STƆDI ATIKUL 10
Wetin Mek Yu Fɔ Baptayz?
“Una ɔl fɔ baptayz.”—AKT 2:38.
SIŊ 34 A Want Kɔntinyu fɔ Du Wetin Gɔd Want
WETIN WI GO LAN? a
1-2. Wetin kin apin bɔku tɛm we pipul dɛn de baptayz? Wetin wi go tɔk bɔt insay dis atikul?
YU DƆN ɛva wach pipul dɛn we de baptayz? Yu yɛri we dɛn de ansa di tu kwɛstyɔn dɛn bifo dɛn baptayz, ɛn dɛn sho se dɛn shɔ bay di we aw dɛn ansa. Yu si se dɛn famili ɛn padi dɛn rili gladi fɔ dɛn. We di pipul dɛn we de baptayz kɔmɔt na di wata, yu yɛri pipul dɛn de klap fɔ dɛn, ɛn yu si am na dɛn fes se dɛn gladi. Nɔmali, ɛni wik, bɔku pipul dɛn de gi dɛn layf to Jiova ɛn baptayz as in Witnɛs dɛn.
2 We yu? If yu de tink bɔt fɔ baptayz, yu na pɔsin we rili spɛshal na dis wikɛd wɔl, bikɔs yu “rɛdi fɔ wɔship” Jiova. (Sam 14:1, 2) Dɛn rayt dis atikul fɔ yu ilɛk yu yɔŋ ɔ ol. Bɔt wi we dɔn ɔlrɛdi baptayz sɛf want fɔ kɔntinyu fɔ mekɔp wi maynd fɔ sav Jiova sote go. So lɛ wi tɔk bɔt tri pan di bɔku rizin dɛn we mek wi want fɔ sav Jiova.
YU LƐK WETIN TRU ƐN WETIN RAYT
Setan dɔn pwɛl Jiova in gudnem fɔ lɔng lɔng tɛm, ɛn i de kɔntinyu fɔ du dat (Luk na paregraf 3 ɛn 4)
3. Wetin mek Jiova in savant dɛn lɛk wetin tru ɛn wetin rayt? (Sam 119:128, 163)
3 Jiova tɛl in pipul dɛn se dɛn fɔ ‘lɛk wetin tru.’ (Zɛk. 8:19) Jizɔs bin ɛnkɔrej in disaypul dɛn fɔ tray tranga wan fɔ du wetin rayt. (Mat. 5:6) Dis min se pɔsin fɔ rili gladi fɔ du wetin rayt, wetin gud, ɛn wetin klin na Gɔd in yay. Yu lɛk wetin tru ɛn wetin rayt? Wi shɔ se yu lɛk dat. Yu et lay ɛn ɔl wetin rɔng ɛn wikɛd. (Rid Sam 119:128, 163.) Pɔsin we de lay de falamakata Setan we de rul dis wɔl. (Jɔn 8:44; 12:31) Wan pan Setan in gol dɛn na fɔ pwɛl Jiova Gɔd in oli nem. Frɔm di tɛm we Adam ɛn Iv bin tɔn dɛn bak pan Gɔd, Setan dɔn de tɔk lay lay tin dɛn bɔt wi Gɔd. I bin tray fɔ mek pipul dɛn tink se Jiova na Gɔd we jɔs bisin bɔt insɛf, ɛn in na Rula we nɔ ɔnɛs, we de ol gud tin dɛn frɔm mɔtalman. (Jɛn. 3:1, 4, 5) Di lay lay tin dɛn we Setan de tɔk bɔt Jiova dɔn kɔntinyu fɔ mek pipul dɛn de tink bad bɔt Am. We mɔtalman disayd nɔ fɔ ‘lɛk wetin tru,’ Setan go mek dɛn du ɔlkayn tin dɛn we nɔ rayt ɛn mek dɛn du wikɛd tin dɛn.—Rom. 1:25-31.
