ဖဲ လါမၢ်ၡး ၂၇ သီ​န့ၣ် ပ​တုၤလၢ​နီၢ်သး​ဖီတၢၣ် အသီ​တခါ​လၢအမ့ၢ် ပ​ထုး​ထီၣ်​ရၤလီၤ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​ကညီ​စှီၤကျိာ်.

ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ တဘ့ၣ်အံၤ အဘၣ်​လီၤတံၢ်​လီၤဆဲး ဒီး​အ​ပာ်ဖျါထီၣ် ကစၢ်ယွၤ​အ​တၢ်ကစီၣ် တီတီ​လိၤလိၤ. (၂ တံၤမသ့း ၃:၁၆) တကးဒံးဘၣ် ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ​အံၤ အ​လီၤဆီ​န့ၢ်ဒံး လံာ်စီဆှံ တၢ်​ကွဲးကျိာ်ထံ​လၢ​အဂၤ​ဒ်လဲၣ်. မတၤ​သ့ၣ်တဖၣ် ကွဲးကျိာ်ထံ​ဝဲ​လဲၣ်. ဒီး ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ​အံၤ ဘၣ်မနုၤ​အဃိ ပနာ်​အီၣ်​အီၤ​သ့​လဲၣ်.

ဒံၤချဲ ဟါယၢၤစ် လၢအမ့ၢ်​ပှၤ​ကူၣ်ဘၣ်ကူၣ်သ့​လၢ တၢ်ဆါ​တၢ်ပှ့ၤ​တ​ကပၤ​န့ၣ် တဲဝဲလၢ “လံာ်စီဆှံန့ၣ် အ​ကဲဝဲ​လံာ်​တဘ့ၣ်​လၢ ပှၤဆါ​အီၤ​န့ၢ်​အါ​က​တၢၢ် ကိးနံၣ်​ဒဲး​လီၤ.” သနာ်က့ လံာ်စီဆှံ အ​တၢ်​ကွဲးကျိာ်ထံ​တဖၣ်န့ၣ် တဘၣ်​လီၤတံၢ်​လီၤဆဲး ကိး​ဘ့ၣ်ဒဲး​ဘၣ်. အဒိ လၢ​လံာ်စီဆှံ​တဘ့ၣ်​အပူၤ ပှၤလၢ​အ​ထုးထီၣ် လံာ်စီဆှံ​တဖၣ် ထုးထီၣ်​ကွံာ်​ဝဲ တၢ်ဂ့ၢ်တၢ်ကျိၤ​လၢ အဝဲသ့ၣ်​ဆိကမိၣ်ဝဲလၢ “အ​တ​လီၤထုးန့ၢ်သး​ဘၣ်​တဖၣ်.” မ့မ့ၢ်​လံာ်စီဆှံ တၢ်​ကွဲးကျိာ်ထံ လၢ​အဂၤ​တဘ့ၣ်​အပူၤန့ၣ် ပှၤ​ဆီတလဲ​ကွံာ်ဝဲ တၢ်​ကတိၤ​တဖၣ် လၢ​ပှၤ​ဆိကမိၣ်ဝဲလၢ အ​က​မၤ​တံာ်တာ် ပှၤ​ဖးလံာ်​ဖိ​လၢ စိၤ​ခဲအံၤ​တဖၣ်​အသး. အဒိ ပှၤ​ကွဲးကျိာ်ထံ လံာ်စီဆှံ​တနီၤန့ၣ် ဒ်သိး ပှၤ​တနီၤနီၤ​က​ဘၣ်သး အ​တၢ်​ကွဲးကျိာ်ထံ​အဂီၢ် အဝဲသ့ၣ် တကိး​ကစၢ်ယွၤ​လၢ ပါ​ဘၣ်, ဘၣ်ဆၣ် ကိးက့ၤ​ဝဲ​လၢ “မိပါ.”

ဖျါ​လၢ လံာ်စီဆှံ တၢ်​ကွဲးကျိာ်ထံ​လၢ အအိၣ်​ဒီး ကစၢ်ယွၤ​အ​မံၤ ယဟိဝၤ​န့ၣ် ပှၤ​တဘၣ်​သး​အီၤ​ဘၣ် အါ​က​တၢၢ်​လီၤ. (ပှၤ​ကူၣ်ဘၣ်ကူၣ်သ့​တနီၤ ကွဲး​က့ၤ​ကစၢ်ယွၤ​အ​မံၤ​လၢ “ယၤ​ဝ့.”) ဘၣ်ဆၣ် ဖဲ​ပှၤ​ကွဲး​လံာ်စီဆှံ​လၢ ဧ့ၤဘြံၤ​ကျိာ်​တ​ကတြူၢ် လၢ​အ​ခီၣ်ထံး​အခါ ကစၢ်​ယွၤအမံၤ​န့ၣ် ပှၤ​ကွဲး​အီၤ​လၢ လံာ်မဲာ်ဖျၢၣ်​မိၢ်ပှၢ်​လွံၢ်​ဖျၢၣ် လၢအမ့ၢ် YHWH မ့တမ့ၢ် JHVH. ဒီး​လၢ လံာ်စီဆှံ​လၢ ဧ့ၤဘြံၤ​ကျိာ်​တ​ကတြူၢ်​အပူၤန့ၣ် * မံၤ​တဖျၢၣ်အံၤ အိၣ်ဝဲ​ဘူးထီၣ်လၢ အဘျီ ၇,၀၀၀ ညါ. (၂ မိၤၡ့ ၃:၁၅; စံးထီၣ်ပတြၢၤ ၈၃:၁၈) အဃိန့ၣ် ပ​သ့ၣ်ညါဘၣ်​လီၤတံၢ်​လၢ ပ​တၢ်ဘၣ်တ့​ကစၢ်​န့ၣ် အဲၣ်ဒိးဝဲ​လၢ ပှၤလၢ​အဘူၣ်ထီၣ်ဘါထီၣ်​အီၤတဖၣ် က​သ့ၣ်ညါ​အ​မံၤ ဒီး​သူ​အ​မံၤ.

