1. Wetin Jiova de alaw wi fɔ du?

 JIOVA de alaw wi fɔ disayd aw wi fɔ liv wi layf. I de tich wi aw fɔ disayd di rayt tin dɛn, ɛn we wi disayd fɔ du di rayt tin we de mek i gladi, i de ɛp wi fɔ mek wi du am fayn. (Sam 119:​173) So we wi fala di fayn fayn tin dɛn we wi de lan insay di Baybul, dat go ɛp wi fɔ disayd di rayt tin dɛn.—Ibru 5:​14.

2. Us prɔblɛm wi kin gɛt afta we wi dɔn disayd fɔ du sɔntin?

² Pan ɔl we wi kin dɔn disayd fɔ du di rayt tin, sɔntɛnde, i nɔ kin izi fɔ wi fɔ dɔn wetin wi bin dɔn bigin fɔ du. Tink bɔt sɔm ɛgzampul dɛn: Wan yɔŋ brɔda disayd fɔ rid di wan ol Baybul. I bin bigin du am fayn fɔ sɔm tɛm, bɔt leta i stɔp. Wan sista disayd fɔ bi rɛgyula payɔnia, bɔt ɔltɛm i de push di tɛm we i fɔ stat. Di ɛlda dɛn na di kɔngrigeshɔn disayd togɛda fɔ de go fɛn ɛn ɛnkɔrej di brɔda ɛn sista dɛn na dɛn os dɛn, bɔt afta sɔm mɔnt, dɛn nɔ bin du wetin dɛn bin dɔn disayd. Ɔl dɛn ɛgzampul dɛn ya difrɛn, bɔt dɛn ɔl gɛt di sem tin. Dɛn ɔl bin disayd fɔ du sɔntin bɔt dɛn nɔ bin du wetin dɛn bin dɔn disayd fɔ du. Di fɔstɛm Kristian dɛn na Kɔrint bin gɛt da sem prɔblɛm de. Lɛ wi tɔk bɔt wetin wi go lan frɔm dɛn.

3. Wetin di Kristian dɛn na Kɔrint bin disayd fɔ du? Wetin bin apin?

³ Arawnd di ia 55, di Kristian dɛn na Kɔrint bin disayd fɔ du wan impɔtant tin. Dɛn bin kam fɔ no se tin nɔ bin rili izi fɔ di brɔda ɛn sista dɛn na Jerusɛlɛm ɛn Judia ɛn dɛn bin po. Dɛn bin kam fɔ no bak se ɔda kɔngrigeshɔn dɛn bin de gɛda mɔni fɔ ɛp dɛn. Di Kristian dɛn na Kɔrint bin gud ɛn  dɛn bin disayd se dɛnsɛf want fɔ ɛp di brɔda ɛn sista dɛn we nid ɛp, so dɛn bin aks di apɔsul Pɔl aw dɛn fɔ du am. I bin tɛl di kɔngrigeshɔn wetin ɛn wetin fɔ du ɛn i bin pik Taytɔs fɔ ɛp fɔ gɛda di mɔni we dɛn bin de gi. (1 Kɔr. 16:​1, NW; 2 Kɔr. 8:​6) Bɔt afta sɔm mɔnt, Pɔl bin kam fɔ no se di Kristian dɛn na Kɔrint nɔ bin gi di mɔni we dɛn bin se dɛn go gi. Ɛn i go mɔs bi se dat bin fɔ dɔn mek dɛn nɔ rɛdi dɛn gift di tɛm we dɛn fɔ go wit am na Jerusɛlɛm wit di kɔntribyushɔn we dɛn bin gɛda na di ɔda kɔngrigeshɔn dɛn.—2 Kɔr. 9:​4, 5.

4. Frɔm wetin de na 2 Kɔrintians 8:​7, 10, 11, (NW), wetin Pɔl bin ɛnkɔrej di Kristian dɛn na Kɔrint fɔ du?

⁴ Di Kristian dɛn na Kɔrint bin disayd fɔ du di rayt tin, ɛn Pɔl bin tɛl dɛn tɛnki fɔ di strɔng fet we dɛn gɛt, ɛn di gud we dɛn bin want fɔ du. Bɔt i bin ɛnkɔrej dɛn bak fɔ dɔn wetin dɛn bin dɔn bigin. (Rid 2 Kɔrintians 8:​7, 10, 11, NW.) Di tin we bin apin to dɛn tich wi se i nɔ kin izi fɔ fetful Kristian dɛnsɛf fɔ du wetin dɛn bin dɔn disayd fɔ du.