4. Aw Jiova dɔn pruv se in na “di Gɔd we de tɔk tru”? (Luk bak di pikchɔ.)
4 Jiova na “di Gɔd we de tɔk tru,” ɛn i gladi fɔ tich di tru to di wan dɛn we lɛk am. (Sam 31:5, NWT) We i de du dat, i de ɛp dɛn so dat Setan nɔ go ful dɛn igen wit in lay lay tɔk dɛn. Jiova de tich in savant dɛn bak fɔ bi pipul dɛn we ɔnɛs ɛn we de du wetin rayt. Dat de ɛp dɛn fɔ gɛt mɔ rɛspɛkt ɛn kolat. (Prɔv. 13:5, 6) Sɔntɛm Jiova dɔn du dɛn tin dɛn de fɔ yu we yu stɔdi di Baybul. Yu dɔn lan se di we aw Jiova de du tin na di bɛst fɔ ɔl mɔtalman, ɛn fɔ yusɛf sɛf. (Sam 77:13) So yu want fɔ tinap tranga wan fɔ du wetin Gɔd se rayt. (Mat. 6:33) Yu want fɔ mek pipul dɛn no di trut ɛn fɔ pruv se wetin Setan tɔk bɔt wi Gɔd Jiova, na lay. Aw yu go du dat?
5. Aw yu go sɔpɔt wetin tru ɛn wetin rayt?
5 Yu go ebul liv yu layf di kayn we we de sho klia wan to ɔlman se yu nɔ biliv Setan in lay dɛn, ɛn yu de sɔpɔt wetin tru. Yu go ebul sho se yu want Jiova fɔ bi yu Rula ɛn yu want fɔ du wetin i se rayt. Aw yu go ebul du dat? Na fɔ pre to Jiova ɛn gi yu layf to am ɛn mek ɔlman no se yu dɔn gi yu layf to am bay we yu de baptayz. We yu lɛk wetin tru ɛn wetin rayt, dat go rili muv yu fɔ disayd fɔ baptayz.
YU LƐK JIZƆS KRAYS
6. Us rizin dɛn Sam 45:4 gi yu fɔ lɛk Jizɔs Krays?
6 Wetin mek yu lɛk Jizɔs Krays? Notis sɔm gud rizin dɛn we de na Sam 45:4. (Rid.) Jizɔs lɛk wetin tru, pɔsin we de put insɛf dɔŋ, ɛn wetin rayt. If yu lɛk wetin tru ɛn wetin rayt, i de sho se yu lɛk Jizɔs Krays bak. Tink bɔt aw Jizɔs bin gɛt maynd fɔ mek pipul dɛn no wetin tru ɛn wetin rayt. (Jɔn 18:37) Bɔt aw Jizɔs tich wi fɔ bi pipul dɛn we de put wisɛf dɔŋ?
7. Wetin yu lɛk bɔt di put we Jizɔs de put insɛf dɔŋ?
7 Jizɔs tich wi fɔ bi pipul dɛn we de put wisɛf dɔŋ bay di tin dɛn we i du. Fɔ ɛgzampul, i de gi ɔl di glori to in Papa, nɔto insɛf. (Mak 10:17, 18; Jɔn 5:19) Aw yu fil we yu si se Jizɔs rili put insɛf dɔŋ? Dat nɔ muv yu fɔ lɛk Gɔd in Pikin ɛn fɔ fala am? Dat mek yu lɛk am ɛn want fɔ fala am. Wetin mek Jizɔs de put insɛf dɔŋ? Na bikɔs i lɛk in Papa we ɔmbul ɛn de falamakata am. (Sam 18:35; Ibru. 1:3) Yu nɔ gladi fɔ fala Jizɔs we de falamakata Jiova in kwaliti dɛn pafɛkt wan?
8. Wetin mek wi gladi we Jizɔs na wi Kiŋ?
8 Wi lɛk Jizɔs as wi Kiŋ bikɔs in na di bɛst Rula. Na Jiova insɛf sɛf dɔn tren in Pikin ɛn pik am fɔ rul. (Ayz. 50:4, 5) Tink bak bɔt di kayn we aw Jizɔs dɔn sho se i rili lɛk wi. (Jɔn 13:1) Bikɔs Jizɔs na yu Kiŋ, i fit fɔ mek yu lɛk am. I bin ɛksplen se di wan dɛn we rili lɛk am, dat na di wan dɛn we i de kɔl in padi dɛn, de sho se dɛn lɛk am bay we dɛn de obe in lɔ dɛn. (Jɔn 14:15; 15:14, 15) Na big big ɔnɔ wi gɛt fɔ bi padi to Jiova in Pikin!
