Wetin di Baybul Se Bɔt Nyuklia Wɔ?
Di neshɔn dɛn we na wɔl pawa stil de mek ɛn kip nyuklia wɛpɔn dɛn, ɛn dis dɔn mek nyuklia wɔ de kɔntinyu fɔ trɛtin di wɔl we wi de. Pipul dɛn de wɔri se di mɔ we nyuklia wɛpɔn dɛn de bɔku, na di mɔ chans de fɔ lɛ dɛn yuz dɛn fɔ fɛt nyuklia wɔ. Pipul dɛn ivin de fred se if wan kɔntri yuz jɔs wan pan dɛn nyuklia bɔm, di ɔda kɔntri dɛn go ib dɛn yon nyuklia bɔm dɛn ɛn dis go mek di wan ol wɔl pwɛl kpatakpata. Di Bulletin of the Atomic Scientists tɔk se, “i pɔsibul se nyuklia wɔ go apin ɛnitɛm” na di wɔl.
Fɔ se nyuklia wɔ go apin? If dat apin, dis wɔl go sev? Aw wi go bia we wi de wɔri bɔt nyuklia wɔ? Wetin di Baybul se?
Insay dis atikul
Fɔ se di Baybul bin dɔn tɔk se nyuklia wɔ go apin?
Di Baybul nɔ tɔk bɔt nyuklia wɔ. Bɔt i tɔk bɔt aw pipul dɛn go biev ɛn di tin dɛn we go bi insay wi tɛm, ɛn dat go mek i pɔsibul fɔ lɛ nyuklia wɔ apin.
Lɛ wi luk dɛn Baybul vas dɛn ya we de dɔŋ ɛn kɔmpia dɛn wit wetin de apin tide na di wɔl:
Baybul vas dɛn: Jizɔs in disaypul dɛn aks am se: “Tɛl wi, ustɛm dɛn tin ya go bi, ɛn us sayn go sho se yu de wit wi ɛn di tɛm want fɔ dɔn?” Jizɔs tɛl dɛn se: “Wan neshɔn go fɛt ɔda neshɔn ɛn wan kiŋdɔm go fɛt ɔda kiŋdɔm.”—Matyu 24:3, 7.
Tin dɛn we de apin na di wɔl: Kɔntri dɛn na di wɔl, ɛn ivin di wan dɛn we ebul mek nyuklia wɛpɔn dɛn, bɔku tɛm dɛn kin lɛk fɔ yuz wɛpɔn dɛn fɔ fɛt.
“Dɛn bien tɛm ya di wɔl jɔs de bad-ɔf mɔ ɛn mɔ, ɛn plɛnti fɛt-fɛt de apin.”—The Armed Conflict Location & Event Data Project.
Baybul vas: “Dyurin di ɛnd, . . . [di kiŋ na di nɔt] ɛn di kiŋ na di sawt go de push dɛnsɛf.”—Daniɛl 11:40.
Tin dɛn we de apin na di wɔl: Jɔs lɛk aw di Baybul bin tɔk, kɔntri dɛn ɛn di wan dɛn we de sɔpɔt dɛn, go fɛt dɛnsɛf fɔ gɛt mɔ pawa ɔ fɔ sho udat gɛt pawa pas ɔl. Pan ɔl we di wan dɛn we de mek dɛn nyuklia wɛpɔn dɛn tide nɔ de atak dɛnsɛf fes-to-fes, bɔt dɛn stil de kɔntinyu fɔ mek nyuklia wɛpɔn dɛn we rili pawaful.
“Insay di tɛn ia we dɔn pas, neshɔn dɛn we na wɔl pawa de sɔpɔt difrɛn kɔntri dɛn we de pan fɛt-fɛt ɛn wi dɔn si se dis de apin mɔ ɛn mɔ.”—The Uppsala Conflict Data Program.
Baybul vas dɛn: “Bɔt no se insay di las dez, tin go tranga ɛn bad. Pipul dɛn . . . . nɔ go de agri wit ɔda pipul dɛn, dɛn go de pwɛl pɔsin in nem, dɛn nɔ go ebul kɔntrol dɛnsɛf, dɛn go wayl.”—2 Timoti 3:1-3.
