1, 2. Aw Jizɔs bin kɔrej in disaypul dɛn di de we i gɛt layf bak?

DI DE we Jizɔs gɛt layf bak, tu pan in disaypul dɛn bin de go na wan vilej we de lɛk sɛvin mayl so frɔm Jerusɛlɛm. Dɛn at bin pwɛl bikɔs Jizɔs dɔn day ɛn dɛn nɔ bin no se i dɔn gɛt layf bak. As dɛn de go, Jizɔs apia na di rod ɛn bigin waka wit dɛn. Jizɔs bin kɔrej dɛn. Aw i bin du dat? “I bigin fɔ tɔk bɔt Mozis ɛn ɔl di ɔda prɔfɛt dɛn, ɛn i bin tɛl dɛn ɔl di tin dɛn bɔt insɛf we de insay ɔl di Skripchɔ dɛn.” (Lyuk 24:13-15, 27) Di tin dɛn we Jizɔs bin tɔk, bin tɔch dɛn at bikɔs i bin de “ɛksplen di Skripchɔ dɛn klia wan” to dɛn.—Lyuk 24:32; futnot.

² Da sem ivintɛm de, di disaypul dɛn go bak na Jerusɛlɛm. Dɛn go to di apɔsul dɛn ɛn tɛl dɛn ɔl wetin apin to dɛn. As dɛn bin de tɔk, Jizɔs apia to dɛn ɔl. Bɔt di apɔsul dɛn bin fred. Dɛn bigin fɔ dawt if na Jizɔs. Aw Jizɔs bin mek dɛn at kam dɔŋ? Di Baybul se: “I mek dɛn ɔndastand gud wan so dat dɛn go ebul fɔ no wetin di Skripchɔ dɛn min.”—Lyuk 24:45.

3. Wetin kin mek wi at pwɛl? Wetin go ɛp wi fɔ tink di rayt we we wi de prich?

 ³ Jɔs lɛk dɛn disaypul dɛn, wisɛf kin gɛt tin dɛn we kin mek wi at pwɛl. Sɔntɛm wi de prich wit zil, bɔt wi at pwɛl bikɔs di pipul dɛn we wi de prich to nɔ de tek di trut. (1 Kɔr. 15:58) Ɔ sɔntɛm di wan dɛn we wi de stɔdi wit nɔ de tray fɔ go bifo na di trut. Sɔm dɛn kin ivin lɛf fɔ sav Jiova. Wetin go ɛp wi fɔ tink di rayt we we wi de prich? Wan tin we go ɛp wi na we wi tray fɔ no wetin Jizɔs in parebul dɛn min. Lɛ wi tɔk bɔt tri parebul dɛn we Jizɔs bin pul ɛn si us lɛsin dɛn wi kin lan frɔm dɛn.

4. Wetin di parebul we Jizɔs bin pul bɔt di fama we plant ɛn go slip, min?

⁴ Rid Mak 4:26-29. Wetin di parebul we Jizɔs bin pul bɔt di fama we plant ɛn go slip, min? Di fama na di parebul na ɔl di wan dɛn we de prich di gud nyus bɔt di Kiŋdɔm. Di sid na di mɛsej we wi de prich to pipul dɛn we want fɔ no bɔt Gɔd. Di fama du di nɔmal tin we ɔlman kin du, dat na, fɔ “slip na nɛt ɛn wek na mɔnin.” Fɔ mek di sid gro, i kin tek sɔm tɛm, frɔm di tɛm we dɛn plant am te to di tɛm we dɛn go avɛst am. Insay da tɛm de, “di sid dɛn . . . bɔs ɛn gro tɔl wan.” Di sid de gro “fɔ insɛf.” I de gro smɔl smɔl ɛn aw i de gro na so i de chenj. Semweso, pɔsin we de lan bɔt Gɔd de go bifo smɔl smɔl ɛn aw i de go bifo na so i de chenj. We sɔmbɔdi stɔdi ɛn disayd fɔ sav Gɔd, i kin bia frut we min se, i kin gi in layf to Jiova ɛn baptayz.

