Dɛn no Jiova Witnɛs dɛn ɔlsay fɔ dɛn transleshɔn wok. Bay Novɛmba 2014 wi bin dɔn translet di Baybul insay 125 langwej dɛn ɛn wi buk ɛn magazin dɛn insay 742 langwej dɛn. Wi kin translet fim dɛn bak. Frɔm Janwari 2015, di fim we gɛt di taytul Wetin Kin Apin na Kiŋdɔm Ɔl? bin de insay 398 langwej dɛn ɛn di fim we gɛt di taytul Wetin Mek I Fayn fɔ Stɔdi di Baybul? de insay 569 langwej dɛn. Wetin mek ɛn aw wi du ɔl dis?

Insay Mach 2014, di Gɔvnin Bɔdi fɔ Jiova Witnɛs dɛn bin tɛl di branch ɔfis dɛn we de ɔlsay na di wɔl fɔ mek fim dɛn we go ɛp fɔ mek pipul dɛn lɛk fɔ stɔdi di Baybul.

Na bɔku tin dɛn kin du fɔ ebul translet fim. Fɔs, di transleshɔn tim fɔ di langwej de tranlet di skript. Afta dat, dɛn kin pik pipul dɛn we sabi tɔk di langwej fɔ ɔl di difrɛn vɔys dɛn na di fim. Dɔn di odio/vidio tim de rɛkɔd wetin di transleshɔn tim dɔn translet, na dɛn de ɛdit wetin dɛn dɔn rekɔd ɛn prosɛs di raytin dɛn we de na di skrin. Afta ɔl dat, dɛn kin wok pan di tɛks ɛn di fim fɔ mek wan fayl we dɛn go ɔplod na di wɛbsayt.

Sɔm branch dɛn gɛt studio fɔ rɛkɔd ɛn dɛn dɔn tren pipul dɛn fɔ du dis wok. Wetin dɛn kin du fɔ langwej dɛn we dɛn kin tɔk ɛn translet na say dɛn we nɔ de insay di men branch?

Odio tɛknishian dɛn kin go wok ɔlsay na di wɔl. Di pɔsin de yuz mayk ɛn laptɔp kɔmpyuta we gɛt sɔftwia fɔ rɛkɔd, fɔ sɛt ɔp in studio na ɔfis, Kiŋdɔm Ɔl, ɔ na pɔsin in os. Na pipul dɛn we de tɔk di langwej na dɛn kin rid, koch, ɛn chɛk. We i dɔn wit wan langwej, i kin pak in tin dɛn ɛn muf go ɔda say.

We dɛn dɔn du am so dɛn dɔn ebul fɔ mek bɔku fim dɛn insay bɔku difrɛn langwej dɛn pas aw i bin dɔn de bi trade.

I rili fayn fɔ si aw pipul dɛn de gladi fɔ wach dɛn fim dɛn ya. Fɔ bɔku pipul dɛn na wi fim dɛn na di fɔs fim we dɛn dɔn si insay dɛn langwej.

Wan pan di langwej dɛn we dɛn dɔn rɛkɔd pan na di Pitjantjatjara, langwej we na lɛk 2,500 pipul dɛn de tɔk am na Ɔstrelia. Na Alis Spring we de na di Nɔt Tɛritori na de dɛn du di rekɔdin. Kalan Tɔmɔs we ɛp fɔ mek di rɛkɔdin bin tɔk se “Pipul dɛn bin gladi fɔ gɛt dɛn fim dɛn ya. Di pipul dɛn we de tɔk dis langwej nɔ bin want fɔ krap nia di tablɛt ɛn dɛn bin de aks usay dɛn go gɛt mɔ pan dɛn fim dɛn ya. Dɛn nɔ gɛt bɔku buk dɛn insay dɛn langwej. We dɛn yɛri am ɛn mɔ we dɛn si am dɛn bin rili sɔprayz.”

Tu Jiova Witnɛs dɛn bin travul wit kenu na wan riva. Dɛn stɔp na wan Pigmi vilej ɛn tɔk to di chif, we na bin ticha na di skul we bin de na di vilej. Afta dɛn no se di chif de tɔk Basa langwej, di brɔda dɛn yuz tablɛt fɔ ple di fim we nem Wetin Mek I Fayn fɔ Stɔdi di Baybul? fɔ am insay in langwej. Dis bin mek di chief gladi ɛn i aks fɔ mek dɛn gi am buk ɛn magazin dɛn we dɛn print.

Na wan vilej na Indonishia, di wan we bin de bifo pan Gɔd biznɛs na di vilej nɔ bin lɛk Jiova Witnɛs dɛn, ɛn i bin de bɔn di buk ɛn magazin dɛn we dɛn bin de gi na di eria. Ɔda pipul dɛn na di vilej bin de trɛtin fɔ bɔn di Kiŋdɔm Ɔl. Afta dat, 4 polisman dɛn go na wan Jiova Witnɛs in os ɛn bigin aks in ɛn in famili bɔku bɔku kwɛstyɔn dɛn. Dɛn bin want fɔ no wetin de apin insay Kiŋdɔm Ɔl, so di sista sho dɛn di fim we nem Wetin Kin Apin na Kiŋdɔm Ɔl insay Indonishian.

Afta dɛn dɔn wach di fim dɔn, wan pan di polisman dɛn tɔk se: “Naw a dɔn si se pipul dɛn nɔ ɔndastand una ɛn dɛn nɔ rili sabi una.” Di ɔda polisman aks se: “A go ebul gɛt di fim so dat a go sho am to ɔda pipul dɛn? Dis fim tɔk di tru bɔt una.” Di polis dɛn de tink di rayt we bɔt Jiova Witnɛs dɛn ɛn na dɛn de protɛkt dɛn.

If yu nɔ wach dɛn fim dɛn ya yet, duya wach dɛn insay yu yon langwej!