန့ၣ် ပှၤအါဂၤ တဒိကနၣ် ယဟိဝၤယွၤ အကလုၢ်ဘၣ်. အဝဲသ့ၣ် အိၣ်မူဝဲဒ်သိးဒီး အနီၢ်ကစၢ်အတၢ်ထံၣ် လၢအဘၣ်ဃးဒီး တၢ်အဘၣ် ဒီးတၢ်အကမၣ်. သနာ်က့ ဒ်သိးအဝဲသ့ၣ် ကဆဲးမူ ဒီးကအိၣ်မူဘၣ် မုာ်မုာ်ခုၣ်ခုၣ်အဂီၢ် ယဟိဝၤယွၤ သးအိၣ်ဟ့ၣ်အဝဲသ့ၣ် တၢ်လၢအဝဲသ့ၣ် လိၣ်ဘၣ်ဝဲ. (မး ၅:၄၄, ၄၅; မၤတၢ် ၁၄:၁၆, ၁၇) တကးဒံးဘၣ် ခီဖျိလၢ ယဟိဝၤယွၤအဃိ အဝဲသ့ၣ် အိၣ်ဒီးတံၤသကိး ဒီးဟံၣ်ဖိဃီဖိလၢ အအဲၣ်အီၤ, ထီၣ်ဖိထီၣ်လံၤ ဒီးန့ၢ်ဘၣ်အဘျုးလၢ တၢ်လၢအဝဲသ့ၣ်မၤဝဲ. (စံး ၁၂၇:၃; စံၣ် ၂:၂၄) တၢ်အုၣ်သးတဖၣ်အံၤ ပာ်ဖျါထီၣ်ဝဲလၢ ပပၢ်ယဟိဝၤယွၤ အဲၣ်ပှၤဟီၣ်ခိၣ်ဖိ ကိးဂၤဒဲး. (၂ မိၤ ၃၄:၆) ခဲအံၤ ပကကွၢ်ကဒါက့ၤ တၢ်ဂ့ၢ်တနီၤလၢ ဘၣ်မနုၤအဃိ ပဆၢတဲာ်လီၤသးလၢ ပကဘူၣ်ထီၣ်ဘါထီၣ် ယဟိဝၤယွၤလဲၣ်. ဒီးခီဖျိလၢ ပဘူၣ်ထီၣ်ဘါထီၣ်အီၤအဃိ အဆိၣ်ဂ့ၤပှၤဒ်လဲၣ်.
ဘၣ်မနုၤအဃိ ပဆၢတဲာ်လီၤသးလၢ ပကဘူၣ်ထီၣ်ဘါထီၣ် ယဟိဝၤယွၤလဲၣ်
၁၀. (က) တၢ်ဂ့ၢ်ခိၣ်သ့ၣ်လၢ ပဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်မနုၤလဲၣ်. (မးသဲ ၂၂:၃၇) (ခ) နသ့ၣ်ညါဘၣ်လၢ ယဟိဝၤယွၤ နၢ်ပၢၢ်စၢၤပှၤ ဒီးသးအိၣ်ပျၢ်တၢ်ကမၣ်အဃိ နဒိးန့ၢ်ဘၣ်အဘျုးဒ်လဲၣ်. (စံးထီၣ်ပတြၢၤ ၁၀၃:၁၃, ၁၄)
