1-2. (a) Wetin bin de apin to Pɔl di tɛm we i rayt di lɛta to di Kristian dɛn na Ɛfisɔs? (b) Us kwɛstyɔn dɛn wi go tɔk bɔt?

 PƆL bin want fɔ ɛnkɔrej in kɔmpin Kristian dɛn we in na bin prizina na Rom. I nɔ bin ebul fɔ go fɛn dɛn bikɔs i bin de na prizin, so i disayd fɔ rayt lɛta dɛn. I bin rayt wan pan dɛn lɛta dɛn de to di Kristian dɛn na Ɛfisɔs arawnd di ia 60 ɔ 61 afta Krays.​—Ɛfi. 1:1; 4:1.

² Lɛk tɛn ia bifo da tɛm de, Pɔl bin spɛn bɔku tɛm na Ɛfisɔs fɔ prich ɛn tich di gud nyuz. (Akt 19:1, 8-10; 20:20, 21) I bin rili lɛk in brɔda dɛn ɛn i bin want fɔ ɛp dɛn fɔ kɔntinyu fɔ sav Jiova fetful wan. Bɔt wetin mek i bin rayt lɛta to di anɔyntɛd Kristian dɛn bɔt daknɛs ɛn layt? Ɛn us lɛsin dɛn wi ɔl we na Kristian kin lan frɔm dis advays? Lɛ wi tɔk bɔt di ansa dɛn to dɛn kwɛstyɔn dɛn ya.

DƐN KƆMƆT NA DAKNƐS ƐN KAM NA LAYT

3. Us wɔd dɛn Pɔl yuz insay di lɛta we i bin rayt to di Kristian dɛn na Ɛfisɔs?

³ Pɔl bin rayt to di Kristian dɛn na Ɛfisɔs se: “Tɛm bin de we una na bin daknɛs, bɔt naw una na layt.” (Ɛfi. 5:8) Pɔl yuz dɛn tu wɔd dɛn ya daknɛs ɛn layt fɔ sho aw di Kristian dɛn na Ɛfisɔs bin dɔn rili chenj. Lɛ wi tɔk bɔt wetin mek Pɔl tɔk se “tɛm bin de” we di Kristian dɛn na Ɛfisɔs “na bin daknɛs.”

4. Us we dɛn di Kristian dɛn na Ɛfisɔs bin de na daknɛs bikɔs ɔf lay lay rilijɔn?

⁴ Lay lay rilijɔn. Bifo di pipul dɛn na Ɛfisɔs lan bɔt di  trut ɛn kam fɔ bi Kristian, dɛn bin biliv tin dɛn we lay lay rilijɔn de tich ɛn majik. Na insay Ɛfisɔs di tɛmpul fɔ wan Grik uman gɔd we nem Atimis bin de we bɔku pipul dɛn bin de si as wan pan di wɔndaful tin dɛn we mɔtalman dɔn ɛva mek na di wɔl da tɛm de. Pipul dɛn bin de go na da tɛmpul de fɔ wɔship lay lay gɔd dɛn. Di wan dɛn we bin de du ɔlkayn wok wit dɛn an bin de gɛt bɔku mɔni bikɔs dɛn bin de mek ɛn sɛl imej dɛn bɔt di tɛmpul ɛn di uman gɔd. (Akt 19:23-27) Pantap dat, bɔku pipul dɛn na Ɛfisɔs bin de du majik.​—Akt 19:19.

