1. Aw Jiova de si wok? Wetin dis bin mek i du?

JIOVA de ɛnjɔy di wok we i de du. (Sam 135:6; Jɔn 5:17) Ɛn i want mek di enjɛl dɛn ɛn mɔtalman dɛn ɛnjɔy di wok we dɛn de du, so i de gi dɛn wok we de mek dɛn ɛnjɔy ɛn satisfay. Fɔ ɛgzampul, Jiova bin mek in fɔs Pikin we na Jizɔs jɔyn am fɔ mek ɔltin. (Rid Lɛta Fɔ Kɔlɔse 1:15, 16.) Di Baybul tɛl wi se di tɛm we Jizɔs bin de na ɛvin, i bin de nia Gɔd “as man we sabi wok.”—Prɔv. 8:30.

2. Aw wi no se di enjɛl dɛn bin dɔn de gɛt impɔtant wok dɛn we bin de mek dɛn satisfay?

² Frɔm Jɛnɛsis to Rɛvɛleshɔn, di Baybul gɛt bɔku ɛgzampul dɛn we de sho se Jiova bin de gi wok ɔltɛm to in spirit pikin dɛn. Afta Adam ɛn Iv sin ɛn Gɔd drɛb dɛn na di gadin usay dɛn bin de, Gɔd “put chɛrɔb dɛn na di ist pat na di gadin na Idɛn, ɛn i put di sɔd we gɛt faya pan am ɛn we bin de tɔn ɔltɛm, fɔ gayd di rod we de go to di tik we de gi layf.” (Jɛn. 3:24) Ɛn Rɛvɛleshɔn 22:6 tɛl wi se Jiova bin “sɛn in enjɛl fɔ sho in slev dɛn di tin dɛn we gɛt fɔ apin jisnɔ.”

3. We Jizɔs bin de na di wɔl, aw i bin fala in Papa in ɛgzampul?

³ We Jizɔs bin de na di wɔl as pafɛkt mɔtalman, i bin gladi fɔ du di wok we Jiova gi am. Fɔ sho se Jizɔs de fala in Papa in ɛgzampul, i bin gi impɔtant wok to in disaypul dɛn. Fɔ lɛ dɛn go gladi fɔ du di wok we i gi dɛn fɔ du, i tɛl dɛn se: “Fɔ tru, a de tɛl una se ɛnibɔdi we sho se i biliv mi go du di wok dɛn we a de du; ɛn i go du wok dɛn we pas dɛn wan ya, bikɔs a de go to mi Papa.” (Jɔn 14:12) Fɔ sho se na wok we dɛn fɔ du kwik kwik wan, Jizɔs bin tɛl dɛn se: “Na naw we di ples brayt, wi fɔ du di wok we di Wan we sɛn mi gi mi fɔ du, di nɛt de kam we nɔbɔdi nɔ go ebul wok.”—Jɔn 9:4.

4-6. (a) Wetin mek wi fɔ gladi bikɔs Noa ɛn Mozis bin du ɔl wetin Jiova bin tɛl dɛn fɔ du? (b) Wetin mek Gɔd kin gi wok to mɔtalman?

⁴ Ivin bifo Jizɔs kam na di wɔl, Jiova bin de gi mɔtalman dɛn wok we dɛn bin de ɛnjɔy fɔ du. Pan ɔl we Adam ɛn Iv nɔ bin ebul fɔ dɔn di wok we Gɔd bin gi dɛn, ɔda mɔtalman dɛn bin de we bin ebul fɔ dɔn di wok we Gɔd gi dɛn. (Jɛn. 1:28) Bifo da ebi ebi Ren bin kam, Jiova bin tɛl Noa wetin-ɛn-wetin fɔ du fɔ bil wan big big bot we go sev in ɛn in famili. Noa bin du ɔl wetin Jiova bin tɛl am fɔ du. So wi gɛt layf tide bikɔs Noa bin du ɔl wetin Gɔd tɛl am fɔ du!—Jɛn. 6:14-16, 22; 2 Pit. 2:5.

