Kasim Rid we na di meyɔ fɔ Atlanta siti, Jɔjia, Amɛrika bin tɔk se: “A salut di wan dɛn de na una ɔganayzeshɔn fɔ di zil we dɛn gɛt fɔ sav Gɔd. Di wok we una de du ɛn di tin we una de gi fɔ ɛp una kɔmpin Jiova Witnɛs dɛn ɛn ɔda pipul dɛn rili fayn ɛn wi gladi fɔ dat.”

Di lɛta we dɛn bin rayt bin wɛlkɔm Jiova Witnɛs dɛn fɔ di tri kɔnvɛnshɔn dɛn we dɛn fɔ gɛt de.

Semweso, di Atlanta Siti Kansul bin wɛlkɔm di wan dɛn we atɛnd di kɔnvɛnshɔn. I bin tɔk se: “Na lɛk et milyɔn Jiova Witnɛs dɛn de na di wɔl, dɛn pipul dɛn ya kɔmɔt . . . difrɛn say dɛn ɛn dɛn de tɔk difrɛn langwej dɛn, bɔt pan ɔl dat una ɔl gɛt wan gol . . . dat na fɔ ɔnɔ Jiova, di wan we mek dɛn rayt di Baybul, ɛn di wan we mek ɔl tin.”

Dɛn bin gɛt tri kɔnvɛnshɔn dɛn insay Julay ɛn Ɔgɔst 2014, dɛn bin ol tu insay Inglish ɛn di ɔda wan insay Spanish. Di wan dɛn we bin atɛnd bin kɔmɔt na lɛk 28 kɔntri dɛn so. Dɛn bin translet fɔ di wan dɛn we kɔmɔt na Rɔshia ɛn Jepan so dat dɛnsɛf go bɛnifit. Na lɛk 95,689 bin atɛnd di tri kɔnvɛnshɔn dɛn.

Insay 2014, Jiova Witnɛs dɛn bin gɛt 24 intanashɔnal kɔnvɛnsshɔn dɛn na 9 kɔntri dɛn; dɛn bin gɛt 16 insay Amɛrika