We wi sabi pɔsin in kwaliti dɛn, dat de mek wi no di pɔsin mɔ, ɛn gɛt tayt padi biznɛs wit am. Semweso, di mɔ wi de sabi Jiova in kwaliti dɛn, na di mɔ wi de no am, ɛn gɛt tayt padi biznɛs wit am. Pan ɔl Gɔd gɛt bɔku wɔndaful kwaliti dɛn, i gɛt 4 men wan dɛn. Dat na, in pawa, sɛns, jɔstis, ɛn lɔv.

“E PAPA GƆD [Jiova, NWT]! . . . Na yu mek ɔp di klawd ɛn di wɔl wit yu big big pawa.”​—JƐRIMAYA 32:​17.

Di tin dɛn we Gɔd mek de sho se i gɛt pawa. Fɔ ɛgzampul, if yu tinap na do santɛm we di ples brayt, wetin yu kin fil na yu skin? Di san kin wam yu nɔto so? Da we aw yu kin fil na wan tin we de sho se Jiova gɛt pawa. Bɔt aw pawaful di san bi? Wata de bwɛl we i rich 100 digri. Bɔt midul di san kin wam lɛk 150,000 tɛm pas dat. Di pawa we di san de pul ɛvri sɛkɔn ikwal to di pawa we bɔku bɔku pawaful bɔm dɛn gɛt we dɛn ib dɛn togɛda.

Bɔt stil, bɔku bɔku sta dɛn de na di skay we big pas di san. Sayɛntist dɛn se wan pan di big sta dɛn we nem UY Scuti, rili big pas di san fa fawe. If yu put UY Scuti usay di san de, i go ful-ɔp di ath ɛn ivin pas usay Jupita de. Sɔntɛm dat de ɛp wi fɔ rili ɔndastand wetin Jɛrimaya bin tɔk bɔt Jiova fɔ se i mek di ɛvin ɛn di ath, wit in big big pawa.

Aw wi de bɛnifit frɔm Gɔd in pawa? Mɔtalman abop pan di tin dɛn we Gɔd mek lɛk di san ɛn ɔl di ɔda wɔndaful tin dɛn we de na di wɔl fɔ mek dɛn ebul fɔ liv. Apat frɔm dat, Gɔd de yuz in pawa fɔ bɛnifit mɔtalman dɛn wan bay wan. Aw i de du dat? Trade trade, Gɔd bin gi Jizɔs pawa fɔ pafɔm mirekul dɛn. Di Baybul se: “Di wan dɛn we blayn de si naw, di wan dɛn we nɔ de waka fayn de waka fayn, di wan dɛn we gɛt lɛprɔsi de wɛl, di wan dɛn we dɛf de yɛri, di wan dɛn we dɔn day de gɛt layf bak.” (Matyu 11:​5) Bɔt wetin i de du insay wi tɛm? Di Baybul se: “I de gi di wan we wik, pawa. . . . Di wan dɛn we biliv PAPA GƆD [Jiova, NWT] de gɛt frɛsh trɛnk.” (Ayzaya 40:​29, 31) Gɔd ebul fɔ gi wi di “pawa we pas mɔtalman in yon” fɔ ebul fɔ bia wit di prɔblɛm dɛn we de mit wi na layf. (2 Kɔrintians 4:​7) Yu nɔ go want fɔ bi tayt padi to Gɔd we de sho yu lɔv bay we i de yuz in bɔku bɔku pawa fɔ ɛp yu?

“PAPA GƆD [Jiova, NWT] yu de du bɔku tin! Bikɔs yu gɛt sɛns.”​—SAM 104:​24.

Di mɔ wi de lan bɔt di tin dɛn we Gɔd mek, na di mɔ wi de kɔle di kayn we aw i gɛt sɛns. Sɔm sayɛnsman dɛn kin stɔdi di tin dɛn we Gɔd mek ɛn kɔpi am fɔ mek dɛn yon dizayn dɛn. Dɛn dɔn kɔpi frɔm di tin dɛn we Jiova mek fɔ mek tin dɛn lɛk fasina ɛn iaroplen.