၁၀ ဒ်ယ့ၣ်ၡူးအသိး တၢ်ဂ့ၢ်ခိၣ်သ့ၣ်လၢ ပဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်ဝဲခီဖျိလၢ ပအဲၣ်အီၤ လၢပသးဒီဖျၢၣ်. (ဖး မးသဲ ၂၂:၃၇.) ဖဲပသ့ၣ်ညါအါထီၣ် ယဟိဝၤယွၤ အတၢ်ဂ့ၤတၢ်ဝါအခါ ပအဲၣ်ဒိးရ့ဒီးအီၤ အါထီၣ်. အဒိ ဆိကမိၣ်ကွၢ် ဘၣ်ဃးဒီး ယဟိဝၤယွၤ သးအိၣ်ပျၢ် တၢ်ကမၣ်အဂ့ၢ်. ဖဲပှၤအံၣ်စရ့လးဖိ တဒိကနၣ် ယဟိဝၤယွၤ အကလုၢ်ဘၣ်အခါ ယဟိဝၤယွၤ ဃ့ကညး အဝဲသ့ၣ်လၢ “ဝံသးစူၤ ပာ်တ့ၢ်ကွံာ် သုတၢ်မၤလၢ အအၢအသီတဖၣ်.” (ယံး ၁၈:၁၁) ယဟိဝၤယွၤ သ့ၣ်နီၣ်ထီၣ်က့ၤဝဲလၢ ပမ့ၢ်ဟီၣ်ခိၣ်ကမူၣ် ဒီးပတကဲ ပှၤလၢပှၤပှဲၤဘၣ်. (ဖး စံးထီၣ်ပတြၢၤ ၁၀၃:၁၃, ၁၄.) ဖဲနဆိကမိၣ်ထံ ဘၣ်ဃးဒီး ယဟိဝၤယွၤ သးအိၣ်ပျၢ် တၢ်ကမၣ်အဂ့ၢ် ဒီးအတၢ်ဂ့ၤတၢ်ဝါလၢ အဂၤတဖၣ်အခါ နတဘၣ်သး ဘူၣ်ထီၣ်ဘါထီၣ်အီၤ လီၤထူလီၤယိာ်ဧီၤ.
၁၁. ဘၣ်မနုၤအဃိ ပဆၢတဲာ်လီၤသးလၢ ပကဘူၣ်ထီၣ်ဘါထီၣ် ယဟိဝၤယွၤလဲၣ်.
၁၁ တၢ်ဂ့ၢ်အဂၤလၢ ပဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်ဝဲခီဖျိလၢ ပသ့ၣ်ညါလၢ ပကြၢးဘူၣ်ထီၣ်ဘါထီၣ် ထဲယဟိဝၤယွၤ တဂၤအဃိ. (မး ၄:၁၀) တကးဒံးဘၣ် ပသ့ၣ်ညါလၢ ပတၢ်သးတီဒီး ယဟိဝၤယွၤန့ၣ် ကကဲဘျုးအါမး. ပမ့ၢ်ဆဲးတီဒီး ယဟိဝၤယွၤ ဒီးဘူၣ်ထီၣ်ဘါထီၣ်အီၤန့ၣ် ပပာ်စီဆှံအမံၤ, ပပာ်ဖျါထီၣ်လၢ မုၣ်ကီၤလံၢ်န့ၣ် အလံၣ်တၢ် ဒီးပမၤသးခု ပပါယဟိဝၤယွၤအသး. ဒီးပမ့ၢ်ဆၢတဲာ်လီၤသးလၢ ပကဘူၣ်ထီၣ်ဘါထီၣ် ယဟိဝၤယွၤ ခဲအံၤန့ၣ် ခါဆူညါ ပအိၣ်ဒီး တၢ်မုၢ်လၢ်လၢ ပကဘူၣ်ထီၣ်ဘါထီၣ်အီၤ လီၤထူလီၤယိာ်.—ယိၤ ၁၇:၃.
၁၂-၁၃. လၢဒီပုၢ်ဝဲၢ်မုၣ်ဖဲၤ ဒီးကၠ့ အတၢ်လဲၤခီဖျိန့ၣ် ပဒိးန့ၢ်ဘၣ် တၢ်မၤလိဒ်လဲၣ်.