5. Aw di pipul dɛn na Ɛfisɔs bin de pan daknɛs bikɔs ɔf fri layf?

⁵ Fri layf. Ɔlman bin sabi di pipul dɛn we bin de na Ɛfisɔs as pipul dɛn we bin de liv fri layf ɛn we bin de du tin dɛn we de sho se dɛn nɔ gɛt wan shem ɔ rɛspɛkt. Bɔku tɛm, di drama dɛn we dɛn bin de akt ɛn dɛn sɛlibreshɔn dɛn bin jɔs de bɔt mami ɛn dadi biznɛs. (Ɛfi. 5:3) Bɔku pan dɛn “nɔ de fil bad igen we dɛn du bad tin.” Di orijinal minin fɔ dɛn wɔd dɛn ya min we “pɔsin nɔ de fil pen igen.” (Ɛfi. 4:17-19) Bifo di pipul dɛn na Ɛfisɔs lan bɔt wetin rayt ɛn rɔng, dɛn kɔnshɛns nɔ bin de kɔndɛm dɛn fɔ di rɔng tin dɛn we dɛn bin de du. Dɛn nɔ bin bisin bɔt aw Jiova bin de fil bɔt di tin dɛn we dɛn bin de du. Na dat mek Pɔl se, i bin tan lɛk “dɛn maynd de insay daknɛs, ɛn dɛn de fa frɔm di layf we de kɔmɔt to Gɔd.”

6. Wetin mek Pɔl se “naw” di pipul dɛn na Ɛfisɔs “na layt”?

⁶ Bɔt sɔm pan di pipul dɛn na Ɛfisɔs nɔ bin kɔntinyu fɔ de na daknɛs. Pɔl bin rayt se “naw [dɛn] na layt bikɔs [dɛn] gɛt wanwɔd wit di Masta.” (Ɛfi. 5:8) Dɛn bin dɔn stat fɔ liv dɛn layf lɛk aw Jiova in Wɔd se we bin tan lɛk layt we bin de gayd dɛn. (Sam 119:105) Dɛn bin lɛf di lay lay wɔship ɛn fri layf we dɛn bin de pan. Dɛn bin de “falamakata Gɔd” ɛn dɛn bin de du dɛn bɛst fɔ wɔship Jiova ɛn mek i gladi.​—Ɛfi. 5:1.

7. Aw wi fiba bɔku pan di Kristian dɛn we bin de na Ɛfisɔs?

 ⁷ Bifo wisɛf lan di trut, wi bin de na lay lay rilijɔn ɛn wi bin de liv fri layf jɔs lɛk di Kristian dɛn na Ɛfisɔs. Sɔm pan wi bin de sɛlibret ɔlide dɛn we lay lay rilijɔn de sɛlibret, ɛn ɔda wan dɛn bin de liv fri layf. Bɔt we wi lan bɔt Jiova in lɔ dɛn bɔt wetin rayt ɛn rɔng, wi mek chenj dɛn na wi layf. Wi bigin fɔ du tin dɛn di we aw Jiova want. Ɛn dat mek wi dɔn de ɛnjɔy bɔku bɛnifit dɛn. (Ayz. 48:17) Bɔt naw, wi de gɛt prɔblɛm dɛn. Wi nid fɔ kɔntinyu fɔ avɔyd di daknɛs we wi dɔn lɛf biɛn ɛn “kɔntinyu fɔ waka lɛk layt in pikin dɛn.” Aw wi go du dat?

AVƆYD DI DAKNƐS

8. Akɔdin to Ɛfishians 5:3-5, wetin di Kristian dɛn na Ɛfisɔs bin nid fɔ avɔyd?

⁸ Rid Ɛfishians 5:3-5. Fɔ mek di Kristian dɛn na Ɛfisɔs nɔ kɔntinyu fɔ de na daknɛs, dɛn bin nid fɔ kɔntinyu fɔ avɔyd tin dɛn we go mek Jiova nɔ gladi. Dat min se dɛn nɔ fɔ jɔs avɔyd mami ɛn dadi biznɛs di we aw Gɔd nɔ want, bɔt dɛn fɔ avɔyd dɔti tɔk bak. Pɔl bin mɛmba dɛn se dɛn fɔ avɔyd dɛn tin dɛn de if dɛn want fɔ gɛt “ɛnitin na Krays ɛn Gɔd dɛn Kiŋdɔm.”