9. Aw Kristian dɛn baptizim fiba Krays in yon?
9 Wan pan Jizɔs in lɔ dɛn na dat in disaypul dɛn fɔ baptayz. (Mat. 28:19, 20) I bin sɛt di ɛgzampul. Sɔm tin dɛn de we mek Jizɔs in baptizim difrɛn frɔm in disaypul dɛn yon. (Rid di bɔks we gɛt di taytul “ Aw Jizɔs in Baptizim Difrɛn Frɔm In Disaypul dɛn Yon?”) Bɔt ɔda we dɛn de we Jizɔs in baptizim fiba in disaypul dɛn yon. We Jizɔs bin baptayz, i gi insɛf fɔ du wetin in Papa want. (Ibru. 10:7) Semweso, we Jizɔs in disaypul dɛn baptayz, dɛn de sho ɔlman se dɛn dɔn gi dɛn layf to Jiova Gɔd. Naw, di tin we impɔtant pas ɔl na dɛn layf na fɔ du wetin Gɔd want, nɔto fɔ du wetin dɛn want. So dɛn de falamakata dɛn Masta in ɛgzampul.
10. Us rizin dɛn yu gɛt fɔ lɛk Jizɔs? Wetin di lɛk we yu lɛk Jizɔs fɔ muv yu fɔ du?
10 Yu biliv se Jizɔs na Jiova in wangren Pikin we insɛf sɛf mek, ɛn yu gladi we in na di Kiŋ we Gɔd dɔn pik fɔ rul wi. Yu no se Jizɔs ɔmbul, ɛn i de falamakata in Papa pafɛkt wan. Yu dɔn lan se i bin de fid pipul dɛn we angri, i bin de kɔrej di wan dɛn we dɛn at pwɛl, ɛn ivin mɛn di wan dɛn we sik. (Mat. 14:14-21) Yu dɔn si aw i de lid in kɔngrigeshɔn tide. (Mat. 23:10) Ɛn yu no se i go du wɔndaful tin dɛn tumara bambay as Kiŋ na Gɔd in Kiŋdɔm, we pas di tin dɛn we i bin du fa fawe. Aw yu go sho se yu lɛk am? Na bay we yu de falamakata in ɛgzampul. (Jɔn 14:21) Wan pan di fɔs tin dɛn we yu go du fɔ fala in ɛgzampul na fɔ gi yu layf to Jiova ɛn baptayz.
YU LƐK JIOVA GƆD
11. Wetin na di rizin we impɔtant pas ɔl we fɔ mek pɔsin baptayz?
11 Wetin na di rizin we impɔtant pas ɔl we fɔ mek pɔsin baptayz? Jizɔs bin sho Gɔd in lɔ we pas ɔl di ɔda lɔ dɛn bay we i bin se: “Yu fɔ lɛk Jiova we na yu Gɔd wit ɔl yu at, wit ɔl yu layf, wit ɔl yu maynd, ɛn wit ɔl yu trɛnk.” (Mak 12:30) Dɛn wɔd dɛn de, de sho aw yu lɛk Gɔd?
Na Jiova de gi yu ɔl di gud tin dɛn we yu dɔn ɛva ɛnjɔy, ɛn we yu go ɛva ɛnjɔy (Luk na paregraf 12 ɛn 13)
12. Wetin mek yu lɛk Jiova? (Luk bak di pikchɔ.)
12 Yu gɛt bɔku rizin dɛn fɔ lɛk Jiova. Fɔ ɛgzampul, yu dɔn kam fɔ ɔndastand se na in “de gi layf,” ɛn na in de gi “ɔl gud gift ɛn ɔl pafɛkt prɛzɛnt.” (Sam 36:9; Jems 1:17) Ɛni gud tin we yu de ɛnjɔy kɔmɔt frɔm wi Gɔd we gɛt lɔv ɛn fri-an.