5. Wetin mek Jizɔs pul di parebul bɔt di fama we plant ɛn go slip?

⁵ Wetin mek Jizɔs bin pul dis parebul? Jizɔs pul dis parebul fɔ mek wi no se na Jiova de mek pipul dɛn we ‘rili want fɔ du wetin i want,’ lan di trut. (Akt 13:48; 1 Kɔr. 3:7) Wi de plant ɛn wata, bɔt nɔto wi de mek i gro. Wi nɔ go ebul fos am ɔ mek i gro wantɛm wantɛm. Jɔs lɛk di fama na di parebul, wi nɔ kin no aw wi Baybul stɔdi dɛn de du wɛl. Wi nɔ kin no atɔl we wi kin de pan wi yon ɔp-ɛn-dɔŋ. Bɔt as tɛm de go, wi Baybul stɔdi kin bigin du di tin dɛn we i de lan ɛn jɔyn wi pan di prichin wok, ɛn wi kin bɛnifit we i de ɛp wi.—Jɔn 4:36-38.

6. Wetin wi fɔ no bɔt wi Baybul stɔdi dɛn?

⁶ Wetin wi lan frɔm dis parebul? Fɔs, wi fɔ no se nɔto wi go mek wi Baybul stɔdi tek di trut kwik kwik wan. If wi ɔmbul, wi nɔ go fos wi Baybul stɔdi fɔ baptayz. Ivin if wi du ɔl wetin wi ebul fɔ du fɔ ɛp am, wi fɔ no se na in gɛt fɔ disayd if i fɔ gi in layf to Jiova. Pɔsin fɔ gi in layf to Gɔd wit ɔl in at ɛn i fɔ du am bikɔs i lɛk Gɔd. Bɔt if i nɔ gi in layf wit ɔl in at ɛn i nɔ lɛk Jiova, Jiova nɔ go gladi fɔ am.—Sam 51:12; 54:6; 110:3.

7, 8. (a) Us ɔda lɛsin dɛn wi lan frɔm di parebul we Jizɔs pul bɔt di fama we plant ɛn go slip? Gi wan ɛgzampul. (b) Wetin dis tɛl wi bɔt Jiova ɛn Jizɔs?

⁷ Sɛkɔn, we wi ɔndastand di lɛsin we Jizɔs bin de tray fɔ tich, i go mek wi at nɔ pwɛl if wi Baybul stɔdi nɔ tek di trut wantɛm wantɛm. Wi fɔ peshɛnt wit dɛn. (Jems 5:7, 8) If wi dɔn tray ɔlkayn we fɔ ɛp wi Baybul stɔdi, bɔt i stil nɔ de du wɛl, wi nɔ fɔ fil se na wi nɔ no aw fɔ tich. Na pipul dɛn we ɔmbul ɛn we rɛdi fɔ chenj dɛn layf, Jiova kin mek tek di trut. (Mat. 13:23) So wi nɔ fɔ se na we wi stɔdi pɔsin ɛn i baptayz de sho se wi sabi prich gud gud wan. Nɔto we wi mek pipul dɛn kam na di trut go mek Jiova gladi fɔ wi. Bɔt na we wi tray  tranga wan fɔ tich pipul dɛn di Baybul.—Rid Lyuk 10:17-20; Fɔs Lɛta Fɔ Kɔrint 3:8.

