မၤယဟိဝၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်တက့ၢ်
“ယွၤဧၢ, ယလဲၤတၢ်လၢနမဲာ်ညါလၢ တၢ်မ့ၢ်တၢ်တီအပူၤ ဒီးလၢယသးဒီဖျၢၣ်.” —၂ စီၤပၤ ၂၀:၃.
၁-၃. ပမၤယဟိဝၤယွၤအတၢ်မၤလၢ “သးဒီဖျၢၣ်” န့ၣ်အဲၣ်ဒိးစံးဝဲ တၢ်မနုၤလဲၣ်, ဟ့ၣ်တၢ်အဒိတက့ၢ်.
ပဝဲခဲလၢာ် ပမ့ၢ်ပှၤတလၢတပှဲၤအဃိ ပမၤဘၣ်တၢ်ကမၣ် ကိးဂၤဒဲးလီၤ. ဘၣ်ဆၣ် ယဟိဝၤယွၤကတဲာ်ကတီၤန့ၢ်ပှၤ တၢ်ပှ့ၤက့ၤဒီး အသးအိၣ်ပျၢ်ပတၢ်ကမၣ်အဃိ ပစံးဘျုးဘၣ်အီၤဒိၣ်မးလီၤ. လၢတၢ်န့ၣ်အဃိ ပမ့ၢ်အိၣ်ဒီးတၢ်ဆီၣ်လီၤသးဒီး တၢ်ပီၢ်ယၢ်လီၤက့ၤသးန့ၣ် ပဃ့ပျၢ်ပတၢ်ကမၣ်လၢ ယွၤအအိၣ်သ့ဝဲလီၤ. ဒီးပနာ်သ့သပှၢ်ကတၢၢ်လၢ ယဟိဝၤယွၤ “တမၤဘၣ်ပှၤဒ်ပတၢ်ဒဲးဘးအသိးဘၣ်.” (စံးထီၣ်ပတြၢၤ ၁၀၃:၁၀) ဘၣ်ဆၣ် ပကဘၣ် ‘မၤ [ယွၤ] အတၢ်လၢပသးဒီဖျၢၣ်’ လီၤ. (၁ ကွဲးနီၣ်တၢ် ၂၈:၉) ပမ့ၢ်ပှၤတလၢတပှဲၤအဃိ ပမၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်ကသ့ဒ်လဲၣ်.
၂ ထိၣ်သတြီၤကွၢ် စီၤပၤအၤစါ ဒီးစီၤပၤအမၤစယါ အတၢ်အိၣ်မူတက့ၢ်. စီၤပၤခံဂၤအံၤမၤဝဲတၢ်ဂ့ၤ ဘၣ်ဆၣ်အဝဲသ့ၣ် တမ့ၢ်ပှၤလၢပှၤပှဲၤဘၣ်အဃိ မၤဘၣ်ဝဲတၢ်ကမၣ်စ့ၢ်ကီးလီၤ. ဘၣ်ဆၣ် လံာ်စီဆှံစံးဝဲလၢ စီၤအၤစါန့ၣ် “အိၣ်ဒံးဒီးတၢ်သးတီဒီးယွၤ လၢအသးသမူ ဒီတကတီၢ်ညါအပူၤန့ၣ်လီၤ.” (၂ ကွဲးနီၣ်တၢ် ၁၅:၁၆, ၁၇, ခ့ခါစှီၤကျိာ်; ၂၅:၁, ၂; ကတိၤဒိ ၁၇:၃) ထီဘိန့ၣ် အဝဲဂုာ်ကျဲးစၢးမၤသးခု ယဟိဝၤယွၤအသးဒီး မၤယွၤအတၢ်လၢအ “သးဒီဖျၢၣ်” လီၤ. (၁ ကွဲးနီၣ်တၢ် ၂၈:၉) မ့မ့ၢ်စီၤအမၤစယါန့ၣ် တမၤယွၤအတၢ်မၤလၢအ “သးဒီဖျၢၣ်” အဃိ ဖဲအဝဲဒုးနၢၤဝဲ ယွၤအဒုၣ်အဒါတဖၣ်ဝံၤအလီၢ်ခံ ဟဲက့ၤစိာ်ဝဲ ဒုၣ်ဒါအတၢ်ဂီၤတၢ်ဖှီၣ်ဒီး စးထီၣ်ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်တဖၣ်န့ၣ်လီၤ.—၂ ကွဲးနီၣ်တၢ် ၂၅:၁၁-၁၆.
၃ ပှၤတဂၤလၢ အမၤယွၤအတၢ်မၤလၢအ “သးဒီဖျၢၣ်” န့ၣ် မ့ၢ်ပှၤလၢအအဲၣ် ယဟိဝၤယွၤနီၢ်နီၢ်ဒီး အဲၣ်ဒိးဘူၣ်ထီၣ်ဘါထီၣ်အီၤ လီၤထူလီၤယိာ်လီၤ. လၢလံာ်စီဆှံပူၤန့ၣ် တၢ်ကတိၤလၢအမ့ၢ် “သး” န့ၣ် ညီနုၢ်အဲၣ်ဒိးစံးဝဲ ပတၢ်ပာ်သူၣ်ပာ်သးနီၢ်နီၢ်န့ၣ်လီၤ. တၢ်အံၤပၣ်ဃုာ်ဒီး ပတၢ်ဆိကမိၣ်, တၢ်လၢပအဲၣ်, တၢ်လၢပအဲၣ်ဒိးမၤလၢ ပတၢ်အိၣ်မူပူၤ ဒီးဘၣ်မနုၤအဃိ ပမၤတၢ်သ့ၣ်တဖၣ်အံၤလဲၣ်န့ၣ်လီၤ. ပတလၢတပှဲၤသနာ်က့ ပဘူၣ်ထီၣ်ဘါထီၣ် ယဟိဝၤယွၤလၢ ပသူၣ်ဒီဖျၢၣ်ပသးဒီဖျၢၣ်သ့ဝဲလီၤ. ပမၤအတၢ်မၤန့ၣ် တဘၣ်မ့ၢ်လၢ ပမူဒါအိၣ်ဝဲအဃိ မ့တမ့ၢ် မၤဝံၤတၢ်အမံၤဘၣ်. ပမၤအတၢ်မၤခီဖျိ ပသးအိၣ်မၤအတၢ်မၤ နီၢ်နီၢ်အဃိလီၤ.—၂ ကွဲးနီၣ်တၢ် ၁၉:၉.
၄. ခဲအံၤ ပကတဲသကိးတၢ်ဂ့ၢ်မနုၤလဲၣ်.
