A bɔn na wan smɔl vilej na di sawtwɛst pat na Nayjiria insay 1948. Da tɛm de mi papa in smɔl brɔda we na Ɔnkul Mustafa, ɛn mi big brɔda Wahabi, bin baptayz as Jiova Witnɛs dɛn. Mi papa bin day we a ol nayn ia. Mi at bin rili pwɛl. Wahabi bin tɛl mi se wi go si Papa we i go dɔn gɛt layf bak. Dat bin rili ɛnkɔrej mi ɛn muv mi fɔ stat fɔ stɔdi di Baybul. A bin baptayz insay 1963. Mi tri brɔda dɛnsɛf bin baptayz.

Insay 1965, a bin go de wit mi big brɔda we nem Wilsin na Legɔs ɛn a bin ɛnjɔy fɔ de wit ɔda rɛgula payɔnia dɛn na di Igbobi Kɔngrigeshɔn. Di gladi-at ɛn zil we dɛn bin gɛt bin tɔch mi ɛn dat bin mek a stat fɔ payɔnia insay Janwari 1968.

Wan brɔda we bin de wok na Bɛtɛl we nem Albat Olubɛbi, bin ol wan spɛshal mitin wit wi di yɔŋ wan dɛn fɔ tɛl wi se dɛn nid spɛshal payɔnia dɛn na di nɔt pat na Nayjiria. A stil mɛmba di kayn zil we Brɔda Olubɛbi bin gɛt we i bin de tɛl wi se: “Una yɔŋ ɛn una kin yuz una tɛm ɛn trɛnk fɔ Jiova. Bɔku wok de fɔ du na di nɔt pat na Nayjiria.” A bin rili want fɔ bi lɛk Ayzaya ɛn go usay Jiova want mi fɔ go, so a bin aplay fɔ go wok as spɛshal payɔnia.—Ayz. 6:8.

 Insay Me 1968, dɛn bin sɛn mi fɔ go wok as spɛshal payɔnia na Kano siti we de na di nɔt pat na Nayjiria. Dis bin apin di tɛm fɔ di Biafran Wɔ (we bin stat 1967 ɛn dɔn 1970). Di fɛt fɛt bin mek bɔku pipul dɛn sɔfa ɛn day na di nɔt pat na Nayjiria ɛn di wɔ bin go na di ist pat na Nayjiria. Wan brɔda bin tray fɔ mek a nɔ go na di nɔt pat na Nayjiria bikɔs i nɔ bin want mek bad tin apin to mi. Bɔt a bin tɛl am se: “Tɛnki fɔ we yu bisin bɔt mi. Bɔt, if Jiova want mi fɔ du dis asaynmɛnt, a nɔ gɛt wan dawt se i go de wit mi.”

I sɔri fɔ si wetin bin apin na Kano di tɛm fɔ di wɔ. Di wɔ bin rili pwɛl dis big siti. Sɔntɛnde we wi kin de na fil savis, wi kin si pipul dɛn we dɛn kil insay di wɔ dɛn dedebɔdi dɛn. Pan ɔl we bɔku kɔngrigeshɔn dɛn bin de na Kano, bɔku pan di brɔda dɛn bin dɔn rɔnawe. Di pɔblisha dɛn we bin lɛf nɔ bin rich 15 ɛn dɛn bin de fred ɛn dɛn at bin pwɛl. Di brɔda ɛn sista dɛn bin rili gladi we siks pan wi we na bin spɛshal payɔnia dɛn go de. Wi bin ɛnkɔrej dɛn ɛn dat bin mek dɛn fil fayn. Wi bin ɛp dɛn fɔ ɔganayz di mitin ɛn prichin wok bak, fɔ stat fɔ gi fil savis ripɔt, ɛn fɔ aks di branch fɔ pɔblikeshɔn dɛn.