⁸ Tɔd, nɔto ɔltɛm wi kin no di chenj dɛn we pɔsin kin mek. Fɔ ɛgzampul, wan man ɛn in wɛf bin tɛl di mishɔnari we bin de stɔdi dɛn se dɛn want fɔ bi ɔnbaptayz pɔblisha. Di mishɔnari mɛmba dɛn se dɛn fɔ lɛf fɔ smok if dɛn want fɔ bi ɔnbaptayz pɔblisha. Di mishɔnari bin sɔprayz we di man ɛn in wɛf tɛl am se dɛn bin dɔn lɛf fɔ smok lɔn lɔn tɛm. Wetin mek dɛn lɛf fɔ smok? Dɛn kam fɔ no se Jiova de si dɛn we dɛn smok ɛn Jiova et pɔsin we de mek ipokrit. So dɛn disayd se if dɛn gɛt fɔ kɔntinyu fɔ smok, dɛn go smok bifo di mishɔnari ɔ lɛf fɔ smok. Di lɛk we dɛn kam fɔ lɛk Jiova bin ɛp dɛn fɔ disayd fɔ du di rayt tin. Dɛn bin dɔn chenj pan ɔl we di mishɔnari nɔ bin no.

9. Wetin di parebul we Jizɔs pul bɔt di fishin nɛt, min?

⁹ Rid Matyu 13:47-50. Wetin Jizɔs in parebul we i pul bɔt di fishin nɛt, min? Jizɔs bin se di gud nyus bɔt Gɔd in Kiŋdɔm we dɛn de prich to ɔlman tan lɛk fishin nɛt we dɛn kin sɛn na di si. Jɔs lɛk aw fishin nɛt kin kech bɔku bɔku fish, na so wisɛf kin prich to bɔku pipul dɛn, ɛn jɔs lɛk aw fishin nɛt kin kech “ɔlkayn fish,” na so wisɛf kin prich to ɔlkayn pipul dɛn. (Ayz. 60:5) Di bɔku bɔku pipul dɛn we kin kam wi kɔnvɛnshɔn ɛn Mɛmorial de sho se dat na tru. Sɔm pan dɛn pipul ya tan lɛk di fish dɛn we “fayn” ɛn dɛn kin kam jɔyn di kɔngrigeshɔn. Di ɔda wan dɛn tan lɛk di fish dɛn we “nɔ fayn” bikɔs dɛn nɔ kin gri fɔ du wetin Jiova want.

10. Wetin mek Jizɔs bin pul di parebul bɔt di fishin nɛt?

¹⁰ Wetin mek Jizɔs bin pul dis parebul? Di put we dɛn bin put di fish dɛn we fayn ɛn di fish dɛn we nɔ fayn difrɛn say nɔ min di las jɔjmɛnt we go apin we da big big trɔbul kam. Bɔt i de sho wetin go apin jɔs bifo di wɔl dɔn. Jizɔs sho se nɔto ɔl di wan dɛn we yɛri di gud nyus go kam fɔ wɔship Jiova. Bɔku pipul dɛn kin kam wi mitin dɛn. Sɔm dɔn ivin gri lɛ wi stɔdi di Baybul wit dɛn, bɔt dɛn nɔ kin want fɔ gi dɛn layf to Jiova. (1 Kiŋ 18:21) Ɛn sɔm dɛn nɔ de kam mitin igen. Sɔm yɔŋ wan dɛn de we dɛn mama ɛn papa mɛn dɛn na di trut, bɔt stil, dɛn nɔ lɛk Jiova. Jizɔs bin se ɔlman go disayd fɔ insɛf if i go sav Jiova. Jiova de si di wan dɛn we disayd fɔ sav am as pipul dɛn we “valyu na ɔl di neshɔn dɛn.”—Egay 2:7; futnot.

11, 12. (a) Aw wi go bɛnifit frɔm di parebul we Jizɔs pul bɔt di fishin nɛt? (b) Wetin dis parebul tɛl wi bɔt Jiova ɛn Jizɔs?

¹¹ Aw wi go bɛnifit frɔm di parebul we Jizɔs pul bɔt di fishin nɛt? We wi ɔndastand di lɛsin we Jizɔs bin de tray fɔ tich, i go mek wi at nɔ pwɛl we wi Baybul stɔdi ɔ wi pikin dɛn nɔ tek di trut. Dis kin apin ilɛksɛf wi dɔn tray wi bɛst. Nɔto we pɔsin in mama ɛn papa na Jiova Witnɛs ɔ i disayd fɔ stɔdi di Baybul go mek i bi Jiova in tayt padi wantɛm wantɛm. Di wan dɛn we nɔ want fɔ put dɛnsɛf dɔŋ fɔ lɛ Jiova rul dɛn, nɔ go de wit in pipul dɛn.

