Da vas de na wan pan di skripchɔ dɛn na di Baybul we plɛnti pipul dɛn sabi ɛn we dɛn kin yuz plɛnti tɛm. Sɔm pipul dɛn se no ɔda vas nɔ de na di Baybul “we de sho klia wan wetin de bitwin Gɔd ɛn mɔtalman ɛn di we aw wi go sev.” Na dande mek insay sɔm kɔntri dɛn, yu go si dɛn yuz dis skripchɔ pan bɔku big program dɛn we dɛn kin gɛt. Dɛn kin yuz am bak pan motoka ɛn ɔdasay dɛn.

Ilɛk usay pipul dɛn yuz dis skripchɔ, i sho se dɛn biliv tranga wan se Gɔd lɛk dɛn ɛn i go mek dɛn gɛt layf we go de sote go. We yu, aw yu go bɛnifit frɔm di we aw Gɔd lɛk yu? Ɛn wetin yu tink se Gɔd dɔn du fɔ sho se i lɛk yu?

Bɔku pipul dɛn biliv se na Gɔd rili mek di wɔl ɛn ɔltin we de insay de. Na in mek di skay ɛn ɔltin we de ɔp de, ɛn ivin mɔtalman. Di tin dɛn we gɛt layf, rili wɔndaful. Na dat mek pipul dɛn no se na Pɔsin we gɛt sɛns go dɔn mek dɛn. Bɔku pipul dɛn kin tɛl Gɔd tɛnki ɛvride fɔ di layf we dɛn gɛt. Dɛn no se na Gɔd nɔmɔ go mek dɛn ebul liv ɛn ɛnjɔy layf. Na Gɔd de gi wi briz, wata, tin fɔ it, ɛn ɔl di ɔda tin dɛn we wi nid fɔ kɔntinyu fɔ liv.

I go fayn mek wi de tɛl Gɔd tɛnki fɔ ɔl dɛn tin ya, bikɔs na in rili mek wi ɛn na in de mek wi kɔntinyu fɔ liv. (Sam 104:10-28; 145:15, 16; Di Apɔsul Dɛn Wok [Akt] 4:24) Wi go sho se wi gladi fɔ di lɛk we Gɔd lɛk wi bay we wi de tink bɔt ɔltin we i de du fɔ mek wi  kɔntinyu fɔ liv. Di apɔsul Pɔl tɔk se: “[Gɔd] de gi ɔlman layf ɛn ɔltin we i want. ‘Na Gɔd de gi wi layf, nain de mek wi ebul waka ɛn nain de mek wi ebul du ɔltin!’”—Di Apɔsul Dɛn Wok [Akt] 17:25, 28.

Fɔ tru, Gɔd de gi wi wetin wi nid, bɔt nɔto dat na di wangren we aw i de sho se i lɛk wi. I dɔn sho bak se i lɛk wi ɛn rɛspɛkt wi bay we i mek wi want fɔ lan bɔt am, ɛn i de ɛp wi fɔ du dat. (Matyu 5:3, NW) Na bay da we de, pipul dɛn we de obe Gɔd go ebul fɔ de insay Gɔd in wan big famili ɛn bi in “pikin dɛn.”—Lɛta Fɔ Rom 8:19-21.

Insay Jɔn 3:16, Gɔd sho se i lɛk wi bay we i sɛn in Pikin we na Jizɔs, fɔ kam na di wɔl fɔ tich wi bɔt Gɔd ɛn fɔ day fɔ wi. Bɔt bɔku pipul dɛn go se dɛn nɔ rili ɔndastand wetin mek Jizɔs bin nid fɔ day fɔ mɔtalman ɛn aw Jizɔs in day de sho se Gɔd lɛk mɔtalman. Lɛ wi si aw di Baybul ɛksplen the rizin we mek Jizɔs day ɛn di bɛnifit we in day briŋ.

Ɔl mɔtalman de sik, ol, ɛn day. Bɔt nɔto dat Jiova Gɔd bin want we i mek wi. I gi di fɔs pipul dɛn di chans fɔ mek dɛn go ebul de sote go na Paradays. Bɔt wan tin bin de we i want dɛn fɔ du. Wetin na da tin de? I bin want mek dɛn obe am. Gɔd se if dɛn nɔ obe am, dɛn go day. (Jɛnɛsis 2:17) Di fɔs man bin chalenj Gɔd, ɛn briŋ day pan insɛf ɛn in pikin dɛn. Di apɔsul Pɔl se: “Na wan man mek sin kam na [di] wɔl ɛn sin mek day kam pan mɔtalman. So, bikɔs ɔlman dɔn sin, day de mit ɔlman.”—Lɛta Fɔ Rom 5:12.