ဘၣ်ဆၣ် ပူၤကွံာ်​အ​နံၣ်​လၢ​အ​က​ယၤန့ၣ် ခီဖျိ​လၢ ပှၤယူဒၤဖိ​တဖၣ် အိၣ်ဒီး​တၢ်​ဒုၣ်​တၢ်​ထု​လၢ ပှၤ​တ​ကြၢး​ကိး​သီၣ်ဝဲ ကစၢ်ယွၤ​အ​မံၤ​ဘၣ်​အဃိ အဝဲသ့ၣ် တကိး​သီၣ်​ကစၢ်ယွၤ​အ​မံၤ​ဘၣ်. လၢခံ ပှၤလၢ​အ​ကိးလီၤ​သး​လၢ ခရံာ်​ဖိ​တဖၣ် အိၣ်ဒီး​တၢ်ထံၣ်​ဒ်န့ၣ်​စ့ၢ်ကီး. (မၤ​တၢ် ၂၀:၂၉, ၃၀; ၁ တံၤမသ့း ၄:၁) မုၢ်မဆါ​တနံၤ​ညါအံၤ ပှၤ​ကွဲးကျိာ်ထံ လံာ်စီဆှံ​အါတက့ၢ်​န့ၣ် အဝဲသ့ၣ်​ထုးထီၣ်​ကွံာ်​ဝဲ ကစၢ်ယွၤ​အ​မံၤ ဒီး​ကွဲး​ထၢနုာ်ဝဲ​လၢ အ​မံၤလၤသၣ်ကပီၤ​လၢအမ့ၢ် ကစၢ်. တၢ်​ကွဲးကျိာ်ထံ​လၢ စိၤ​ခဲအံၤ​တနီၤန့ၣ် ထုးထီၣ်​ကွံာ်​ဝဲ တၢ်​ကတိၤ​လၢအမ့ၢ် “မံၤ” လၢ​အအိၣ်​ဖဲ ယိၤဟၣ် ၁၇:၆ အပူၤ. ဖဲန့ၣ် ယ့ၣ်ၡူး တဲဝဲလၢ “ယ​ပာ်ဖျါထီၣ်​န့ၢ်​အဝဲသ့ၣ်​လၢ န​မံၤ​လံ.” မ့မ့ၢ်​လၢ ခ့ခါ​စှီၤကျိာ် အ​တၢ်​ကွဲးကျိာ်ထံ​န့ၣ် အ​ကွဲးကျိာ်ထံ​ဝဲ လံာ်စီဆှံ​တဆၢအံၤ​လၢ “ယ​ဒုး​သ့ၣ်ညါ​လံ အီၤ​လၢ​နၤ​လံ.”

ပှၤ​ကူၣ်ဘၣ်ကူၣ်သ့​တနီၤ တဲဝဲလၢ ခီဖျိ​လၢ အဝဲသ့ၣ် မၤထွဲ​ပှၤယူဒၤဖိ အ​လုၢ်လၢ်​အဃိ ဖဲ​အဝဲသ့ၣ် ကွဲးကျိာ်ထံ လံာ်စီဆှံ​အခါ အဝဲသ့ၣ်​ထုးထီၣ်​ကွံာ် ကစၢ်ယွၤ​အ​မံၤ ဒီး​ကွဲး​ထၢနုာ်​က့ၤဝဲ​လၢ မံၤလၤသၣ်ကပီၤ လၢအမ့ၢ် “ကစၢ်.” မ့မ့ၢ် ပှၤ​ကူၣ်ဘၣ်ကူၣ်သ့ လၢ​အဂၤ​တဖၣ်န့ၣ် အဝဲသ့ၣ်​တဲဝဲလၢ ဒ်သိး​အဝဲသ့ၣ် ဆါဝဲ​လံာ်စီဆှံ ကန့ၢ်​အါအါ​အဂီၢ် အဝဲသ့ၣ်​မၤဝဲ​ဒ်န့ၣ်. * ဘၣ်ဆၣ် ပှၤလၢ​အ​တ​ပာ်ကဲ​ကစၢ်ယွၤ​ဘၣ် ဒီး​မၤထွဲ ပှၤဟီၣ်ခိၣ်ဖိ အ​လုၢ်လၢ်​တဖၣ်န့ၣ် ယ့ၣ်ၡူး​တဲဝဲလၢ အဝဲသ့ၣ် မၤတၢ်​န့ၣ်​တဘၣ်ဘၣ်. (မးသဲ ၁၅:၆) တကးဒံးဘၣ် ဘၣ်ဃးဒီး ပှၤ​ထုး​ထီၣ်က့ၤ ကစၢ်ယွၤ​အ​မံၤ ဒီး​ကွဲး​နုာ်​က့ၤ​လၢ အ​မံၤလၤသၣ်ကပီၤ​န့ၣ် လံာ်စီဆှံ​အဆၢ​လၢ က​ဆီၣ်ထွဲ အဝဲသ့ၣ်​အ​တၢ်ထံၣ်​န့ၣ် တအိၣ်​နီ​တ​ဆၢ​ဘၣ်. ပမ့ၢ်​ကွၢ် ယ့ၣ်ၡူး​ခရံာ်​န့ၣ် အအိၣ်​ဒီး အ​မံၤလၤသၣ်ကပီၤ​စ့ၢ်ကီး. အဒိ လံာ်စီဆှံ​ကိးအီၤလၢ “ကစၢ်ယွၤ​အကလုၢ်” ဒီး “စီၤပၤ​တဖၣ် အ​စီၤပၤ.” (လီၣ်ဖျါ ၁၉:၁၁-၁၆) အဃိ မ့ၢ်​ပကြၢး ထုးထီၣ်​ကွံာ် ယ့ၣ်ၡူး​အ​မံၤ ဒီး​ထၢနုာ်​ကဒါက့ၤ​အီၤ​လၢ အ​မံၤလၤသၣ်ကပီၤ​တဖၣ်န့ၣ် တ​ဖျၢၣ်​ဖျၢၣ်​ဧါ.