၁၂ ဖဲပသးစၢ်အခါ ပမ့ၢ်မၤလိသ့ထီၣ်သးလၢ ပကအဲၣ် ယဟိဝၤယွၤန့ၣ် ဖဲပဒိၣ်ထီၣ်အခါ ပတၢ်အဲၣ်အီၤ ကဂၢၢ်ကျၢၤထီၣ်. ဆိကမိၣ်ကွၢ် ပှၤဒီပုၢ်ဝဲၢ်မုၣ်ခံဂၤလၢ အမံၤမ့ၢ် ဖဲၤဒီးကၠ့ a အတၢ်လဲၤခီဖျိ. ဖဲအဝဲသ့ၣ် စးထီၣ်မၤလိ လံာ်စီဆှံအခါ ဖဲၤန့ၣ် အသးအိၣ် အနံၣ် ၁၀ ဒီးကၠ့န့ၣ် အသးအိၣ် ၁၁ နံၣ်. အဝဲသ့ၣ် အမိအပါ တအဲၣ်ဒိး မၤလိလံာ်စီဆှံဘၣ် သနာ်က့ အမိအပါ ဟ့ၣ်အီၤအခွဲးလၢ ကရ့လိာ်သးဒီး ယဟိဝၤပှၤအုၣ်အသး. ဘၣ်ဆၣ် ပှၤဒီပုၢ်ဝဲၢ်မုၣ်ခံဂၤအံၤ ကဘၣ်လဲၤထီၣ်သရိာ် ဃုာ်ဒီးအဟံၣ်ဖိဃီဖိ လၢနွံကတၢၢ်စ့ၢ်ကီး. ကၠ့တဲဝဲလၢ “တၢ်လၢ ယဟိဝၤပှၤအုၣ်အသးတဖၣ် သိၣ်လိယၤလၢ လံာ်စီဆှံအပူၤန့ၣ် မၤစၢၤယၤဒ်သိးဒီး ယကတြီဆၢကွံာ် တံၤသကိး အတၢ်ဆီၣ်သနံး လၢအဘၣ်ဃးဒီး တၢ်သူကသံၣ်မူၤဘှီး ဒီးတၢ်မံဃုာ်.”
၁၃ အဝဲသ့ၣ် မၤလိလံာ်စီဆှံ စှၤကိာ်နံၣ်ဝံၤဒီး အဝဲသ့ၣ်ခံဂၤလၢာ် ကဲထီၣ် ပှၤစံၣ်တဲၤတဲလီၤတၢ်ဖိ. လၢခံ အဝဲသ့ၣ် မၤပှၤလဲၤလၢညါ ဒီးကွၢ်ထွဲစ့ၢ်ကီး အမိအပါ လၢအသးပှၢ်. ဒီပုၢ်ဝဲၢ်မုၣ်ကၠ့ ဆိကမိၣ်ထီၣ်က့ၤ အဝဲသ့ၣ်တၢ်လဲၤခီဖျိ ဒီးအတဲဝဲလၢ “ယသ့ၣ်ညါဘၣ်လၢ ယဟိဝၤယွၤ အံးထွဲကွၢ်ထွဲ အသကိးလၢ အတီဒီးအီၤတဖၣ်. ဒီးဒ် ၂ တံၤမသ့း ၂:၁၉ တဲဝဲအသိး ‘ယဟိဝၤယွၤ သ့ၣ်ညါပှၤလၢ အမ့ၢ်အတၢ်တဖၣ်.’” ပထံၣ်ဘၣ်ၡဲၡဲလၢ ပှၤလၢအအဲၣ်ယဟိဝၤယွၤ ဒီးဆၢတဲာ်လီၤသးလၢ ကဘူၣ်ထီၣ်ဘါထီၣ်အီၤန့ၣ် ယဟိဝၤယွၤ ကွၢ်ထွဲအဝဲသ့ၣ်ထီဘိ.