9. Wetin mek wi fɔ rili tek tɛm mek wi nɔ du ɛnitin we go mek wi du mami ɛn dadi biznɛs di we aw Gɔd nɔ want?

⁹ Wisɛf nid fɔ kɔntinyu fɔ fɛt agens “tin dɛn we nɔ gɛt wan bɛnifit we dɛn de du na dak.” (Ɛfi. 5:11) Ɛkspiriɛns dɛn dɔn sho bɔku tɛm se we pɔsin kɔntinyu fɔ luk, lisin to, ɔ de tɔk bɔt tin dɛn we nɔ klin, ɛn fri layf, dat go mek i izi fɔ mek i du wetin bad. (Jɛn. 3:6; Jems 1:14, 15) Insay wan kɔntri, bɔku brɔda ɛn sista dɛn bin bigin fɔ sɛn mɛsej to dɛnsɛf na soshal midia. Bɔku pan dɛn bin stat fɔ tɔk bɔt spirichwal tin dɛn. Bɔt as tɛm de go, dɛn bigin fɔ tɔk bɔt tin dɛn we nɔ de mek Jiova gladi. Na mami ɛn dadi biznɛs mɔ dɛn bin de tɔk bɔt. Leta bɔku pan dɛn bin gri se bikɔs dɛn bin de tɔk bɔt tin dɛn we nɔ klin, dat bin mek dɛn du mami ɛn dadi biznɛs di we aw Gɔd nɔ want.

10. Aw Setan de tray fɔ ful wi? (Ɛfishians 5:6)

¹⁰ Dis wɔl ya we Setan de rul kin tray fɔ ful wi fɔ mek wi biliv se di tin dɛn we Jiova se na fri layf ɛn we nɔ klin nɔ rili bad. (2 Pit. 2:19) Dis tin we Setan de du nɔ de sɔprayz wi! Wan pan di taktis dɛn we Setan dɔn de yuz fɔ lɔng tɛm na fɔ kɔnfyuz pipul dɛn so dat dɛn nɔ go ebul no di difrɛns bitwin wetin rayt ɛn rɔng. (Ayz. 5:20; 2 Kɔr. 4:4) Na dat mek bɔku fim dɛn, tɛlivishɔn program dɛn, ɛn wɛbsayt dɛn de sho tin dɛn we de agens wetin Jiova se rayt. Setan want wi fɔ tink se di dɔti ɛn fri layf we bɔku pipul dɛn na di wɔl de pan nɔ bad, ɛn na tin dɛn we wi go ɛnjɔy ɛn bad tin nɔ go apin to wi if wi du dɛn.​—Rid Ɛfishians 5:6.

11. Aw Angɛla in ɛkspiriɛns sho se wi nid fɔ aplay di fayn advays we de na Ɛfishians 5:7? (Luk bak di pikchɔ.)

¹¹ Setan want lɛ wi de spɛnd tɛm wit pipul dɛn we go mek i nɔ izi fɔ lɛ wi obe Jiova in lɔ dɛn. Na dat mek Pɔl bin tɛl di Kristian dɛn na Ɛfisɔs se: “Una nɔ jɔyn” dɛn wan dɛn we de du tin dɛn we rɔng na Gɔd in yay. (Ɛfi. 5:7) Wi nid fɔ tek tɛm mɔ pas di Kristian dɛn we bin de na Ɛfisɔs, bikɔs tide wi nɔ jɔs de spɛn tɛm wit pipul dɛn we wi de si fes-to-fes, bɔt wi de spɛn tɛm bak na soshal midia wit pipul dɛn we wi nɔ de si. Angɛla, a we de na  Eshia bin kam fɔ si aw soshal midia kin ambɔg pipul dɛn. I bin tɔk se: “Na trap. Smɔl smɔl, di we aw a bin de tink stat fɔ chenj. Afta sɔm tɛm, a bigin fɔ tink se i nɔ bad fɔ gɛt pipul dɛn we nɔ de rɛspɛkt Baybul prinsipul dɛn as padi. Ɛn as tɛm de go, a bigin fil se i nɔ bad fɔ du tin dɛn we de mek Jiova nɔ gladi.” Sɔm ɛlda dɛn bin tek tɛm fɔ ɛp Angɛla fɔ mek di chenj dɛn we i bin nid fɔ mek. I tɔk se: “Naw a de pe atɛnshɔn mɔ pan spirichwal tin dɛn, nɔto soshal midia.”