၄ ဒ်သိးပကသ့ၣ်ညါအါထီၣ် တၢ်မၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ် အခီပညီအဂီၢ် ပကဆိကမိၣ်ကွၢ် စီၤအၤစါ ဒီးပှၤယူဒၤဖိအစီၤပၤလၢ အဂၤသၢဂၤအဂ့ၢ်လီၤ. စီၤပၤသၢဂၤအံၤမ့ၢ်ဝဲ စီၤယဟိၡၤဖး, စီၤဃံးစကံယၤ ဒီးစီၤယိၤၡံယၤလီၤ. စီၤပၤတဖၣ်အံၤ မၤဘၣ်တၢ်ကမၣ်သနာ်က့ အဝဲသ့ၣ်ဆဲးမၤဒံး ယဟိဝၤယွၤအတၢ်ဘၣ်သးလီၤ. လၢတၢ်န့ၣ်အဃိ ယွၤထံၣ်ဝဲအဝဲသ့ၣ်လၢ အမၤယွၤတၢ်မၤလၢ အသူၣ်ဒီဖျၢၣ်သးဒီဖျၢၣ်န့ၣ်လီၤ. ဘၣ်မနုၤအဃိ ယွၤထံၣ်အဝဲသ့ၣ် ဒ်န့ၣ်လဲၣ်, ဒီးပကွၢ်လိမၤဒိး အဝဲသ့ၣ်ကသ့ဒ်လဲၣ်.
စီၤအၤစါ “အသးအိၣ်ဝဲဒီဖျၢၣ်ညါဒီးယွၤ”
၅. ဖဲစီၤအၤစါကဲထီၣ်စီၤပၤအခါ အဝဲမၤဝဲတၢ်မနုၤလဲၣ်.
၅ အံၣ်စရ့လးအဘီအမုၢ်လီၤဖးခံက့ ဒီးကဲထီၣ်ဝဲအံၣ်စရ့လး အဘီအမုၢ်ဒီး ယူဒၤအဘီအမုၢ်န့ၣ်လီၤ. ဒီးလၢယူဒၤအဘီမုၢ်ပူၤန့ၣ် စီၤအၤစါကဲထီၣ်ဝဲ ပှၤယူဒၤဖိအစီၤပၤ သၢဂၤတဂၤန့ၣ်လီၤ. ဖဲစီၤအၤစါကဲထီၣ် ယူဒၤအစီၤပၤအခါ အဝဲအသးဆူၣ်လၢ ကမၤဟးဂီၤကွံာ် တၢ်ဘူၣ်တၢ်ဘါလၢအကမၣ် ဒီးတၢ်လၢအလီၤသးဘၣ်အၢဒ်သိးဒီး တၢ်မၤကမၣ်မုၣ်ကမၣ်ခွါလၢ အဘီအမုၢ်အပူၤန့ၣ်လီၤ. အဝဲမၤဟးဂီၤကွံာ်တၢ်ဂီၤတၢ်ဖှီၣ်လၢ ပှၤဘူၣ်ထီၣ်ဘါထီၣ်ဝဲဒီး ဟီထီၣ်ကွံာ်ဝဲ ပှၤလၢ အဆါလီၤအီၣ်သးလၢ တၢ်လုၢ်ဟံၣ်အပူၤတဖၣ်န့ၣ်လီၤ. တကးဒံးဘၣ် စီၤအၤစါ သုးကွံာ်အဖံလၢ “နီၢ်ပၤမုၣ်အမိၢ်အလီၢ်လၢ အတ့အၡ့ရၤအဂီၤအဃိန့ၣ်လီၤ.” (၁ စီၤပၤ ၁၅:၁၁-၁၃) ဒီးစီၤအၤစါ ဟ့ၣ်ဂံၢ်ဟ့ၣ်ဘါပှၤယူဒၤဖိတဖၣ်လၢ “ကဃုန့ၢ်ယွၤ အပၢ်တဖၣ်အကစၢ်, ဒီးတိၢ်န့ၢ်တၢ်သိၣ်တၢ်သီ, ဒီးတၢ်မၤလိာ်လီၤ.” စီၤအၤစါဂုာ်ကျဲးစၢး မၤစၢၤပှၤဂၤလၢအဂ့ၤကတၢၢ် ဒ်သိးအဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤအဂီၢ်လီၤ.—၂ ကွဲးနီၣ်တၢ် ၁၄:၄.
စီၤအၤစါသူၣ်ဆူၣ်သးဆူၣ်လၢ ကမၤဟးဂီၤကွံာ် တၢ်ဘူၣ်တၢ်ဘါလၢ အကမၣ်တဖၣ်လၢ အဘီအမုၢ်အပူၤန့ၣ်လီၤ
၆. ဖဲပှၤကူၤၡးဖိဟဲဒုး ပှၤယူဒၤဖိအခါ စီၤအၤစါမၤဝဲဒ်လဲၣ်.
၆ ဖဲစီၤအၤစါ စးထီၣ်ပၢတၢ်အနံၣ်တဆံအတီၢ်ပူၤန့ၣ် လၢယူဒၤအဘီအမုၢ်ပူၤ တၢ်ဒုးတၢ်ယၤတအိၣ်ဘၣ်. ဘၣ်ဆၣ်လၢခံ ပှၤကူၤၡးဖိဟဲ ဒီးအသုးမုၢ်သံၣ်ဘိတကကွဲၢ် ဒီးလ့ၣ်ကဟၣ် ၃၀၀ ဒ်သိးကဒုးပှၤယူဒၤဖိအဂီၢ်လီၤ. (၂ ကွဲးနီၣ်တၢ် ၁၄:၁, ၆, ၉, ၁၀) ဖဲန့ၣ်အခါစီၤအၤစါ မၤဝဲဒ်လဲၣ်. အဝဲနာ်ဝဲသပှၢ်ကတၢၢ်လၢ ယဟိဝၤယွၤမၤစၢၤ အပှၤဂီၢ်မုၢ်သ့ဝဲလီၤ. လၢတၢ်န့ၣ်အဃိ အဝဲဃ့တၢ်မၤစၢၤလၢ ယဟိဝၤယွၤအအိၣ်ဒ်သိး အကမၤနၢၤတၢ်ဒုးအဂီၢ်လီၤ. (ဖး ၂ ကွဲးနီၣ်တၢ် ၁၄:၁၁ တက့ၢ်.) တဘျီတခီၣ် ပှၤအံၣ်စရ့လးဖိအစီၤပၤတဖၣ် တတီဒီးယဟိဝၤယွၤဒၣ်လဲာ် ယဟိဝၤယွၤမၤစၢၤအဝဲသ့ၣ်လၢ ကမၤနၢၤတၢ်ဒုးအဂီၢ်လီၤ. ယဟိဝၤယွၤမၤဝဲဒ်န့ၣ်န့ၣ် မ့ၢ်လၢအဝဲအဲၣ်ဒိးပာ်ဖျါထီၣ်ဝဲလၢ အမ့ၢ်ယွၤလၢအမ့ၢ်အတီတဂၤလီၤ. (၁ စီၤပၤ ၂၀:၁၃, ၂၆-၃၀) ဘၣ်ဆၣ်တဘျီညါအံၤ မ့ၢ်လၢစီၤအၤစါသန့ၤအသးလၢ ယဟိဝၤယွၤအဃိ ယွၤမၤစၢၤအဝဲသ့ၣ်လီၤ. ယဟိဝၤယွၤစံးဆၢက့ၤ စီၤအၤစါအတၢ်ထုကဖၣ်ဒီး အဝဲသ့ၣ်ဒုးတၢ်နၢၤဝဲလီၤ. (၂ ကွဲးနီၣ်တၢ် ၁၄:၁၂, ၁၃) လၢခံစီၤအၤစါ မၤဘၣ်တၢ်ကမၣ်ဖးဒိၣ်တခါလီၤ. ဘၣ်တဘျီ ဖဲအဝဲလိၣ်ဘၣ်တၢ်မၤစၢၤအခါ တဃ့တၢ်မၤစၢၤလၢ ယဟိဝၤယွၤအအိၣ်ဘၣ်. လၢတၢ်န့ၣ်အလီၢ် ဃ့ဝဲတၢ်မၤစၢၤလၢ စူၤရံအစီၤပၤအအိၣ်လီၤ. (၁ စီၤပၤ ၁၅:၁၆-၂၂) အဝဲမၤဝဲဒ်န့ၣ်သနာ်က့ ယဟိဝၤယွၤထံၣ်ဝဲလၢ စီၤအၤစါအဲၣ်အီၤဒံးလီၤ. ဒီးလံာ်စီဆှံတဲဝဲလၢ စီၤအၤစါန့ၣ် “အိၣ်ဒံးဒီးတၢ်သးတီဒီးယွၤ လၢအသးသမူဒီစိၤန့ၣ်လီၤ.” ပဝဲဒၣ်သ့ၣ်တဖၣ် ပကွၢ်လိမၤဒိးစီၤအၤစါ အဒိအတဲာ်လၢအဂ့ၤကသ့ဒ်လဲၣ်.—၁ စီၤပၤ ၁၅:၁၄, ခ့ခါစှီၤကျိာ်.
