Na mɔni dɛn we Jiova Witnɛs dɛn kin gi na in wi de yuz fɔ sɔpɔt wi prichin wok. Wi nɔ kin pas plet we wi kin gɛt wi mitin dɛn ɛn wi nɔ de aks fɔ tayt. (Matyu 10:7, 8) Bifo dat, wi gɛt bɔks dɛn na wi Kiŋdɔm Ɔl dɛn usay pɔsin kin put ɔmɔs i want fɔ put. Di wan dɛn we kin gi nɔ kin rayt dɛn nem.

 Wan rizin we mek wi ebul fɔ manej di mɔni dɛn we wi de gɛt, na bikɔs wi nɔ de pe wi ɛlda dɛn. Apat frɔm dat, dɛn nɔ de pe Jiova Witnɛs dɛn fɔ we dɛn de prich frɔm os to os, ɛn na simpul bildin dɛn wi kin mek.

 Ɛni mɔni we dɛn sɛn to di branch ɔfis na in dɛn kin yuz fɔ ɛp wi brɔda dɛn we trɔbul mit dɛn, ɛn fɔ ɛp mishɔnari ɛn travlin ovasia dɛn. Dɛn kin yuz am bak fɔ bil Kiŋdɔm Ɔl dɛn na kɔntri dɛn we nɔ gɛt bɛtɛ mɔni, ɛn fɔ print ɛn ship Baybul dɛn ɛn ɔda buk dɛn we de tɔk bɔt di Baybul.

 Ɛnibɔdi kin disayd fɔ insɛf if i want fɔ put mɔni fɔ mek dɛn yuz na di kɔngrigeshɔn ɔ fɔ mek dɛn yuz am fɔ sɔpɔt di wok na difrɛn say dɛn na di wɔl. Ɔ if di pɔsin want i kin put fɔ ɔltu. Ɛni kɔngrigeshɔn kin mek ripɔt fɔ di mɔni dɛn we dɛn kin gɛt.