5. Us kwɛstyɔn dɛn wi go ansa?

⁵ Jɔs lɛk di Kristian dɛn we bin de na Kɔrint, wi kin si am se i nɔ izi fɔ du wetin wi bin dɔn tɔk se wi go du. Wetin mek? Bikɔs wi nɔ pafɛkt, i kin izi fɔ lɛ wi pospon tin dɛn. Ɔ tin dɛn we kin apin we wi nɔ bin de tink se go apin kin mek i nɔ izi fɔ lɛ wi du wetin wi bin dɔn disayd se wi go du. (Ɛkli. 9:​11 NW; Rom. 7:​18) Aw wi go tink bɔt wetin wi bin dɔn disayd fɔ du ɛn si if nid de fɔ ajɔst am? Aw wi go mek shɔ se wi dɔn wetin wi bin dɔn bigin fɔ du?

6. Ustɛm wi go nid fɔ ajɔst di tin we wi bin dɔn disayd fɔ du?

⁶ Sɔm impɔtant tin dɛn de we wi kin disayd fɔ du we nɔ go ɛva chenj. Fɔ ɛgzampul, wi nɔ de chenj wetin wi dɔn disayd fɔ se wi go sav Jiova, ɛn wi dɔn mekɔp wi maynd fɔ fetful to di pɔsin we wi mared to. (Mat. 16:​24; 19:​6) Bɔt wi go nid fɔ ajɔst ɔda tin dɛn we wi go disayd fɔ du. Wetin mek? Bikɔs di tin dɛn we kin apin to wi kin chenj. Wetin go ɛp wi fɔ disayd fɔ du di rayt tin dɛn?

7. Wetin wi fɔ pre fɔ? Wetin mek?

⁷ Pre fɔ sɛns. Jiova bin mek Jems rayt se: “If ɛni wan pan una want mɔ sɛns fɔ du ɛnitin, mek i aks Gɔd, Gɔd go gi am, bikɔs Gɔd de gi mɔtalman plɛnti tin dɛn ɛn i gladi fɔ du dat.”(Jems 1:​5) Sɔntɛnde wi ɔl kin “want mɔ sɛns.” So wi fɔ abop pan Jiova we wi de disayd fɔ du sɔntin ɛn we wi de ajɔst wetin wi bin dɔn disayd fɔ du. Jiova go ɛp wi fɔ disayd di rayt tin dɛn.

8. Us risarch dɛn wi fɔ du bifo wi disayd fɔ du sɔntin?

⁸ Du risach gud gud wan. Rid Gɔd in Wɔd, di buk ɛn magazin dɛn we Jiova in ɔganayseshɔn de mek, ɛn tɔk to pipul dɛn we go gi yu fayn advays. (Prɔv. 20:​18) I impɔtant fɔ lɛ wi du dɛn risach dɛn ya bifo wi disayd fɔ chenj wi wok, fɔ muv, ɔ bifo wi disayd wetin wi go lan we go mek wi gɛt di mɔni we wi go nid fɔ sɔpɔt wisɛf ɛn fɔ kɔntinyu fɔ sav Jiova.

9. If wi ɔnɛs wit wisɛf, aw dat go bɛnifit wi?

⁹ Tink gud gud wan bɔt wetin mek yu de disayd fɔ du sɔntin. Jiova bisin bɔt di rizin dɛn we mek wi de du sɔntin. (Prɔv. 16:​2) I want wi fɔ ɔnɛs pan ɔltin we wi de du. So we wi de disayd fɔ du tin dɛn, wi fɔ ɔnɛs wit wisɛf ɛn wit ɔda pipul dɛn bɔt di rizin we mek wi disayd fɔ du wetin wi want fɔ du. If wi nɔ rili ɔnɛs wit wisɛf i nɔ go izi fɔ wi fɔ du wetin wi bin dɔn tɔk se wi go du. Fɔ ɛgzampul, wan yɔŋ brɔda go disayd fɔ bi rɛgyula payɔnia. Bɔt afta sɔm tɛm, i nɔ  izi fɔ am fɔ rich di awa we payɔnia fɔ gɛt. I mɔs dɔn tink se di men rizin we mek i de payɔnia na bikɔs i want fɔ du wetin Jiova want. Bɔt sɔntɛm di men rizin we mek i payɔnia na bikɔs i bin want fɔ du wetin go mek in mama ɛn papa ɔ ɔda pɔsin gladi.

