1-2. Aw sɔm pipul dɛn kin fil bɔt di tɛm we dɛn de wach dɛnsɛf fɔ mared?

 DI TƐM we tu pipul dɛn de wach dɛnsɛf fɔ mared kin bi fayn tɛm we dɛn kin ɛnjɔy. If yu ɛn pɔsin de wach unasɛf naw fɔ mared, wan dawt nɔ de se yu go want mek ɔltin kɔmɔt fayn. Ɛn bɔku pipul dɛn kin rili ɛnjɔy da tɛm de. Wan sista we de na Itopia we nem Sayɛn a tɔk se: “Di tɛm we a bin gladi pas ɔl na di tɛm we mi ɛn mi man bin de wach wisɛf fɔ mared. Wi bin de tɔk bɔt siriɔs tin dɛn ɛn wi bin de gɛt tɛm bak fɔ laf. A bin gladi we a kam fɔ no se a dɔn gɛt pɔsin we a lɛk ɛn we lɛk mi.”

² Bɔt wan brɔda we nem Alɛsio we de na Nɛdaland tɔk se, “A bin de ɛnjɔy di tɛm we a bin de spɛn fɔ sabi mi wɛf we wi bin de wach wisɛf fɔ mared, bɔt dɛn tɛm dɛn de nɔ bin izi bak.” Insay dis atikul, wi go tɔk bɔt sɔm prɔblɛm dɛn ɛn Baybul prinsipul dɛn we go ɛp tu pipul dɛn we de wach dɛnsɛf fɔ mared fɔ disayd fɔ du di rayt tin. Wi go tɔk bak bɔt aw ɔda pipul dɛn na di kɔngrigeshɔn go sɔpɔt di wan dɛn we de wach dɛnsɛf fɔ mared.

DI RIZIN WE MEK TU PIPUIL DƐN KIN WACH DƐNSƐF BIFO DƐN MARED

3. Wetin mek tu pipul dɛn kin wach dɛnsɛf bifo dɛn mared? (Prɔvabs 20:25)

³ Pan ɔl we di tɛm we tu pipul dɛn de wach dɛnsɛf fɔ mared kin bi fayn tɛm we dɛn de ɛnjɔy, i fayn fɔ mɛmba bak se i kin mek dɛn disayd fɔ du siriɔs tin, we na fɔ mared. Di de we dɛn de mared, di man ɛn uman de mek vaw bifo Jiova se dɛn go lɛk ɛn rɛspɛkt dɛnsɛf wans dɛn ɔltu de alayv. Bifo wi mek vaw, i go fayn fɔ mek wi tink gud wan bɔt am. (Rid Prɔvabs 20:25.) Na di sem tin bak pɔsin fɔ du we i de mek  vaw fɔ mared. We tu pipul dɛn de wach dɛnsɛf fɔ mared, dat go ɛp dɛn fɔ sabi dɛnsɛf gud gud wan ɛn ɛp dɛn fɔ disayd fɔ du di rayt tin. Sɔntɛm, dɛn go disayd fɔ mared ɔ dɛn go disayd fɔ pat. If dɛn disayd se i bɛtɛ mek dɛn pat, i nɔ min se na bad tin dɛn disayd fɔ du. Bifo dat, wi go se dɛn bin ebul fɔ yuz da tɛm de fɔ no if dɛn fɔ mared ɔ dɛn nɔ fɔ mared.

