A bin bɔn na wan vilej we nem Saksoni, we dɛn bin de kɔl di Jaman Dɛmokratik Ripɔblik ɔ (GDR). Gladi-at bin de na wi famili ɛn mi mama ɛn papa bin gi mi gud trenin. Di GDR na bin Kɔmyunist stet, so rilijɔn nɔ bin impɔtant to bɔku pipul dɛn na Saksoni. Ɛn fɔ mi, Gɔd nɔ de. Frɔm we a smɔl te a ol 18 ia a bin gɛt tu aydia dɛn na mi maynd; dat na Kɔmyunizim ɛn fɔ biliv se Gɔd nɔ de.

A bin lɛk Kɔmyunizim bikɔs a jɔs lɛk di aydia fɔ se ɔlman ikwal. Apat frɔm dat, a biliv se dɛn fɔ sheb ɔl di prɔpati dɛn ikwal, bikɔs dat go mek po pipul dɛn nɔ po pasmak ɛn di wan dɛn we jɛntri nɔ jɛntri pasmak. So a bin bizi wit ɔganayzeshɔn dɛn we de sɔpɔt dat. We a bin ol 14 ia, a bin spɛn bɔku tɛm pan wan projɛkt fɔ gɛda pepa dɛn we dɛn de yuz bak. Di bigman dɛn na wan tɔŋ we nem Awe bin gladi fɔ wetin a de du so dɛn bin gi mi awɔd. Pan ɔl we a bin yɔŋ, a bin sabi sɔm big pɔlitishian dɛn na GDR. A bin fil se na di rayt gol a dɔn sɛt ɛn mi tumara bambay go fayn.

Dɔn wantɛm wantɛm, tin bin chenj. Insay 1989, di Balin Wɔl ɛn di Kɔmyunist blɔk na Istan Yurop bin fɔdɔm. Wan tin bin lid to ɔda tin. A bin kam fɔ no se dɛn de tek advantej pan pipul dɛn na GDR. Fɔ ɛgzampul, dɛn bin de trit pipul dɛn we nɔ bin de sɔpɔt Kɔmyunizim, as lɛk sɛkɔn klas sitizin dɛn. A bigin tink to misɛf se; Aw dat pɔsibul? Fɔ se wi Kɔmyunist pipul dɛn nɔ biliv se ɔlman ikwal? Fɔ se Kɔmyunizim dɔn fel? A bin rili de wɔri.

So a pe atɛnshɔn pan myuzik ɛn drɔin. Bikɔs a bin go wan Sɛkɔndri skul we dɛn bin de tich myuzik ɛn leta go yunivasiti, a bin want fɔ bi myuzishian ɛn pɔsin we de drɔ. So a bin lɛf fɔ fala di gud trenin we dɛn bin gi mi we a smɔl. Di tin we bin impɔtant to mi mɔ na fɔ ɛnjɔy misɛf ɛn a bin de kip bɔku galfrɛn dɛn di sem tɛm. Bɔt myuzik, drɔin, ɛn di fri layf we a bin de liv nɔ bin mek a lɛf fɔ wɔri. Ivin di pikchɔ dɛn we a de pent de sho se a de fred. Wetin go apin tumara bambay? Ɛn wetin na di rizin we mek wi gɛt layf?

We a bin fɛn di ansa dɛn we a bin de luk fɔ, a bin rili sɔprayz. Wan ivintɛm, mi ɛn mi kɔmpin studɛnt dɛn bin de tɔk bɔt wetin go apin tumara bambay. Mandi * na bin wan pan di studɛnt dɛn ɛn bak in na bin wan pan Jiova Witnɛs dɛn. Da ivintɛm de i bin gi mi fayn advays. I bin se: “Andreas, if yu want ansa dɛn to kwɛstyɔn dɛn bɔt layf ɛn wetin go apin tumara bambay, yu nid fɔ tek tɛm rid di Baybul.”