Tin dɛn we de apin na di wɔl: Jɔs lɛk aw bɔku pipul dɛn nɔ de gri wit dɛn kɔmpin dɛn tide, na di sem tin di wan dɛn we de rul di wɔl de du. Bifo dɛn sidɔm ɛn sɛtul dɛn prɔblɛm dɛn pisful wan, dɛn kin disayd fɔ trɛtin dɛnsɛf ɔ fɛt. Bikɔs ɔf dat, i kin mek mɔ chans de fɔ lɛ nyuklia wɔ apin.
“If dɛn nɔ fɛn we fɔ gɛt wanwɔd, di wɔ dɛn we go apin go bad-ɔf pas di wan dɛn we bin dɔn bi.”—S. Saran and J. Harman, World Economic Forum.
Fɔ se Gɔd go alaw fɔ lɛ nyuklia wɔ apin?
Di Baybul nɔ tɔk bɔt dat. Bɔt i tɔk se “fiaful tin dɛn” ɔ tin dɛn we de mek pipul dɛn fred go apin insay wi yon tɛm. (Lyuk 21:11) Wan pan dɛn fiaful tin dɛn ya na we dɛn bin ib atɔmik bɔm dɛn insay Wɔl Wɔ II. Di Baybul de ɛksplen wetin mek Gɔd de alaw wɔ dɛn fɔ apin. Fɔ lan mɔ, wach di vidio we gɛt di taytul Wetin Mek Gɔd de Alaw Wi fɔ Sɔfa?
Fɔ se dis wɔl go sev?
Yɛs. IIɛksɛf mɔtalman yuz nyuklia wɛpɔn dɛn bak, Gɔd nɔ go alaw dɛn fɔ dɔnawe wit di wan ol wɔl. Di Baybul nɔ jɔs tɔk bɔt aw dis wɔl go sev pan ɔl we dɛn want fɔ dɔnawe wit am, bɔt i tɔk bak se mɔtalman gɛt fɔ de na dis wɔl sote go.
Sɔm pipul dɛn tink se, di pipul dɛn we go lɛf tumara bambay nɔ go bɔku, ɛn afta nyuklia wɔ go dɔn pwɛl di wɔl i nɔ go izi fɔ lɛ pipul dɛn liv de igen. Bɔt di Baybul tɛl wi se Gɔd go mek ɔltin bak we dɛn go dɔn pwɛl na di wɔl.
Gɔd want mek wi de na dis fayn wɔl wit gladi-at
Di Wan we mek ɔltin dɔn dizayn di wɔl wan kayn we we go mek i tɔn bak to aw i bin de bifo dɛn pwɛl am. Dɔn wi no bak se, Gɔd go yuz in pawa fɔ mek di wɔl fayn bak, we mɔtalman go de de sote go.—Sam 37:11, 29; Rɛvɛleshɔn 21:5.
Aw wi go bia we wi de “wɔri bɔt nyuklia wɔ”?
We sɔm pipul dɛn de “wɔri bɔt nyuklia wɔ,” i kin mɔna dɛn te dɛn sik bikɔs dɛn de “fred nyuklia wɔ ɛn di bad bad tin dɛn we go apin.” Di prɔmis ɛn advays dɛn na di Baybul kin ɛp di wan dɛn we de fred nyuklia wɔ fɔ bia, ɛn mek dɛn nɔ fred tumɔs. Aw?
Di Baybul tɔk bɔt wan wɔndaful op fɔ di wɔl ɛn di wan dɛn we go de de tumara bambay. We wi lan bɔt dis op, i kin tan lɛk “ankɔ fɔ wi layf,” ɛn mek lɛ wi nɔ wɔri pasmak. (Ibruz 6:19, futnot) Wi kin lɛf fɔ wɔri tumɔs bak, bay we wi nɔ de pe tumɔs atɛnshɔn to di tin dɛn we de apin ɛvride ɛn bad tin dɛn we sɔntɛm go apin tumara bambay. Jɔs lɛk aw Jizɔs bin se “ɛnide gɛt in yon prɔblɛm.”—Matyu 6:34.