တၢ်ဂ့ၢ်​အံၤန့ၣ် အ​ကဲဝဲ​တၢ်ဂ့ၢ်လၢ အရ့ဒိၣ်​တခါ. ဘၣ်ဃးဒီး ပှၤ​ထုးထီၣ်​ကွံာ် ကစၢ်ယွၤ​အ​မံၤ​လၢ လံာ်စီဆှံ​အပူၤန့ၣ် ပှၤ​ဟ့ၣ်ကူၣ်​တၢ် လၢ​တၢ်​ကွဲးကျိာ်ထံ လံာ်စီဆှံ​တ​ကပၤ လၢ​အအိၣ်လၢ ကီၢ်အ့ဒံယါ​န့ၣ် တဲဝဲလၢ “ပှၤ​ဟ့ၤဒူၤ​ဖိ​တဖၣ်န့ၣ် တအဲၣ်ဒိး​သ့ၣ်ညါ​ဝဲ​ထဲ ကစၢ်ယွၤ အ​မံၤလၤသၣ်ကပီၤ​ဘၣ်. အဝဲသ့ၣ် အဲၣ်ဒိး​သ့ၣ်ညါ​ဝဲ ကစၢ်ယွၤ အ​နီၢ်ကစၢ်​အ​မံၤ. ဒီး​အဝဲသ့ၣ် မ့ၢ်​တ​သ့ၣ်ညါ ကစၢ်ယွၤ​အ​မံၤ​ဘၣ်န့ၣ် အဝဲသ့ၣ်​သ့ၣ်ညါ​ထီၣ် ကစၢ်ယွၤ​အဂ့ၢ် ဂ့ၤဂ့ၤ​တသ့ဘၣ်. အဃိန့ၣ် ပှၤ​ကိးဂၤဒဲး​လၢ အ​ဃု​ကစၢ်ယွၤ​န့ၣ် အဝဲသ့ၣ် မ့ၢ်​သ့ၣ်ညါ​ထီၣ် ကစၢ်ယွၤ​အ​မံၤ​မၣ် အဝဲသ့ၣ်​က​သ့ၣ်ညါထီၣ် ကစၢ်ယွၤ​အဂ့ၢ်​ဂ့ၤဂ့ၤ.” ဖဲ​အံၤန့ၣ် ပ​သ့ၣ်ညါဘၣ်​လၢ ကစၢ်ယွၤ​န့ၣ် ပ​တဘၣ်​ထံၣ်​အီၤ​ဒ် တၢ်​သဟီၣ်​လၢ အ​ဂံၢ်ဆူၣ်​ဒိၣ်ကတၢၢ်​တခါဘၣ်. အရ့ဒိၣ်​လၢ ပ​ကဘၣ်​သ့ၣ်ညါ​အ​မံၤ ဒီး​ထံၣ်​အီၤ​ဒ် အ​ကဲ​ပှၤ​နီၢ်ကီၢ်​တဂၤ​လၢ ပ​သ့ၣ်ညါထီၣ်​အဂ့ၢ်​သ့. (၂ မိၤၡ့ ၃၄:၆, ၇) တကးဒံးဘၣ် လံာ်စီဆှံ​တဲဝဲလၢ “ပှၤလၢ​အ​ကိးထီၣ် ယဟိဝၤ​ယွၤ​အ​မံၤ ကိးဂၤဒဲး​န့ၣ် က​တုၤလၢ တၢ်အုၣ်က့ၤခီၣ်က့ၤ​လီၤ.” (ရိမ့ၤ ၁၀:၁၃) အဃိ ပှၤ​ကိးဂၤဒဲး​လၢ အ​ဘူၣ်ထီၣ်ဘါထီၣ် ယဟိဝၤ​ယွၤန့ၣ် ကဘၣ်​သူ ကစၢ်ယွၤ​အ​မံၤ.