A nɔ bin rili biliv, bɔt a bin disayd fɔ rid di Baybul fɔ fɛn di ansa dɛn. Mandi bin dayrɛkt mi to Daniɛl chapta 2, ɛn wetin a rid de bin mek a sɔprayz. Dis prɔfɛsi bin tɔk bɔt difrɛn wɔl pawa dɛn ɛn gɔvmɛnt dɛn we gɛt sɔntin fɔ du wit wi yon tɛm. Mandi bin sho mi ɔda Baybul prɔfɛsi dɛn we tɔk bɔt tumara bambay. A bin de gɛt ansa to mi kwɛstyɔn dɛn. Bɔt udat bin rayt dɛn prɔfɛsi dɛn ya, ɛn udat ebul fɔ tɔk bɔt wetin go apin tumara bambay kɔrɛkt wan? Fɔ se Gɔd rili de?

Mandi bin sho mi to Ɔst ɛn in wɛf Angɛlika fɔ mek dɛn ɛp mi fɔ ɔndastand Gɔd in Wɔd gud gud wan. A kam fɔ no se Jiova Witnɛs dɛn na di wangren ɔganayzeshɔn we de yuz ɛn ɛp pipul dɛn fɔ sabi Gɔd in nem we na Jiova. (Sam 83:​18, NWT; Matyu 6:​9) A kam fɔ no se Jiova de gi op to mɔtalman fɔ liv sote go na Paradays na dis wɔl. Sam 37:​9 se: “Udat put in op pan PAPA GƆD [“Jiova,” NWT] go gɛt di land.” Dis mek a fil fayn fɔ no se ɔl di wan dɛn we de fala Gɔd in lɔ ɛn de liv dɛn layf di we aw Gɔd want go ɛnjɔy da blɛsin de.

Bɔt i nɔ bin izi fɔ mi fɔ chenj mi layf ɛn fɔ liv akɔdin to wetin di Baybul se. Bikɔs mi na bin big myuzishian ɛn a sabi drɔ, dat bin mek a prawd so a bin nid fɔ lan fɔ put misɛf dɔŋ. I nɔ bin izi bak fɔ mi fɔ lɛf di fri layf we a bin de liv. Bɔt a rili gladi bikɔs Jiova de sho se i peshɛnt, i gɛt sɔri-at, ɛn i de ɔndastand ɔl di wan dɛn we de tray dɛn bɛst fɔ du wetin di Baybul se!

Frɔm we a smɔl te a ol 18 ia, a bin de sɔpɔt Kɔmyunizim ɛn a nɔ biliv se Gɔd de, bɔt frɔm we a bigin stɔdi di Baybul, na di Baybul dɔn de shep mi layf te naw. Wetin a bin lan bin mek a nɔ de wɔri bɔt wetin go apin tumara bambay, ɛn i mek mi layf gɛt minin. Insay 1993, a bin baptayz fɔ bi wan pan Jiova Witnɛs dɛn, ɛn insay di ia 2000, a bin mared Tabita, we na sista we gɛt zil fɔ sav Jiova. Wi kin spɛn bɔku tɛm fɔ ɛp pipul dɛn fɔ sabi di Baybul. Bɔku pipul dɛn we wi kin mit biliv di sem tin we a bin biliv trade we na Kɔmyunizim ɛn nɔ biliv se Gɔd de. A kin rili fil fayn we a sho dɛn aw fɔ no Jiova.

We a bin bigin stɔdi di Baybul wit Jiova Witnɛs dɛn, mi mama ɛn papa nɔ bin gladi. Bɔt frɔm da tɛm de, dɛn dɔn kam fɔ si di fayn we aw di Witnɛs dɛn bin ɛp mi fɔ chenj mi layf. Naw a rili gladi we dɛn de rid di Baybul ɛn atɛnd Jiova Witnɛs dɛn mitin dɛn.

Mi ɛn Tabita de ɛnjɔy wi mared os bikɔs wi de tray fɔ fala di advays dɛn we de insay di Baybul we de fɔ maredman ɛn mareduman. Fɔ ɛgzampul, we wi de fala di advays bɔt aw mared pipul dɛn fɔ fetful to dɛnsɛf, dɔn ɛp wi fɔ gɛt strɔng mared os.​—Ibruz 13:​4.

A nɔ de fred ɛn wɔri igen bɔt tumara bambay. A no se a de insay wan big famili we de ɔlsay na di wɔl, ɛn dɛn de ɛnjɔy tru tru pis ɛn wanwɔd. Insay dis famili, wi de trit wisɛf di sem we. Dat na sɔntin we a biliv ɛn na sɔntin we a want fɔ apin.