4. Wetin mek wi fɔ si di tɛm we tu pipul dɛn de wach dɛnsɛf fɔ mared di rayt we?

⁴ Wetin mek i impɔtant fɔ mek wi si di tɛm we tu pipul dɛn de wach dɛnsɛf fɔ mared di rayt we? We di wan dɛn we nɔ mared de si di tɛm we tu pipul dɛn de wach dɛnsɛf fɔ mared di rayt we, i go ɛp dɛn fɔ mek dɛn nɔ bigin wach pɔsin we dɛn nɔ plan fɔ mared am. Bɔt nɔto di wan dɛn nɔmɔ we nɔ mared fɔ si dis di rayt we. Wi ɔl fɔ si di tɛm we tu pipul dɛn de wach dɛnsɛf fɔ mared di rayt we. Fɔ ɛgzampul, sɔm pipul dɛn go fil se we tu pipul dɛn bigin wach dɛnsɛf fɔ mared, dɛn fɔ mared paopa. Aw dis kin ambɔg Kristian dɛn we nɔ mared? Wan sista we nem Mɛlisa we nɔ mared we de na Amɛrika tɔk se: “We brɔda ɛn sista de wach dɛnsɛf fɔ mared, sɔm pipul dɛn kin fil se dɛn fɔ mared paopa. Ɛn dat kin mek sɔm brɔda ɛn sista dɛn fred fɔ pat pan ɔl we dɛn go dɔn si se dɛn nɔ fit. Ɔda pipul dɛn we nɔ mared kin disayd nɔ fɔ wach ɛnibɔdi fɔ mared. Dis kin mek dɛn rili strɛs.”

UNA TRAY FƆ SABI UNASƐF GUD GUD WAN

5-6. Wetin mek tu pipul dɛn we de wach dɛnsɛf fɔ mared fɔ tray fɔ sabi dɛnsɛf? (1 Pita 3:4)

⁵ If yu de wach pɔsin fɔ mared, wetin go ɛp yu fɔ disayd if una fɔ mared ɔ una nɔ fɔ mared? Una tray fɔ sabi unasɛf gud gud wan. Sɔntɛm yu dɔn sabi sɔntin dɛn bɔt di pɔsin bifo una bigin wach unasɛf fɔ mared. Bɔt naw yu dɔn gɛt chans fɔ sabi “di we aw [i] tan insay [in] at.” (Rid 1 Pita 3:4.) Dis min se yu de lan mɔ bɔt di pɔsin in padi biznɛs wit Jiova, aw i de biev, ɛn aw i de tink. As tɛm de go, yu fɔ ebul ansa kwɛstyɔn dɛn lɛk: ‘Dis pɔsin go bi gud man ɔ wɛf fɔ mi?’ (Prɔv. 31:​26, 27, 30; Ɛfi. 5:33; 1 Tim. 5:8) ‘Wi go ebul fɔ lɛk wisɛf ɛn gi wisɛf di atɛnshɔn we wi fɔ gɛt? Wi go ebul fɔ bia wisɛf we wi mek mistek dɛn?’ b (Rom. 3:23) As una de sabi unasɛf, una mɛmba se: Nɔto jɔs bikɔs una de gri pan bɔku tin dɛn min se una fit fɔ mared, bɔt na aw una rɛdi fɔ ajɔst we una si tin dɛn difrɛn we go sho se una fit fɔ mared.

 ⁶ Us ɔda tin dɛn go fayn fɔ mek yu no bɔt di pɔsin di tɛm we una tu de wach unasɛf fɔ mared? Bifo yu lɛk di pɔsin pasmak, i go fayn fɔ mek una tɔk bɔt impɔtant tin dɛn lɛk di gol dɛn we di pɔsin gɛt. Bɔt wetin wi go se bɔt tin dɛn lɛk wɛlbɔdi biznɛs, mɔni prɔblɛm dɛn, ɛn bad tin dɛn we bin dɔn apin to am we de afɛkt di we aw i de tink, fil, ɛn biev? Nɔto ɔltin una go tɔk bɔt wantɛm wantɛm we una bigin wach unasɛf fɔ mared. (Luk bak Jɔn 16:12.) If yu fil se di tɛm ali fɔ mek di ɔda pɔsin bigin aks yu kwɛstyɔn dɛn bɔt yusɛf, mek lɛ i no. Bɔt as tɛm de go, yu go nid fɔ tɛl am tin dɛn bɔt yusɛf we go ɛp am fɔ disayd fɔ du di rayt tin. So we da tɛm de rich, i go fayn fɔ mek yu tɛl am ɔltin.

7. Aw tu pipul dɛn we de wach dɛnsɛf fɔ mared go sabi dɛnsɛf gud gud wan? (Luk bak di bɔks we gɛt di taytul, “ We Yu De Wach Pɔsin fɔ Mared We De Fa.”) (Luk bak di pikchɔ dɛn.)