ဖဲ ၁၉၅၀ န့ၣ် ပ​တုၤလၢ​နီၢ်သး​ဖီတၢၣ် တခါ. ဖဲ​တၢ်​တနံၣ်န့ၣ် ပ​ထုး​ထီၣ် ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​ကြံး​ကျိာ် တ​ကတြူၢ် လၢ​ကီၤလၤဝါ​ကျိာ်. လၢခံ​အ​နံၣ်​တဆံ​အတီၢ်ပူၤန့ၣ် ပှၤ​ထုးထီၣ်​ဝဲ လံာ်စီဆှံ​လၢ ဧ့ၤဘြံၤ​ကျိာ် တ​ကတြူၢ်. မ့မ့ၢ် ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ ဒီ​တဘ့ၣ်န့ၣ် ပှၤ​ထုး​ထီၣ်​အီၤ​ဖဲ ၁၉၆၁ နံၣ်. ဒီး​တၢ်လၢ အ​လီၤ​ထုးန့ၢ်​ပသး​တမံၤ​န့ၣ် မ့ၢ်ဝဲ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လံာ်​တၢ်အၢၣ်လီၤ​အီလီၤ အ​လီၢ်လံၤ မ့တမ့ၢ် လံာ်စီဆှံ​လၢ အ​လီၢ်လံၤ​တ​ကတြူၢ်​အပူၤန့ၣ် ပှၤ​ထၢနုာ်​ကဒါက့ၤ ကစၢ်ယွၤ​အ​မံၤ “ယဟိဝၤ” က​အိၣ်ဝဲ​အဘျီ ၇,၀၀၀ ညါ. မ့မ့ၢ်​လံာ်စီဆှံ​လၢ ကြံး​ကျိာ် တ​ကတြူၢ်​အပူၤန့ၣ် * ပှၤ​က့ၤ​ထၢနုာ်​ကဒါက့ၤ ကစၢ်ယွၤ​အ​မံၤ အိၣ်ဝဲ​အဘျီ ၂၃၇ ဘျီ​ညါ​အဃိ လီၤ​သးခု​ညါ.

ပှၤ​က့ၤ​ထၢနုာ်​ကဒါက့ၤ ကစၢ်ယွၤ​အ​မံၤ​အဃိ အမၤ​လၤကပီၤ ကစၢ်ယွၤ တကးဒံးဘၣ် မၤစၢၤ​ပှၤလၢ ပကနၢ်ပၢၢ် လံာ်စီဆှံ​အခီပညီ​ဘၣ်​ဘၣ်. အဒိ ပှၤ​အါဂၤ​ကွဲးကျိာ်ထံ​ဝဲ မးသဲ ၂၂:၄၄ လၢ “ယွၤ​စံး​ဘၣ်​ယ​ကစၢ်.” (မ့ၤစံၣ်​လံာ်စီဆှံ) ဘၣ်ဆၣ် မတဂၤ​တဲ​တၢ်ဒီး​မတဂၤ​လဲၣ်န့ၣ် ပှၤ​တ​သ့ၣ်ညါဝဲ​လီၤတံၢ်​လီၤဆဲး​ဘၣ်. နီၢ်ကီၢ်န့ၣ် လံာ်စီဆှံ​တဆၢအံၤ အ​တၢ်​ကတိၤ​တဖၣ်န့ၣ် အိၣ်ပာ်စၢၤလၢ စံးထီၣ်ပတြၢၤ ၁၁၀:၁ အပူၤ​လံ. မ့မ့ၢ် ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ န့ၣ်​ပှၤ​ကွဲးကျိာ်ထံ​က့ၤဝဲ မးသဲ ၂၂:၄၄ လၢ “ယဟိဝၤ​ယွၤ တဲ​ဘၣ် ယ​ကစၢ်.” ပှၤ​ကွဲးကျိာ်ထံ​က့ၤ​အီၤ​ဒ်န့ၣ်​အဃိ ယဟိဝၤ​ယွၤ ဒီး​အ​ဖိခွါ လီၤဆီ​လိာ်​အသး​ဒ်လဲၣ်န့ၣ် ပှၤ​ဖးလံာ်​ဖိ နီၤဖး​ဝဲ​ဘၣ်.

ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ န့ၣ်​ယဟိဝၤ​ပှၤအုၣ်အသး​တဖၣ် အ​တၢးထီခိးတၢ် လံာ်စီဆှံ​ဒီး​လံာ်ဖိ​တၢ်ကရၢကရိ လၢအမ့ၢ် တၢ်ကရၢကရိ​လၢ အဘၣ်​လိာ်သး​ဒီး ပဒိၣ်​တၢ်သိၣ်တၢ်သီ​န့ၣ် ထုးထီၣ်​ဝဲ. ယဟိဝၤ​ပှၤအုၣ်အသး​တဖၣ်န့ၣ် ထုး​ထီၣ်​ရၤလီၤ​ဝဲ လံာ်စီဆှံ​လၢ ဟီၣ်ခိၣ်ဒီဘ့ၣ်ညါ အိၣ်ဝဲ​အ​နံၣ်​လၢ တကယၤ​ဘျဲၣ်လံ. ပှၤလၢ​အ​ရဲၣ်ကျဲၤ​ဝဲ​လၢ ပှၤ​က​ထုး​ထီၣ် ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ န့ၣ်​အ​ကဲဝဲ ယဟိဝၤ​ပှၤအုၣ်အသး​တဖၣ်လၢ အမၤ​တၢ်လၢ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ ကမံးတံာ်. ပှၤလၢ​အမၤ​တၢ်လၢ ကမံးတံာ်​တဖု​အံၤန့ၣ် အဝဲသ့ၣ်​တအဲၣ်ဒိး​လၢ ပှၤ​က​ထံၣ်​ဒိၣ်​အီၤ​ဘၣ်​အဃိ ဖဲ​အဝဲသ့ၣ်​အိၣ်​မူ​အခါ​မ့ၢ်ဂ့ၤ အဝဲသ့ၣ်​သံ​မ့ၢ်​ဝံၤအလီၢ်ခံ​မ့ၢ်ဂ့ၤ အဝဲသ့ၣ်​တအဲၣ်ဒိး​လၢ ပှၤ​က​ပာ်ဖျါထီၣ်​အ​မံၤ​ဘၣ်.—၁ ကရံၣ်သူး ၁၀:၃၁.

ဘၣ်မနုၤ​အဃိ လံာ်စီဆှံ​တၢ်​ကွဲးကျိာ်ထံ​တဘ့ၣ်အံၤ​န့ၣ် ပ​ကိးအီၤလၢ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လဲၣ်. ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​ပှၤ​ထုးထီၣ်​ဝဲ​ဖဲ ၁၉၅၀ နံၣ်န့ၣ် အ​တၢ်​ကတိၤ​အိးထီၣ် တဲဝဲလၢ “မံၤ​တဖျၢၣ်​လၢအမ့ၢ် ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ န့ၣ်​ပာ်ဖျါထီၣ်ဝဲလၢ ပနာ်​သပှၢ်​ကတၢၢ်​လၢ ဟီၣ်ခိၣ်သီ​လၢ ၂ ပ့းတရူး ၃:၁၃ အၢၣ်လီၤဝဲ​န့ၣ် ဘူးထီၣ်ဝဲ​သပှၢ်တၢၢ်​လံ. ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ ကမံးတံာ်​တဲဝဲလၢ “ဟီၣ်ခိၣ်​အ​လီၢ်လံၤ​လၢ ပအိၣ်​တဖျၢၣ်အံၤ​န့ၣ် က​ကတၢၢ်​ဘူးထီၣ်​ဝဲလံ. ဒီး​ဟီၣ်ခိၣ်​အသီ​လၢ အအိၣ်​ဒီး​တၢ်တီတၢ်လိၤန့ၣ် ဘူးထီၣ်လံ.” အဃိ ပှၤလၢ​အ​ကွဲးကျိာ်ထံ လံာ်စီဆှံ​တဖၣ်န့ၣ် ကဘၣ်​ကွဲးကျိာ်ထံ​ဝဲ​ဒ်သိးဒီး “လံာ်စီဆှံ အ​တၢ်မ့ၢ်တၢ်တီ” က​ဖျါ​ၡဲ​ဒိၣ်ထီၣ်​အဂီၢ်.

ပှၤ​ကွဲးကျိာ်ထံ​တၢ်ဖိ​တဖၣ် သူဝဲ​လံာ်စီဆှံ​တၢ်ကွဲး​အသး အ​ခီၣ်ထံး​လၢ ဧ့ၤဘြံၤ, အရၣ်မ့း ဒီး​ကြံး​ကျိာ် ဒ်သိး​က​ကွဲးကျိာ်ထံ​ဝဲ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​ကီၤလၤဝါ​ကျိာ်​အဂီၢ်. လံာ်စီဆှံ အ​တၢ်ကွဲး​အသး အ​ခီၣ်ထံး​တဖၣ်အံၤ ဒ်သိး​ပှၤ​ကွဲးကျိာ်ထံ​က့ၤ​အီၤ​လၢ တၢ်​ကတိၤ​လၢ ပှၤ​နၢ်ပၢၢ်​ဘၣ်​အီၤ​ညီ ဒီး​တကတီၢ်​ဃီန့ၣ် အခီပညီ​ကဘၣ်ဝဲ လီၤတံၢ်​လီၤဆဲး​အဂီၢ် ပှၤ​ကွဲးကျိာ်ထံ​တၢ်ဖိ​တဖၣ် ပလီၢ်​အသး​သပှၢ်တၢၢ်.