၇, ၈. နကွၢ်လိမၤဒိး စိၤအၤစါကသ့ဒ်လဲၣ်.
၇ မ့ၢ်ပသန့ၤပသးလၢ ယဟိဝၤယွၤလၢ ပသူၣ်ဒီဖျၢၣ်ပသးဒီဖျၢၣ်ဧါန့ၣ် ပသ့ၣ်ညါအီၤကသ့ဒ်လဲၣ်. ပသံကွၢ်လီၤပသးဒ်အံၤ သ့ဝဲလီၤ– ‘ယကဒိကနၣ် ယဟိဝၤယွၤအကလုၢ်အဂီၢ် မ့ၢ်ကီလၢယဂီၢ်ဒၣ်လဲာ် မ့ၢ်ယကဒိကနၣ်အီၤဒံးဧါ. ဒ်သိးတၢ်အိၣ်ဖှိၣ်ကစီဆှံအဂီၢ် တၢ်လၢယကဘၣ်မၤတဖၣ် မ့ၢ်ယပာ်လီၤယသး ဂၢၢ်ဂၢၢ်ကျၢၤကျၢၤလၢ ယကမၤအီၤလၢ တၢ်သူၣ်ဆူၣ်သးဆူၣ်အပူၤဧါ.’ ဆိကမိၣ်ကွၢ် ဖဲစီၤအၤစါ ကသုးကွံာ်အဖံလၢ နီၢ်ပၤမုၣ်အလီၢ်အခါ အဝဲကလိၣ်ဘၣ်တၢ်သူၣ်ဒူသးဒူ ထဲလဲၣ်န့ၣ်တက့ၢ်. ဘၣ်သ့ၣ်သ့ၣ် တဘျီတခီၣ် နကလိၣ်ဘၣ်တၢ်သူၣ်ဒူသးဒူဒ် စီၤအၤစါအသိးလီၤ. အဒိ, နဘူးနတံၢ် မ့တမ့ၢ် နတံၤသကိးလၢ နအဲၣ်အီၤတဂၤ မၤတၢ်ကမၣ်ဖးဒိၣ်ဒီး တပီၢ်ယၢ်လီၤအသးဘၣ်အဃိ ဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤလီၤ. ဖဲန့ၣ်အခါ မ့ၢ်နကပာ်လီၤနသး ဂၢၢ်ဂၢၢ်ကျၢၤကျၢၤ လၢနတရ့ဒီးအီၤလၢၤဘၣ်န့ၣ်ဧါ. နကမၤဒ်လဲၣ်.
၈ ဒ်စီၤအၤစါအသိး တဘျီတခီၣ် ပကတူၢ်ဘၣ်လၢ ပှၤကိးဂၤဒဲးသးဟ့ပှၤလီၤ. ဘၣ်သ့ၣ်သ့ၣ် ခီဖျိလၢနမ့ၢ် ယဟိဝၤပှၤအုၣ်အသးတဂၤအဃိ နတံၤသကိးလၢကၠိ မ့တမ့ၢ် နသရၣ်တဖၣ် ကမၤမဲာ်ဆှးနၤလီၤ. မ့တမ့ၢ် ပှၤလၢနတၢ်မၤလီၢ် ကဆိကမိၣ်ဝဲလၢနပျုၢ် မ့ၢ်လၢနဟံးန့ၢ်ခွဲးလၢ နကလဲၤထီၣ်တၢ်အိၣ်ဖှိၣ်ဖးဒိၣ်အဂီၢ် မ့တမ့ၢ် အါတက့ၢ်န့ၣ် နတမၤတၢ်မၤအါန့ၢ်ဒံး တၢ်ဆၢကတီၢ်လၢ ပှၤပာ်ပနီၣ်ဝဲဘၣ်အဃိန့ၣ်လီၤ. နမ့ၢ်ထံၣ်ဘၣ်တၢ်အိၣ်သးဒ်အံၤန့ၣ် သန့ၤနသးလၢ ယဟိဝၤယွၤအအိၣ် ဒ်စီၤအၤစါမၤဝဲအသိးန့ၣ်တက့ၢ်. ဒီးဃ့ဘါထုကဖၣ်လၢ ယဟိဝၤယွၤအအိၣ်, အိၣ်ဒီးတၢ်သူၣ်ဒူသးဒူ ဒီးဆဲးမၤတၢ်လၢအဘၣ် လၢယွၤအမဲာ်ညါန့ၣ်တက့ၢ်. ဒ်ယွၤဟ့ၣ်ဆူၣ်ထီၣ် စီၤအၤစါအသိး အဝဲကဟ့ၣ်ဆူၣ်ထီၣ်နၤစ့ၢ်ကီးလီၤ.
၉. ဖဲပစံၣ်တဲၤတဲလီၤတၢ်အခါ ပမၤသးခုယဟိဝၤယွၤအသး သ့လၢကျဲဒ်လဲၣ်.