10. Wetin wi nid fɔ du fɔ mek chenj dɛn na wi layf?

¹⁰ Tink bɔt wan Baybul studɛnt we disayd se i go stɔp fɔ smok. I nɔ smok fɔ wan ɔ tu wiks pan ɔl we i nɔ bin izi fɔ am. Bɔt leta i bigin fɔ smok bak. Dɔn, afta sɔm tɛm i bin ebul stɔp fɔ smok. Bikɔs i lɛk Jiova ɛn i want fɔ du wetin go mek i gladi, dat bin ɛp am fɔ stɔp da bad abit de.—Kol. 1:​10; 3:​23, NW.

11. Wetin mek wi fɔ gɛt patikyula gol dɛn?

¹¹ Sɛt patikyula gol dɛn. We yu gɛt patikyula gol dɛn, i go izi fɔ yu fɔ dɔn wetin yu bigin fɔ du. Fɔ ɛgzampul, sɔntɛm yu dɔn disayd se yu want fɔ de rid di Baybul ɔltɛm. Bɔt if yu nɔ gɛt ɛni patikyula plan, yu nɔ go ebul fɔ du wetin yu dɔn plan fɔ du. b Ɔ sɔntɛm di ɛlda dɛn na di kɔngrigeshɔn disayd se dɛn go de go fɛn ɛn ɛnkɔrej di brɔda ɛn sista dɛn na dɛn os dɛn, bɔt afta sɔm tɛm, dɛn nɔ bin du wetin dɛn disayd. Fɔ lɛ dɛn go ebul fɔ du wetin dɛn dɔn disayd, dɛn fɔ aks dɛnsɛf kwɛstyɔn dɛn lɛk: “Wi dɔn rayt di brɔda ɛn sista dɛn nem dɛn we wi nid fɔ go fɛn ɛn ɛnkɔrej? Wi dɔn pik wan patikyula tɛm fɔ go fɛn dɛn?”

12. Wetin wi go nid fɔ du? Wetin mek?

¹² Tink di rayt we. Wi ɔl nɔ gɛt di tɛm, trɛnk, ɛn wetin wi nid fɔ du ɔl wetin wi go lɛk fɔ du. So tink di rayt we ɛn du wetin yu ebul fɔ du. If nid de, yu kin ajɔst wetin yu bin dɔn disayd fɔ du we yu kam fɔ no se yu nɔ go ebul fɔ du am. (Ɛkli. 3:​6) Bɔt lɛ wi se yu dɔn tink bɔt wetin yu bin dɔn disayd fɔ du, yu dɔn ajɔst am, ɛn yu fil se yu ebul fɔ du am. Lɛ wi tɔk bɔt fayv tin dɛn we go ɛp yu fɔ dɔn wetin yu bin dɔn bigin fɔ du.

13. Aw yu go gɛt di trɛnk we yu nid fɔ dɔn wetin yu bin dɔn disayd fɔ du?

¹³ Pre fɔ lɛ yu gɛt trɛnk fɔ du am. Gɔd go gi yu “di pawa fɔ du am” ɛn dɔn wetin yu bin dɔn disayd fɔ du. (Fil. 2:​13, NW) So na fɔ aks Jiova fɔ in oli spirit so dat yu go gɛt di trɛnk we yu nid. Kɔntinyu fɔ pre ivin if yu tink se Jiova nɔ ansa yu prea yet. Jizɔs bin tɔk se: ‘Una kɔntinyu fɔ aks ɛn una go gɛt [oli sprit] we una aks fɔ.’—Lyuk 11:​9, 13, NW.

14. Aw di prinsipul we de na Prɔvabs 21:​5 go ɛp yu fɔ du wetin yu dɔn disayd fɔ du?

¹⁴ Mek plan. (Rid Prɔvabs 21:​5.) Fɔ lɛ yu dɔn wetin yu bin dɔn stat fɔ du, yu nid fɔ mek plan. Dɔn yu nid fɔ du di tin dɛn we yu bin dɔn plan. Semweso, we yu dɔn disayd fɔ du sɔntin, rayt ɔl di tin dɛn we yu nid fɔ du fɔ lɛ yu go du wetin yu bin dɔn disayd. We yu gɛt tranga wok fɔ du, sheb am smɔl smɔl. Ɛnitɛm we yu dɔn fɔ du wan pan dɛn smɔl smɔl wok dɛn de, yu go ebul fɔ si wetin yu dɔn du. Pɔl bin ɛnkɔrej di Kristian dɛn na kɔrint se dɛn fɔ de kip sɔm mɔni na kɔna “di fɔs de insay ɛni wik” so dat dɛn nɔ go nid fɔ gɛda mɔni we i kam. (1 Kɔr. 16:​2, NW) We yu sheb big wok smɔl smɔl, dat kin ɛp yu bak fɔ lɛ yu nɔ fil se yu nɔ go ebul fɔ du am.