Bɔt Gɔd lɛk fɔ “du wetin rayt.” (Sam 37:28) Pan ɔl we Gɔd bin pɔnish Adam we i bin tɔn in bak pan am bay wilful, i nɔ pɔnish ɔl mɔtalman fɔ sɔfa ɛn day sote go fɔ di sin we wangren pɔsin du. Bifo dat, i fala di lɔ we se “layf fɔ layf.” We Jiova du dat, i sho se i dɔn du wetin rayt, ɛn i dɔn mek ɔl mɔtalman we ɔmbul, gɛt di chans fɔ gɛt layf we go de sote go. (Ɛksodɔs 21:23) Di kwɛstyɔn naw na, Aw wi go ebul gɛt di pafɛkt layf we Adam dɔn lɔs? Di ansa na: Wi nid pɔsin we go gi ɔ sakrifays in layf we ikwal wit di wan we Adam bin gɛt bifo i sin; dat min se i fɔ bi pɔsin we gɛt pafɛkt layf.

Dis dɔn sho wi klia wan se no mɔtalman nɔ de pan Adam in pikin dɛn we bin fɔ ebul pe fɔ da kayn layf de. Bɔt di pɔsin we fit fɔ du dat na Jizɔs. (Sam 49:6-9) Jizɔs nɔ bin gɛt wan sin we dɛn bɔn am so i bin pafɛkt, jɔs lɛk aw Adam bin de fɔs. So we Jizɔs kam day, i fri mɔtalman frɔm sin. We i du dat, i gi Adam ɛn Iv dɛn pikin dɛn di chans fɔ mek dɛn go ebul ɛnjɔy di sem pafɛkt layf we Adam bin gɛt. (Lɛta Fɔ Rom 3:23, 24; 6:23) Wetin wi fɔ du fɔ mek wi bɛnifit frɔm dis kayn we aw Gɔd dɔn sho se i rili lɛk wi?

Jɔn 3:16 se “ɛnibɔdi we biliv pan [Jizɔs] nɔ go day, bɔt i go gɛt layf we go de sote go.” Wetin dat min? I min se wi nid fɔ du sɔntin if wi want fɔ “gɛt layf we go de sote go.” If wi want fɔ gɛt da layf de, wi fɔ biliv Jizɔs ɛn obe am.

Sɔntɛm yu go bigin tink se: ‘Wetin mek wi fɔ obe Jizɔs? Amin Jizɔs se, “ɛnibɔdi we biliv pan am” go gɛt layf we go de sote go?’ Na tru, fɔ gɛt fet, ɔ fɔ biliv, rili impɔtant. Bɔt i fayn fɔ mɛmba se we di Baybul kin tɔk bɔt fet, i nɔ jɔs min fɔ biliv se Jizɔs de. Insay wan buk we dɛn kɔl Vine’s Expository Dictionary of Old and New Testament Words, di wɔd we Jɔn yuz min “fɔ abop pan, nɔto jɔs fɔ biliv.” Fɔ mek Gɔd gladi fɔ sɔmbɔdi, di pɔsin nɔ fɔ jɔs biliv se Jizɔs kam sev wi. I fɔ rili tray fɔ du wetin Jizɔs se. If i nɔ du dat, i nɔ fɔ tɔk se i gɛt fet. Di Baybul se: “Pɔsin we se in biliv Gɔd ɛn i nɔ de du dɛn tin we sho se i biliv am, nɔ biliv Gɔd at ɔl.” (Jems 2:26) Pɔsin we se i gɛt fet, fɔ sho se i biliv Jizɔs bay we i liv in layf di we aw Jizɔs bin liv in layf.

Pɔl bin ɛksplen se: “Na di lɛk we Krays lɛk wi de rul wi, bikɔs naw wi si se wan man [Jizɔs] dɔn day fɔ ɔlman . . . I day fɔ ɔlman so dat dɛn wan we gɛt layf nɔ go liv fɔ dɛnsɛf nɔmɔ, bɔt dɛn go jɛs liv nɔmɔ fɔ di wan we dɔn day, we Gɔd mek rayz frɔm di grev fɔseka dɛn.” (Sɛkɛn Lɛta Fɔ Kɔrint 5:14, 15) If wi rili gladi fɔ di day we Jizɔs kam day fɔ wi, dat go mek wi chenj di we aw wi de liv wi layf. Wi fɔ lɛf fɔ liv wi layf fɔ wisɛf ɛn bigin liv fɔ Jizɔs we kam day fɔ wi. Dat min se, wi fɔ du wetin Jizɔs se ɔltɛm. Na dis fɔ impɔtant to wi pas ɛni ɔda tin. Dis na tin we gɛt fɔ du wit wetin wi chuz fɔ du wit wi layf, di tin dɛn we impɔtant to wi, ɛn ɛnitin we wi de du. Wetin di wan dɛn we biliv Jizɔs ɛn we de sho se dɛn gɛt fet pan am, go gɛt?

Di las pat na Jɔn 3:16 tɔk bɔt di prɔmis we Gɔd mek to di wan dɛn we de sho se dɛn biliv pan di day we Jizɔs bin kam day, ɛn we de liv dɛn layf di we aw Gɔd want. Gɔd nɔ want mek dɛn kayn pipul ya ‘day, bɔt i want lɛ dɛn gɛt layf we go de sote go.’ Difrɛn blɛsin de fɔ di wan dɛn we Gɔd lɛk.

