ပှၤထူးပှၤတီၤ ဒီးစီၤလါစရူး လၢယ့ၣ်ၡူးတဲဝဲအဂ့ၢ်န့ၣ် အိၣ်ဒၣ်ယ့ၣ်ၡူးဟ့ၣ်တၢ်အဒိလီၤ. (လူၤကၣ် ၁၆:၁၉-၃၁) ပှၤခံဂၤအံၤန့ၣ် အဲၣ်ဒိးဒိလီၤဝဲ ပှၤခံဖု. တၢတဖုန့ၣ်အကဲဝဲ ပှၤယူဒၤဖိ တၢ်ဘူၣ်တၢ်ဘါခိၣ်နၢ်လၢ အပာ်ထီၣ်ထီအသးသ့ၣ်တဖၣ် လၢအအိၣ်မူလၢ ယ့ၣ်ၡူးအစိၤ. ခံဖုတဖုန့ၣ် အကဲဝဲ ပှၤလၢအပတီၢ်ဖုၣ်တဖၣ်လၢ အတူၢ်လိာ်ဝဲ ယ့ၣ်ၡူးအတၢ်ကစီၣ် လၢတၢ်ဆီၣ်လီၤသးအပူၤ.

လၢတၢ်မၤလိအံၤအပူၤန့ၣ် ပကသ့ၣ်ညါဘၣ်လၢ

•  ဘၣ်ဃးဒီး ပှၤထူးပှၤတီၤ ဒီးစီၤလါစရူး အဂ့ၢ်န့ၣ် ယ့ၣ်ၡူးတဲဘၣ်ပှၤ တၢ်မနုၤလဲၣ်

•  ပှၤခံဂၤအံၤအဂ့ၢ်န့ၣ် အကဲတၢ်လၢအဟဲကဲထီၣ်သးနီၢ်ကီၢ်ဧါ

•  တၢ်အဒိတခါအံၤ မ့ၢ်အအဲၣ်ဒီးသိၣ်လိပှၤလၢ လရာ်မ့ၣ်အူန့ၣ် အိၣ်အနီၢ်ကီၢ်ဧါ

•  ယ့ၣ်ၡူးဟ့ၣ်ဝဲ တၢ်အဒိလၢ ဘၣ်ဃးဒီး ပှၤထူးပှၤတီၤ ဒီးစီၤလါစရူးအဂ့ၢ်န့ၣ် အဲၣ်ဒီးတဲဝဲ အခီပညီဒ်လဲၣ်

 ဖဲလူၤကၣ် အဆၢဒိၣ် ၁၆ အပူၤန့ၣ် ယ့ၣ်ၡူးတဲဘၣ်ဃးဒီး ပှၤထူးပှၤတီၤတဂၤဒီးစီၤလါစရူးအဂ့ၢ်. ဒီးလၢခံ အဝဲသ့ၣ် အတၢ်အိၣ်သး ဆီတလဲဝဲလၢာ်စီပျီ.