Di we aw Gɔd mek mɔtalman bɔdi bak na ɔda tin we de sho se i rili gɛt sɛns. Fɔ ɛgzampul, lɛ wi tɔk bɔt di we aw yɔŋbebi in bɔdi de gro. Di yɔŋbebi kin bigin fɔ gro frɔm wan sɛl we fatalayz, we gɛt ɔl wetin i nid fɔ gro. Da wan sɛl de kin divayd ɛn tɔn to difrɛn difrɛn sɛl dɛn we fiba. We di rayt tɛm rich, di sɛl dɛn kin bigin ɛn mek difrɛn difrɛn pat dɛn na di bɔdi lɛk di blɔd sɛl, nav sɛl, ɛn bon sɛl dɛn. I nɔ kin te igen, i kin bigin fɔ gɛt difrɛn difrɛn ɔgan dɛn we de bigin fɔ wok fayn. Insay jɔs nayn mɔnt, da wan sɛl de gro ɛn tɔn to yɔŋbebi we gɛt bɔku bɔku sɛl dɛn na in bɔdi. Di sɛns we Jiova yuz fɔ mek mɔtalman bɔdi go mek wi gri wit wetin wan pan di man dɛn we rayt di Baybul bin tɔk we i se: “A go prez yu bikɔs aw yu mek mi na mirekul.”​—Sam 139:​14.

Aw wi de bɛnifit frɔm Gɔd in sɛns? Di Wan we mek wi no wetin wi nid fɔ mek wi gladi. Bikɔs Gɔd gɛt bɔku bɔku sɛns ɛn i ɔndastand ɔltin, i go ebul fɔ gi wi fayn advays insay in Wɔd, di Baybul. Fɔ ɛgzampul, i ɛnkɔrej wi se: ‘Una kɔntinyu fɔ . . . fɔgiv una kɔmpin dɛn fɔ fri.’ (Koloshians 3:​13) Yu nɔ tink se dat na fayn advays? Yɛs, na fayn advays. Dɔktɔ dɛn dɔn kam fɔ si se we pɔsin de fɔgiv, dat de ɛp am fɔ gɛt gud slip ɛn i go ridyus in blɔd prɛzhɔ. I go ɛp bak fɔ ridyus bɔku sik dɛn we pipul dɛn kin gɛt. Gɔd tan lɛk wi padi we lɛk wi, we gɛt sɛns, ɛn we nɔ de ɛva stɔp fɔ gi wi advays we de ɛp wi ɛn bɛnifit wi. (2 Timoti 3:​16, 17) Yu nɔ go want fɔ gɛt da kayn padi de?

“Jiova lɛk fɔ du tin tret.”​—SAM 37:​28, NWT

Gɔd de du wetin rayt ɔltɛm. Infakt, “i nɔ ɛva pɔsibul fɔ lɛ di tru Gɔd du bad, ɛn di Ɔlmayti nɔ de ɛva du rɔng!” (Job 34:​10, NWT) Jiova de jɔj di rayt we ɔltɛm, ɛn wan pan di man dɛn we rayt di sam buk bin rayt se: Jiova “de trit ɔlman, wan.” (Sam 67:​4) Bikɔs Jiova de “luk insay pɔsin in at,” pɔsin nɔ de ebul ful am bay we i mek ipokrit; i ebul fɔ no di tru ɔltɛm ɛn jɔj di rayt we. (Fɔs Samiɛl 16:​7) Apat frɔm dat, Gɔd no bɔt ɔl di bad bad tin dɛn ɛn di kɔrɔpshɔn we de apin na di wɔl, ɛn i dɔn prɔmis se i nɔ go te igen ‘i go pul ɔl di bad wan dɛn kɔmɔt na di land.’​—Prɔvabs 2:​22.

Bɔt Gɔd nɔto wikɛd jɔj we jɔs de luk fɔ we fɔ pɔnish pipul dɛn. Sɔntɛnde, i kin sho sɔri-at. Di Baybul se: “PAPA GƆD [Jiova, NWT] gɛt sɔri-at bad,” ɛn i de ivin sɔri fɔ di wikɛd wan dɛn if dɛn rili sho se dɛn dɔn ripɛnt. Yu nɔ tink se dat na tru jɔstis?​—Sam 103:​8; 2 Pita 3:​9.

Aw wi de bɛnifit frɔm Gɔd in jɔstis? Di apɔsul Pita bin rayt se: “Gɔd nɔ de tek wan pɔsin bɛtɛ pas ɔda pɔsin, bɔt na ɛni neshɔn, di man we de fred Gɔd ɛn du wetin rayt, na in Gɔd de tek as in yon.” (Akt 10:​34, 35) Wi de bɛnifit frɔm Gɔd in jɔstis bikɔs I nɔ de ɛva tek wan pɔsin bɛtɛ pas ɔda pɔsin ɔ trit wan pɔsin fayn pas di ɔda wan. I go tek wi as in yon ɛn wi go ebul fɔ wɔship am ilɛk us kɔlɔ wi gɛt, us kɔntri wi kɔmɔt, ɔmɔs buk wi lan, ɔ udat wi bi.