⁵ Jiova bin sho Mozis aw fɔ bil wan big tɛnt usay dɛn go de wɔship am, ɛn i bin tɛl am bak fɔ ɔganayz di prist dɛn. Mozis bin du ɔl dɛn tin ya we Jiova bin tɛl am fɔ du. (Ɛks. 39:32; 40:12-16) Tide sɛf, wi de bɛnifit bikɔs Mozis bin du ɔl wetin Jiova tɛl am fɔ du. Aw wi de bɛnifit? Di apɔsul Pɔl bin tɔk se dis tɛnt we Mozis bin bil fɔ wɔship Jiova ɛn di we aw i bin ɔganayz di prist dɛn, bin de sho “di gud tin dɛn we gɛt fɔ kam.”—Ibru 9:1-5, 9; 10:1.

⁶ As di tin dɛn we Gɔd want de go bifo, na so i de gi in savant dɛn difrɛn difrɛn wok dɛn fɔ du. Bɔt pan ɔl we Jiova kin gi dɛn difrɛn difrɛn wok dɛn fɔ du, dɛn stil de briŋ prez to am ɛn bɛnifit mɔtalman dɛn we biliv am. Wi si dis klia wan frɔm di wok we Jizɔs bin de du we i bin de na ɛvin ɛn we i bin kam na di wɔl. (Jɔn 4:34; 17:4) Semweso, di wok we Jiova dɔn gi wi tide de briŋ prez to am. (Mat. 5:16; rid Fɔs Lɛta Fɔ Kɔrint 15:58.) Wetin mek wi se so?

7, 8. (a) Us spɛshal wok dɛn we Kristian dɛn de du tide? (b) Wetin wi fɔ du we Jiova chenj wi wok?

⁷ Yu go gri se na big big ɔnɔ fɔ lɛ Jiova kɔl mɔtalman we nɔ pafɛkt fɔ wok wit am. (1 Kɔr. 3:9) Di wan dɛn we de bil Asɛmbli Ɔl dɛn, Kiŋdɔm Ɔl dɛn, ɛn branch ɔfis dɛn de du di sem wok we Noa ɛn Mozis bin du. Ilɛksɛf di wok we yu de du na fɔ mek di say dɛn we dɔn pwɛl na Kiŋdɔm Ɔl dɛn, ɔ yu de ɛp fɔ bil wi wɔl ɛdkwata we de na Wɔwik, insay Nyu Yɔk, yu fɔ valyu di spɛshal wok we yu de du. (Luk di pikchɔ nia dis atikul in taytul.) Wetin mek? Bikɔs na oli wok yu de du fɔ Jiova. Bɔt di wok we Gɔd dɔn invayt ɔl Kristian dɛn fɔ du na di prichin wok. Dis wok insɛf de fɔ briŋ prez to Jiova ɛn briŋ bɛnifit to mɔtalman dɛn we de obe am. (Akt 13:47-49) Gɔd de yuz in ɔganayzeshɔn fɔ sho wi di rayt we aw fɔ du dis wok. Dis min se sɔntɛm, dɛn go gi wi nyu wok fɔ du.

⁸ Jiova in savant dɛn kin gladi ɔltɛm fɔ du di tin dɛn we di ɔganayzeshɔn de tɛl dɛn. (Rid Di Ibru Pipul Dɛn 13:7, 17.) We dɛn kin jɔs gi wi nyu wok fɔ du, wi nɔ kin rili ɔndastand wetin mek dɛn chenj wi  wok, bɔt stil, wi kin du ɔl wetin dɛn tɛl wi fɔ du bikɔs wi no se di wok kɔmɔt frɔm Jiova. Ɛn wi no se bɛnifit dɛn de we wi du ɛnitin we Jiova tɛl wi fɔ du.

