မရံယၤ, ရၤအူ, အါနၢၤ ဒီးပှၤအါဂၤ ထံၣ်ဝဲလၢ တၢ်ထုကဖၣ်န့ၣ်​ အကဲတၢ်ဟ့ၣ်လီၤဆီတခါ. အဝဲသ့ၣ်​ တူၢ်ဘၣ်ဝဲလၢ ခီဖျိလၢ တၢ်ထုကဖၣ်အဃိ အဝဲသ့ၣ်တဲတၢ်ဒီး ကစၢ်ယွၤသ့, စံးဘျုးအီၤသ့ ဒီးဃ့အတၢ်မၤစၢၤသ့. အဃိ လံာ်စီဆှံ အတၢ်အၢၣ်လီၤ ဘၣ်ဃးဒီး တၢ်ထုကဖၣ်န့ၣ်​ အဝဲသ့ၣ်နာ်ဝဲ သပှၢ်တၢၢ်. လံာ်စီဆှံ အၢၣ်လီၤဝဲလၢ “ပနာ်န့ၢ် ကစၢ်ယွၤလၢ ပမ့ၢ်ဃ့တၢ် တမံၤဂ့ၤတမံၤဂ့ၤ ဒ်အတၢ်ဘၣ်သးအသိးန့ၣ်​ အဝဲဒိကနၣ်ပှၤလီၤ.”—၁ ယိၤဟၣ်​ ၅:၁၄.

သနာ်က့ လံာ်စီဆှံ အတၢ်အၢၣ်လီၤ ဘၣ်ဃးဒီး တၢ်ထုကဖၣ်န့ၣ်​ ပှၤအဂၤတနီၤ တနာ်ဝဲဘၣ်. ဘၣ်ဃးဒီး တၢ်ထုကဖၣ်န့ၣ်​ စတံၤ တဲဖျါထီၣ်​ အတၢ်တူၢ်ဘၣ်ဒ်အံၤ. “ဖဲယအိၣ်​ ၁၇ နံၣ်အခါ ယသကိးသၢဂၤ သံသဒၣ်ယၤ. တဂၤန့ၣ်​ အသံလၢ ကါဘၣ်တဲးအဃိ ဒီးအဂၤခံဂၤန့ၣ်​ အလီၤအုးသံလၢ ပီၣ်လဲၣ်ပူၤ.” တၢ်ကဲထီၣ်သး ဒ်န့ၣ်အဃိ စတံၤ မၤဝဲဒ်လဲၣ်. အတဲဝဲလၢ “ယဃ့ထုကဖၣ်လၢ ကစၢ်ယွၤအအိၣ်​ ဒီးသံကွၢ်အီၤလၢ ဘၣ်မနုၤအဃိ တၢ်ကဲထီၣ်အသး ဒ်အံၤလဲၣ်. ဘၣ်ဆၣ်​ ယတဒိးန့ၢ်ဘၣ်​ တၢ်စံးဆၢဘၣ်. အဃိ  ယသံကွၢ်လီၤယသးလၢ ‘ဘၣ်မနုၤအဃိ ယဃ့ထုကဖၣ်လဲၣ်.’” ပှၤအါဂၤ တူၢ်ဘၣ်ဝဲလၢ အဝဲသ့ၣ်​ ဃ့ထုကဖၣ်​ သနာ်က့ အတဒိးန့ၢ်ဘၣ်​ တၢ်စံးဆၢဘၣ်. အဃိ အဝဲသ့ၣ်​ ဆိကမိၣ်ဝဲလၢ အဃ့ထုကဖၣ်​ သနာ်က့ အဘျုးတအိၣ်ဘၣ်.

ဘၣ်မနုၤအဃိ ပှၤတနီၤ တူၢ်ဘၣ်ဝဲလၢ တၢ်ထုကဖၣ်​ တမၤစၢၤ အဝဲသ့ၣ်ဘၣ်လဲၣ်န့ၣ်​ တၢ်ဂ့ၢ်အဂၤ အိၣ်ဝဲစ့ၢ်ကီး. ပှၤတနီၤ တဲဝဲလၢ ကစၢ်ယွၤန့ၣ်​ အသ့ၣ်ညါတၢ် ခဲလၢာ်လံ. ပလိၣ်ဘၣ်​ မနုၤလဲၣ်, ပတၢ်ကီတၢ်ခဲ အိၣ်ဒ်လဲၣ်န့ၣ်​ အသ့ၣ်ညါဝဲစ့ၢ်ကီးအဃိ ပမ့ၢ်ဃ့ထုကဖၣ်​ သနာ်က့ အဘျုးတအိၣ်ဘၣ်.

ပှၤအဂၤတနီၤ ဆိကမိၣ်ဝဲလၢ ခီဖျိလၢ အမၤကမၣ်တၢ် လၢအပူၤကွံာ်အဃိ ကစၢ်ယွၤ တအဲၣ်ဒိး ဒိကနၣ်​ အတၢ်ထုကဖၣ်ဘၣ်. ကၠဲနံၤ တဲဝဲလၢ “ယတၢ်ကီတၢ်ခဲ အဒိၣ်ကတၢၢ်န့ၣ်​ မ့ၢ်ဝဲ ယတူၢ်ဘၣ်လၢ ယဘျုးတအိၣ်ဘၣ်. ယသးဘၣ်ဒိက့ၤလၢ တၢ်လၢယမၤတ့ၢ်လၢ အပူၤကွံာ်အဃိ ယတဲလီၤယသးလၢ ကစၢ်ယွၤ တဒိကနၣ်​ ယတၢ်ထုကဖၣ်ဘၣ်.”

နၤမီၤ, ဘၣ်ဃးဒီး တၢ်ထုကဖၣ်န့ၣ်​ နတူၢ်ဘၣ်ဒ်လဲၣ်. နမ့ၢ်တူၢ်ဘၣ်ဒ်သိးဒီး အဝဲသ့ၣ်​ ဒီးနသးမ့ၢ်ဒ့ဒီ ဘၣ်ဃးဒီး တၢ်ထုကဖၣ်န့ၣ်​ လံာ်စီဆှံ ကမၤစၢၤနၤ ဒ်သိး နကထံၣ်န့ၢ် တၢ်စံးဆၢလၢ ကမၤမုာ်ထီၣ်နသး. တၢ်လၢလံာ်စီဆှံ တဲဝဲဘၣ်ဃးဒီး တၢ်ထုကဖၣ်န့ၣ်​ ပနာ်သ့သပှၢ်တၢၢ်. a ဒီးလံာ်စီဆှံ ကမၤစၢၤနၤဒ်သိး နကသ့ၣ်ညါ တၢ်သံကွၢ်တဖၣ်အံၤ အတၢ်စံးဆၢ–

• ကစၢ်ယွၤ ဒိကနၣ်​ ပတၢ်ထုကဖၣ်​ နီၢ်ကီၢ်ဧါ.

• တၢ်ထုကဖၣ်တနီၤန့ၣ်​ ဘၣ်မနုၤအဃိ ကစၢ်ယွၤ တစံးဆၢဝဲဘၣ်လဲၣ်.

• ဒ်သိး ကစၢ်ယွၤ ကဒိကနၣ်​ ပတၢ်ထုကဖၣ်အဂီၢ် ပကဘၣ်​ ဃ့ထုကဖၣ်ဒ်လဲၣ်.

• တၢ်ထုကဖၣ်န့ၣ်​ ကကဲဘျုးလၢ ပဂီၢ်ဒ်လဲၣ်.