⁷ Aw yu go rili ebul fɔ sabi di ɔda pɔsin gud gud wan? Wan pan di bɛst we dɛn fɔ du dat na we una de tɔk wetin de na una at, aks kwɛstyɔn dɛn, ɛn tek tɛm lisin. (Prɔv. 20:5; Jems 1:19) Fɔ mek una go ebul fɔ du dat, i go fayn fɔ mek una go de du tin dɛn we go mek una gɛt chans fɔ tɔk, tin dɛn lɛk fɔ it togɛda, waka togɛda na say dɛn usay pipul dɛn de, ɛn fɔ prich togɛda. Una go ebul sabi unasɛf bak we una spɛn tɛm wit una padi ɛn fambul dɛn. Dɔn bak, una kin mek plan fɔ du tin dɛn we go ɛp una fɔ no aw di ɔda pɔsin de biev we difrɛn tin dɛn de apin ɛn we i de wit difrɛn pipul dɛn. Notis wetin Ashwin we de na Nɛdaland bin tray fɔ du. Na dis i tɔk bɔt di tɛm we in ɛn Alisha bin de wach dɛnsɛf fɔ mared, i se: “Wi bin de luk fɔ tin dɛn we wi go du fɔ ɛp wi fɔ sabi wisɛf. Bɔku tɛm, wi bin de du simpul tin dɛn lɛk fɔ kuk togɛda ɔ fɔ du ɔda wok dɛn. We wi bin de du dɛn tin dɛn de, wi bin ebul fɔ no wetin di ɔda pɔsin ebul fɔ du ɛn wetin i nɔ ebul fɔ du.”

8. Aw tu pipul dɛn we de wach dɛnsɛf fɔ mared go bɛnifit we dɛn de stɔdi togɛda?

⁸ Una go sabi unasɛf bak we una de stɔdi di Baybul togɛda. If una mared, una go nid fɔ fɛn tɛm fɔ du famili wɔship fɔ mek Gɔd de pat pan una mared. (Ɛkli. 4:12) So wetin mek una nɔ go fɛn tɛm fɔ de stɔdi togɛda naw we una de wach unasɛf fɔ mared? Na tru se di tu pipul dɛn we de wach dɛnsɛf fɔ mared nɔ bi famili yet ɛn di brɔda nɔ de oba di sista yet. Bɔt, we dɛn de stɔdi togɛda ɔltɛm, dɛn go ebul fɔ no aw dɛn padi biznɛs  wit Jiova de. Wan maredman ɛn in wɛf we de na Amɛrika we nem Maks ɛn Laysa bin notis wan ɔda bɛnifit we dɛn bin gɛt we dɛn de stɔdi togɛda. I se: “We wi bigin fɔ wach wisɛf fɔ mared, wi bin bigin fɔ stɔdi pɔblikeshɔn dɛn we de tɔk bɔt di tɛm we pipul dɛn de wach dɛnsɛf fɔ mared, mared layf, ɛn famili layf. Dɛn pɔblikeshɔn dɛn de ɛp wi fɔ tɔk bɔt impɔtant tin dɛn we sɔntɛm wi nɔ bin fɔ jɔs tɔk bɔt lɛk dat.”

ƆDA TIN DƐN WE UNA FƆ TINK BƆT

9. Wetin na sɔm tin dɛn we tu pipul dɛn we de wach dɛnsɛf fɔ mared fɔ tink bɔt we dɛn de disayd udat fɔ tɛl bɔt dɛn rileshɔnship?

⁹ Udat dɛn una fɔ tɛl se una dɔn bigin wach unasɛf fɔ mared? Dat na tin we una fɔ disayd fɔ unasɛf. We una jɔs bigin una rileshɔnship, sɔntɛm una kin disayd nɔ fɔ tɛl bɔku pipul dɛn. (Prɔv. 17:27) We una du dat, pipul dɛn nɔ go de aks una bɔku kwɛstyɔn dɛn ɔ mɔna una fɔ disayd wetin fɔ du. Bɔt if una disayd nɔ fɔ tɛl ɛnibɔdi, dat go mek una kip to unasɛf ɛn if una nɔ tek tɛm, una go du tin dɛn we nɔ fayn. So i go fayn fɔ mek una tɛl di wan dɛn we go gi una gud advays ɛn ɛp una ɔda we dɛn. (Prɔv. 15:22) Fɔ ɛgzampul, una kin tɛl sɔm pan una fambul dɛn, padi dɛn we machɔ, ɛn di ɛlda dɛn.