ပှၤ​ကူၣ်ဘၣ်ကူၣ်သ့​တနီၤန့ၣ် ပတြၢၤဝဲ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ မ့ၢ်လၢ ပှၤ​ကွဲးကျိာ်ထံ​တၢ်ဖိ​တဖၣ်န့ၣ် ကွဲးကျိာ်ထံ​ဝဲ တီတီ​လိၤလိၤ ဒီး​အခီပညီ ဘၣ်ဝဲ​လီၤတံၢ်​လီၤဆဲး. အဒိ ဘဲကၠၢၤမဲၤ ခဲဒၢၤ ခီၣ်ဖ်စတဲၤ လၢအမ့ၢ်​ပှၤ​ကူၣ်ဘၣ်ကူၣ်သ့​လၢ အ​ဃု​သ့ၣ်ညါ​မၤ​လိ ဧ့ၤဘြံၤ​ကျိာ် လၢ​အအိၣ်လၢ ကီၢ်​အံၣ်စရ့​တဂၤန့ၣ် ဖဲ ၁၉၈၉ နံၣ်န့ၣ် အဝဲ​တဲဝဲလၢ “ယၤန့ၣ် ယ​ဃု​သ့ၣ်ညါ လံာ်စီဆှံ​လၢ ဧ့ၤဘြံၤ​ကျိာ် ဒီး​တၢ်​ကွဲးကျိာ်ထံ​တဖၣ်. ဒီး​ယ​က့ၤ​ထိၣ်သတြီၤ​အီၤ​ဒီး ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​ကီၤလၤဝါ​ကျိာ်. ခီဖျိ​လၢ ယ​ထိၣ်သတြီၤ​အီၤ​ဒ်န့ၣ်​အဃိ ယ​သ့ၣ်ညါ​ဘၣ်လၢ ဟီၣ်ခိၣ်သီ တၢ်​ကွဲးကျိာ်ထံ​အံၤ ကဲဝဲ တၢ်​ကွဲးကျိာ်ထံ​လၢ ပှၤ​ကွဲးကျိာ်ထံ​အီၤ တီတီ​လိၤလိၤ ဒီး​ကဲထီၣ်​တၢ်မၤစၢၤ​လၢ ပှၤ​က​နၢ်ပၢၢ် လံာ်စီဆှံ​အဆၢ လီၤတံၢ်​လီၤဆဲး.”

ယဟိဝၤ​ပှၤအုၣ်အသး​တဖၣ်န့ၣ် ထုးထီၣ်​ဝဲ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​ကျိာ်​အဂၤ​တဖၣ်​စ့ၢ်ကီး. ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ ဒီ​တဘ့ၣ်​မ့ၢ်ဂ့ၤ, အ​ကတြူၢ်​တနီၤ​မ့ၢ်ဂ့ၤ ခဲအံၤ ပှၤ​ကွဲးကျိာ်ထံ​အီၤလၢ​ကျိာ်​ဝံၤ​ဝဲ ၂၁၀ လံ. ဒီး​ဒ်သိး ပှၤ​က​ကွဲးကျိာ်ထံ လံာ်စီဆှံ တဘ့ၣ်အံၤ လၢ​ကျိာ်​အဂၤ​အဂီၢ် ပှၤ​ဒုး​အိၣ်ထီၣ်ဝဲ ခီၣ်ဖၠူထၢၣ် အ​တၢ်ရဲၣ်တၢ်ကျဲၤ​တခါ လၢ​အ​ပာ်ဖှိၣ်​ဃာ်ဝဲ တၢ်​ကတိၤ​လၢ အ​အိၣ်လၢ​လံာ်စီဆှံ​အပူၤ​တဖၣ်. ဒီး​ပှၤ​ဒုးအိၣ်ထီၣ်​စ့ၢ်ကီး တၢ်​ကွဲးကျိာ်ထံ​ဝဲၤကျိၤ (Translation Services) ဒ်သိး​က​မၤစၢၤဝဲ ပှၤ​ကွဲးကျိာ်ထံ​တၢ်ဖိ​တဖၣ်. တကးဒံးဘၣ် ယဟိဝၤ​ပှၤအုၣ်အသး​တဖၣ် အ​ပှၤပၢဆှၢတၢ်​ကမံးတံာ်​န့ၣ် မၤသကိး​တၢ်ဒီး တၢ်ကွဲး​လံာ်​ကွဲး​လဲၢ်​ကမံးတံာ် ဒီး​ကွၢ်ထွဲဝဲ တၢ်​ကွဲးကျိာ်ထံ လံာ်စီဆှံ​အ​တၢ်မၤ​အံၤ​ဂ့ၤဂ့ၤ. ဘၣ်ဆၣ် တၢ်​ကွဲးကျိာ်ထံ လံာ်စီဆှံ​တၢ်မၤ​အံၤ ပှၤ​မၤဝဲ​ဒ်လဲၣ်.