9. Us ɛgzampul we di ɛlda dɛn de sɛt fɔ di kɔngrigeshɔn?

⁹ Di we aw di ɛlda dɛn de du dɛn wok na di kɔngrigeshɔn de sho se dɛn rili want fɔ du wetin Jiova want. (2 Kɔr. 1:24; 1 Tɛs. 5:12, 13) Di ɛlda dɛn rɛdi fɔ wok tranga wan ɛn dɛn rɛdi fɔ fala ɛnitin we di ɔganayzeshɔn go tɛl dɛn fɔ du. We di ɔganayzeshɔn kin sho wi nyu we dɛn fɔ prich bɔt Gɔd in Kiŋdɔm, di ɛlda dɛn kin rɛdi fɔ lan ɛn fala dɛn nyu we ya. Pan ɔl we sɔm ɛlda dɛn kin fil se dɛn nɔ go ebul fɔ ɔganayz di brɔda dɛn fɔ yuz fon fɔ prich, fɔ prich usay ship dɛn kin slam, ɔ fɔ prich na say dɛn we pipul dɛn bɔku, dɛn dɔn si se di prichin wok de go bifo we dɛn de prich dɛn difrɛn difrɛn we ya. Fɔ ɛgzampul, 4 payɔnia dɛn we de na Jamani bin disayd fɔ go prich na wan biznɛs eria, we i dɔn te we Witnɛs dɛn prich de. Wan pan di payɔnia dɛn we nem Maykɛl bin tɔk se: “I dɔn te we wi nɔ du dis kayn prichin, so wi bɔtɔm bɛlɛ bin de bwɛl we wi bin de prich. Jiova go mɔs dɔn si aw wi bin de fil, so i bin ɛp wi fɔ ɛnjɔy di fil savis da mɔnintɛm de ɛn wi nɔ go ɛva fɔgɛt dis. Wi bin gladi we wi fala di advays dɛn we de na Wi Kiŋdɔm Ministri ɛn we wi bin abop pan Jiova fɔ sɔpɔt wi!” Yu go want fɔ tray nyu we fɔ prich na di eria usay una kin prich?

10. Us chenj di ɔganayzeshɔn dɔn mek dis biɛn tɛm?

¹⁰ Sɔntɛnde, di ɔganayzeshɔn kin mek sɔm chenj dɛn. Fɔ ɛgzampul, dis biɛn tɛm dɛn dɔn jɔyn sɔm smɔl branch ɔfis dɛn to dɛn big branch ɔfis dɛn. Dis chenj we dɛn bin mek bin afɛkt sɔm brɔda ɛn sista dɛn we bin de wok na dɛn smɔl branch ɔfis ya, so dis min se dɛn bin gɛt fɔ chenj di we aw dɛn bin de liv, bɔt leta dɛn bin si di bɛnifit. (Ɛkli. 7:8) Dɛn brɔda ya we bin de wok na dɛn smɔl branch ɔfis ya bin gladi fɔ tek pat pan dis chenj we Jiova in ɔganayzeshɔn mek.

11-13. Us chenj bɔku brɔda dɛn dɔn mek bikɔs di ɔganayzeshɔn bin mek sɔm chenj dɛn?

¹¹ Wi kin lan impɔtant lɛsin frɔm wi brɔda ɛn sista dɛn we bin de wok na dɛn smɔl branch ɔfis dɛn we dɛn jɔyn wit ɔda branch ɔfis dɛn. Sɔm pan dɛn brɔda ɛn sista ya bin dɔn sav na dɛn branch ɔfis ya fɔ lɔng tɛm. Fɔ ɛgzampul, dɛn bin sɛn wan brɔda ɛn in wɛf we bin de wok na wan smɔl Bɛtɛl na Sɛntral Amɛrika fɔ go jɔyn di Bɛtɛl famili we de na Mɛksiko, we big pas di say we dɛn bin de fa fawe. Di brɔda we nem Rogɛlio bin tɔk se: “I nɔ bin izi fɔ lɛf wi famili ɛn padi dɛn.” Wan ɔda brɔda we nem Juan we dɛn bin sɛn na Mɛksiko Bɛtɛl bin tɔk se: “I jɔs tan lɛk we dɛn bɔn yu bak; yu gɛt fɔ mek nyu padi dɛn. Dis min se yu gɛt fɔ chenj to di we aw dɛn de liv ɛn aw dɛn de tink.”

