လံာ်စီဆှံ ပာ်ဖျါထီၣ်ဝဲလၢ ကစၢ်ယွၤအတၢ်ဘၣ်သးန့ၣ်​ မ့ၢ်ဒ်သိးပှၤဟီၣ်ခိၣ်ဖိတဖၣ်​ က “ဟးဆှဲး တၢ်မၤကမၣ်မုၣ်ကမၣ်ခွါလီၤ.” (၁ သ့းစၤလနံ ၄:၃) လံာ်စီဆှံသူဝဲ တၢ်ကတိၤလၢအမ့ၢ် “တၢ်မၤကမၣ်မုၣ်ကမၣ်ခွါ” န့ၣ်ပာ်ဃုာ်ဒီး တၢ်အဲၣ်ဘၢမါအဲၣ်ဘၢဝၤ, ပိာ်မုၣ်ကဒဲကဒဲ မ့တမ့ၢ် ပိာ်ခွါကဒဲကဒဲ မံဃုာ်လိာ်သး ဒီးပိာ်မုၣ်ဒီးပိာ်ခွါ မံဃုာ်လိာ်သး တချုးလၢအဖျီသးဒံးဘၣ်.

•  ပှၤမ့ၢ်တဖျီသးဘၣ်သနာ်က့ မ့ၢ်အိၣ်ဃုာ်တပူၤဃီန့ၣ်​ လံာ်စီဆှံတဲဝဲဒ်လဲၣ်.

•  ပှၤခံဂၤဒ်သိးကသ့ၣ်ညါလၢ အသးကခုဧါ တခုဧါအဂီၢ် မ့ၢ်အိၣ်ဃုာ်ဆိတပူၤဃီမီၤ ကဂ့ၤဧါ.

•  ပှၤဒီမါဝၤခံဂၤ မၤဂၢၢ်ကျၢၤထီၣ်ဝဲ အတၢ်ဆီဟံၣ်ဆီဃီ ကသ့ဒ်လဲၣ်.

•   တၢ်ဆီဟံၣ်ဆီဃီ အတၢ်ရဲၣ်တၢ်ကျဲၤန့ၣ်​ ဟဲလၢကစၢ်ယွၤအအိၣ်. ကစၢ်ယွၤဒုးတ့ဒုးဖျီဝဲ ပှၤဟီၣ်ခိၣ်ဖိအဆိကတၢၢ်ခံဂၤ. (၁ မိၤၡ့ ၂:၂၂-၂၄) ကစၢ်ယွၤတအဲၣ်ဒိးဝဲလၢ ပှၤလၢအဖျီအသး တဝံၤဒံးဘၣ်န့ၣ်​ ကအိၣ်ဃုာ်တပူၤဃီဘၣ်.

•   ကစၢ်ယွၤသ့ၣ်ညါဝဲ တၢ်အဂ့ၤကတၢၢ်လၢ ပှၤဟီၣ်ခိၣ်ဖိအဂီၢ်. ကစၢ်ယွၤရဲၣ်ကျဲၤဝဲလၢ တၢ်ဆီဟံၣ်ဆီဃီန့ၣ်​ မ့ၢ်ဝဲလၢပှၤနီၢ်ဒီမါဝၤခံဂၤအံၤ ကအိၣ်ဝဲတပူၤဃီတစိၤအသး ဒ်သိးအဝဲသ့ၣ်ကန့ၢ်ဘၣ်​ အဘျုးအဖှိၣ်​ ဒီးကကဲထီၣ်တၢ်ဒီသဒၢလၢ အဟံၣ်ဖိဃီဖိခဲလၢာ်အဂီၢ်လီၤ. ပကဆိၣ်ကမိၣ်ကွၢ် တၢ်အဒိယိယိတခါ. အဒိ ဖဲနလဲၤပှ့ၤ တၢ်ပီးတၢ်လီတမံၤမံၤအခါ ပာ်ဃုာ်ဒီးလံာ်တၢ်ဟံးစုနဲၣ်ကျဲတဘ့ၣ်လၢ အကတဲပၠးနၤလၢ နကဘၣ်သူဝဲ တၢ်ပီးတၢ်လီအံၤဒ်လဲၣ်. ဒ်န့ၣ်အသိး ကစၢ်ယွၤစ့ၢ်ကီး ဟံးစုနဲၣ်ကျဲဝဲ ပှၤနီၢ်ဒီမါဝၤ ဒ်သိးကအိၣ်ဒီး ဟံၣ်မုာ်ဃီပၢၤအဂီၢ်လီၤ. ပှၤမ့ၢ်မၤထွဲ ကစၢ်ယွၤတၢ်ဟံးစုနဲၣ်ကျဲန့ၣ်​ ကကဲဘျုးလၢ အဝဲသ့ၣ်အဂီၢ်ထီဘိလီၤ.—ယၡါယၤ ၄၈:၁၇, ၁၈.