13. Wetin mek di day we Jizɔs day fɔ wi na wɔndaful gift?
13 Di day we Jizɔs day fɔ wi na wɔndaful gift we Jiova dɔn gi wi. Wetin mek wi se so? Tink bɔt di tayt padi biznɛs we de bitwin Jiova ɛn in Pikin. Jizɔs bin se: “Di Papa lɛk mi” ɛn “a lɛk di Papa.” (Jɔn 10:17; 14:31) Dɛn padi biznɛs bin tayt mɔ ɛn mɔ we dɛn bin de togɛda fɔ lɔng lɔng tɛm. (Prɔv. 8:22, 23, 30) Tink bɔt di pen we Gɔd bin fil we i alaw in Pikin fɔ sɔfa ɛn day. Jiova rili lɛk mɔtalman, ivin yu. Na dat mek i bin rɛdi fɔ gi in Pikin we i lɛk as sakrifays fɔ ɛp yu ɛn ɔda pipul dɛn fɔ de sote go. (Jɔn 3:16; Gal. 2:20) Dis na di rizin we pas ɔl ɔda rizin dɛn we wi gɛt fɔ lɛk Gɔd.
14. Wetin na di bɛst tin we yu go ɛva disayd fɔ du na yu layf?
14 Yu dɔn lɛk Jiova mɔ bikɔs yu dɔn lan mɔ bɔt am. Wan dawt nɔ de se yu want fɔ kam nia Jiova mɔ ɛn mɔ naw ɛn sote go. Ɛn yu go ebul fɔ du dat. I de ɛnkɔrej yu fɔ mek yu at gladi. (Prɔv. 23:15, 16) Yu kin du dat bay wetin yu de se ɛn wetin yu de du. Di we aw yu de liv yu layf go sho se yu rili lɛk Jiova. (1 Jɔn 5:3) Di bɛst tin we yu go ɛva du na we yu disayd fɔ liv yu layf di we we go mek Jiova gladi.
15. Aw yu go sho se yu lɛk Jiova?
15 Aw yu go sho se yu lɛk Jiova? Fɔs, yu fɔ pre wan spɛshal prea fɔ gi yu layf to di wangren tru Gɔd. (Sam 40:8) Dɔn, yu fɔ mek ɔlman no se yu dɔn gi yu layf to Gɔd bay we yu baptayz. As wi bin dɔn tɔk na di biginin insay dis atikul, di baptayz we yu go baptayz go mek yu gladi ɛn na impɔtant tɛm na yu layf. Yu go bigin fɔ liv nyu layf, we nɔto fɔ yusɛf igen, bɔt na fɔ Jiova. (Rom. 14:8; 1 Pit. 4:1, 2) Dis go tan lɛk siriɔs tin we yu go nid fɔ disayd fɔ du, ɛn na so i bi. Bɔt i de gi yu chans fɔ mek yu liv di bɛst layf. Aw?
16. Wetin Sam 41:12 se Jiova go du fɔ di wan dɛn we yuz dɛn layf fɔ sav am?
16 Jiova na di Pɔsin we gɛt fri-an pas ɔlman. Ilɛk wetin yu gi Jiova, i go gi yu bak pas wetin yu gi am fa fawe. (Mak 10:29, 30) I go mek yu gɛt layf we yu go ɛnjɔy, i go blɛs yu, ɛn yu layf go gɛt minin ivin insay dis wikɛd wɔl. Ɛn dis na jɔs di biginin. Yu nɔ nid fɔ stɔp fɔ liv di layf we yu go bigin fɔ liv afta yu baptayz. Yu go ebul fɔ kɔntinyu fɔ sav yu Papa we lɛk yu sote go. Di lɔv we de bitwin yu ɛn yu Papa go kɔntinyu fɔ gro, ɛn jɔs lɛk aw Jiova na Gɔd we de sote go, yusɛf go gɛt layf we go de sote go.—Rid Sam 41:12.