၁၄. ဖဲပှၤတဲလံၣ်တဲလီ ယဟိဝၤယွၤ အဂ့ၢ်အခါ ပအိၣ်ဃူအီၤ သ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၄ ဖဲပှၤတဲဟးဂီၤ ယဟိဝၤယွၤ အဂ့ၢ်အခါ ပအဲၣ်ဒိး ပာ်ဖျါထီၣ်လၢ တၢ်လၢပှၤတဲဝဲန့ၣ် တဘၣ်ဘၣ်. ဆိကမိၣ်ကွၢ် တၢ်အိၣ်သးအံၤ. နအိၣ်ဒီး နသကိးတဂၤလၢ အသးဂ့ၤ, အဟ့ၣ်တၢ်ညီ ဒီးအသးအိၣ်ပျၢ်ကွံာ် တၢ်ကမၣ်. ဘၣ်တနံၤ နနၢ်ဟူ ပှၤတဂၤတဲဝဲလၢ နသကိးန့ၣ် အကဲပှၤလၢ အသးအၢ ဒီးအတမၤတၢ် တီတီလိၤလိၤဘၣ်. ဖဲနနၢ်ဟူ ဒ်န့ၣ်အခါ နကအဲၣ်ဒိး အိၣ်ဃူနသကိး သပှၢ်တၢၢ်. ဒ်န့ၣ်အသိး ဖဲပနၢ်ဟူပှၤတဲ တၢ်လံၣ်တၢ်လီ ဘၣ်ဃးဒီး ယဟိဝၤယွၤ အဂ့ၢ်အခါ ပကအိၣ်ဃူ ယဟိဝၤယွၤ ခီဖျိ ပတဲဖျါထီၣ် တၢ်မ့ၢ်တၢ်တီ ဘၣ်ဃးဒီးအီၤ. (စံး ၃၄:၁; ၡါ ၄၃:၁၀) ပမၤဒ်အံၤအဃိ ပတၢ်ကတိၤ ဒီးတၢ်မၤန့ၣ် ပာ်ဖျါထီၣ်လၢ ပအဲၣ်ဒိး ဘူၣ်ထီၣ်ဘါထီၣ် ယဟိဝၤယွၤ လၢပသးဒီဖျၢၣ်.
နကဒီသဒၢ ယဟိဝၤယွၤ အမံၤဧါ (ကွၢ်လံာ်အဆၢ ၁၄) b
၁၅. တၢ်မၢဖိပီလူး ဆီတလဲ အတၢ်အိၣ်မူ ဝံၤအလီၢ်ခံ အဒိးန့ၢ်ဘၣ် အဘျုးဒ်လဲၣ်. (ဖံလံးပံၤ ၃:၇, ၈)
၁၅ ဒ်သိး ပကမၤ ယဟိဝၤယွၤ အတၢ်ဘၣ်သး မ့တမ့ၢ် မၤအါထီၣ် အတၢ်မၤအဂီၢ် ပသးအိၣ်ဆီတလဲ ပဖီတၢၣ်တဖၣ် လၢပတၢ်အိၣ်မူပူၤ. အဒိ လၢယူဒၤ အတၢ်ဘူၣ်တၢ်ဘါအပူၤန့ၣ် တၢ်မၢဖိပီလူး အိၣ်ဒီးလီၢ်လၤလၢ အပတီၢ်ထီ ဘၣ်ဆၣ် ဒ်သိး အကကဲထီၣ် ယ့ၣ်ၡူးခရံာ် အပျဲၢ်အဘီၣ် ဒီးဘူၣ်ထီၣ်ဘါထီၣ် ယဟိဝၤယွၤအဂီၢ် အသးအိၣ် ပာ်တ့ၢ်ကွံာ် ယူဒၤအတၢ်ဘူၣ်တၢ်ဘါ. (ကလၤ ၁:၁၄) ခီဖျိလၢ အသးအိၣ် ဆီတလဲအသးအဃိ လၢယဟိဝၤယွၤ အတၢ်မၤအပူၤန့ၣ် အဒိးန့ၢ်ဘၣ် တၢ်ဆိၣ်ဂ့ၤအါမး. ဒီးအန့ၢ်ဘၣ် တၢ်ခွဲးတၢ်ယာ်လၢ အပၢဘၣ်တၢ်ဒီး ယ့ၣ်ၡူးခရံာ် လၢမူခိၣ်. တကးဒံးဘၣ် အတသးအုးက့ၤလၢ အတၢ်ဆၢတဲာ်အံၤအဃိ နီတဘျီဘၣ်. ပဝဲစ့ၢ်ကီး ပမ့ၢ်ဘူၣ်ထီၣ်ဘါထီၣ် ယဟိဝၤယွၤန့ၣ် ပတသးအုးက့ၤလၢ ပတၢ်ဆၢတဲာ်အံၤအဃိဘၣ်.—ဖး ဖံလံးပံၤ ၃:၇, ၈.
