ဖဲ လါယူၤ ၁၇ ၂၀၂၄ န့ၣ် New York Times တၢ်ကစီၣ်တခါ ပာ်ဖျါထီၣ်ဝဲလၢ ဒီးကထၢၤ ဘံဘဲး မါသံၢ် လၢအမ့ၢ် U.S. surgeon general တဲဝဲလၢ “ဆၢကတီၢ်ခဲအံၤ တၢ်လီၤဘၣ်ယိၣ်အိၣ်ဝဲလၢ ဖိသၣ်တဖၣ် အတၢ်အိၣ်ဆူၣ်အိၣ်ချ့ လၢအဘၣ်ဃးဒီး တၢ်တူၢ်ဘၣ် ဒီးအတၢ်ဆိကမိၣ် တကပၤ. ဒီးတၢ်ကဲထီၣ်သးဒီးအဝဲသ့ၣ် ဒ်န့ၣ်န့ၣ် အါတက့ၢ်မ့ၢ်လၢ အ့ၤထၢၤနဲၣ်အဃိ.”

 ဒ်သိးအ့ၤထၢၤနဲၣ် တမၤဘၣ်ဒိ နဖိတဂ့ၤအဂီၢ် နဒီသဒၢနဖိကသ့ဒ်လဲၣ်. လံာ်စီဆှံ ပာ်ဖျါထီၣ် တၢ်ဟ့ၣ်ကူၣ်တနီၤ.

 ပကတဲသကိး လံာ်စီဆှံ တၢ်ဟ့ၣ်ကူၣ်တနီၤ.

 “ပှၤကူၣ်တၢ်သ့န့ၣ် ဆိကမိၣ်ထံ အခီၣ်ခါ ကိးခါဒဲး.”—ကတိၤဒိ ၁၄:၁၅.

 ခီဖျိလၢ အ့ၤထၢၤနဲၣ်န့ၣ် ကဲထီၣ်တၢ်လီၤဘၣ်ယိၣ်လၢ နဖိအဂီၢ်သ့ဝဲအဃိ တဘၣ်ဟ့ၣ်ကြီနဖိအခွဲးလၢ ကသူအ့ၤထၢၤနဲၣ်တဂ့ၤ. တချုးလၢ နဟ့ၣ်အဝဲသ့ၣ် အခွဲးလၢ ကသူအ့ၤထၢၤနဲၣ် ဒံးဘၣ်န့ၣ် ဆိကမိၣ် ဘၣ်ဃး နဖိန့ၣ် အကဲပှၤလၢအသးဆးလံဧါ. အဒိ ဖဲအဝဲသ့ၣ် သူအ့ၤထၢၤနဲၣ်အခါ မ့ၢ်အဝဲသ့ၣ် မၤထွဲဒ်တၢ်ဆၢကတီၢ်လၢ နပာ်ပနီၣ်အသိးဧါ. အဝဲဃုထၢသကိးလၢအဂ့ၤ ဒီးအကဲသကိးလၢအဂ့ၤဧါ. ဒီးတၢ်ဂီၤ, တၢ်ဂီၤမူ ဒီးလံာ်လၢ တကြၢးတဘၣ်တဖၣ်န့ၣ် အဝဲဟးဆှဲးဝဲဧါ.

•   နမ့ၢ်အဲၣ်ဒိးသ့ၣ်ညါအါထီၣ်န့ၣ် ဖးကွၢ် တၢ်ဂ့ၢ်လၢအခိၣ်တီမ့ၢ်ဝဲ “ယဖိတဖၣ်ကြၢးသူ အ့ၤထၢၤနဲၣ်ဧါ” ဒီး “သိၣ်လိနဖိတဖၣ်ဒ်သိး အဝဲသ့ၣ်ကသူအ့ၤထၢၤနဲၣ် လၢတၢ်ကူၣ်သ့အပူၤ.”

 “တၢ်ဆၢကတီၢ်လၢ အအိၣ်ဒီးသုန့ၣ် သူအီၤလၢ အဂ့ၤကတၢၢ်.”—အ့းဖ့းစူး ၅:၁၆.

 နမ့ၢ်ပျဲ နဖိသူ အ့ၤထၢၤနဲၣ်န့ၣ် ပာ်လီၤန့ၢ်အီၤ တၢ်ဘျၢ ဒီးၡဲပၠးအီၤလၢ တၢ်ဘျၢတဖၣ်အံၤ ကဒီသဒၢအဝဲသ့ၣ်ဒ်လဲၣ်. ဒီးကွၢ်စ့ၢ်ကီး နဖိအတၢ်အိၣ်ထီၣ်အိၣ်လီၤ ဒီးနမ့ၢ်ထံၣ်လၢ အဝဲသ့ၣ် သူအ့ၤထၢၤနဲၣ် အါတလၢန့ၣ် မၤဃံးထီၣ်တၢ်ဘျၢလၢအဘၣ်ဃးဒီး တၢ်သူအ့ၤထၢၤနဲၣ်.

•   ဒ်သိးနဖိတဖၣ် ကနၢ်ပၢၢ်လၢ ဘၣ်မနုၤအဃိ နပာ်လီၤတၢ်ဘျၢ ဘၣ်ဃးဒီး တၢ်သူအ့ၤထၢၤနဲၣ်လဲၣ်အဂီၢ် ကွၢ်သကိး ကးတိလၢ လၢၢ်ဘ့ၣ်ဘၣ်ဝါအလိၤ လၢအခိၣ်တီမ့ၢ်ဝဲ ဖဲနသူအ့ထၢၣ်နဲးအခါ ဟးဆှဲးတၢ်ဘၣ်ယိၣ်အလီၢ်တဖၣ်.

 လံာ်စီဆှံတဲဝဲလၢ ပအိၣ်မူဘၣ်လၢ “တၢ်ဆၢကတီၢ်လီၤဆီလၢ အကီအခဲသပှၢ်တၢၢ်.” (၂ တံၤမသ့း ၃:၁-၅) ဘၣ်ဆၣ် ဒ်သိးပလဲၤခီဖျိတၢ်ကီတၢ်ခဲ ကန့ၢ်အဂီၢ် လံာ်စီဆှံ တၢ်ဟ့ၣ်ကူၣ် မၤစၢၤပှၤသ့. ဒီးလၢတၢ်ဂ့ၢ်လၢ အခိၣ်တီမ့ၢ်ဝဲ ပှၤသးစၢ်တဖၣ် ထံၣ်ဘၣ်ဒီး တၢ်သးလီၤစၢ်တၢ်ဆါအါထီၣ် အပူၤန့ၣ် အိၣ်ဒီးတၢ်ဂ့ၢ်အခါ ခံဆံဘျဲၣ်လၢ အဒိးသန့ၤထီၣ်အသးလၢ လံာ်စီဆှံ လၢအကဲဘျုးလၢ မိပါ ဒီးဖိတဖၣ်အဂီၢ်.