¹² Fɔ se dis min se dɛn nɔ go alaw di wan dɛn we dɔn lɛf di trut fɔ kam bak na di kɔngrigeshɔn? If pɔsin nɔ gri fɔ gi in layf to Jiova, fɔ se dat min se i go tan lɛk di fish dɛn we “nɔ fayn” sote go? Nɔ, nɔto so i bi. Dɛn stil gɛt chans fɔ kam  bak na di kɔngrigeshɔn bifo da big big trɔbul bigin. I jɔs tan lɛk se Jiova de tɛl dɛn se: “Una kam bak to mi ɛn a go kam bak to una.” (Mal. 3:7) Jizɔs bin sho dis we i pul di parebul bɔt di pikin we west in papa in prɔpati.—Rid Lyuk 15:11-32.

13. Wetin Jizɔs in parebul we i pul bɔt di pikin we west in papa in prɔpati, min?

¹³ Wetin Jizɔs in parebul we i pul bɔt di pikin we west in papa in prɔpati, min? Di papa we gɛt sɔri-at pan di parebul na wi Papa we de na ɛvin, Jiova. Di pikin we aks fɔ in yon prɔpati ɛn west am na di wan dɛn we dɔn lɛf di kɔngrigeshɔn. We dɛn kin lɛf di kɔngrigeshɔn, i tan lɛk se dɛn travul go na wan kɔntri we de fa. Dat na Setan in wɔl we de fa frɔm Jiova. (Ɛfi. 4:18; Kɔl. 1:21) Leta sɔm dɛn kin kechɔp ɛn kam bak na Jiova in ɔganayzeshɔn. We dɛn put dɛnsɛf dɔŋ ɛn ripɛnt, Jiova kin fɔgiv dɛn ɛn gladi fɔ dɛn bak.—Ayz. 44:22; 1 Pit. 2:25.

14. Wetin mek Jizɔs pul di parebul bɔt di pikin we west in papa in prɔpati?

¹⁴ Wetin mek Jizɔs bin pul dis parebul? Jizɔs bin de tray fɔ sho se Jiova want lɛ di wan dɛn we dɔn kɔmɔt na di kɔngrigeshɔn kam bak to Am. Di papa na Jizɔs in parebul bin biliv se in pikin go kam bak. We i si in pikin de kam bak, i rɔn go mit am, pan ɔl we “i bin stil de fa.” Di papa bin want lɛ in pikin no se i gladi fɔ am we i dɔn kam bak. Dis parebul fɔ mek di wan dɛn we dɔn lɛf di trut kam bak to Jiova wantɛm wantɛm! Na tru se dɛn padi biznɛs wit Jiova go dɔn pwɛl, ɛn i nɔ izi fɔ kam bak, ɔ dɛn de shem fɔ kam bak. Bɔt i go fayn fɔ lɛ dɛn kam bak bikɔs Jiova, Jizɔs, ɛn di enjɛl dɛn go gladi.—Lyuk 15:7.

15, 16. (a) Us lɛsin wi lan frɔm Jizɔs in parebul bɔt di pikin we west in papa in prɔpati? Gi sɔm ɛgzampul dɛn. (b) Wetin dis tɛl wi bɔt Jiova ɛn Jizɔs?