Na dat mek i fayn fɔ lɛ wi ɔl tray fɔ de kia bɔt di we aw wi de tink ɛn fil. Wi kin du dis bay we wi avɔyd fɔ de rid, wach ɔ lisin ɔltɛm to nyuz bɔt nyuklia wɔ we go mek wi wɔri pasmak. Dis nɔ min se wi nɔ bisin bɔt wetin de apin na di wɔl. Bifo dat, dɛn tin ya de ɛp wi fɔ lɛ wi nɔ tink tumɔs bɔt tin dɛn we wi nɔ ebul kɔntrol ɛn we sɔntɛm nɔ go ɛva apin.
Lɛ wi lɛf fɔ de lisin to bad nyuz ɔltɛm ɛn pe atɛnshɔn pan di gud tin dɛn we de apin na yu layf.
Di Baybul de gi wi op se bɛtɛ go de tumara bambay ɛn wi kin abop pan am
We wi go de lan mɔ bɔt di tin dɛn we Gɔd dɔn prɔmis, dat de gi wi op, mek wi gladi, ɛn gɛt kolat.
Fɔ se di Baybul bin dɔn tɔk se nyuklia wɔ na Amagɛdɔn?
Sɔm pipul dɛn tink se Amagɛdɔn na nyuklia wɔ we go afɛkt di wan ol wɔl. Wan dawt nɔ de se sɔm pipul dɛn de tink bɔt di bad bad tin dɛn we go apin da tɛm de.
Bɔt di Baybul de yuz di wɔd “Amagɛdɔn” fɔ tɔk bɔt wɔ we di “kiŋ dɛn na di wan ol wɔl”, ɔ mɔtalman gɔvmɛnt dɛn, ɛn Gɔd go fɛt. a (Rɛvɛleshɔn 16:14, 16) Amagɛdɔn nɔ go kil pipul dɛn ɔ pwɛl di wɔl jɔs lɛk dat lɛk aw nyuklia bɔm kin du. Bifo dat, Gɔd go yuz Amagɛdɔn fɔ dɔnawe wit wikɛd pipul dɛn nɔmɔ ɛn dat go briŋ tru tru pis ɛn natin nɔ go de fɔ fred igen.—Sam 37:9, 10; Ayzaya 32:17, 18; Matyu 6:10.
Wetin di Baybul se bɔt aw wɔ go dɔn?
Jiova b Gɔd go sho in pawa to ɔl di neshɔn dɛn we de fɛt wɔ bay we i gɛt fɔ stɔp di wɔ dɛn ɛn pwɛl ɔl di wɛpɔn dɛn we dɛn de yuz fɔ fɛt. I go yuz in Kiŋdɔm fɔ du dis, we na in gɔvmɛnt we de na ɛvin we gɛt fɔ kɔntrol di wan ol wɔl.—Daniɛl 2:44.
Gɔd in Kiŋdɔm go tich pipul dɛn aw fɔ liv pisful wan ɛn gɛt wanwɔd. Bikɔs na wangren gɔvmɛnt gɛt fɔ de rul di wan ol wɔl, dat go mek prɔblɛm ɛn fɛt-fɛt nɔ go de na di wɔl igen. Pipul dɛn nɔ go lan fɔ fɛt wɔ igen! (Mayka 4:1-3) Wetin go apin bak? “Ɔlman go liv pisful wan ɔnda in yon vayn ɛn fig stik dɛn, ɛn nɔbɔdi nɔ go mek i fred.”—Mayka 4:4, Today’s English Version.
a Rid di atikul we gɛt di taytul “What Is the Battle of Armageddon?”
You May Also Like
DI WACHTAWA
Fɔ Wɔri bɔt Denja
Wetin go ɛp yu fɔ bia wit wɔ, kraym, dɛn blak blak smok we de ambɔg layf, dɛn sik we de prɛd ɛn we di wɛda kin chenj
IMPƆTANT BAYBUL TICHIN DƐN
Wetin na Gɔd in Kiŋdɔm?
Di tɛm we Jizɔs bin de na di wɔl, i bin tɔk bɔt Gɔd in Kiŋdɔm pas ɛni ɔda tin. Fɔ lɔng tɛm, di wan dɛn we de fala Jizɔs dɔn pre fɔ mek da Kiŋdɔm de kam.