Bikɔs Gɔd want fɔ mek wi ɔndastand ɛn bɛnifit frɔm in jɔstis, na dat mek i gi wi kɔnshɛns. Di Baybul se di kɔnshɛns tan lɛk lɔ ‘na wi at’ ɛn i kin bi witnɛs fɔ sho if wi de du wetin rayt ɔ rɔŋ. (Romans 2:​15) Aw wi de bɛnifit? If wi tren wi kɔnshɛns fayn, i kin mek wi nɔ du wetin bad ɛn wi kin trit pipul dɛn fia wan. Ɛn if wi mek mistek, i go mek wi ripɛnt ɛn lɛf fɔ du di bad tin dɛn we wi bin de du. Fɔ tru, we wi ɔndastand di we aw Gɔd de du tin tret, dat de ɛp wi fɔ kam nia am!

“Gɔd na lɔv.”​—1 JƆN 4:​8.

Gɔd gɛt pawa, sɛns, ɛn i de du tin tret, bɔt di Baybul nɔ wande se Gɔd na pawa, sɛns, ɔ jɔstis. Bɔt i se Gɔd na lɔv. Wetin mek? Na bikɔs Gɔd in pawa na in de mek i ebul fɔ du sɔntin ɛn in jɔstis ɛn in sɛns na in de gayd di we aw i de du tin. Bɔt na lɔv de muv Jiova fɔ du sɔntin. So lɔv de afɛkt ɔl wetin i de du.

Pan ɔl we Jiova nɔ nid ɛnibɔdi ɔ ɛnitin, in lɔv bin muv am fɔ mek di enjɛl dɛn na ɛvin ɛn mɔtalman dɛn na dis wɔl fɔ mek dɛn go bɛnifit ɛn ɛnjɔy in lɔv ɛn we i de kia fɔ dɛn. I mek di wɔl as di bɛst ples fɔ lɛ mɔtalman liv. Ɛn i de kɔntinyu fɔ sho se i lɛk ɔl mɔtalman bay we “i de mek in san shayn pan di wikɛd pipul dɛn ɛn di gud pipul dɛn, ɛn i de mek ren kam pan di pipul dɛn we de du wetin rayt ɛn di wan dɛn we nɔ de du wetin rayt.”​—Matyu 5:​45.

Apat frɔm dat, “Jiova rili lɛk wi ɛn i gɛt sɔri-at.” (Jems 5:​11) I de sho se i rili lɛk di wan dɛn we de du tin dɛn we go ɛp dɛn fɔ no am ɛn kam nia am. Gɔd de notis dɛn kayn pipul dɛn de wan bay wan. Infakt, ‘i bisin bɔt yu.’​—1 Pita 5:​7.

Aw wi de bɛnifit frɔm Gɔd in lɔv? Wi kin ɛnjɔy fɔ si we di san de go dɔŋ. Wi kin gladi fɔ si we yɔŋbebi de laf. Wi lɛk di wan dɛn we de na wi famili. Sɔntɛm dɛn tin dɛn ya nɔ tu impɔtant, bɔt dɛn rili de ɛp wi fɔ gɛt gladi-at.

Wi de bɛnifit bak frɔm wan ɔda we we Gɔd de sho se i lɛk wi; dat na we wi de pre to am. Di Baybul se: “Una nɔ wɔri bɔt ɛnitin, bɔt pan ɔltin una tɛl Gɔd fɔ ɛp una bay we una de pre ɛn rili beg am ɛn tɛl am tɛnki.” Jɔs lɛk papa we lɛk in pikin, I want fɔ lɛ wi tɔn to am fɔ mek I ɛp wi wit di prɔblɛm dɛn we wi gɛt. Ɛn Jiova dɔn prɔmis se i go gi wi “di pis we Gɔd de gi we mɔtalman nɔ ebul ɔndastand.”​—Filipians 4:​6, 7.

Dis smɔl tin we wi dɔn tɔk bɔt Gɔd in 4 men kawaliti dɛn we na pawa, sɛns, jɔstis, ɛn lɔv dɔn ɛp yu fɔ rili no aw Gɔd tan lɛk? Fɔ mek yu go gladi mɔ fɔ di tin dɛn we Gɔd de du, i go fayn fɔ mek yu lan bɔt wetin i dɔn du ɛn wetin i go du tumara bambay we go bɛnifit yu.