¹² We dɛn bin sɛn sɔm Bɛtɛlayt dɛn we bin de wok na ɔda branch ɔfis dɛn na Yurop fɔ go wok na di branch ɔfis na Jamani, i nɔ bin izi fɔ dɛn. Fɔ ɛgzampul, i nɔ bin izi fɔ lɛf di fayn say we dɛn bin de. Ɛnibɔdi we lɛk fɔ si mawnten dɛn, go tɛl yu se i nɔ izi fɔ kɔmɔt na Swizaland we gɛt fayn fayn mawnten dɛn. Ɛn di wan dɛn we kɔmɔt na Ɔstria go tɛl yu se dɛn mis di layf we dɛn bin de liv wit di smɔl Bɛtɛl famili na Ɔstria.

¹³ Di wan dɛn we bin go na ɔda kɔntri, bin gɛt fɔ mek bɔku chenj dɛn. Dɛn bin gɛt fɔ yus to di nyu say we dɛn go de, wok wit brɔda ɛn sista dɛn we dɛn nɔ bin no, ɛn lan difrɛn wok. I min bak se dɛn bin gɛt fɔ yus to di nyu kɔngrigeshɔn usay dɛn  sɛn dɛn ɛn prich na nyu eria dɛn. Sɔntɛm dɛn bin ivin gɛt fɔ lan nyu langwej. I nɔ kin izi fɔ mek dɛn kayn chenj ya. Bɔt stil, bɔku Bɛtɛlayt dɛn dɔn mek dɛn chenj ya. Wetin mek dɛn du dis?

14, 15. (a) Aw bɔku brɔda dɛn dɔn sho se dɛn valyu di wok we dɛn de wok wit Jiova no mata us wok dɛn de du? (b) Aw dɛn sɛt fayn ɛgzampul fɔ wi ɔl?

¹⁴ Wan sista we nem Gritɛl bin se: “A gri fɔ go bikɔs a want fɔ sho Jiova se a lɛk am pas mi kɔntri, pas ɛni bildin, ɔ ɛni spɛshal wok we a bin de du.” Wan ɔda sista we nem Deska bin tɔk se: “We a mɛmba se na Jiova de sɛn mi, dat mek a gladi fɔ go.” Wan brɔda we nem Andre ɛn in wɛf we nem Gebrɛla bin gri wit wetin Deska se ɛn dɛnsɛf bin tɔk se: “Dis chenj bin ɛp wi fɔ no se na ɔda chans wi dɔn gɛt fɔ sav Jiova ɛn push di tin dɛn we wi want na kɔna. Wi tɛl wisɛf se, ‘We Jiova chenj di wok we wi de du, wi fɔ rɛdi fɔ go, wi nɔ fɔ alaw natin fɔ stɔp wi.’”

¹⁵ We dɛn bin de jɔyn sɔm branch ɔfis dɛn to ɔda branch ɔfis dɛn, dɛn bin mek sɔm Bɛtɛlayt dɛn bi payɔnia dɛn. Dis bin apin to bɔku Bɛtɛlayt dɛn di tɛm we dɛn bin jɔyn di branch ɔfis dɛn na Dɛnmak, Nɔwe, ɛn Swidɛn fɔ mek wan branch ɔfis we dɛn kɔl di Skandinevia branch ɔfis. Sɔm pan di wan dɛn we dɛn bin tɛl fɔ bi payɔnia, na wan brɔda we nem Flɔrian ɛn in wɛf we nem Anja. Flɔrian ɛn in wɛf bin se: “Wi bin si wi nyu wok as sɔntin we wi go gladi fɔ du, bɔt we nɔ go izi. Fɔ wi, na big ɔnɔ fɔ sav Jiova ilɛk usay wi de sav am. Wi go se dis na rial blɛsin!” Bɔku pan wi nɔ go ɛva mek dɛn kayn chenj ya, bɔt yu nɔ tink se wi fɔ falamakata dɛn brɔda ɛn sista ya fɔ put Gɔd in Kiŋdɔm fɔs na wi layf? (Ayz. 6:8) Jiova de blɛs di wan dɛn we valyu di wok we dɛn de wok wit am, no mata us wok dɛn de du.

