Wan 35 ia ol uman we nem Smita, * we de na Daka, dat na insay Bangladɛsh, bin lɛk pipul dɛn, ɛn i bin rili bisin bɔt dɛn. Dɛn bin no am as sɔmbɔdi we ebul fɔ wok ɛn we bin de ɛp ɔda pipul dɛn fɔ no di tin dɛn we i dɔn lan bɔt Gɔd. Pipul dɛn bin no am bak as mareduman we gladi ɔltɛm. Bɔt i sɔri fɔ no se, Smita bin kam gɛt wan sik, ɛn bifo dɛn se wan wik, i day! Dis bin mek in famili ɛn in padi dɛn bin shɔk.

Dis sem tin bin apin to Jems ɛn in wɛf we bin de na Amɛrika. Dɛn bin dɔn pas 30 ia, ɛn dɛn bin de du gud tin dɛn jɔs lɛk Smita. Wan de, Jems ɛn in wɛf go waka to dɛn padi dɛn na ɔdasay na Amɛrika. Dɛn nɔ bin ɛva kam bak na dɛn os we bin de na Nyu Yɔk. We dɛn bin de to dɛn padi dɛn, dɛn bin gɛt wan bad bad aksidɛnt we kil dɛn. Ɛn dis bin briŋ pwɛl at fɔ dɛn famili, dɛn padi dɛn, ɛn dɛn wokmet dɛn.

Tide, yu nɔ nid fɔ luk fa fɔ si se bad tin dɛn dɔn bɔku na di wɔl. We wɔ kin apin sɔnsay, nɔto sojaman dɛn nɔmɔ kin day, ɔda pipul dɛn bak kin day. Pipul dɛn de tif, fɛt dɛn kɔmpin, ɛn du ɔda bad bad tin we kin ambɔg pipul dɛn we nɔ du natin. Bad bad aksidɛnt ɛn sik kin apin to ɛnibɔdi, i nɔ mata if na big pɔsin ɔ yɔŋ pɔsin, jɛntriman ɔ poman. Tin dɛn lɛk atkwek, flɔd, ebi ebi briz, ɛn plɛnti ɔda bad bad tin dɛn dɔn kil bɔku pipul dɛn. Ɔlsay na di wɔl, pipul dɛn de tek advantej pan dɛn kɔmpin ɛn dɛn de trit ɔda pipul dɛn bɛtɛ pas di ɔda pɔsin. Sɔntɛm dɛn bad bad tin ya go dɔn mit yusɛf.

So dis kin mek wi aks kwɛstyɔn dɛn lɛk dɛn wan ya:

• Wetin mek bad tin kin apin to gud pipul dɛn?

• Na Gɔd wi fɔ blem fɔ dɛn kayn tin ya?

• Bad tin dɛn jɔs de apin fɔ dɛnsɛf ɔ na mɔtalman de mek dɛn apin?

• Fɔ se na di bad tin dɛn we pɔsin bin dɔn du trade de mek i sɔfa?

• If Gɔd de we gɛt pawa pas ɔlman, wetin mek i nɔ de protɛkt gud pipul dɛn fɔ lɛ bad tin nɔ mit dɛn?

• Di bad bad tin dɛn we de apin ɛn di sɔfa we wi de sɔfa go ɛva dɔn?

Fɔ lɛ wi go gɛt ansa to dɛn kwɛstyɔn ya, wi nid fɔ ɔndastand di ansa to dɛn tu impɔtant kwɛstyɔn ya: Wetin mek bad tin dɛn de apin? Ɛn wetin Gɔd go du bɔt dɛn bad tin ya?