 ယ့ၣ်ၡူးတဲဝဲလၢ ပှၤထူးပှၤတီၤတဂၤအံၤ အအိၣ်ဘၣ်ဝဲ ဘီၣ်ဘီၣ်ညီညီ. ဒီးမ့မ့ၢ် စီၤလါစရူး လၢအမ့ၢ် ပှၤဃ့အီၣ်တၢ်ဖိတဂၤန့ၣ် ဆ့ၣ်နီၤအိၣ်ခိးတၢ်လၢ ပှၤထူးပှၤတီၤတဂၤန့ၣ် အတြဲၤခီၣ်ထံး ဒ်သိးဒီး- အကအီၣ်ဘၣ်ဝဲ တၢ်အီၣ်လၢအလီၤတဲာ်လၢ ပှၤထူးပှၤတီၤတဂၤန့ၣ် အစီၢ်နီၤခိၣ်အဖီလာ်. လၢခံစီၤလါစရူးသံဝဲ ဒီးမူခိၣ်ကလူး လဲၤစိာ်ထီၣ်အီၤလၢ စီၤအၤဘြၤဟၣ်အကပၤ. ပှၤထူးပှၤတီၤနာ်က့ သံဝဲဘျီ ပှၤလဲၤခူၣ်လီၤအီၤ. လၢတၢ်အဒိတခါအံၤအပူၤန့ၣ် ပထံၣ်ဘၣ်လၢ ဖဲအဝဲသ့ၣ်သံဝံၤအလီၢ်ခံ အဝဲသ့ၣ်အိၣ်မူဒံး. ပှၤထူးပှၤတီၤတဂၤအံၤန့ၣ် ဘၣ်အိၣ်လၢ မ့ၣ်အူပူၤအဃိ အတူၢ်ဘၣ်တၢ်နးမး. ဒီးအဝဲတဲဝဲ စီၤအၤဘြၤဟၣ်လၢ ‘မၢစီၤလါစရူး စုၣ်လီၤအစုနၢအခိၣ်ထိး လၢထံကျါ ဒီးဟဲဒုးလီၤစီၤထံလၢ ယပျ့ၤလိၤ.’ ဘၣ်ဆၣ် စီၤအၤဘြၤဟၣ် တမၤဝဲဘၣ်. စီၤအၤဘြၤဟၣ် တဲဘၣ်ပှၤခံဂၤန့ၣ်လၢ အဝဲသ့ၣ်အတၢ်အိၣ်သး ဆီတလဲလၢာ်စီပျီလံ. ဒီးလၢအဝဲသ့ၣ် အဘၢၣ်စၢၤန့ၣ် အိၣ်ဒီးတၢ်ပူၤယိာ်အဃိ အဝဲသ့ၣ်လဲၤလၢ တဂၤဒီးတဂၤအအိၣ်တန့ၢ်ဘၣ်.

 အတဟဲကဲထီၣ်အသး နီၢ်ကီၢ်ဘၣ်. အကဲဝဲဒၣ် ယ့ၣ်ၡူးဟ့ၣ်တၢ်အဒိ ဒ်သိးကသိၣ်လိပှၤဂၤအဂီၢ်. ပှၤကူၣ်ဘၣ်ကူၣ်သ့တဖၣ် သနာ်က့ တဲဝဲလၢ တၢ်လၢယ့ၣ်ၡူးတဲဝဲန့ၣ် အကဲတၢ်အဒိလီၤ. အဒိ, လူၤသၢၤ လံာ်စီဆှံလၢ ပှၤထုးထီၣ်အီၤဖဲ ၁၉၁၂ န့ၣ်တဲဝဲလၢ တၢ်လၢယ့ၣ်ၡူးတဲဝဲတခါအံၤန့ၣ် အကဲဝဲ တၢ်အဒိ. ဒီးခဲးသလ့း အလံာ်စီဆှံတဘ့ၣ်စ့ၢ်ကီး အတၢ်ဂ့ၢ်အဘျဲၣ်န့ၣ် ပာ်ဖျါထီၣ်ဝဲလၢ “တၢ်ဂ့ၢ်လၢ ယ့ၣ်ၡူးတဲဝဲတခါအံၤန့ၣ် ကဲဝဲတၢ်အဒိ ဒီးတအဲၣ်ဒီးတဲဝဲ ပှၤခံဂၤအံၤ အိၣ်နီၢ်ကီၢ်ဘၣ်.”

 ဘၣ်ဆၣ် ယ့ၣ်ၡူးဟ့ၣ်ဝဲ တၢ်အဒိတခါအံၤန့ၣ် မ့ၢ်အအဲၣ်ဒီး သိၣ်လိဝဲလၢ ဖဲပှၤတဂၤ သံဝံၤအလီၢ်ခံန့ၣ် အဆဲးအိၣ်မူဒံးဧါ. မ့ၢ်အအဲၣ်ဒီးတဲဝဲဒၣ်လၢ ဖဲပှၤတနီၤ သံဝံၤအလီၢ်ခံ အဝဲသ့ၣ်လီၤလၢ လရာ်မ့ၣ်အူအပူၤဧါ. မ့တမ့ၢ် အဝဲအဲၣ်ဒီးတဲဝဲလၢ စီၤအၤဘြၤဟၣ် ဒီးစီၤလါစရူးန့ၣ် လဲၤထီၣ်လၢမူခိၣ် အနီၢ်ကီၢ်ဧါ. ယ့ၣ်ၡူးတအဲၣ်ဒီးတဲဝဲ ဒ်န့ၣ်ဘၣ်.