Wi di spɛshal payɔnia dɛn bin bigin fɔ lan di Awusa langwej. Bɔku pan di pipul dɛn bin gri fɔ lisin to wi we dɛn yɛri di Kiŋdɔm mɛsej insay dɛn yon langwej. Bɔt, sɔm pan di pipul dɛn we bin de na di men rilijɔn na Kano nɔ bin lɛk we wi de prich, so wi bin nid fɔ tek wi tɛm. Wan tɛm, wan man bin rɔnata mi ɛn wan brɔda wit nɛf bɔt wi bin ebul rɔn pas am ɛn dat bin mek i nɔ kech wi! Pan ɔl dɛn prɔblɛm dɛn ya, Jiova bin ɛp wi fɔ “fil sef” ɛn di pɔblisha dɛn bin stat fɔ bɔku. (Sam. 4:8) Tide, i pas 500 pɔblisha dɛn we de na 11 kɔngrigeshɔn dɛn na Kano.

Afta wi dɔn de na Kano fɔ sɔm mɔnt, dɛn bin sɛn mi ɛn tu ɔda spɛshal payɔnia dɛn na Niame di kapital siti fɔ Nayja insay  Ɔgɔst 1968. I nɔ tu te, wi kam fɔ no se Nayja we de na Wɛst Afrika, na wan pan di ples dɛn we wam pasmak na di wɔl. Wi bin nid fɔ lan fɔ prich we di ples rili wam ɛn fɔ lan fɔ tɔk dɛn men langwej we na Frɛnch. Pan ɔl we dis nɔ bin izi fɔ wi, wi bin abop pan Jiova ɛn bigin prich na di siti wit sɔm pɔblisha dɛn we bin de de. Insay shɔt tɛm, ɔlman na Niame we bin ebul fɔ rid bin gɛt di Baybul stɔdi buk we nem The Truth That Leads to Eternal Life. Pipul dɛn bin de ivin kam fɛn wi so dat wi go gi dɛn di buk!

I nɔ tu te, wi kam fɔ no se di wan dɛn we de na pawa nɔ lɛk Jiova Witnɛs dɛn. Insay Julay 1969, wi bin gɛda fɔ ol wi fɔs sakit asɛmbli na di kɔntri ɛn na 20 pipul dɛn bin atɛnd. Wi bin rili de wet fɔ di tu nyu pɔblisha dɛn we gɛt fɔ baptayz. Bɔt di fɔs de fɔ di asɛmbli, di polis dɛn bin kam ɛn stɔp di program. Dɛn bin go wit di payɔnia dɛn ɛn sakit ovasia na polis steshɔn. Dɛn bin tɛl wi fɔ kam bak na di polis steshɔn di nɛks de afta dɛn aks wi sɔm kwɛstyɔn dɛn. We wi kam fɔ no se di wan dɛn we de na pawa go kɔz prɔblɛm, wi bin disayd fɔ mek dɛn gi di tɔk fɔ di wan dɛn we fɔ baptayz na wan pɔblisha in os ɛn go baptayz dɛn sikrit wan na wan riva.

Afta sɔm wik dɔn pas, di gɔvmɛnt bin tɛl mi ɛn di fayv ɔda spɛshal payɔnia dɛn fɔ kɔmɔt na Nayja. Dɛn bin gi wi 48 awa fɔ lɛf di kɔntri. So wi bin nid fɔ mek wi yon arenjmɛnt fɔ lɛf di kɔntri. Wi bin obe ɛn go na di branch ɔfis na Nayjiria usay dɛn bin gi wi nyu asaynmɛnt dɛn.

Dɛn bin sɛn mi na Orisɔnbari we na wan vilej insay Nayjiria usay a bin ɛnjɔy fɔ prich ɛn kɔndɔkt Baybul stɔdi dɛn wit pɔblisha dɛn we nɔ bin bɔku, we bin de de. Bɔt afta siks mɔnt, di branch ɔfis bin tɛl mi fɔ go bak na Nayja mi wangren. Fɔs, a bin sɔprayz ɛn a bin de fred, bɔt leta a bin gladi fɔ go mit di brɔda dɛn bak we bin de de!