၁၆. လၢဒီပုၢ်ဝဲၢ်မုၣ် ကၠူလယါ အတၢ်လဲၤခီဖျိန့ၣ် ပဒိးန့ၢ်ဘၣ် တၢ်မၤလိဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၆ ပမ့ၢ်ပာ်ဆိ ပတၢ်ဘူၣ်ထီၣ်ဘါထီၣ် ယဟိဝၤယွၤ လၢပတၢ်အိၣ်မူအပူၤန့ၣ် အကဆိၣ်ဂ့ၤပှၤ လၢခဲအံၤ ဒီးလၢခါဆူညါ. ဆိကမိၣ်ကွၢ် ဒီပုၢ်ဝဲၢ်မုၣ် ကၠူလယါ အတၢ်လဲၤခီဖျိ. တချုးလၢ ကၠူလယါ မၤလိတၢ်မ့ၢ်တၢ်တီ ဒံးဘၣ်န့ၣ် အသးဝံၣ်တၢ်လၢ အသရိာ် စးထီၣ်လၢ အနီၢ်ဆံးခါလံ. အသးဝံၣ်တၢ် သ့ဒိၣ်မးအဃိ ပှၤသိၣ်လိအီၤလၢ အကကဲထီၣ် ပှၤသးဝံၣ်တၢ်ဖိလၢ အဖၠဲးဒိၣ်မးတဂၤ. တယံာ်ဘၣ်ဒီး ကၠူလယါ အမံၤဒိၣ်ထီၣ် ဒီးအသးဝံၣ်ဘၣ်တၢ်လၢ တၢ်လီၢ်လၢ အမံၤဟူသၣ်ဖျါအါတီၤ. ဖဲအလဲၤထီၣ်ကၠိလၢ ပှၤသိၣ်လိ တၢ်သးဝံၣ်အခါ အသကိးတဂၤ တဲအီၤဘၣ်ဃးဒီး ကစၢ်ယွၤအဂ့ၢ်. ဒီးတဲပၠးအီၤလၢ ကစၢ်ယွၤ အမံၤမ့ၢ် ယဟိဝၤ. တယံာ်ဘၣ်ဒီး ကၠူလယါ စးထီၣ်မၤလိလံာ်စီဆှံ တနွံခံဘျီ. လၢခံ အဆၢတဲာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤ ဒီးအတသူ အတၢ်ဂံၢ်တၢ်ဘါ ဒီးတၢ်ဆၢကတီၢ်လၢ အကကဲထီၣ် ပှၤသးဝံၣ်တၢ်ဖိလၢ အဖၠဲးတဂၤဘၣ်. တၢ်ဆၢတဲာ်တခါအံၤ ကကီဖးဒိၣ်ညါ. ကၠူလယါ တဲဝဲလၢ “ယဆၢတဲာ်လီၤသးလၢ ယတကဲ ပှၤသးဝံၣ်တၢ်ဖိ လၢၤဘၣ်အဃိ ပှၤအါဂၤတဲယၤလၢ ယဆၢတဲာ်နါစိၤတၢ်. ဘၣ်ဆၣ် ယအဲၣ်ဒိးသူ ယတၢ်ဂံၢ်တၢ်ဘါ ဒီးယတၢ်ဆၢကတီၢ်လၢ ကဘူၣ်ထီၣ်ဘါထီၣ် ယဟိဝၤယွၤ.” တၢ်လၢ ကၠူလယါ ဆၢတဲာ်ဝဲ ပူၤကွံာ်အနံၣ် ၃၀ ဘျဲၣ်န့ၣ် အတူၢ်ဘၣ်ဝဲဒ်လဲၣ်. အတဲဝဲလၢ “ယဆၢတဲာ်လီၤသးလၢ ယကဘူၣ်ထီၣ်ဘါထီၣ် ယဟိဝၤယွၤအဃိ ယသးခုဒိၣ်မး. ဒီးလၢခါဆူညါန့ၣ် ယသ့ၣ်ညါလၢ ယဟိဝၤယွၤ ကမၤလၢပှဲၤန့ၢ် ယတၢ်မိၣ်န့ၢ်သးလီ.”—စံး ၁၄၅:၁၆.