 အဒိ

•   ပှၤထူးပှၤတီၤတဂၤန့ၣ် မ့ၢ်လီၤဘၣ်လၢ လရာ်မ့ၣ်အူပူၤနီၢ်ကီၢ်န့ၣ် မ့ၢ်လၢမ့ၣ်အူကဲၤဆူၣ်အဃိ ထံတလီၤစီၤဖိလၢ စီၤလါစရူးအစုနၢခိၣ်ထိးန့ၣ် ကလီၤမၢ်ကွံာ်တမ့ၢ်ဧီၤ.

•   ထံတလီၤစီၤဖိန့ၣ် မ့ၢ်လီၤစီၤတုၤလၢ ပှၤထူးပှၤတီၤတဂၤန့ၣ် အအိၣ်ဘၣ်ဆၣ် တမ့ၢ်လၢ အကမၤစၢၤအီၤနီတမံၤဘၣ်.

•   ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အတဲဝဲလၢ ပှၤတလဲၤထီၣ်ဘၣ်လၢ မူခိၣ်နီတဂၤဒံးဘၣ်. အဃိ ပသ့ၣ်ညါဘၣ်လၢ စီၤအၤဘြၤဟၣ် တအိၣ်လၢမူခိၣ်ဘၣ်.—ယိၤဟၣ် ၃:၁၃.

 တၢ်လၢယ့ၣ်ၡူးတဲဝဲတခါအံၤန့ၣ် အဲၣ်ဒီးတဲဝဲ တၢ်အဒိ သနာ်က့ ပှၤတနီၤတဲဝဲလၢ တၢ်အဒိ တခါအံၤန့ၣ် အဲၣ်ဒီးပာ်ဖျါထီၣ်ဝဲလၢ ပှၤလၢအမၤတၢ်ဂ့ၤန့ၣ် ကလဲၤထီၣ်ဘၣ်လၢမူခိၣ် ဒီးပှၤလၢအမၤတၢ်အၢန့ၣ် ကဘၣ်လီၤလၢ လရာ်မ့ၣ်အူပူၤ. a

 အဝဲသ့ၣ်တဲဝဲဒ်အံၤန့ၣ် မ့ၢ်အဘၣ်ဧါ. တဘၣ်ဘၣ်.

 လံာ်စီဆှံ တသိၣ်လိပှၤလၢ လရာ်မ့ၣ်အူန့ၣ် မ့ၢ်တၢ်လၢအအိၣ်နီၢ်ကီၢ်ဘၣ်. ဘၣ်ဃးဒီးပှၤသံန့ၣ် လံာ်စီဆှံတဲဝဲလၢ “ပှၤလၢအမူန့ၣ် သ့ၣ်ညါဝဲလၢ အကသံလီၤ. မ့မ့ၢ် ပှၤသံန့ၣ် တသ့ၣ်ညါ တၢ်နီတမံၤဘၣ်.” အဃိ လံာ်စီဆှံတတဲဝဲလၢ ပှၤလၢအမၤတၢ်ဂ့ၤ ကိးဂၤဒဲး ကလဲၤထီၣ်ဘၣ်လၢမူခိၣ်ဒီး အိၣ်ဘၣ်မုာ်မုာ်ခုၣ်ခုၣ် ဒီးပှၤလၢအမၤ တၢ်အၢတၢ်သီတဖၣ် ကတူၢ်ဘၣ်တၢ်မၤနးမၤဖှီၣ်လၢ လရာ်မ့ၣ်အူပူၤဘၣ်.—စံၣ်တဲၤတဲလီၤတၢ် ၉:၅.

 တၢ်အဒိတခါအံၤန့ၣ် အဲၣ်ဒီးတဲဝဲ ပှၤခံဖုလၢ အတၢ်အိၣ်သး ကဆီတလဲလၢာ်စီပျီ.

 ပှၤထူးပှၤတီၤတဂၤ အံၤန့ၣ်အဲၣ်ဒီးဒိလီၤဝဲ ပှၤယူဒၤဖိတၢ်ဘူၣ်တၢ်ဘါခိၣ်နၢ်သ့ၣ်တဖၣ်လၢ “အအဲၣ်ကျိၣ်အဲၣ်စ့တဖၣ်.” (လူၤကၣ် ၁၆:၁၄) ပှၤသ့ၣ်တဖၣ်အံၤန့ၣ် အဝဲသ့ၣ် နၢ်ဟူဘၣ်ဝဲ ယ့ၣ်ၡူးအတၢ်စံၣ်တဲၤတဲလီၤဘၣ်ဆၣ် အဝဲသ့ၣ် တတူၢ်လိာ်ဝဲဘၣ်. တကးဒံးဘၣ် အဝဲသ့ၣ်ထံၣ်ဆံးဝဲ ပှၤလၢအပတီၢ်ဖုၣ်သ့ၣ်တဖၣ်.—ယိၤဟၣ် ၇:၄၉.