15. Afta we yu dɔn mek plan, wetin yu fɔ du?

¹⁵ If yu rayt wetin yu plan fɔ du, i go izi fɔ lɛ yu du am. (1 Kɔr. 14:​40) Fɔ ɛgzampul, dɛn kin tɛl ɛlda dɛn na di kɔngrigeshɔn dɛn fɔ pik wan ɛlda fɔ de  rayt ɛnitin we di ɛlda dɛn disayd fɔ du, di pɔsin we dɛn tɛl fɔ du di tin we dɛn disayd, ɛn ustɛm dɛn fɔ dɔn fɔ du am. We di ɛlda dɛn rayt ɔltin, i go izi fɔ dɛn fɔ du ɔl wetin dɛn dɔn disayd fɔ du. (1 Kɔr. 9:​26) Semweso, yu kin tray fɔ du di sem tin pan ɛnitin we yu de du. Fɔ ɛgzampul, yu kin rayt ɔl di tin dɛn we yu nid fɔ du ɛnide, ɛn na di tin dɛn we impɔtant yu fɔ rayt fɔs. If yu du dis i go izi fɔ dɔn wetin yu bin dɔn bigin fɔ du ɛn yu go ebul fɔ du mɔ.

16. Us impɔtant tin wi fɔ du if wi want fɔ du wetin wi dɔn disayd fɔ du? Aw Romans 12:​11, (NW) sɔpɔt dis?

¹⁶ Wok tranga wan. I nɔ kin izi fɔ du wetin yu plan ɛn fɔ dɔn wetin yu bin dɔn bigin fɔ du. (Rid Romans 12:​11, NW.) Pɔl bin tɛl Timoti fɔ “de tray ɔltɛm” ɛn “nɔ fɔ lɛf” fɔ bi gud ticha. Wi kin fala Pɔl in advays pan ɛnitin we wi want fɔ du fɔ Jiova.—1 Tim. 4:​13, 16.

17. Aw Ɛfishians 5:​15, 16 (NW), go ɛp wi fɔ du wetin wi dɔn plan fɔ du?

¹⁷ Yuz yu tɛm di rayt we. (Rid Ɛfishians 5:​15, 16, NW.) Pik di tɛm we yu go want fɔ du wetin yu dɔn disayd fɔ du ɛn nɔ chenj di tɛm. Nɔ wet te di rayt tɛm rich bifo yu stat fɔ du wetin yu dɔn disayd; sɔntɛm, di rayt tɛm nɔ go ɛva kam. (Ɛkli. 11:​4) Tek tɛm mek yu nɔ alaw tin dɛn we nɔ tu impɔtant fɔ tek ɔl yu tɛm ɛn ɛnaji we yu nid fɔ du di tin dɛn we rili impɔtant. (Fil. 1:​10, NW) If i pɔsibul, na fɔ pik tɛm we yu no se ɔda pipul dɛn nɔ go ambɔg yu pan wetin yu de du. Mek lɛ ɔda pipul dɛn no se yu nid tɛm fɔ pe atnɛshɔn pan wetin yu de du. Mɛmba se yu fɔ put yu fon ɔf ɛn yu kin chɛk yu imel ɔ soshal midia dɛn leta. c

18-19. Wetin go ɛp yu fɔ lɛ yu nɔ giv-ɔp fɔ du di gud tin dɛn we yu dɔn disayd fɔ du ilɛksɛf prɔblɛm dɛn mit yu?

¹⁸ Pe atɛnshɔn pan di gud tin dɛn we go apin. We wi du di tin dɛn we wi kin disayd fɔ du, di gud tin dɛn we kin apin kin tan lɛk we pɔsin de travul ɛn i rich na di say we i de go. If yu rili want fɔ rich na di say we yu de go, yu go kɔntinyu fɔ go ilɛksɛf di rod blɔk ɛn yu nid fɔ yuz difrɛn rod fɔ rich de. Semweso, if wi pe atɛnshɔn pan di gud tin dɛn we gɛt fɔ apin we wi disayd fɔ du sɔntin, wi nɔ go giv-ɔp kwik kwik wan we prɔblɛm dɛn mit wi.—Gal. 6:​9.

¹⁹ I nɔ kin izi fɔ disayd fɔ du di rayt tin dɛn, ɛn fɔ du di tin dɛn we wi dɔn disayd fɔ du nɔ kin rili izi. Bɔt Jiova go ɛp yu fɔ lɛ yu gɛt mɔ sɛns ɛn trɛnk fɔ dɔn wetin yu bin dɔn bigin fɔ du.