10. Wetin tu pipul dɛn we de wach dɛnsɛf fɔ mared fɔ du fɔ mek dɛn nɔ du tin we go mek Jiova nɔ gladi? (Prɔvabs 22:3)

¹⁰ Aw una go du tin dɛn we go mek Jiova gladi we una de wach unasɛf fɔ mared? As una de lɛk unasɛf mɔ ɛn mɔ, una go want fɔ spɛn mɔ tɛm togɛda. Wetin go ɛp una fɔ avɔyd fɔ du ɛnitin we go mek Jiova nɔ gladi? (1 Kɔr. 6:18) Una avɔyd fɔ de tɔk bɔt mami ɛn dadi biznɛs, fɔ de usay ɔda pipul dɛn nɔ de si una, ɛn fɔ de drink bɔku. (Ɛfi. 5:3) Dɛn tin dɛn ya go mek una fil fɔ du mami ɛn dadi biznɛs ɛn mek i nɔ izi fɔ una fɔ du wetin rayt. Una nɔ tink se i go fayn fɔ mek una de tɔk bɔt tin dɛn we una go du fɔ sho se una gɛt rɛspɛkt fɔ unasɛf ɛn Jiova in lɔ dɛn? (Rid Prɔvabs 22:3.) Notis wetin bin ɛp Dawit ɛn Almaz we de na Itopia. Dɛn se: “Wi kin spɛn tɛm togɛda na ples dɛn usay ɔda pipul dɛn de ɔ wit wi padi dɛn. Wi nɔ bin ɛva de insay motoka ɔ os jɔs wi tu nɔmɔ. So dat bin ɛp wi fɔ avɔyd fɔ du tin dɛn we nɔ fayn.”

11. Wetin na sɔm tin dɛn we tu pipul dɛn we de wach dɛnsɛf fɔ mared fɔ tink bɔt we dɛn de disayd aw fɔ sho se dɛn lɛk dɛnsɛf?

¹¹ Fɔ se i fayn fɔ mek tu pipul dɛn we de wach dɛnsɛf fɔ mared du tin dɛn we go sho se dɛn lɛk dɛnsɛf? Sɔntɛm as una rileshɔnship de go bifo, una go disayd fɔ du tin dɛn we de sho se una lɛk unasɛf. Bɔt if una gɛt filin fɔ du mami ɛn dadi biznɛs, i go mek i nɔ izi fɔ mek una tink di rayt we bɔt unasɛf. (Sɔl. in Siŋ. 1:2; 2:6) I go izi bak fɔ mek una du tin dɛn we nɔ fayn we una de sho se una lɛk unasɛf. (Prɔv. 6:27) So as una bigin una rileshɔnship, una tɔk bɔt Jiova in lɔ dɛn c ɛn tin dɛn we una go du ɛn di tin dɛn we una nɔ go du fɔ sho se una lɛk unasɛf. (1 Tɛs. 4:​3-7) I go fayn fɔ mek una aks unasɛf dɛn kwɛstyɔn dɛn ya: ‘Aw pipul dɛn na wi eria go si di tin dɛn we wi de du fɔ sho se wi lɛk wisɛf? Dɛn tin dɛn de go mek wi gɛt filin fɔ wisɛf?’