၉ စီၤအၤစါ တဆိကမိၣ်တၢ်ထဲ အနီၢ်ကစၢ်အဂီၢ်ဘၣ် အဝဲဟ့ၣ်ဂံၢ်ဟ့ၣ်ဘါ ပှၤအဂၤတဖၣ်လၢ “အကဃုန့ၢ်ယွၤ” စ့ၢ်ကီးလီၤ. ပဝဲစ့ၢ်ကီးပကဘၣ်မၤစၢၤပှၤဂၤ ဒ်သိးအဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤအဂီၢ်လီၤ. ဖဲပတဲဘၣ်ပှၤဂၤဘၣ်ဃးဒီး ယွၤအဂ့ၢ်အခါ ယွၤထံၣ်ဝဲလီၤ. ဖဲယဟိဝၤယွၤထံၣ်ဝဲလၢ ပမၤအတၢ်မၤ မ့ၢ်လၢပအဲၣ်အီၤ ဒီးပအဲၣ်ပှၤဂၤအဃိ အဝဲအသးခုဒိၣ်မးလီၤ.
စီၤယဟိၡၤဖး ဃုယဟိဝၤယွၤ
၁၀, ၁၁. ပကွၢ်လိမၤဒိး စီၤယဟိၡၤဖး ကသ့ဒ်လဲၣ်.
၁၀ စီၤယဟိၡၤဖး “ပိာ်အပၢ်စီၤအၤစါအကျဲ, ဒ်သိးအကမၤတၢ်ဂ့ၤ လၢယွၤအမဲာ်” လီၤ. (၂ ကွဲးနီၣ်တၢ် ၂၀:၃၁, ၃၂) အဝဲမၤဝဲဒ်လဲၣ်. ဒ်အပၢ်အသိး စီၤယဟိၡၤဖး ဟ့ၣ်ဂံၢ်ဟ့ၣ်ဘါပှၤဂၤလၢ ကဆဲးဘူၣ်ထီၣ်ဘါထီၣ် ယဟိဝၤယွၤလီၤ. အဝဲဆှၢလီၤပိာ်ခွါတဖၣ်လၢ ကလဲၤဆူဝ့ၢ်လၢအအိၣ်လၢ ကီၢ်ယူဒၤအပူၤခဲလၢာ် ဒ်သိးကသိၣ်လိပှၤဂၤလၢ “ယွၤအလံာ်တၢ်သိၣ်တၢ်သီ” အဂီၢ်လီၤ. (၂ ကွဲးနီၣ်တၢ် ၁၇:၇-၁၀) တကးဒံးဘၣ်အဝဲလဲၤလၢ အံၣ်စရ့လးအဘီမုၢ်လၢ ကလံၤစိးတခီ လၢအအိၣ်လၢ ကစၢၢ်အ့ဖရဲၣ် “ဒ်သိးကကိး ကဒါက့ၤပှၤဂီၤမုၢ်ဆူယွၤ” အအိၣ်လီၤ. (၂ ကွဲးနီၣ်တၢ် ၁၉:၄, ခ့ခါစှီၤကျိာ်) စီၤယဟိၡၤဖး မ့ၢ်ဝဲစီၤပၤလၢ “အဃုယွၤလၢ အသးဒီဖျၢၣ်ညါ” လီၤ.—၂ ကွဲးနီၣ်တၢ် ၂၂:၉.
စီၤယဟိၡၤဖး ဟ့ၣ်ဂံၢ်ဟ့ၣ်ဘါ ပှၤဂၤလၢ ကဆဲးဘူၣ်ထီၣ်ဘါထီၣ် ယဟိဝၤယွၤလီၤ
၁၁ မုၢ်မဆါတနံၤအံၤ ယဟိဝၤယွၤအဲၣ်ဒိးဝဲလၢ ကယဲၢ်ပှၤလၢဟီၣ်ခိၣ်ချၢခဲလၢာ် ကမၤလိဘၣ်အဂ့ၢ်လီၤ. ဒီးပဝဲခဲလၢာ်ပပၣ်ဃုာ်လၢ တၢ်မၤအံၤအပူၤသ့ဝဲလီၤ. မ့ၢ်နဖီတၢၣ်အိၣ်လၢ နကပၣ်ဃုာ်လၢ တၢ်မၤအံၤအပူၤကိးလါဒဲးဧါ. ဒ်သိးပှၤအဂၤတဖၣ် ကဘူၣ်ထီၣ်ဘါထီၣ် ယဟိဝၤယွၤအဂီၢ် မ့ၢ်နအဲၣ်ဒိးမၤလိအဝဲသ့ၣ် လံာ်စီဆှံဧါ. ဒ်သိးနမၤဒ်အံၤကသ့အဂီၢ် မ့ၢ်နဃ့ထုကဖၣ်ဧါ. နမ့ၢ်ဂုာ်ကျဲးစၢးန့ၣ် ယဟိဝၤယွၤကမၤစၢၤနၤဒ်သိး နစးထီၣ်တၢ်မၤလိလံာ်စီဆှံ ဒီးပှၤဂၤကသ့လီၤ. ဒ်သိးနကမၤလိပှၤဂၤ လံာ်စီဆှံအဂီၢ် မ့ၢ်နဟ့ၣ်လီၤ နတၢ်ဆၢကတီၢ်တနီၤကကဲဧါ. ဒီးဒ်စီၤယဟိၡၤဖး ဂုာ်ကျဲးစၢးမၤစၢၤပှၤဂၤလၢ ကဟဲက့ၤဘူၣ်ထီၣ်ဘါထီၣ်ကဒါက့ၤ ယဟိဝၤယွၤအသိး ပဝဲစ့ၢ်ကီးပမၤစၢၤ ပှၤလၢအပတုာ်တၢ် ဟးစံၣ်တဲၤတဲလီၤတၢ်တဖၣ်သ့ဝဲလီၤ. လၢပတၢ်စံၣ်တဲၤတဲလီၤတၢ် ဟီၣ်ကဝီၤအပူၤ ပှၤလၢအဘၣ် တၢ်ဟီထီၣ်ကွံာ်အီၤ ကအိၣ်ဝဲလီၤ. ဒီးအဝဲသ့ၣ်တဖၣ် ဘၣ်သ့ၣ်သ့ၣ် ကပာ်တ့ၢ်ကွံာ်တၢ်ကမၣ်လၢ အမၤဝဲလၢညါတဖၣ်န့ၣ်လီၤ. တၢ်အိၣ်ဖှိၣ်သးပှၢ်တဖၣ် ကရဲၣ်ကျဲၤဝဲလၢ ကလဲၤဟးဆူပှၤတဖၣ်အံၤအအိၣ် ဒ်သိးကမၤစၢၤ အဝဲသ့ၣ်အဂီၢ်လီၤ.
၁၂, ၁၃. (က) ဖဲစီၤယဟိၡၤဖး ပျံၤတၢ်အခါ အဝဲမၤဝဲဒ်လဲၣ်. (ခ) ဘၣ်မနုၤအဃိ ပကြၢးမၤဒ် စီၤယဟိၡၤဖးအသိးလဲၣ်.