Jizɔs bin prɔmis wan grup se dɛn go gɛt layf we go de sote go na ɛvin. I bin tɛl in disaypul dɛn klia wan se i de go rɛdi ples fɔ dɛn fɔ mek dɛn go rul wit am. (Jɔn 14:2, 3; Lɛta Fɔ Filipay 3:20, 21) Di wan dɛn we go gɛt layf bak fɔ go na ɛvin “go bi pipul we de mek sakrifays to Gɔd ɛn Krays, ɛn dɛn go rul wit am fɔ wan tawzin ia.”—Rɛvɛleshɔn 20:6.

Di wan dɛn we gɛt fɔ go na ɛvin nɔ bɔku. Infakt, Jizɔs bin se: “Una we de fala mi nɔ plɛnti, bɔt una nɔ fred; Gɔd we na una Papa go mek una rul lɛkɛ aw insɛf de rul.” (Na wi mek am italiks; Lyuk 12:32) Ɔmɔs pipul dɛn gɛt fɔ go na ɛvin? Rɛvɛleshɔn 14:1, 4 tɔk se: “Wɛn dat dɔn, a si di Ship [Jizɔs Krays we bin dɔn gɛt layf bak] tinap pantap di ay il we dɛn kɔl Zayɔn [na ɛvin]. Wan ɔndrɛd ɛn fɔti-fo tawzin pipul bin tinap de wit am. Di Ship in nem ɛn in Papa in nem bin rayt pan dɛn fɔrɛd. . . . Na di Ship bin pik dɛn kɔmɔt to dɛn ɔda mɔtalman wɛn i bay dɛn, ɛn na dɛn fɔs i put wansay fɔ insɛf nɔmɔ ɛn fɔ Gɔd.” If yu kɔmpia di bɔku bɔku pipul dɛn we dɔn liv na di wɔl, ɛn di 144,000, yu go si se di 144,000 pipul dɛn “nɔ plɛnti.” Di Baybul se dɛn go bi kiŋ dɛn. Bɔt udat dɛn, dɛn go rul?

Jizɔs bin tɔk se ɔda grup de we go gɛt di blɛsin dɛn we in Kiŋdɔm go kam wit. Jizɔs bin tɔk na Jɔn 10:16 se: “Ɔda ship dɛn de we blant mi, bɔt dɛn nɔ de wit dɛn wan ya, a fɔ briŋ dɛnsɛf kam; dɛnsɛf go lisin wɛn a de tɔk, dɛn go miks wit dɛn wan ya, so dɛn go gɛt wan shɛpad fɔ mɛn dɛn ɔl.” Dɛn “ship” ya go gɛt layf  we go de sote go na di wɔl. Na da sem layf de Adam ɛn Iv bin fɔ gɛt. Aw wi no se na dis wɔl dis ɔda grup gɛt fɔ de?

Plɛnti plɛnti tɛm, di Baybul kin tɔk bɔt aw dis wɔl gɛt fɔ bi Paradays. Rid dɛn skripchɔ ya fɔ si dis fɔ yusɛf: Sam 37:9-11; 46:8, 9; 72:7, 8, 16; Ayzaya 35:5, 6; 65:21-23; Matyu 5:5; Jɔn 5:28, 29; Rɛvɛleshɔn 21:4. Dɛn skripchɔ ya tɔk bɔt di tɛm we wɔ, angri, sik, ɛn day nɔ go de igen. Dɛn tɔk bɔt tɛm we gud pipul dɛn go ebul bil dɛn yon os ɛn de de wit gladi at, plant dɛn yon gadin, ɛn mɛn dɛn pikin dɛn usay kolat de. * Yu gladi fɔ yɛri dis kayn tin? Wi shɔ se i nɔ go te igen, dɛn tin ya go mɔs bi.

If yu sidɔm ɛn tink bɔt ɔl wetin Gɔd dɔn du fɔ yu ɛn fɔ ɔda pipul dɛn, yu go si klia wan se Gɔd dɔn du bɔku tin. Wi gɛt layf, wi gɛt sɛns, wi gɛt smɔl wɛlbɔdi, ɛn wi gɛt ɔda tin dɛn we de mek wi kɔntinyu fɔ liv. Pantap dat, di day we Gɔd mek Jizɔs kam day fɔ wi, go mek wi gɛt blɛsin dɛn we pas dɛn wan ya, jɔs lɛk aw Jɔn 3:16 tɔk.

Insay Paradays, pipul dɛn go gɛt layf we go de sote go, dɛn go gɛt pis, ɛn dɛn go rili ɛnjɔy dɛn layf. Sik, wɔ, angri, ɛn day nɔ go de igen. Ɔl dis go mek pipul dɛn gɛt gladi at ɛn ɔda blɛsin dɛn we go de sote go. I lɛf to yu fɔ gɛt ɔl dɛn blɛsin ya. Di kwɛstyɔn naw na, Wetin yu de du fɔ Gɔd?