12. Wetin tu pipul dɛn we de wach dɛnsɛf fɔ mared fɔ tink bɔt if dɛn de gɛt prɔblɛm dɛn?

¹² Wetin una go du if una de gɛt prɔblɛm dɛn? Wetin una go du if una de gɛt prɔblɛm dɛn wan wan tɛm? Fɔ se dat min se una nɔ go ebul fɔ de togɛda? Nɔto dat i min; bikɔs  na nɔmal tin fɔ mek sɔntɛnde tu pipul dɛn we de wach dɛnsɛf fɔ mared gɛt prɔblɛm dɛn. Wetin de mek mared las na we di tu pipul dɛn rɛdi fɔ ajɔst ɛn bia dɛnsɛf. So di we aw una de sɔlv prɔblɛm dɛn naw go sho if una mared go kɔmɔt fayn. Una aks unasɛf dɛn kwɛstyɔn dɛn ya: ‘Wi kin ebul fɔ tɔk bɔt wi prɔblɛm dɛn saful wan ɛn di kayn we we de sho se wi gɛt rɛspɛkt fɔ wisɛf? I kin izi fɔ mek wi gri se wi rɔng ɛn tray fɔ ajɔst? I kin izi fɔ mek wi nɔ pin, se sɔri, ɛn tray fɔ fɔgiv?’ (Ɛfi. 4:​31, 32) Bɔt if una de mek plaba ɔltɛm we una de wach unasɛf fɔ mared, chans nɔ de se tin go bɛtɛ we una mared. If yu notis se di ɔda pɔsin nɔ go bi gud man ɔ wɛf fɔ yu, di bɛst tin we una kin disayd fɔ du na fɔ pat. d

13. Wetin na sɔm tin dɛn we tu pipul dɛn we de wach dɛnsɛf fɔ mared fɔ tink bɔt we go ɛp dɛn fɔ disayd ustɛm dɛn fɔ mared?

¹³ Aw lɔng una fɔ wach unasɛf bifo una disayd if una go mared? Bɔku tɛm, if wi nɔ tek tɛm tink bɔt sɔntin bifo wi disayd, wi kin ɛnd-ɔp fɔ du di rɔng tin. (Prɔv. 21:5) So di tɛm we una de tek fɔ wach unasɛf fɔ du fɔ mek una go sabi unasɛf gud gud wan. Bɔt una nɔ fɔ kɔntinyu fɔ wach unasɛf fɔ lɔng tɛm if una nɔ gɛt gud rizin fɔ du dat. Di Baybul tɔk bak se: “We pɔsin de ɛkspɛkt sɔntin ɛn nɔ gɛt am, dat de mek in at pwɛl.” (Prɔv. 13:12) Pan tap dat, as una de spɛn mɔ tɛm togɛda, dat go mek i at mɔ fɔ mek una nɔ fil fɔ du mami ɛn dadi biznɛs. (1 Kɔr. 7:9) Bɔt bifo una pe atɛnshɔn to aw lɔng una dɔn de wach unasɛf, i go fayn fɔ mek una aks unasɛf dis kwɛstyɔn: ‘Wetin a stil nid fɔ sabi bɔt dis pɔsin fɔ mek a go ebul disayd wetin fɔ du?’

AW ƆDA PIPUL DƐN GO SƆPƆT TU PIPUL DƐN WE DE WACH DƐNSƐF FƆ MARED?

14. Wetin na sɔm tin dɛn we ɔda pipul dɛn go du fɔ sɔpɔt di wan dɛn we de wach dɛnsɛf fɔ mared? (Luk bak di pikchɔ.)

¹⁴ If wi sabi tu pipul dɛn we de wach dɛnsɛf fɔ mared, wetin wi go du fɔ ɛp dɛn? Wi kin invayt dɛn fɔ jɔyn wi fɔ it, fɔ du famili wɔship togɛda, ɔ fɔ spɛn tɛm togɛda fɔ ɛnjɔy wisɛf. (Rom. 12:13) We una de du dɛn tin dɛn de, dɛn go gɛt chans fɔ sabi dɛnsɛf gud gud wan. Fɔ se dɛn nid pɔsin fɔ de wit dɛn, dɛn nid transpɔt, ɔ dɛn nid fɔ de say usay dɛn tu go gɛt chans fɔ tɔk? If na so i bi, yu go rɛdi fɔ ɛp dɛn? (Gal. 6:10) Alisha, we wi bin dɔn tɔk bɔt mɛmba wetin in ɛn Ashwin bin rili gladi fɔ. I tɔk se, “Wi bin gladi we wi brɔda ɛn sista dɛn  bin de tɛl wi se wi kin go fɛn dɛn if wi nid say fɔ spɛn tɛm togɛda we ɔda pipul dɛn go de arawnd.” If tu pipul dɛn we de wach dɛnsɛf fɔ mared aks yu fɔ spɛn tɛm wit dɛn, na fɔ si am se na fayn chans yu gɛt fɔ ɛp dɛn. Tek tɛm mek yu nɔ lɛf dɛn ɔltu nɔmɔ togɛda, bɔt tray fɔ no bak di tɛm we dɛn go nid tɛm fɔ tɔk to dɛnsɛf.—Fil. 2:4.