ပမ့ၢ်ပာ်ဆိ ပတၢ်ဘူၣ်ထီၣ်ဘါထီၣ် ယဟိဝၤယွၤ လၢနီၣ်ဂံၢ်တၢ လၢပတၢ်အိၣ်မူအပူၤန့ၣ် ပကဒိးန့ၢ်ဘၣ် တၢ်သးခု (ကွၢ်လံာ်အဆၢ ၁၆) c
ဆဲးဘူၣ်ထီၣ်ဘါထီၣ် ယဟိဝၤယွၤ
၁၇. တၢ်အကတၢၢ် ဘူးထီၣ်ဒိၣ်မးလံအဃိ ပှၤလၢအဘူၣ်ထီၣ်ဘါထီၣ် ယဟိဝၤယွၤ ဒီးတဘူၣ်ထီၣ်ဘါထီၣ်အီၤ ဒံးဘၣ်တဖၣ် ကြၢးသ့ၣ်ညါ တၢ်ဂ့ၢ်မနုၤလဲၣ်.
၁၇ ခဲအံၤ ပအိၣ်မူဘၣ် တၢ်ဆၢကတီၢ်လၢ တၢ်အကတၢၢ် ဘူးထီၣ်ဒိၣ်မးလံ. တၢ်မၢဖိပီလူး တဲဝဲလၢ “‘အိၣ်ဒံးတစိၢ်ဖိ’ ဒီး ‘ပှၤလၢအဟဲတဂၤန့ၣ် ကဟဲတုၤဝဲ ဒီးအတမၤယံာ်မၤနီၢ်အသးဘၣ်.’” (ဧ့ၤ ၁၀:၃၇) တၢ်လၢအတဲဝဲန့ၣ် ဒုးသ့ၣ်ညါပှၤ တၢ်ဂ့ၢ်မနုၤလဲၣ်. ပသ့ၣ်ညါဘၣ်လၢ ပှၤလၢ တဘူၣ်ထီၣ်ဘါထီၣ် ယဟိဝၤယွၤ ဒံးဘၣ်တဖၣ် ကဆၢတဲာ်လီၤသးလၢ ကဘူၣ်ထီၣ်ဘါထီၣ်အီၤ အဂီၢ်န့ၣ် တၢ်ဆၢကတီၢ် တအိၣ်အါအါလၢၤဘၣ်. (၁ ကရံၣ် ၇:၂၉) ဒီးပဝဲလၢ အဘူၣ်ထီၣ်ဘါထီၣ် ယဟိဝၤယွၤန့ၣ် ပသ့ၣ်ညါလၢ ပကထံၣ်ဘၣ် တၢ်မၤကွၢ်တဖၣ် ဘၣ်ဆၣ် တၢ်မၤကွၢ်တဖၣ်အံၤ က “အိၣ်ဒံးတစိၢ်ဖိ” လီၤ.
၁၈. ယဟိဝၤယွၤ ဒီးယ့ၣ်ၡူး အဲၣ်ဒိးလၢ ပကဆဲးမၤမနုၤလဲၣ်.
