1. Aw yu layf bin tan lɛk bifo yu bigin fɔ stɔdi di Baybul?

 AW YU layf bin tan lɛk bifo yu bigin fɔ stɔdi di Baybul wit Jiova Witnɛs dɛn? Bɔku pan wi nɔ kin lɛk fɔ tink bɔt dat. I go bi se na di tin dɛn we di wɔl se rayt ɛn rɔng bin de afɛkt di we aw wi bin de tink ɛn di abit dɛn we wi bin gɛt. If na so i bi, dat min se wi “nɔ bin gɛt op, ɛn [wi] nɔ bin no Gɔd na di wɔl.” (Ɛfi. 2:​12) Bɔt afta wi bigin fɔ stɔdi di Baybul, wi layf chenj.

2. Wetin yu bin kam fɔ no we yu bigin fɔ stɔdi di Baybul?

² We yu bigin fɔ stɔdi di Baybul, yu kam fɔ no se yu gɛt Papa na ɛvin, we rili lɛk yu. Yu kam fɔ no bak se if yu want fɔ mek Jiova gladi ɛn bi pat pan in famili, yu go nid fɔ mek big chenj dɛn na yu layf. Yu fɔ chenj di we aw yu de si tin, ɛn di we aw yu de tink. Yu go nid fɔ lan fɔ du wetin Jiova se rayt ɛn avɔyd wetin i se rɔng.​—Ɛfi. 5:​3-5.

3. Akɔdin to Koloshians 3:​9, 10, wetin Jiova want wi fɔ du? Wetin wi go tɔk bɔt insay dis atikul?

³ Bikɔs Jiova na di Wan we mek wi, ɛn na wi Papa we de na ɛvin, i gɛt di rayt fɔ disayd aw di wan dɛn we de na in famili fɔ du tin. Ɛn bifo wi baptayz, i want fɔ mek wi tray tranga wan fɔ “lɛf di ol abit dɛn ɛn di tin dɛn we [wi] bin de du.” b (Rid Koloshians 3:​9, 10.) Dis atikul go ɛp di  wan dɛn we want fɔ baptayz fɔ ansa tri kwɛstyɔn dɛn: (1) Wetin na “di ol abit dɛn”? (2) Wetin mek Jiova want wi fɔ lɛf dɛn? (3) Aw wi go du dat? Fɔ wi we dɔn baptayz, dis stɔdi go ɛp wi fɔ mek wi nɔ gɛt wi ol abit dɛn bak.

4. Aw pɔsin de biev we “di ol abit dɛn” de kɔntrol am?

⁴ Bɔku tɛm, pɔsin we “di ol abit dɛn” de kɔntrol kin tink ɛn du di bad tin dɛn we di bɔdi want. Sɔntɛm i kin jɔs de tink bɔt insɛf nɔmɔ, i kwik fɔ vɛks, i nɔ gɛt tɛnki, ɛn i prawd. Sɔntɛm i kin lɛk fɔ wach dɛn rud rud pikchɔ dɛn, fim dɛn we gɛt fɔ du wit mami ɛn dadi biznɛs di we aw Gɔd nɔ want, ɔ fɛt-fɛt fim dɛn. Wan dawt nɔ de se i go gɛt sɔm gud kwaliti dɛn, ɛn sɔntɛm i go de fil am fɔ di bad tin dɛn we i de se ɔ du. Bɔt i nɔ gɛt di zil fɔ chenj di bad we aw i de tink ɛn du tin.—Gal. 5:​19-21; 2 Tim. 3:​2-5.

5. Wi go ebul fɔ lɛf ɔl wi ol abit dɛn? Ɛksplen. (Akt 3:​19)

⁵ Wi nɔ pafɛkt, so nɔn pan wi nɔ ebul fɔ pul ɔl di bad tin dɛn we wi kin tink bɔt ɛn di bad tin dɛn we wi bɔdi want frɔm wi at ɛn wi maynd. Sɔntɛnde, wi go se ɔ du tin dɛn we wi go rigrɛt. (Jɛr. 17:​9; Jems 3:​2) Bɔt we wi lɛf wi ol abit dɛn, di bad tin dɛn we wi bɔdi want ɛn di bad tin dɛn we wi bin de du nɔ go kɔntinyu fɔ kɔntrol wi igen. I de mek wi bi difrɛn pɔsin.—Ayz. 55:​7; rid Akt 3:​19.