12. Wetin go ɛp wi fɔ kɔntinyu fɔ obe Jiova in lɔ dɛn bɔt wetin rayt ɛn rɔng?

¹² Wi nid fɔ tray tranga wan fɔ avɔyd di we aw di wɔl de tink we i kam pan fɔ liv fri layf. Wi no se di we aw dɛn de tink nɔ kɔrɛkt. (Ɛfi. 4:19, 20) I go fayn fɔ mek wi aks wisɛf dɛn kwɛstyɔn dɛn ya: ‘A kin tray tranga wan nɔ fɔ spɛn tumɔs tɛm wit mi wokmet dɛn, klasmet dɛn, ɔ pipul dɛn we nɔ gɛt wan rɛspɛkt fɔ Jiova in lɔ dɛn bɔt wetin rayt ɛn rɔng? A gɛt maynd fɔ fala wetin Jiova se rayt ɔ rɔng pan ɔl we ɔda pipul dɛn go tɔk bad bɔt mi?’ Lɛk aw 2 Timoti 2:20-22 tɔk, sɔntɛm wi go nid bak fɔ tek tɛm pik wi tayt padi dɛn na di kɔngrigeshɔn. Wi fɔ mɛmba se sɔntɛm, sɔm pan dɛn nɔ go ɛp wi fɔ kɔntinyu fɔ sav Jiova fetful wan.

WAKA “LƐK LAYT IN PIKIN DƐN”

13. Wetin i min fɔ “kɔntinyu fɔ waka lɛk layt in pikin dɛn?” (Ɛfishians 5:7-9)

¹³ Pɔl nɔ bin jɔs ɛnkɔrej di Kristian dɛn na Ɛfisɔs fɔ kɔntinyu fɔ avɔyd di daknɛs, bɔt i bin ɛnkɔrej dɛn bak fɔ “kɔntinyu fɔ waka lɛk layt in pikin dɛn.” (Rid Ɛfishians 5:7-9.) Wetin dat min? I min se wi fɔ biev lɛk tru Kristian dɛn ɔltɛm. Wan tin we go ɛp wi fɔ du dat na we wi de tek tɛm rid ɛn stɔdi di Baybul ɛn wi pɔblikeshɔn dɛn. I rili impɔtant fɔ lɛ wi pe atɛnshɔn pan Jizɔs Krays we na “di layt fɔ di wɔl” in ɛgzampul ɛn di tin dɛn we i bin tich wi.​—Jɔn 8:12; Prɔv. 6:23.

14. Aw oli spirit kin ɛp wi?

¹⁴ Wi nid Gɔd in oli spirit bak fɔ ɛp wi so dat wi go kɔntinyu fɔ biev “lɛk layt in pikin dɛn.” Wetin mek? Na bikɔs i nɔ izi  fɔ mek wi kɔntinyu fɔ liv klin layf insay dis wɔl we bɔku pipul dɛn de liv fri layf. (1 Tɛs. 4:3-5, 7, 8) Oli spirit go ɛp wi fɔ mek wi avɔyd fɔ tink lɛk aw pipul dɛn na di wɔl de tink we nɔ de si tin dɛn di we aw Gɔd de si am. Oli spirit go ɛp wi bak fɔ du “ɔlkayn tin we gud, [ɛn] we rayt.”​—Ɛfi. 5:9.

15. Wetin wi go du fɔ gɛt oli spirit? (Ɛfishians 5:19, 20)

¹⁵ Wan tin we wi go du fɔ gɛt oli spirit na we wi de pre fɔ am. Jizɔs bin tɔk se Jiova go “gi oli spirit to di wan dɛn we de aks am.” (Lyuk 11:13) Wi de gɛt oli spirit bak we wi de prez Jiova togɛda na wi mitin dɛn. (Rid Ɛfishians 5:19, 20.) Gɔd in oli spirit go ɛp wi fɔ liv di kayn we we go mek Gɔd gladi.

16. Wetin go ɛp wi fɔ disayd fɔ du di rayt tin dɛn? (Ɛfishians 5:10, 17)

¹⁶ Wi nid fɔ no “wetin Jiova want” we wi de disayd fɔ du impɔtant tin dɛn ɛn du tin dɛn we gri wit wetin i want. (Rid Ɛfishians 5:10, 17.) We wi tray fɔ no Baybul prinsipul dɛn we gɛt sɔntin fɔ du wit wetin wi want fɔ disayd, wi de sho se wi want fɔ no aw Gɔd de tink bɔt di tin we wi want fɔ disayd. Dɔn we wi aplay in prinsipul dɛn, dat go mek wi disayd fɔ du di rayt tin dɛn.

17. Aw wi go yuz wi tɛm di bɛst we? (Ɛfishians 5:15, 16) (Luk bak di pikchɔ.)

¹⁷ Pɔl bin advays di Kristian dɛn na Ɛfisɔs bak fɔ yuz dɛn tɛm di bɛst we. (Rid Ɛfishians 5:15, 16.) Setan we na wi ɛnimi ɛn we di Baybul kɔl “di wikɛd wan,” want mek wi bizi de rɔnata tin dɛn na di wɔl te wi nɔ gɛt tɛm fɔ sav Gɔd. (1 Jɔn 5:19) I go izi fɔ mek pɔsin we na Kristian stat fɔ pe atɛnshɔn pan mɔni, buk lanin, ɔ wok ɛn nɔ pe atɛnshɔn pan di tin dɛn we i nid fɔ du fɔ sav Jiova. We dat apin, i de sho se i dɔn alaw di we aw di wɔl de tink fɔ afɛkt am. As wi ɔI no, dɛn tin dɛn de nɔ bad, bɔt dɛn nɔ fɔ ɛva bi di tin dɛn we impɔtant pas ɔl na wi layf. Fɔ waka  “lɛk layt in pikin dɛn,” wi nid fɔ “yuz [wi] tɛm di bɛst we,” ɛn pe atɛnshɔn pan di tin dɛn we rili impɔtant.

18. Wetin ɛn wetin Dɔnald bin du fɔ mek i go yuz in tɛm di bɛst we?

¹⁸ Luk fɔ we dɛn we yu go ebul du mɔ fɔ sav Jiova. Na dis Dɔnald we de na Sawt Afrika bin du. I tɔk se: “A tink bɔt mi layf ɛn a pre wit ɔl mi at to Jiova fɔ lɛ i ɛp mi fɔ du mɔ na di prichin wok. A bin pre bak fɔ gɛt wok we go mek a gɛt mɔ tɛm fɔ du di prichin wok. Wit Jiova in ɛp, a bin gɛt da kayn wok de. Naw mi ɛn mi wɛf dɔn stat fɔ yuz ɔl wi tɛm fɔ sav Jiova.”

19. Aw wi go kɔntinyu fɔ waka “lɛk layt in pikin dɛn?”

¹⁹ Wan dawt nɔ de se di lɛta we Pɔl bin rayt to di Kristian dɛn na Ɛfisɔs bin rili ɛp dɛn fɔ kɔntinyu fɔ sav Jiova fetful wan. Ɛn di advays we i bin gi dɛn we kɔmɔt frɔm Jiova go ɛp wi bak. As wi bin dɔn lan, i go ɛp wi fɔ yuz sɛns we wi de pik di tin dɛn we wi de yuz fɔ ɛnjɔy wisɛf ɛn di pipul dɛn we wi de spɛn tɛm wit. I de ɛp wi bak fɔ kɔntinyu fɔ stɔdi di Baybul ɔltɛm so dat di trut we tan lɛk layt go kɔntinyu fɔ gayd wi pan ɔl wetin wi de du. Ɛn i mek wi si se di oli spirit rili impɔtant bay we i de ɛp wi fɔ gɛt fayn kwaliti dɛn. We wi aplay di fayn advays dɛn we Pɔl bin rayt, i go ɛp wi fɔ disayd fɔ du di rayt tin dɛn we gri wit di we aw Jiova de tink. We wi du ɔl dɛn tin ya, wi go ebul fɔ avɔyd di daknɛs we de na dis wɔl ɛn kɔntinyu fɔ de na di layt!