17. Wetin yu go gi Jiova we i nɔ gɛt yet?
17 We yu gi yu layf to Gɔd ɛn baptayz, yu gɛt di ɔnɔ fɔ gi yu Papa sɔntin we rili valyu. I dɔn gi yu ɔl di gud tin dɛn we yu dɔn ɛva ɛnjɔy, ɛn ɔl di tin dɛn we de mek yu gladi. Yu go ebul fɔ gi di Wan we mek di ɛvin ɛn di wɔl sɔntin we i nɔ gɛt yet, dat na di rɛdi we yu rɛdi fɔ kɔntinyu fɔ sav am. (Job 1:8; 41:11; Prɔv. 27:11) Fɔ tru, dis na di bɛst we fɔ liv yu layf. Wan dawt nɔ de se di lɛk we yu lɛk Jiova na di bɛst rizin fɔ mek yu baptayz.
WETIN YU DE WET FƆ?
18. Us kwɛstyɔn dɛn yu fɔ aks yusɛf?
18 Aw yu go ansa di kwɛstyɔn we se, Yu dɔn rɛdi fɔ baptayz? Na yu nɔmɔ go ebul fɔ ansa da kwɛstyɔn de. Sɔntɛm i go fayn if yu aks yusɛf, ‘Wetin a de wet fɔ?’ (Akt 8:36) Mɛmba di tri rizin dɛn we wi dɔn tɔk bɔt. Fɔs, yu lɛk wetin tru ɛn wetin rayt. Aks yusɛf, ‘A go want fɔ si di de we ɔlman go tɔk di tru ɛn du wetin rayt?’ Sɛkɔn, yu lɛk Jizɔs Krays. Aks yusɛf, ‘A want Gɔd in Pikin fɔ bi mi Kiŋ, ɛn a go want fɔ falamakata in ɛgzampul?’ Di tɔd rizin we impɔtant pas dɛn ɔl na dat yu lɛk Jiova. Aks yusɛf, ‘A want fɔ mek Jiova in at gladi bay we a de sav am as mi Gɔd?’ If yu ansa to dɛn kwɛstyɔn dɛn ya na yɛs, wɛl, wetin mek yu nɔ want fɔ baptayz? Wetin yu de wet fɔ?—Akt 16:33.
19. Wetin mek yu nɔ fɔ westɛm fɔ baptayz? Gi wan ɛgzampul. (Jɔn 4:34)
19 If yu nɔ shɔ if yu fɔ baptayz, na fɔ tink bɔt wan ɛgzampul we Jizɔs bin yuz. (Rid Jɔn 4:34.) Mɛmba se Jizɔs bin kɔmpia fɔ du wetin in Papa want to it. Wetin mek? Na bikɔs it gud fɔ wi. Jizɔs bin no se ɔl wetin Jiova de aks wi fɔ du gud fɔ wi. Jiova nɔ want mek wi du ɛnitin we go mek bad mit wi. Fɔ se Jiova want fɔ mek yu baptayz? Yɛs. (Akt 2:38) So na fɔ gɛt kɔnfidɛns se we yu obe di lɔ we se yu fɔ baptayz, dat go bɛnifit yu. If yu nɔ go westɛm fɔ it it we rili swit, wetin mek yu de westɛm fɔ baptayz?
20. Wetin wi go tɔk bɔt insay di nɛks atikul?
20 Wetin mek sɔm pipul dɛn kin wet? Sɔntɛm bɔku pipul dɛn go ansa se, “A nɔ rɛdi yet.” Di tru na dat di disayd we yu de disayd fɔ gi yu layf to Jiova ɛn baptayz impɔtant pas ɛni ɔda tin we yu go ɛva disayd fɔ du. So i go tek tɛm, yu go nid fɔ rili tink bɔt am ɛn tray tranga wan fɔ mek yu kwalifay. Bɔt if yu rili want fɔ baptayz, wetin yu go du naw fɔ rɛdi yusɛf? Wi go ansa da kwɛstyɔn de na di nɛks atikul.
SIŊ 28 Bi Jiova in Padi
a Fɔ baptayz na wan impɔtant tin fɔ ɛni Baybul studɛnt. Wetin go muv Baybul studɛnt fɔ du dat? Na lɔv. Bɔt lɔv fɔ wetin ɛn fɔ udat? Insay dis atikul, wi go fɛn di ansa dɛn ɛn tɔk bɔt aw wi layf go tan lɛk we wi baptayz as Kristian dɛn.