A bin go bak na Niame. Di de afta a rich de, wan Nayjirian biznɛs man bin si se mi na Jiova Witnɛs ɛn i bin stat fɔ aks mi kwɛstyɔn dɛn bɔt di Baybul. Wi bin stɔdi togɛda ɛn afta i lɛf di abit fɔ smok ɛn drink pasmak, i bin baptayz. A bin gladi fɔ prich wit di brɔda ɛn sista dɛn na difrɛn pat dɛn na Nayja. We a fɔs rich, na 31 Jiova Witnɛs dɛn bin de na di kɔntri; we a bin kɔmɔt de na 69 bin de de.

Insay Disɛmba 1977, a bin go bak na Nayjiria fɔ trenin. We di tri wik trenin dɔn, Malkɔm Vigo we na di kɔdinetɔ fɔ di Branch Kɔmiti bin mek a rid wan lɛta we kɔmɔt na di Salon branch. Dɛn bin de luk fɔ singul brɔda  we nɔ gɛt wɛlbodi prɔblɛm ɛn we na payɔnia. I fɔ sabi tɔk Inglish ɛn Frɛnch so dat i go wok as sakit ovasia na Gini. Brɔda Vigo bin tɛl mi se na da asaynmɛnt de dɛn bin de tren mi fɔ. I bin ɛksplen klia wan se nɔto izi asaynmɛnt. Ɛn i bin advays mi se: “Tek tɛm tink bɔt am bifo yu disayd fɔ go.” Wantɛm wantɛm, a tɛl am se, “Bikɔs na Jiova de sɛn mi de, a go go.”

A bin go na Salon ɛn mit di brɔda dɛn na di branch ɔfis. Wan pan di Branch Kɔmiti mɛmba dɛn bin tɛl mi se, “Wi nɔ no aw wi brɔda ɛn sista dɛn na Gini de du.” Pan ɔl we na di brɔda dɛn na di Salon branch bin gɛt di wok fɔ kia fɔ di prichin wok na Gini, dɛn nɔ bin ebul fɔ tɔk to di pɔblisha dɛn bikɔs dɛn bin gɛt prɔblɛm na di kɔntri we gɛt fɔ du wit pɔlitiks biznɛs. Dɛn bin dɔn tray bɔku tɛm fɔ sɛn brɔda dɛn fɔ go fɛn di brɔda dɛn na Gini, bɔt dɛn nɔ bin ebul fɔ go de. So dɛn bin tɛl mi fɔ go na Konakri we na di kapital siti fɔ Gini fɔ tray fɔ mek di gɔvmɛnt alaw mi fɔ de de.

We a rich na Konakri, a go na di Nayjiria ɛmbasi fɔ go mit di ambasedɔ. A bin tɛl am se a want fɔ prich na Gini. I tɛl mi nɔ fɔ de na Gini bikɔs sɔntɛm dɛn go arɛst mi ɔ du bad to mi. I tɔk se: “Go bak na Nayjiria ɛn prich de,” bɔt a tɛl am se, “A dɔn mekɔp mi maynd fɔ de ya.” So i bin rayt lɛta to di minista na Gini fɔ ɛp mi, ɛn di minista bin ɛp mi.

Shɔt tɛm afta dat, a bin go bak na di branch ɔfis na Salon ɛn tɛl di brɔda dɛn wetin di minista dɔn disayd. Dɛn bin shawt bikɔs dɛn bin gladi we dɛn yɛri aw Jiova bin blɛs mi patrol. Di gɔvmɛnt bin alaw mi fɔ de na Gini!

A bin du di sakit wok na Salon ɛn Gini ɛn wok as sɔbstityut ovasia na Laybiria frɔm 1978 to 1989. Fɔs, a bin de sik bɔku. Sɔntɛnde dis bin de apin we a bin de na eria dɛn usay bɔku pipul dɛn nɔ de. Bɔt di brɔda dɛn bin de du dɛn bɛst fɔ kɛr mi go na ɔspitul.