16. (a) Wetin Lɛta Fɔ Galeshya 6:4 tɛl wi fɔ du? (b) Wetin na di bɛst wok we ɛni mɔtalman go du?

¹⁶ Bikɔs wi nɔ pafɛkt, wi kin lɛk fɔ kɔmpia wisɛf to ɔda pipul dɛn, bɔt di  Baybul de ɛnkɔrej wi fɔ de tink bɔt wetin wi ebul fɔ du. (Rid Lɛta Fɔ Galeshya 6:4.) Bɔku pan wi nɔ gɛt ɛni spɛshal wok we wi de du na di ɔganayzeshɔn. Ɛn nɔto wi ɔl go ebul fɔ bi payɔnia, mishɔnari, ɔ wok na Bɛtɛl. Ɔl dɛn wok ya na fayn fayn wok dɛn we wi kin du. Bɔt wi fɔ mɛmba se di bɛst wok we ɛni mɔtalman go du na fɔ wok wit Jiova fɔ du di prichin wok. Dis na wok we wi rili valyu!

17. Wetin wi nɔ go ebul fɔ du we wi de na Setan in wɔl? Wetin mek wi nɔ fɔ alaw dis fɔ mek wi at pwɛl pasmak?

¹⁷ Bikɔs wi de na Setan in wɔl, wi nɔ go ebul fɔ sav Jiova di we aw wi want. Di wok we wi gɛt na wi famili, wi wɛlbɔdi biznɛs, ɛn ɔda tin dɛn kin mek i nɔ izi fɔ wi. Bɔt wi nɔ fɔ alaw dis fɔ pwɛl wi at. Nɔ ɛva tɛkɛ yusɛf se yu nɔ go ebul fɔ wok wit Gɔd. Yu go wok wit Gɔd we yu de tɔk bɔt in nem ɛn in Kiŋdɔm we yu gɛt ɛni chans fɔ du dat. Di tin we impɔtant pas ɔl na dat yu de du yu bɛst fɔ wok wit Gɔd ɛn yu de pre lɛ i blɛs di brɔda dɛn we ebul fɔ wok mɔ wit am. Mɛmba se ɛnibɔdi we prez Jiova in nem valyu na in yay!

18. Wetin wi fɔ rɛdi fɔ put na kɔna? Wetin mek wi fɔ put am na kɔna?

¹⁸ Pan ɔl we wi nɔ pafɛkt ɛn kin mek mistek, Jiova stil gladi fɔ wok wit wi. Wi fɔ rili gladi we wi de wok wit Gɔd naw we dis wɔl want dɔn! So wi fɔ rɛdi fɔ put wetin wi want na kɔna ɛn wi fɔ no se insay di nyu wɔl, Jiova go mek wi ɛnjɔy “di rial layf” dat na layf we go de sote go wit kolat ɛn gladi at.—1 Tim. 6:18, 19.

19. Wetin Jiova dɔn prɔmis wi fɔ tumara bambay?

¹⁹ Naw we wi de nia fɔ ɛnta insay di nyu wɔl, i go fayn fɔ lɛ wi tink bɔt wetin Mozis bin tɛl di Izrɛlayt dɛn jɔs bifo dɛn go na di land we Jiova bin dɔn prɔmis dɛn. Mozis bin tɛl dɛn se: “Jiova we na una Gɔd go blɛs una bɛtɛ bɛtɛ wan pan ɛni wok we una de du.” (Dyut. 30:9) Afta Amagɛdɔn, di wan dɛn we bin de wok wit Gɔd go de na di wɔl jɔs lɛk aw i bin dɔn prɔmis dɛn. Dɔn, wi go bigin wan ɔda nyu wok, dat na fɔ mek di wan ol wɔl bi Paradays!