၁၈ ယ့ၣ်ၡူး ဟ့ၣ်ဂံၢ်ဟ့ၣ်ဘါဝဲလၢ ပှၤကကဲထီၣ် အပျဲၢ်အဘီၣ် ဒီးဆဲးပိာ်အခံထီဘိ. (မး ၁၆:၂၄) အဃိ ပဘူၣ်ထီၣ်ဘါထီၣ် ယဟိဝၤယွၤ မ့ၢ်အိၣ်တဘျုးနံၣ်လံ သနာ်က့ ပကဘၣ် ပာ်လီၤပသး ဂၢၢ်ဂၢၢ်ကျၢၤကျၢၤလၢ ပကဆဲး ဘူၣ်ထီၣ်ဘါထီၣ်အီၤ. ဒီးဒ်သိး ပကဆဲးဘူၣ်ထီၣ်ဘါထီၣ်အီၤအဂီၢ် ပကဘၣ် ဂုာ်ကျဲးစၢးဆူၣ်ဆူၣ်. ပကမၤဒ်န့ၣ်အဂီၢ် အတညီဘၣ်. ဘၣ်ဆၣ် ပမ့ၢ်ဘူၣ်ထီၣ်ဘါထီၣ် ယဟိဝၤယွၤ ခဲအံၤန့ၣ် ပကအိၣ်ဒီး တၢ်သးခု ဒီးပကဒိးန့ၢ်ဘၣ် တၢ်ဆိၣ်ဂ့ၤအါမး.—စံး ၃၅:၂၇.
၁၉. လၢကၠံအတၢ်လဲၤခီဖျိန့ၣ် ပဒိးန့ၢ်ဘၣ် တၢ်မၤလိဒ်လဲၣ်.
၁၉ ပှၤတနီၤ တူၢ်ဘၣ်ဝဲလၢ အဝဲသ့ၣ် မ့ၢ်ဘူၣ်ထီၣ်ဘါထီၣ် ယဟိဝၤယွၤန့ၣ် အဝဲသ့ၣ် ဘၣ်တူၢ်ၡူကွံာ်တၢ်အါမး. နမ့ၢ်ကဲ ပှၤသးစၢ်န့ၣ် ဒ်သိး နကဘူၣ်ထီၣ်ဘါထီၣ် ယဟိဝၤယွၤအဂီၢ် နတူၢ်ဘၣ်လၢ အကီဘၣ်နၤ ဒိၣ်မးဧါ. ဒီပုၢ်ဝဲၢ်ခွါသးစၢ် လၢအမံၤမ့ၢ် ကၠံန့ၣ် တဲဝဲလၢ “ယတူၢ်ဘၣ်လၢ ယကဲယဟိဝၤပှၤအုၣ်အသးန့ၣ် အတညီဘၣ် ဒီးတၢ်သိၣ်တၢ်သီ ဃံးဘၣ်ယၤညါ. ဖျါဘၣ်ယၤလၢ ပှၤသးစၢ်လၢ အဒိၣ်ထီၣ် တပူၤဃီဒီးယၤန့ၣ် အဝဲသ့ၣ် အိၣ်ဒီးတၢ်ခွဲးတၢ်ယာ်လၢ ကမၤမူးပွဲ, ကပာ်တၢ်အဲၣ်တီ မ့တမ့ၢ် လိာ်ကွဲ ဝံၤဒံၤအိၤက့ လၢအပၣ်ဃုာ်ဒီး တၢ်မၤဆူၣ်မၤစိး. မ့မ့ၢ်ယၤန့ၣ် ယဘၣ်လဲၤထီၣ် တၢ်အိၣ်ဖှိၣ် ဒီးဟးစံၣ်တဲၤတဲလီၤတၢ်.” ကၠံဆိကမိၣ်တၢ် ဒ်အံၤအဃိ မၤဘၣ်ဒိအီၤဒ်လဲၣ်. ကၠံတဲဝဲလၢ “ယစးထီၣ်မၤတၢ်လၢ အတဂ့ၤဘၣ်တဖၣ် ဒ်သိးဒီး