6. Wetin mek Jiova want wi fɔ lɛf fɔ tink di rɔng we ɛn fɔ lɛf bad abit dɛn?

⁶ Jiova want wi fɔ lɛf fɔ tink di rɔng we ɛn fɔ lɛf bad abit dɛn bikɔs i lɛk wi pasmak, ɛn i want wi fɔ ɛnjɔy layf. (Ayz. 48:​17, 18) I no se dɛn wan dɛn we de du di bad tin dɛn we di bɔdi want de ambɔg dɛnsɛf ɛn di wan dɛn we de arawnd dɛn. I kin fil am we i de si wi de du bad to wisɛf ɛn di wan dɛn we de arawnd wi.

7. Akɔdin to Romans 12:​1, 2, wetin na di tin dɛn we wi gɛt fɔ disayd?

⁷ Sɔntɛm sɔm pan wi padi ɛn fambul dɛn go bigin provok wi fɔ we wi de tray fɔ chenj wi ol abit dɛn. (1 Pit. 4:​3, 4) Sɔntɛm dɛn go se wi gɛt rayt fɔ du ɛnitin we wi want ɛn wi nɔ fɔ alaw ɔda pipul dɛn fɔ  tɛl wi wetin fɔ du. Bɔt dɛn wan dɛn we nɔ de gri fɔ du wetin Jiova want nɔ rili fri. Fɔ tɔk tru, dɛn de alaw di wɔl we Setan de rul fɔ kɔntrol dɛn. (Rid Romans 12:​1, 2.) Wi ɔl gɛt fɔ disayd if wi go kɔntinyu fɔ gɛt wi ol abit dɛn we sin ɛn Setan in wɔl de mek wi gɛt, ɔ wi go alaw Jiova fɔ chenj wi ɛn ɛp wi fɔ bi gud pɔsin.—Ayz. 64:​8.

8. Wetin go ɛp wi fɔ avɔyd fɔ tink di rɔng we ɛn fɔ avɔyd bad abit dɛn?

⁸ Jiova no se i go tek sɔm tɛm ɛn wi go nid fɔ wok tranga wan fɔ ebul fɔ avɔyd fɔ tink di rɔng we ɛn fɔ avɔyd bad abit dɛn. (Sam 103:​13, 14) Bɔt Jiova de yuz in Wɔd, in spirit, ɛn in ɔganayzeshɔn fɔ gi wi di sɛns, di trɛnk, ɛn di sɔpɔt we wi nid fɔ chenj udat wi bi. Wan dawt nɔ de se i dɔn ɔlrɛdi ɛp yu. Naw lɛ wi kam tɔk bɔt sɔm tin dɛn we yu go ebul fɔ du fɔ lɛf di ol abit dɛn mɔ ɛn mɔ ɛn kwalifay fɔ baptayz.

9. Wetin Gɔd in Wɔd go ɛp yu fɔ du?

⁹ Yuz di Baybul fɔ chɛk yusɛf gud gud wan. Gɔd in Wɔd tan lɛk glas; i go ɛp yu fɔ chɛk di we aw yu de tink, tɔk, ɛn du tin. (Jems 1:​22-25) Yu Baybul ticha ɛn ɔda machɔ Kristian dɛn go advays yu. Fɔ ɛgzampul, dɛn go yuz di Baybul fɔ ɛp yu fɔ si di say dɛn we yu strɔng ɛn di say dɛn we yu wik. Dɛn go tich yu aw fɔ fɛn infɔmeshɔn dɛn na di Baybul we go gi yu gud advays bɔt aw yu go ebul fɔ lɛf bad abit dɛn. Ɛn Jiova rɛdi ɔltɛm fɔ ɛp yu. In na di bɛst Pɔsin fɔ ɛp yu bikɔs i no wetin de na yu at. (Prɔv. 14:​10; 15:​11) So mek am abit fɔ de pre to am ɛn stɔdi in Wɔd ɛvride.