¹⁵ Aw wi go bɛnifit frɔm di parebul we Jizɔs pul bɔt di pikin we west in papa in prɔpati? Wi fɔ falamakata Jiova. Lɛ wi nɔ ɛva tray fɔ mek lɛk se wi de “du wetin rayt tumɔs” te wi nɔ gri fɔ gladi fɔ di wan dɛn we dɔn ripɛnt. Dis go “ambɔg” wi padi biznɛs wit Jiova. (Ɛkli. 7:16) Wan ɔda lɛsin de we wi kin lan frɔm dis parebul. Wi fɔ si di wan dɛn  we de lɛf di kɔngrigeshɔn, lɛk “ship we lɔs,” we min se sɔntɛm dɛn go kam bak. (Sam 119:176) If wi mit pɔsin we dɔn lɛf di kɔngrigeshɔn, bɔt we nɔ disfɛloship, yu nɔ tink se i go fayn lɛ wi sho se wi lɛk am ɛn ɛp am fɔ kam bak? Ivin if di pɔsin disfɛloship ɔ i nɔ disfɛloship, wi fɔ stil tɛl di ɛlda dɛn wantɛm wantɛm so dat dɛn go ɛp am. If wi du dat, wi de sho se wi de fala di lɛsin we wi dɔn lan na Jizɔs in parebul bɔt di pikin we west in papa in prɔpati.

¹⁶ Lɛ wi kam tɔk bɔt sɔm pipul dɛn na wi yon tɛm we bin dɔn lɛf Jiova, bɔt we dɔn kam bak to am. Lɛ wi si aw dɛn gladi we Jiova sɔri fɔ dɛn ɛn aw di kɔngrigeshɔn lɛk dɛn ɛn sɔpɔt dɛn. Wan brɔda we bin dɔn disfɛloship fɔ 25 ia se: “Frɔm we a kam bak, a kin gladi ɔltɛm bikɔs Jiova de sho se i dɔn fɔgiv mi. (Akt 3:19) Ɔlman de sɔpɔt mi ɛn sho se dɛn lɛk mi! Di brɔda ɛn sista dɛn tan lɛk famili naw to mi.” Wan yɔŋ sista we bin dɔn lɛf di kɔngrigeshɔn, bɔt we kam bak afta fayv ia bin tɔk se: “A nɔ go ebul fɔ tɔk bɔt aw a bin fil we dɛn sho mi di kayn lɔv we Jizɔs bin tɔk bɔt. Fɔ de na Jiova in ɔganayzeshɔn na sɔntin we yu nɔ go kɔmpia to ɛnitin!”

17, 18. (a) Us lɛsin dɛn wi dɔn lan frɔm di tri parebul dɛn we wi dɔn tɔk bɔt? (b) Wetin wi fɔ mekɔp wi maynd fɔ du?

¹⁷ Us lɛsin dɛn wi dɔn lan frɔm di tri parebul dɛn we wi dɔn tɔk bɔt? Fɔs, wi fɔ mɛmba se nɔto wi go mek wi Baybul stɔdi tek di trut kwik kwik wan. Na Jiova go du dat. Sɛkɔn, wi fɔ mɛmba se nɔto ɔlman we de kam wi mitin dɛn ɛn we wi de stɔdi di Baybul wit go gri fɔ wɔship Jiova. Tɔd, pan ɔl we sɔm go lɛf di kɔngrigeshɔn ɛn stɔp fɔ sav Jiova, wi nɔ fɔ ɛva fil se dɛn nɔ go kam bak. Ɛn we dɛn kam bak, wi fɔ gladi fɔ dɛn ɛn sho se wi lɛk dɛn jɔs lɛk aw Jiova lɛk dɛn.

¹⁸ Lɛ wi ɔl kɔntinyu fɔ no mɔ, ɔndastand, ɛn gɛt sɛns. We wi de rid Jizɔs in parebul dɛn, lɛ wi aks wisɛf dɛn kwɛstyɔn ya: ‘Wetin dis parebul min? Wetin mek dɛn rayt am na di Baybul? Aw wi go du wetin wi dɔn lan na di parebul? Ɛn wetin dis parebul de tɛl mi bɔt Jiova ɛn Jizɔs?’ We wi du dis, i go ɛp wi fɔ ɔndastand di tin dɛn we Jizɔs bin de tich.