ပှၤသးစၢ်လၢအဂၤတဖၣ် မၤဝဲ. ဒီးယဒိးန့ၢ်ဘၣ် တၢ်သးခု တစိၢ်တလီၢ် ဘၣ်ဆၣ် တၢ်သးခုတခါန့ၣ် အတကဲဝဲ တၢ်သးခုနီၢ်ကီၢ်ဘၣ်. အဃိ ယဆိကမိၣ်ထီၣ်လၢ ယမ့ၢ်မၤထွဲ တၢ်လၢလံာ်စီဆှံ တဲဝဲန့ၣ် ယကဒိးန့ၢ်ဘၣ်အဘျုး. ဝံၤဒီး ယဆၢတဲာ်လီၤသးလၢ ယကဘူၣ်ထီၣ်ဘါထီၣ် ယဟိဝၤယွၤ လၢယသးဒီဖျၢၣ်. စးထီၣ်ဖဲန့ၣ် ယတူၢ်ဘၣ်လၢ ယဟိဝၤယွၤ စံးဆၢယတၢ်ထုကဖၣ် ကိးဘျီဒဲး.”
၂၀. ပကဘၣ် ပာ်လီၤပသးလၢ ပကမၤမနုၤလဲၣ်.
၂၀ ပှၤကွဲးထါစံးထီၣ်ပတြၢၤတဂၤ သးဝံၣ်ထီၣ် ယဟိဝၤယွၤလၢ “ပှၤလၢနဃုထၢအီၤ ဒီးကွဲမုာ်အီၤလၢ ကဟဲဘူးဒီးနၤ ဒ်သိးကအိၣ်လၢ နဟံၣ်အတၢ်ပျီတဖၣ်အပူၤန့ၣ် ကသးခုဝဲလီၤ.” (စံး ၆၅:၄) အဃိ မ်ပပာ်လီၤပသးလၢ ပကဘူၣ်ထီၣ်ဘါထီၣ် ယဟိဝၤယွၤထီဘိ. ဒီးဒ်စီၤယိၤၡူအသိး ပကတဲလၢ “မ့မ့ၢ် ယၤဒီးယဟံၣ်ဖိဃီဖိန့ၣ် ပကဘူၣ်ထီၣ်ဘါထီၣ် ယဟိဝၤယွၤ.”—ၡူ ၂၄:၁၅.
တၢ်သးဝံၣ် ၂၈ ကဲထီၣ်ယဟိဝၤယွၤ အတံၤသကိး
a ပှၤမံၤတနီၤန့ၣ် ပှၤဆီတလဲဝဲ.
b တၢ်ဂီၤ အခီပညီ– ဖဲပမၤ တၢ်အိၣ်ဖှိၣ်ဖးဒိၣ်အခါ လၢတၢ်ချၢန့ၣ် ပိာ်မုၣ်တဂၤ နၢ်ဟူဝဲတၢ်လၢ ပှၤထီဒါတၢ်တဖၣ်တဲဝဲ ဝံၤဒီး အလဲၤလၢ ဒီပုၢ်ဝဲၢ်လၢအမၤ တၢ်စံၣ်တဲၤတဲလီၤလၢ လ့ၣ်ဆီၣ် ဒီးအနၢ်ဟူဘၣ် လံာ်စီဆှံ တၢ်မ့ၢ်တၢ်တီ.
c တၢ်ဂီၤ အခီပညီ– တၢ်ဂီၤအံၤ ပာ်ဖျါထီၣ်က့ၤ ဒီပုၢ်ဝဲၢ်မုၣ် ကၠူလယါ အတၢ်လဲၤခီဖျိ ဘၣ်ဃးဒီး တၢ်ဆီတလဲ လၢအဘၣ်မၤဝဲ ဒ်သိးအက ဆၢတဲာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤအဂီၢ်.