၁၂ ဒ်အပၢ်စီၤအၤစါအသိး ဖဲသုးမုၢ်သံၣ်ဘိဖးဒိၣ်ဟဲဒုး ယူဒၤအခါ စီၤယဟိၡၤဖး သန့ၤအသးလၢ ယဟိဝၤယွၤအအိၣ်လီၤ. (ဖး ၂ ကွဲးနီၣ်တၢ် ၂၀:၂-၄ တက့ၢ်.) အဝဲပျံၤတၢ်ဒီး ဃ့တၢ်မၤစၢၤလၢ ယဟိဝၤယွၤအအိၣ်လီၤ. လၢအတၢ်ထုကဖၣ်အပူၤန့ၣ် အဝဲအၢၣ်လီၤဝဲလၢ အဒုးအဒုၣ်အဒါတဖၣ်တနၢၤဘၣ်. ဒီးအဝဲစံးဝဲလၢ အဝဲဒီးအပှၤသုးမုၢ်သံၣ်ဘိတဖၣ် ကဘၣ်မၤဝဲဒ်လဲၣ်န့ၣ် တသ့ၣ်ညါဝဲဘၣ်. စီၤယဟိၡၤဖး နာ်ဝဲသပှၢ်ကတၢၢ်လၢ ယဟိဝၤယွၤကမၤစၢၤအဝဲသ့ၣ်လီၤ. အဝဲစံးဝဲလၢ– “ပမဲာ်အိၣ်ဝဲဆူနအိၣ်လီၤ.”—၂ ကွဲးနီၣ်တၢ် ၂၀:၁၂.
၁၃ ဒ်စီၤယဟိၡၤဖးအသိး တဘျီတခီၣ် ဘၣ်ဃးဒီးပတၢ်ဂ့ၢ်ကီတဖၣ်န့ၣ် ပကဘၣ်မၤဘၣ်ဂီၢ်က့ၤအီၤဒ်လဲၣ် ပတသ့ၣ်ညါဘၣ်. လၢတၢ်န့ၣ်အဃိ ဘၣ်သ့ၣ်သ့ၣ် ပကဘၣ်ယိၣ်တၢ်လီၤ. (၂ ကရံၣ်သူး ၄:၈, ၉) ဘၣ်ဆၣ် သ့ၣ်နီၣ်ထီၣ်လၢ စီၤယဟိၡၤဖး မၤဝဲဒ်လဲၣ်န့ၣ်တက့ၢ်. အဝဲဃ့ထုကဖၣ်လၢ ယဟိဝၤယွၤအအိၣ် လၢပှၤခဲလၢာ်အမဲာ်ညါ ဒီးတဲဘၣ်ယဟိဝၤယွၤလၢ အဝဲသ့ၣ်အသးလီၤစၢ် ထဲလဲၣ်န့ၣ်လီၤ. (၂ ကွဲးနီၣ်တၢ် ၂၀:၅) ဟံၣ်ခိၣ်တဖၣ်စ့ၢ်ကီး ကွၢ်လိမၤဒိးဝဲ စီၤယဟိၡၤဖးသ့ဝဲလီၤ. ဒ်သိးနၤဒီးနဟံၣ်ဖိဃီဖိ မၤဘၣ်ဂီၢ်တၢ်ကီတၢ်ခဲတဖၣ် ကန့ၢ်အဂီၢ်ဃ့တၢ်မၤစၢၤလၢ ယဟိဝၤယွၤအအိၣ်တက့ၢ်. ဖဲနဃ့ထုကဖၣ်ဒီး နဟံၣ်ဖိဃီဖိအခါ တဘၣ်မဲာ်ဆှးလၢ ကတဲဖျါထီၣ် နတၢ်တူၢ်ဘၣ် လၢယဟိဝၤယွၤ အအိၣ်တဂ့ၤ. နမ့ၢ်မၤဒ်န့ၣ်န့ၣ် အဝဲသ့ၣ်ကထံၣ်ဝဲလၢ နနာ်န့ၢ်ယဟိဝၤယွၤ ထဲလဲၣ်န့ၣ်လီၤ. ဒ်ယဟိဝၤယွၤမၤစၢၤ စီၤယဟိၡၤဖးအသိး အဝဲကမၤစၢၤနၤစ့ၢ်ကီးလီၤ.
စီၤဃံးစကံယၤ ဆဲးမၤတၢ်လၢအဘၣ်
၁၄, ၁၅. စီၤဃံးစကံယၤသန့ၤအသးလၢ ယဟိဝၤယွၤအအိၣ်လၢအသးဒီဖျၢၣ် လၢကျဲဒ်လဲၣ်.
၁၄ စီၤဃံးစကံယၤအပၢ်န့ၣ် ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ် ဒီးတပာ်လီၤတဲာ်န့ၢ်အဖိခွါ တၢ်ဒိတၢ်တဲာ်လၢအဂ့ၤဘၣ်. ဘၣ်ဆၣ် စီၤဃံးစကံယၤမ့ၢ်ဝဲ စီၤပၤတဂၤလၢအ “စဲဘူးအသးလၢယွၤ” လီၤ. အဝဲ “သုးကွံာ်တၢ်အလီၢ်ထီၣ်ထီတဖၣ်, ဒီးမၤကၢ်လီၤကလဲတၢ်ဂီၤတဖၣ်, ဒီးကူာ်လီၤကွံာ်အၡ့ရၤ, ဒီးမၤကၢ်လီၤကလဲ ဂုၢ်တိၢ်လၢ စီၤမိၤၡ့တ့ဝဲ” မ့ၢ်လၢပှၤအံၣ်စရ့လးဖိတဖၣ် ဘူၣ်ထီၣ်ဘါထီၣ်ဝဲအဃိလီၤ. စီၤဃံးစကံယၤတီဒီး ယဟိဝၤယွၤလၢ အသးဒီဖျၢၣ်လီၤ. ဒီးအဝဲဆဲး “တိၢ်န့ၢ် [ယွၤ] အတၢ်သိၣ်တၢ်သီလၢ ယွၤမၤလိာ်စီၤမိၤၡ့န့ၣ်လီၤ.”—၂ စီၤပၤ ၁၈:၁-၆.