15. Us ɔda tin padi dɛn kin du fɔ sɔpɔt tu pipul dɛn we de wach dɛnsɛf fɔ mared? (Prɔvabs 12:18)

¹⁵ Wi kin sho bak se wi de sɔpɔt di wan dɛn we de wach dɛnsɛf fɔ mared bay di tin dɛn we wi de tɔk ɛn di tin dɛn we wi nɔ de tɔk. Sɔntɛnde, wi go nid fɔ kɔntrol wisɛf ɛn nɔ tɔk natin. (Rid Prɔvabs 12:18.) Fɔ ɛgzampul, sɔntɛm wi go want fɔ tɛl ɔda pipul dɛn we tu pipul dɛn de wach dɛnsɛf fɔ mared, bɔt sɔntɛm dɛn go want fɔ du dat fɔ dɛnsɛf. Wi nɔ fɔ kongosa dɛn ɔ tɔk bad bɔt dɛn bikɔs ɔf wetin dɛn disayd fɔ du. (Prɔv. 20:19; Rom. 14:10; 1 Tɛs. 4:11) Dɔn bak, wi nɔ want fɔ de aks kwɛstyɔn dɛn ɔ tɔk tin dɛn we go mek i tan lɛk se wi de fos dɛn fɔ mared. Wan sista we nem Ɛlis ɛn in man tɔk se, “Wi bin de shem we pipul dɛn bin de aks wi bɔt di plan dɛn we wi gɛt fɔ wi mared we wi nɔ bin dɔn ivin tɔk bɔt dɛn yet.”

16. Wetin wi fɔ du if tu pipul dɛn we de wach dɛnsɛf fɔ mared disayd fɔ pat?

¹⁶ Wetin wi fɔ du if tu pipul dɛn we de wach dɛnsɛf fɔ mared disayd fɔ pat? Wi fɔ avɔyd fɔ aks kwɛstyɔn dɛn ɔ blem ɛniwan pan dɛn fɔ wetin apin. (1 Pit. 4:15) Wan sista we nem Lia tɔk se: “A bin yɛri se pipul dɛn bin de tɔk bɔt di rizin we mek mi ɛn wan brɔda pat. A bin rili fil bad.” Jɔs lɛk aw wi bin dɔn tɔk, if tu pipul dɛn we de wach dɛnsɛf fɔ mared disayd fɔ pat, dat nɔ min se na di rɔng tin dɛn disayd fɔ du. Bɔku tɛm, i kin jɔs min se di tɛm we dɛn spɛn fɔ wach dɛnsɛf ɛp dɛn fɔ disayd fɔ du di rayt tin, ɛn dat na di rizin we mek dɛn bin de wach dɛnsɛf fɔ mared. Bɔt sɔntɛm wetin dɛn disayd fɔ du go mek dɛn at pwɛl ɛn dat go mek dɛn fil se na dɛn wangren de. So wi kin tink bɔt tin dɛn we wi go du fɔ sɔpɔt dɛn.—Prɔv. 17:17.

17. Wetin tu pipul dɛn we de wach dɛnsɛf fɔ mared fɔ kɔntinyu fɔ du?

¹⁷ Jɔs lɛk aw wi dɔn lan, we tu pipul dɛn de wach dɛnsɛf fɔ mared dɛn kin gɛt prɔblɛm dɛn, bɔt dɛn kin ɛnjɔy da tɛm de bak. Jɛsika tɔk se: “Fɔ tɔk tru, bɔku tin de fɔ du we tu pipul dɛn de wach dɛnsɛf fɔ mared. Bɔt a bin gladi we wi yuz wi tɛm ɛn trɛnk fɔ sabi wisɛf gud gud wan.” If yu ɛn ɔda pɔsin de wach unasɛf fɔ mared, una kɔntinyu fɔ tray tranga wan fɔ sabi unasɛf gud gud wan. If una du dat, i go ɛp una fɔ disayd fɔ du di rayt tin.