အဆိ​ကတၢၢ်န့ၣ် ပှၤ​ဃုထၢထီၣ်ဝဲ ယဟိဝၤ​ပှၤအုၣ်အသး လၢ​အ​ဒိးဘျၢထံ​ဝံၤ​တဖၣ် ဒ်သိး​က​မၤဝဲ တၢ်​ကွဲးကျိာ်ထံ​လံာ်စီဆှံ အ​တၢ်မၤ​အံၤ. ပှၤ​ကွဲးကျိာ်ထံ​တၢ်ဖိ​တဖၣ် ထံၣ်​ဘၣ်ဝဲ​လၢ ဖဲ​အဝဲသ့ၣ်​ကွဲးကျိာ်ထံ​လံာ်စီဆှံ​အခါ အဝဲသ့ၣ်​မ့ၢ်​မၤ​သကိး​တၢ်ဒ်သိး​သိး ဒီး​တ​မၤဝဲ​ထဲ​တဂၤဘၣ်​န့ၣ် အဝဲသ့ၣ် အ​တၢ်​ကွဲးကျိာ်ထံ​န့ၣ် ဂ့ၤဒိၣ်​ဝဲ. (ကတိၤဒိ ၁၁:၁၄) ပှၤ​ကွဲးကျိာ်ထံ​တၢ်ဖိ​လၢ အ​ပၣ်ဃုာ်​လၢ တၢ်​ကွဲးကျိာ်ထံ​လံာ်စီဆှံန့ၣ် အဝဲသ့ၣ် အ​တၢ်လဲၤ​ခီဖျိ​အိၣ်ပာ်စၢၤလၢ တၢ်​ကွဲးကျိာ်ထံ​တ​ကပၤ​လံ. အဒိ တချုး​လၢ​အဝဲသ့ၣ် ကွဲးကျိာ်ထံ​လံာ်စီဆှံ ဒံးဘၣ်န့ၣ် အဝဲသ့ၣ်​ကွဲးကျိာ်ထံ​ဘၣ်ဝဲ ယဟိဝၤ​ပှၤအုၣ်အသး အ​လံာ်လဲၢ်​တဖၣ်. တကးဒံးဘၣ် ပှၤ​ကွဲးကျိာ်ထံ​တၢ်​တ​ကရူၢ်​အံၤ အဝဲသ့ၣ် ကဘၣ်​ကွဲးကျိာ်ထံ​ဝဲ လံာ်စီဆှံ​ဒ်လဲၣ် ဒီး​ကဘၣ်​သူဝဲ ခီၣ်ဖၠူထၢၣ် အ​တၢ်ရဲၣ်တၢ်ကျဲၤ​ဒ်လဲၣ်န့ၣ် အဝဲသ့ၣ် ဒိးန့ၢ်ဘၣ်​ဝဲ တၢ်သိၣ်လိ လီၤတံၢ်​လီၤဆဲး.

ပှၤ​ကွဲးကျိာ်ထံ​တၢ်ဖိ​တဖၣ်န့ၣ် ပှၤ​ဟံးစု​နဲၣ်ကျဲ​အဝဲသ့ၣ်​လၢ အဝဲသ့ၣ် အ​တၢ်​ကွဲးကျိာ်ထံ​န့ၣ် အခီပညီ ကဘၣ်​ဘၣ်​လီၤတံၢ်​လီၤဆဲး ဒီး​အကဘၣ်မ့ၢ်​တၢ်​ကွဲးကျိာ်ထံ​လၢ ပှၤ​မုၢ်ဆ့ၣ်မုၢ်ဂီၤဖိ​တဖၣ် နၢ်ပၢၢ်​ဘၣ်ဝဲ​ညီ. အဝဲသ့ၣ်​ကွဲးကျိာ်ထံဝဲ အခီပညီ​လိၤလိၤ​မ့ၢ်​သ့ ဒီး​အခီပညီ​မ့ၢ်​တ​လီၤမၢ်​ဘၣ်န့ၣ် အဝဲသ့ၣ် ကြၢး​ကွဲးကျိာ်ထံ​ဝဲ​လိၤလိၤ. အဃိ အဝဲသ့ၣ် ကွဲးကျိာ်ထံ​ဝဲ​ဒ်လဲၣ်. အဒိ ပ​ကကွၢ်​သကိး လံာ်စီဆှံ​လၢ ပ​ထုး​ထီၣ်​အီၤ အသီ​တဘ့ၣ်အံၤ. အဆိ​ကတၢၢ်န့ၣ် ပှၤ​ကွဲးကျိာ်ထံ​လံာ်စီဆှံ ကရူၢ်​တ​ကရူၢ် ဃုထၢ​ဝဲ တၢ်​ကတိၤ​လၢ​အရ့ဒိၣ် လၢ​အအိၣ်လၢ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​ကီၤလၤဝါ​ကျိာ်. ဝံၤဒီး​အဝဲသ့ၣ် ကွဲးကျိာ်ထံ​က့ၤဝဲ​လၢ ကညီ​စှီၤကျိာ်. ဒီး​ခီၣ်ဖၠူထၢၣ် အ​တၢ်ရဲၣ်တၢ်ကျဲၤ​လၢအမ့ၢ် Watchtower Translation System န့ၣ်​ပာ်ဖျါထီၣ်ဝဲ လံာ်စီဆှံ အ​တၢ်​ကတိၤ​တဖၣ်လၢ အ​လီၤဂာ်​လိာ်​အသး. တကးဒံးဘၣ် အ​ပာ်ဖျါထီၣ်​စ့ၢ်ကီး​ဝဲ ဧ့ၤဘြံၤ ဒီး​ကြံး​အ​တၢ်​ကတိၤ တ​ဖျၢၣ်​ဘၣ်​တဖျၢၣ်လၢ ပှၤ​ကွဲးကျိာ်ထံ​က့ၤ​အီၤ​လၢ ကီၤလၤဝါ​ကျိာ်. အဃိ တၢ်ရဲၣ်တၢ်ကျဲၤ​တခါ​အံၤ မၤစၢၤဝဲ ပှၤ​ကွဲးကျိာ်ထံ​တၢ်ဖိ​တဖၣ် ဒ်သိး​အဝဲသ့ၣ် က​သ့ၣ်ညါ​ဝဲ ဧ့ၤဘြံၤ ဒီး​ကြံး​အ​တၢ်​ကတိၤ လၢ​အအိၣ်လၢ လံာ်စီဆှံ​အဆၢ​လၢ​အဂၤ​တဖၣ်. ပှၤ​ကွဲးကျိာ်ထံ​တၢ်ဖိ​တဖၣ် တူၢ်လိာ်ဝဲ တၢ်​ကတိၤ​လၢ အဝဲသ့ၣ် ကွဲးကျိာ်ထံ​က့ၤဝဲ​လၢ ကညီ​စှီၤကျိာ် ဝံၤဒီး​အဝဲသ့ၣ် သူဝဲ​တၢ်ကတိၤ​တဖၣ်န့ၣ် လၢ​က​ကွဲးကျိာ်ထံ​ဝဲ လံာ်စီဆှံ တ​ဆၢ​ဘၣ်​တ​ဆၢ.