၁၅ ဖဲစီၤဃံးစကံယၤ ကဲစီၤပၤအဆၢကတီၢ် အၤၡူၢ်အသုးမုၢ်သံၣ်ဘိလၢ အဂံၢ်ဆူၣ်န့ၣ် ဟဲဒုးဝဲယူဒၤဒီး တဲဝဲလၢ ကမၤဟးဂီၤကွံာ် ဝ့ၢ်ယရူၤၡလ့ၣ်လီၤ. ပှၤအၤၡူၢ်ဖိအစီၤပၤ စီၤစၤနဃ့ရံာ်န့ၣ် တဲတရီတပါယဟိဝၤယွၤဒီး ဂုာ်ကျဲးစၢးဝဲဒ်သိး စီၤဃံးစကံယၤ ကတူၢ်ၡူအသးန့ၣ်လီၤ. ဖဲတၢ်အိၣ်သးလၢ အလီၤဘၣ်ယိၣ်အဆၢကတီၢ်ဒ်အံၤန့ၣ် စီၤဃံးစကံယၤ သန့ၤအသးလၢယဟိဝၤယွၤ ဒီးဃ့တၢ်မၤစၢၤလၢ ယွၤအအိၣ်လီၤ. စီၤဃံးစကံယၤ သ့ၣ်ညါဝဲလၢ ယွၤအဂံၢ်ဆူၣ်ဘါဆူၣ်န့ၢ်ဒံး ပှၤအၤၡူၢ်ဖိဒီး ယွၤမၤပူၤဖျဲးအပှၤဂီၤမုၢ်သ့ဝဲလီၤ. (ဖး ဝံယၡါယၤ ၃၇:၁၅-၂၀ တက့ၢ်.) ယွၤစံးဆၢအတၢ်ထုကဖၣ် ခီဖျိဆှၢလီၤဝဲမူခိၣ်ကလူးတဂၤ ဒီးမၤသံဝဲပှၤအၤၡူၢ်ဖိ အသုးမုၢ်သံၣ်ဘိ ၁၈၅,၀၀၀ န့ၣ်လီၤ.—ယၡါယၤ ၃၇:၃၆, ၃၇.
၁၆, ၁၇. နကွၢ်လိမၤဒိး စီၤဃံးစကံယၤကသ့လၢ ကျဲဒ်လဲၣ်.
၁၆ လၢခံ စီၤဃံးစကံယၤ ဆိးက့ဝဲဘူးကသံလီၤ. ဖဲန့ၣ်အဆၢကတီၢ် အဝဲဃ့ကညးယဟိဝၤယွၤဒ်သိး ကသ့ၣ်နီၣ်ထီၣ်က့ၤ အတၢ်သးတီဒီးကမၤစၢၤအီၤအဂီၢ်လီၤ. (ဖး ၂ စီၤပၤ ၂၀:၁-၃ တက့ၢ်.) ယဟိဝၤယွၤနၢ်ဟူစီၤဃံးစကံယၤ အတၢ်ထုကဖၣ်ဒီး မၤဘျါက့ၤအီၤလီၤ. မ့မ့ၢ်လၢမုၢ်မဆါတနံၤအံၤန့ၣ် ကစၢ်ယွၤကမၤဘျါက့ၤ ပတၢ်ဆါလၢတၢ်လီၤလိၢ်လီၤလးအပူၤ မ့တမ့ၢ် မၤထီထီၣ်ပသးသမူန့ၣ် ပမုၢ်လၢ်တသ့ဘၣ်. ဘၣ်ဆၣ် ဒ်စီၤဃံးစကံယၤအသိး ပသန့ၤပသးလၢ ယဟိဝၤယွၤအအိၣ် ဒ်သိးကမၤစၢၤပှၤအဂီၢ် သ့ဝဲလီၤ. ပတဲဘၣ်အီၤလၢ– “ယွၤဧၢ, ယလဲၤတၢ်လၢနမဲာ်ညါလၢ တၢ်မ့ၢ်တၢ်တီအပူၤ ဒီးလၢယသးဒီးဖျၢၣ်, ဒီးယမၤတ့ၢ်တၢ်လၢ အဂ့ၤလၢနမဲာ်န့ၣ် သ့ၣ်နီၣ်ထီၣ်က့ၤလၢ်တက့ၢ်” သ့ဝဲလီၤ. လၢတၢ်န့ၣ်အဃိ ဖဲနအိၣ်ဆူၣ်အခါမ့ၢ်ဂ့ၤ နအိၣ်တဆူၣ်ဘၣ်အခါမ့ၢ်ဂ့ၤ မ့ၢ်နနာ်လၢယဟိဝၤယွၤ ကကဟုကယာ်နၤထီဘိဧါ.—စံးထီၣ်ပတြၢၤ ၄၁:၃.
၁၇ ပကွၢ်လိမၤဒိး စီၤဃံးစကံယၤသ့လၢ ကျဲအဂၤဒ်လဲၣ်. ဘၣ်သ့ၣ်သ့ၣ် တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤ မ့တမ့ၢ် တၢ်လၢကမၤလၢာ်ဂီၤ ပတၢ်ဆၢကတီၢ်လၢ ပကမၤယွၤအတၢ်မၤန့ၣ် ကအိၣ်ဝဲလီၤ. အဒိ, မုၢ်မဆါတနံၤအံၤ ပှၤအါဂၤပာ်ဒိၣ်ပာ်ကဲဝဲ ပှၤလၢအမံၤဟူသၣ်ဖျါတဖၣ် အါတလၢကွံာ်အခၢးလီၤ. ပှၤအါဂၤ သူဝဲအတၢ်ဆၢကတီၢ်အါမးဒ်သိး ကဖးဝဲပှၤတဖၣ်အံၤအဂ့ၢ် မ့တမ့ၢ် ကွၢ်ဝဲပှၤတဖၣ်အံၤအတၢ်ဂီၤန့ၣ်လီၤ. အဝဲသ့ၣ်သူစ့ၢ်ကီးဝဲ အ့ထၢၣ်နဲး အတၢ်ပီးတၢ်လီဒ်သိးဒီး စိၣ်ၡဲၣ် မံဒံယါ (social media) လၢကဆဲးကျိးဒီး ပှၤဂၤအဂီၢ်လီၤ. နီၢ်နီၢ်န့ၣ် ပသူတၢ်ပီးတၢ်လီတဖၣ်အံၤ ဒ်သိးပကတဲသကိးတၢ်ဒီး ပဘူးပတံၢ်ဒီး ပတံၤသကိးတဖၣ် သ့ဝဲစ့ၢ်ကီးလီၤ. ဘၣ်ဆၣ် ပမ့ၢ်တပလီၢ်ပသးန့ၣ် ပမၤလၢာ်ဂီၤပတၢ်ဆၢကတီၢ် အါအါဂီၢ်ဂီၢ်လၢ တၢ်သူတၢ်ပီးတၢ်လီတဖၣ်အံၤ သ့ဝဲလီၤ. ဒီးဖဲပပာ်ထီၣ်တၢ်ဂီၤလၢ အ့ထၢၣ်နဲးအပူၤအခါ ပှၤနုာ်လီၤကွၢ်ပတၢ်မ့ၢ်အါဒီး ပှၤဘၣ်သူၣ်ဘၣ်သးဝဲမ့ၢ်အါန့ၣ် ဘၣ်သ့ၣ်သ့ၣ် ပကဲထီၣ်ပှၤလၢ အပာ်ထီၣ်ထီသးသ့ဝဲလီၤ. မ့တမ့ၢ် ပမ့ၢ်သ့ၣ်ညါလၢ ပှၤတနီၤနီၤ တကွၢ်ပတၢ်ဂီၤလၢၤဘၣ်န့ၣ် ဘၣ်သ့ၣ်သ့ၣ် ပကသးထီၣ်အီၤလီၤ. လၢပကမၤဒ်န့ၣ်အလီၢ် ပကြၢးကွၢ်လိမၤဒိး တၢ်မၢဖိပီလူး, နီၢ်ပြံစကံးလၤ ဒီးစီၤအကူလၤန့ၣ်လီၤ. နဆိကမိၣ် တနံၤဘၣ်တနံၤန့ၣ် မ့ၢ်အဝဲသ့ၣ်သူအတၢ်ဆၢကတီၢ်လၢ ကဃုသ့ၣ်ညါ ပှၤအဂၤတဖၣ်အဂ့ၢ် လၢအကဆူးကတ့ၤ လီၤဆီဒၣ်တၢ် ပှၤလၢအတဘူၣ်ထီၣ်ဘါထီၣ် ယဟိဝၤယွၤ အဂ့ၢ်န့ၣ်ဧါ. လံာ်စီဆှံစံးဝဲလၢ “စီၤပီလူးဟ့ၣ်လီၤ အဆၢကတီၢ် လၢာ်လၢာ်ဆ့ဆ့လၢ တၢ်စံၣ်တဲၤတဲလီၤ တၢ်သးခုကစီၣ်အဂီၢ်” လီၤ. ဒီးနီၢ်ပြံစကံးလၤဒီး စီၤအကူလၤသူဝဲ အတၢ်ဆၢကတီၢ်လၢ ကစံၣ်တဲၤတဲလီၤတၢ်ဒီး တဲနၢ်ပၢၢ်ပှၤဂၤ “လၢယွၤအကျဲလီၤတံၢ်န့ၢ်အလီၢ်တက့ၢ်လီၤ.” (မၤတၢ် ၁၈:၄, ၅, ၂၆, ခ့ခါစှီၤကျိာ်) ပဝဲသ့ၣ်တဖၣ်စ့ၢ်ကီး ပကြၢးသံကွၢ်လီၤပသးလၢ– ‘မ့ၢ်ယပာ်ဒိၣ်ပာ်ကဲ ပှၤဟီၣ်ခိၣ်ဖိ အါတလၢကွံာ်အခၢးဧါ. မ့ၢ်ယမၤလၢာ်ဂီၤ ယတၢ်ဆၢကတီၢ်လၢ တၢ်လၢအရ့တဒိၣ်ဘၣ်တဖၣ်အဂီၢ်ဧါ.—ဖး အ့းဖ့းစူး ၅:၁၅, ၁၆ တက့ၢ်.
စီၤယိၤၡံယၤ ဒိကနၣ်ဝဲ ယဟိဝၤယွၤအတၢ်မၤလိာ်
၁၈, ၁၉. ပကွၢ်လိမၤဒိး စီၤယိၤၡံယၤသ့လၢ ကျဲဒ်လဲၣ်.
၁၈ စီၤပၤယိၤၡံယၤန့ၣ် အဝဲမ့ၢ်စ့ၢ်ကီး ပှၤလၢအဒိကနၣ် ယဟိဝၤယွၤ အတၢ်မၤလိာ် “လၢအသးဒီဖျၢၣ်ညါ” တဂၤလီၤ. (၂ ကွဲးနီၣ်တၢ် ၃၄:၃၁) စီၤယိၤၡံယၤန့ၣ် မ့ၢ်ဝဲစီၤဃံးစကံယၤ အလိၤလီၤ. ဖဲအဒိၣ်ထီၣ်သီအခါ အဝဲစးထီၣ်ဃု “အပၢ်စီၤဒၤဝံးအကစၢ်” ယွၤဒီးဖဲအသးအိၣ် ၂၀ အခါ အဝဲစးထီၣ် မၤဟးဂီၤကွံာ်ဝဲ တၢ်ဂီၤတၢ်ဖှီၣ်လၢ ကီၢ်ယူဒၤအပူၤန့ၣ်လီၤ. (ဖး ၂ ကွဲးနီၣ်တၢ် ၃၄:၁-၃ တက့ၢ်.) စီၤယိၤၡံယၤဂုာ်ကျဲးစၢး မၤတၢ်ဘၣ်ယဟိဝၤယွၤအသး သပှၢ်ကတၢၢ်လီၤ. အဝဲမၤတၢ်ဘၣ်ယွၤအသးအါန့ၢ်ဒံး ယူဒၤအစီၤပၤလၢအဂၤတဖၣ်လီၤ. ဘၣ်တနံၤ ပှၤလုၢ်တၢ်အဒိၣ် ဃုထံၣ်န့ၢ်ဝဲ ယွၤအတၢ်သိၣ်တၢ်သီ အလံာ်တဘ့ၣ်လၢ တၢ်လုၢ်ဟံၣ်န့ၣ်လီၤ. ဘၣ်သ့ၣ်သ့ၣ် လံာ်အဝဲန့ၣ်ကမ့ၢ်ဝဲ လံာ်လၢစီၤမိၤၡ့ကွဲးဝဲန့ၣ်လီၤ. ဖဲစီၤၡၤဖၣ် ဖးထီၣ်န့ၢ်အီၤလံာ်အံၤအခါ စီၤယိၤၡံယၤ သ့ၣ်ညါဝဲလၢ ဒ်သိးအဝဲမၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်ကသ့အဂီၢ် တၢ်လၢကဘၣ်မၤဝဲန့ၣ် အိၣ်ဝဲဒီဒူၣ်ဒံးလီၤ. တကးဒံးဘၣ် အဝဲဟ့ၣ်ဂံၢ်ဟ့ၣ်ဘါဝဲ ပှၤအဂၤတဖၣ်လၢ ကမၤဝဲဒ်န့ၣ်စ့ၢ်ကီးလီၤ. မ့ၢ်လၢစီၤယိၤၡံယၤ မၤဝဲဒ်န့ၣ်အဃိ ဖဲအမူဝဲအဖၢမုၢ်န့ၣ် ပှၤဂီၢ်မုၢ် “တလဲၤသဒၣ်” ယဟိဝၤယွၤဘၣ်.—၂ ကွဲးနီၣ်တၢ် ၃၄:၂၇, ၃၃.