•   ပှၤလၢအဆီဟံၣ်ဆီဃီတဖၣ်​ မ့ၢ်မံဃုာ်ဒီး ပှၤလၢအတမ့ၢ် အသးသမူတံၤသကိးဘၣ်န့ၣ်​ ကထံၣ်ဘၣ်ဒီးတၢ်ကီတၢ်ခဲဖးဒိၣ်. အဒိ ကအိၣ်ထီၣ်ဒီးအဟုးအသးလၢ တသးလီဝဲ, တၢ်ဆူးတၢ်ဆါ ကဘၣ်ကူဘၣ်ဂာ်အီၤ ဒီးတၢ်သူၣ်ဘၣ်ဒိသးဘၣ်ဒိအိၣ်ထီၣ်.

•   ကစၢ်ယွၤတ့လီၤ ပိာ်မုၣ်ဒီးပိာ်ခွါ ဒ်သိးကထီၣ်ဖိထီၣ်လံၤ ခီဖျိတၢ်မံဃုာ်အိၣ်ဃုာ်. ကစၢ်ယွၤထံၣ်ဝဲ တၢ်သးသမူဒ်အမ့ၢ် တၢ်လၢအလုၢ်ဒိၣ်ပှ့ၤဒိၣ်တခါအဃိ ဖဲပှၤဟီၣ်ခိၣ်ဖိသ့ၣ်တဖၣ်​ အိၣ်ဒီးတၢ်ခွဲးတၢ်ယာ်လၢ ကထီၣ်ဖိထီၣ်လံၤအခါ အဝဲအံၤမ့ၢ်ဝဲ တၢ်ဟ့ၣ်အလုၢ်ဒိၣ်ပှ့ၤဒိၣ်​ လၢအဟဲလၢ ကစၢ်ယွၤအအိၣ်လီၤ. လၢတၢ်န့ၣ်အဃိ ကစၢ်ယွၤ အဲၣ်ဒိးဝဲလၢ ပှၤဟီၣ်ခိၣ်တဖၣ်​ ကပာ်လုၢ်ပာ်ပှ့ၤဝဲတၢ်ဟ့ၣ်အံၤ ခီဖျိပာ်ဖျါထီၣ်တၢ်ပာ်ကဲလၢ တၢ်ဆီဟံၣ်ဆီဃီ အတၢ်ရဲၣ်တၢ်ကျဲၤ အဖီခိၣ်လီၤ.—ဧ့ၤဘြံၤ ၁၃:၄.

 ဒ်သိးနကအိၣ်ဒီး ဟံၣ်မုာ်ဃီပၢၤအဂီၢ် နကဘၣ်အိၣ်ဃုာ်ဆိတပူၤဃီ တချုးလၢ နဖျီသးဒံးဘၣ်န့ၣ်​ တမ့ၢ်ဘၣ်. လၢတၢ်န့ၣ်အလီၢ် နမ့ၢ်ဆီဟံၣ်ဆီဃီ ဒီးမ့ၢ်မၤသကိးတၢ်တပူၤဃီ ဒီးဖီၣ်လိာ်သးစု ဒီးဘှါၡဲသကိးတၢ်ဂ့ၢ်ကီတပူၤဃီန့ၣ်​ တၢ်ကလဲၤသးဘၣ်လီၢ်ဘၣ်ဆးလီၤ. တၢ်ဆီဟံၣ်ဆီဃီန့ၣ်​ မၤဂၢၢ်ကျၢၤထီၣ်​ တၢ်နာ်အီၣ်လိာ်သး တဂၤဒီးတဂၤလီၤ.—မးသဲ ၁၉:၆.

 တၢ်ဆီဟံၣ်ဆီဃီလၢ အလၢအပှဲၤန့ၣ်​ တအိၣ်ဘၣ်. ဘၣ်ဆၣ်အဝဲသ့ၣ်​ မ့ၢ်မၤထွဲ လံာ်စီဆှံ အတၢ်ဟံးစုနဲၣ်ကျဲန့ၣ်​ အဝဲသ့ၣ်ကအိၣ်ဒီး ဟံၣ်မုာ်ဃီပၢၤလီၤ. ပကကွၢ်သကိး တၢ်အဒိတနီၤ.

•   ပာ်ဆိ နသးသမူတံၤသကိး အတၢ်လိၣ်ဘၣ်လၢညါ.—၁ ကရံၣ်သူး ၇:၃-၅; ဖံလံးပံၤ ၂:၃, ၄.

•   မၤဒိၣ်ထီၣ်​ တၢ်အဲၣ်လၢ တဂၤဒီးတဂၤအဖီခိၣ်​ ဒီးပာ်ကဲလိာ်သး တဂၤဒီးတဂၤ.—အ့းဖ့းစူး ၅:၂၅, ၃၃.

•   အိၣ်ဒီးတၢ်ပၢၤသူၣ်ပၢၤသးလၢ တၢ်စံးတၢ်ကတိၤ တကပၤ.—ကတိၤဒိ ၁၂:၁၈.

•   အိၣ်ဒီးတၢ်ဝံသးစူၤ ဒီးပျၢ်ပှၤဂၤတၢ်ကမၣ်ညီ.—ကလီးစဲ ၃:၁၃, ၁၄.