သနာ်က့ တၢ်​ကွဲးကျိာ်ထံ​လံာ်စီဆှံန့ၣ် တမ့ၢ်ထဲ​လၢ ပှၤ​ကွဲးကျိာ်ထံ​တၢ်ဖိ​တဖၣ် ကွဲး​ထၢနုာ်ဝဲ တၢ်​ကတိၤ တ​ဖျၢၣ်​ဘၣ်​တ​ဖျၢၣ်​ဘၣ်. ဒ်သိး​လံာ်စီဆှံ တ​ဆၢ​ဘၣ်​တ​ဆၢ အလီၢ်​ခံ​ဒီး​အ​မဲာ်ညါ အခီပညီ​ကဘၣ်​လီၤတံၢ်​အဂီၢ် ပှၤ​ကွဲးကျိာ်ထံ​တၢ်ဖိ​တဖၣ် ကဘၣ်​ဃုထၢဝဲ တၢ်​ကတိၤ​လၢ ကညီ​စှီၤကျိာ် လီၤတံၢ်​လီၤဆဲး. တကးဒံးဘၣ် ပှၤ​ကွဲးကျိာ်ထံ​တၢ်ဖိ​တဖၣ် ကဘၣ်​ရဲၣ်လီၤ တၢ်​ကတိၤ​အ​ဖျၢၣ်​တဖၣ် လၢ​အလီၢ်​အကျဲ ဒ်​အ​နီၢ်ကစၢ်​ကျိာ် အ​ကြၣ်မၢ်​အိၣ်ဝဲ​အသိး. အဝဲသ့ၣ်​မ့ၢ်​မၤ​ဒ်န့ၣ်​မၣ် ပှၤ​ကနၣ်​က​လိၤ ဒီး​ပှၤ​ဖးဘၣ်​အီၤ ကညီ​ဝဲ. ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​ကညီ​စှီၤကျိာ် တဘ့ၣ်အံၤ က​မၤစၢၤဝဲ ပှၤဖးလံာ်ဖိ​တဖၣ် ဒ်သိး​အဝဲသ့ၣ် ဖးဘၣ်ဝဲ​ကညီ, နၢ်ပၢၢ်​ဝဲ​ကညီ​ဒီး​က​ၡဲ​အဂီၢ်. ဒီး​ဒ်သိး​တၢ်ကွဲး​အ​ခီၣ်ထံး အခီပညီ တ​လီၤမၢ်​တဂ့ၤ​အဂီၢ် လံာ်စီဆှံ​တဘ့ၣ်အံၤ ပှၤ​ကွဲးကျိာ်ထံ​အီၤ တီတီ​လိၤလိၤ. လံာ်စီဆှံ တၢ်​ကွဲးကျိာ်ထံ​တဘ့ၣ်အံၤ က​ကဲထီၣ်​ဂ့ၤဂ့ၤ​အဂီၢ် ပှၤ​ကွဲးကျိာ်ထံ​တၢ်ဖိ​တဖၣ် ဘၣ်​မၤတၢ်​ဆူၣ်​မး. *

ပ​အဲၣ်ဒိး​ဟ့ၣ်ဂံၢ်ဟ့ၣ်ဘါ​နၤ​လၢ န​က​ဖး​ကွၢ် ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ တဘ့ၣ်အံၤ. န​ဖး​အီၤ​လၢ အ့ထၢၣ်နဲး, (online) အဖီခိၣ်, JW Library app အပူၤ မ့တမ့ၢ် န​ဟံးန့ၢ်အီၤ​လၢ ယဟိဝၤ​ပှၤအုၣ်အသး​တဖၣ် အ​တၢ်အိၣ်ဖှိၣ်​အလီၢ်​သ့. န​က​ထံၣ်ဘၣ်​လၢ ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ လၢ​န​ကျိာ်​တဘ့ၣ်အံၤ​န့ၣ် အဘၣ်ဝဲ​လီၤတံၢ်လီၤဆဲး. ဒီး​ခီဖျိ​လၢ ပ​ဒိးန့ဘၣ် ဟီၣ်ခိၣ်သီ တၢ်​ကွဲးကျိာ်ထံ​လံာ်စီဆှံ အဃိ ပ​သ့ၣ်ညါဘၣ်​လၢ ပ​တုၤလၢ နီၢ်သး​အ​ဖီတၢၣ် တခါ​က​ဒီး​လံ.