 စီၤလါစရူး န့ၣ်အဲၣ်ဒီးဒိလီၤဝဲ ပှၤလၢအပတီၢ်ဖုၣ်တဖၣ်လၢ အတူၢ်လိာ်ဝဲ တၢ်သးခုကစီၣ်လၢ ယ့ၣ်ၡူးစံၣ်တဲၤတဲလီၤဝဲတဖၣ်. ဒီးပှၤသ့ၣ်တဖၣ်အံၤန့ၣ် ပှၤယူၤဒၤဖိတၢ်ဘူၣ်တၢ်ဘါခိၣ်နၢ်သ့ၣ်တဖၣ် ထံၣ်ဆံးအဝဲသ့ၣ်ဒိၣ်မး.

 ဘၣ်ဆၣ် ပှၤခံဖုအံၤန့ၣ် အဝဲသ့ၣ် တၢ်အိၣ်သးဆီတလဲ လၢာ်စီပျီ.

•   ပှၤယူဒၤဖိတၢ်ဘူၣ်တၢ်ဘါခိၣ်နၢ်သ့ၣ်တဖၣ်န့ၣ် အဝဲသ့ၣ် ဆိကမိၣ်လီၤအသးလၢ ကစၢ်ယွၤ ဘၣ်သူၣ်ဘၣ်သးအဝဲသ့ၣ်. ဘၣ်ဆၣ် မ့ၢ်လၢအဝဲသ့ၣ် တတူၢ်လိာ် တၢ်ကစီၣ်လၢ ယ့ၣ်ၡူးစံၣ်တဲၤတဲလီၤဝဲဘၣ်အဃိ ကစၢ်ယွၤ တတူၢ်လိာ်အဝဲသ့ၣ် ဒီးအဝဲသ့ၣ် တၢ်ဘူၣ်ထီၣ်ဘါထီၣ်လၢၤဘၣ်. အဃိန့ၣ် လီၤဂာ်ဒ်သိးဒီး အဝဲသ့ၣ်သံဝဲလံ. ဒီးတၢ်ကစီၣ်လၢ ယ့ၣ်ၡူးဒီးအပျဲၢ်အဘီၣ်တဖၣ် စံၣ်တဲၤတဲလီၤဝဲန့ၣ် ဘၣ်အဝဲသ့ၣ် ဆါဒိၣ်မး.—မးသဲ ၂၃:၂၉, ၃၀; မၤတၢ် ၅:၂၉-၃၃.

•   ပှၤလၢအပတီၢ်ဖုၣ်တဖၣ်လၢ ယ့ၣ်ၡူးအစိၤန့ၣ် အဝဲသ့ၣ်အတၢ်ဘူၣ်တၢ်ဘါခိၣ်နၢ် ကွၢ်ကပာ်ကွံာ်အီၤန့ၢ်ဖးယံာ်လံ. ဘၣ်ဆၣ် တဘျီအံၤ အဝဲသ့ၣ်ဒိးန့ၢ်ဘၣ်က့ၤ ကစၢ်ယွၤအတၢ်ဘၣ်သးလံ. အဝဲသ့ၣ်အါဂၤန့ၣ် တူၢ်လိာ်ဝဲ တၢ်သးခုကစီၣ်လၢ ယ့ၣ်ၡူးစံၣ်တဲၤတဲလီၤဝဲအဃိ ကဲဘျုးလၢ အဝဲသ့ၣ် အတၢ်အိၣ်မူပူၤဒိၣ်မး. တကးဒံးဘၣ် အဝဲသ့ၣ်အိၣ်ဒီး တၢ်ခွဲးတၢ်ယာ်လၢ ကဒိးန့ၢ်ဘၣ် ကစၢ်ယွၤအတၢ်ဘၣ်သး လီၤထူလီၤယိာ်.—ယိၤဟၣ် ၁၇:၃.