စီၤယိၤၡံယၤ အသူၣ်ဆူၣ်သးဆူၣ်လၢ ကမၤ ယဟိဝၤယွၤအတၢ်ဘၣ်သးဒီး အဝဲမၤပိာ်ထွဲဝဲ တဘျီဃီန့ၣ်လီၤ
၁၉ နမ့မ့ၢ်ပှၤသးစၢ်န့ၣ် နကွၢ်လိမၤဒိး စီၤယိၤၡံယၤ ဒီးဃုသ့ၣ်ညါအါထီၣ် ယဟိဝၤယွၤအဂ့ၢ်သ့ဝဲလီၤ. ဘၣ်သ့ၣ်သ့ၣ် စီၤယိၤၡံယၤ ကမၤလိဘၣ်ဝဲ ယဟိဝၤယွၤအဂ့ၢ်လၢ အဖုစီၤပၤမနၤၡ့ၤ လၢအပီၢ်ယၢ်လီၤက့ၤ အသးတဂၤအအိၣ် လၢယဟိဝၤယွၤမ့ၢ်ပှၤလၢ အသးအိၣ်ပျၢ်ပှၤဂၤ အတၢ်ကမၣ်န့ၣ်လီၤ. ပဝဲစ့ၢ်ကီး ပမၤလိန့ၢ်တၢ်လၢ ပှၤသးပှၢ်လၢပဟံၣ်ဖိဃီဖိအကျါမ့ၢ်ဂ့ၤ မ့တမ့ၢ် ပှၤသးပှၢ်လၢ တၢ်အိၣ်ဖှိၣ်အပူၤမ့ၢ်ဂ့ၤ အအိၣ်သ့ဝဲလီၤ. အဝဲသ့ၣ်တဲနၢ်ပၢၢ်နၤလၢ ယဟိဝၤယွၤမၤစၢၤတ့ၢ် အဝဲသ့ၣ်လၢကျဲဒ်လဲၣ်န့ၣ် သ့ဝဲလီၤ. တကးဒံးဘၣ် သ့ၣ်နီၣ်ထီၣ်လၢ ဖဲစီၤယိၤၡံယၤ သ့ၣ်ညါအါထီၣ်ဝဲ လံာ်စီဆှံအတၢ်မၤလိာ်အခါ အဝဲသူၣ်ဆူၣ်သးဆူၣ်လၢ ကမၤယဟိဝၤယွၤအတၢ်ဘၣ်သးဒီး အဝဲမၤပိာ်ထွဲဝဲတဘျီဃီန့ၣ်လီၤ. နၤစ့ၢ်ကီး ဖဲနဖးလံာ်စီဆှံအခါ ဘၣ်သ့ၣ်သ့ၣ် တၢ်လၢနမၤလိဘၣ်တဖၣ် ကထိၣ်ဟူးထိၣ်ဂဲၤထီၣ်နၤလၢ နကမၤတၢ်ဘၣ်ယွၤအသးလၢ တၢ်သူၣ်ဆူၣ်သးဆူၣ်အပူၤလီၤ. နမ့ၢ်မၤဒ်န့ၣ်န့ၣ် နတၢ်ရ့လိာ်သးဒီး ယဟိဝၤယွၤကဂ့ၤထီၣ် ဒီးနကဒိးန့ၢ်ဘၣ် တၢ်သူၣ်ခုသးခုအါထီၣ်လီၤ. တကးဒံးဘၣ် နကအဲၣ်ဒိးတဲဘၣ်ပှၤဂၤလၢ ယဟိဝၤယွၤအဂ့ၢ်လီၤ. (ဖး ၂ ကွဲးနီၣ်တၢ် ၃၄:၁၈, ၁၉ တက့ၢ်.) ဖဲနမၤလိလံာ်စီဆှံအခါ ဘၣ်သ့ၣ်သ့ၣ် နကသ့ၣ်ညါလီၤနသးလၢ နကဘၣ်ဂုာ်ကျဲးစၢးအါထီၣ်လၢ ကစၢ်ယွၤအတၢ်မၤအပူၤ ဒ်လဲၣ်အဂ့ၢ်န့ၣ်လီၤ. မ့မ့ၢ်ဒ်န့ၣ်န့ၣ် ဂုာ်ကျဲးစၢးလၢအဂ့ၤကတၢၢ် ဒ်သိးနကဆီတလဲ နတၢ်အိၣ်မူဒ်စီၤယိၤၡံယၤ အသိးန့ၣ်တက့ၢ်.
မၤယဟိဝၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်
၂၀, ၂၁. (က)ဘၣ်ဃးဒီး စီၤပၤလွံၢ်ဂၤအံၤန့ၣ် ပသ့ၣ်ညါဘၣ်တၢ်ဂ့ၢ်မနုၤလဲၣ်. (ခ) တၢ်မၤလိလၢခံတခါန့ၣ် ပကမၤလိတၢ်ဂ့ၢ်မနုၤလဲၣ်.
၂၀ ယူဒၤအစီၤပၤလွံၢ်ဂၤလၢ အမၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်တဖၣ်အံၤ ပဟံးန့ၢ်တၢ်မၤလိလၢ အဝဲသ့ၣ်အအိၣ်သ့ဒ်လဲၣ်. အဝဲသ့ၣ်မ့ၢ်ပှၤလၢ အသူၣ်ဆူၣ်သးဆူၣ်လၢ ကမၤယဟိဝၤယွၤအတၢ်ဘၣ်သးဒီး ဘူၣ်ထီၣ်ဘါထီၣ်အီၤလၢ အသးသမူဒီတစိၤန့ၣ်လီၤ. ဖဲသုးမုၢ်သံၣ်ဘိလၢ အဂံၢ်ဆူၣ်ဘါဆူၣ်တဖၣ် ဟဲဒုးအဝဲသ့ၣ်အခါ အဝဲသ့ၣ်ဒိးသန့ၤအသးလၢယွၤအအိၣ်လီၤ. ဒီးတၢ်လၢအရ့ဒိၣ်ကတၢၢ်တခါန့ၣ်မ့ၢ်ဝဲ အဝဲသ့ၣ်မၤယဟိဝၤယွၤအတၢ်မၤ မ့ၢ်လၢအဝဲသ့ၣ်အဲၣ်ကစၢ်ယွၤအဃိလီၤ.
၂၁ စီၤပၤလွံၢ်ဂၤအံၤ မ့ၢ်ဝဲပှၤတလၢတပှဲၤဒီး မၤဘၣ်တၢ်ကမၣ်သနာ်က့ ယဟိဝၤယွၤ အဲၣ်အဝဲသ့ၣ်ဒံးလီၤ. ယွၤထံၣ်အဝဲသ့ၣ်အသးဒီး သ့ၣ်ညါဝဲလၢ အဝဲသ့ၣ်အဲၣ်အီၤနီၢ်နီၢ်လီၤ. ပဝဲစ့ၢ်ကီး ပမ့ၢ်ပှၤတလၢတပှဲၤဘၣ် ဒီးပမၤဘၣ်တၢ်ကမၣ်တဖၣ်လီၤ. ဘၣ်ဆၣ် ဖဲယဟိဝၤယွၤထံၣ်ဝဲလၢ ပမၤအတၢ်မၤဒီးပအဲၣ်အီၤလၢ ပသူၣ်ဒီဖျၢၣ်ပသးဒီဖျၢၣ်အခါ အဝဲသးခုဝဲလီၤ. တၢ်မၤလိလၢခံတခါန့ၣ် ပကတဲသကိးဘၣ်ဃး တၢ်ကမၣ်လၢစီၤပၤတဖၣ်မၤဝဲန့ၣ် ပဟံးန့ၢ်တၢ်မၤလိကသ့ဒ်လဲၣ်.