Wan tɛm, a bin gɛt siriɔs malaria ɛn wɔm dɛn. We a wɛl, a kam fɔ no se di brɔda dɛn bin dɔn de tink bɔt usay fɔ bɛr mi if a day! Pan ɔl we di tin dɛn we bin mit mi nɔ bin izi, a nɔ bin ɛva lɛf mi asaynmɛnt. Ɛn a kɔntinyu fɔ biliv se na Gɔd nɔmɔ go protɛk wi di bɛst we bikɔs ivin if wi day, i go gi wi layf bak.

Insay 1988, a bin mit Dɔkas ɛn na bin payɔnia we rili lɛk Jiova ɛn na pɔsin we rili ɔmbul. Wi bin mared, ɛn i jɔyn mi fɔ du di sakit wok. Dɔkas bin de wok wit mi tranga wan na wi asaynmɛnt ɛn i bin rɛdi fɔ mek sakrifays dɛn fɔ Jiova. Wi bin de waka fɔ lɛk 25 kilomita (15 mayl) fɔ go na difrɛn kɔngrigeshɔn dɛn ɛn wi bin de go wit wi lod dɛn. Wi bin de yuz ɛni transpɔt we wi ebul gɛt fɔ go na kɔngrigeshɔn dɛn we bin de fa, ɛn wi bin de  travul na rod dɛn we gɛt pɔtɔ pɔtɔ ɛn bɔku big ol dɛn.

Dɔkas rili gɛt maynd. Fɔ ɛgzampul, sɔntɛnde wi bin de krɔs wata dɛn we gɛt krɔkɔdayl dɛn. Wantɛm we wi bin de travul fɔ lɛk fayv dez, di brij we dɛn mek wit wud pantap di riva bin brok, so wi bin nid fɔ yuz kenu fɔ krɔs. We Dɔkas bin de go insay di kenu, i fɔdɔm ɛn go ɔnda ɔnda di wata. Wi tu nɔ bin sabi swim ɛn krɔkɔdayl dɛn bin de insay di wata. Bɔt sɔm yɔŋman dɛn bin go ɔnda di wata ɛn sev am. Wi bin de gɛt bad drim bɔt wetin bin apin fɔ sɔm tɛm, bɔt wi kɔntinyu fɔ du wi sakit wok.

We di ia 1992 jɔs bigin, wi bin sɔprayz fɔ no se Dɔkas dɔn gɛt bɛlɛ. Fɔ se wi nɔ go kɔntinyu fɔ de na ful-taym savis igen? Wi tɛl wisɛf se, “Jiova dɔn gi wi gift!” So wi disayd fɔ kɔl wi galpikin Jagift. 4 ia afta wi bɔn Jagift, wi bin bɔn in brɔda Ɛrik. Wi tu pikin dɛn na bin gift frɔm Jiova. Jagift bin wok fɔ sɔm tɛm na di rimot transleshɔn ɔfis na Konakri, ɛn Ɛrik na ministerial savant.

Pan ɔl we Dɔkas bin stɔp fɔ bi spɛshal payɔnia, i bin kɔntinyu fɔ rɛgyula payɔnia pan ɔl we i bin de mɛn wi pikin dɛn. Jiova bin ɛp mi fɔ kɔntinyu fɔ de na spɛshal ful-taym savis. We wi pikin dɛn dɔn big, Dɔkas bin ebul fɔ bi spɛshal payɔnia bak. Naw wi tu de wok as mishɔnari dɛn na Konakri.

A dɔn de go usay Jiova want mek a go ɔltɛm. Bɔku tɛm, mi ɛn mi wɛf dɔn si se Jiova de protɛkt ɛn blɛs wi. Bikɔs wi abop pan Jiova ɛn nɔ abop pan prɔpati, dat dɔn mek wi avɔyd bɔku prɔblɛm dɛn ɛn nɔ fɔ wɔri pasmak lɛk ɔda pipul dɛn tide. Mi ɛn Dɔkas dɔn kam fɔ si se di Wan we de rili mek pɔsin fil sef na “PAPA GƆD [Jiova NWT] we [de] sev wi.” (1 Krɔ. 16:35) A biliv se ɔl di wan dɛn we abop pan am, dɛn “layf go de sef wan na. . . . Jiova in an.”​—1 Sam. 25:​29, NWT.