10. Wetin yu lan frɔm Ili in ɛkspiriɛns?

¹⁰ Biliv tranga wan se di tin dɛn we Jiova de tɛl wi fɔ du na di bɛst. Wi kin bɛnifit frɔm ɔl di tin dɛn we Jiova de tɛl wi fɔ du. Di wan dɛn we de du wetin Jiova de tɛl dɛn gɛt rɛspɛkt fɔ dɛnsɛf, dɛn layf gɛt minin, ɛn dɛn gɛt tru tru gladi-at. (Sam 19:​7-11) Bɔt di wan dɛn we nɔ de gri fɔ du wetin Jiova de tɛl dɛn de sɔfa bikɔs dɛn de du di tin dɛn we di bɔdi want. Notis wetin wan man we nem Ili se bɔt wetin kin apin we wi nɔ gri fɔ du wetin Gɔd tɛl wi. In mama ɛn papa we mɛn am bin lɛk Jiova. Bɔt we Ili na bin tineja, i bin disayd fɔ fala bad padi dɛn. I bigin fɔ tif, tek drɔgs, ɛn du mami ɛn dadi biznɛs di we aw Gɔd nɔ want. Ili se i bin kam fɔ si se i bin de vɛks bad, ɛn i bin lɛk fɛt-fɛt. I tɔk se: “Fɔ tɔk tru, a bin du ɔl di tin dɛn we a bin dɔn lan se a nɔ fɔ du as Kristian.” Bɔt Ili nɔ bin fɔgɛt di tin dɛn we i bin dɔn lan we i bin yɔŋ. So i bigin fɔ stɔdi di Baybul bak. I tray tranga wan fɔ lɛf in bad abit dɛn, ɛn i baptayz insay di ia 2000. Aw i dɔn bɛnifit we i de du wetin Jiova se? Ili tɔk se: “Naw a gɛt kolat ɛn klin kɔnshɛns.” c Ili in ɛkspiriɛns mek wi si klia wan se di wan dɛn we nɔ de gri fɔ du wetin Jiova se kin du bad to dɛnsɛf. Pan ɔl dat, Jiova rɛdi fɔ ɛp dɛn fɔ chenj.

11. Wetin na di tin dɛn we Jiova et?

¹¹ Lan fɔ et wetin Jiova et. (Sam 97:​10) Di Baybul mek wi no se Jiova et ‘pɔsin we de fil tu gud bɔt insɛf, pɔsin we lɛk fɔ lay, ɛn pɔsin we de kil fɔ natin.’ (Prɔv. 6:​16, 17) I et bak ‘pɔsin we lɛk fɛt-fɛt ɛn  pɔsin we de ful pipul dɛn.’ (Sam 5:​6) Na bikɔs Jiova rili et dɛn abit dɛn de ɛn di tin dɛn we dɛn bin de du mek i bin dɔnawe wit ɔl di bad pipul dɛn we bin de insay Noa in tɛm, bikɔs dɛn bin ful-ɔp di wɔl wit fɛt-fɛt. (Jɛn. 6:​13) Tink bɔt ɔda ɛgzampul. Jiova bin mek prɔfɛt Malakay tɔk se I et ɛnibɔdi we de yuz kɔni kɔni we fɔ dayvɔs di pɔsin we i mared to, pan ɔl we di pɔsin nɔ du natin fɔ mek i dayvɔs am. Gɔd nɔ de gri fɔ tek dɛn wɔship, ɛn i go jɔj dɛn fɔ wetin dɛn de du.—Mal. 2:​13-16; Ibru. 13:​4.

12. Wetin i min fɔ “rili et wetin wikɛd”?

¹² Jiova want wi fɔ “rili et wetin wikɛd.” (Rom. 12:​9) Di wɔd dɛn fɔ “rili et” min se yu nɔ want fɔ gɛt natin fɔ du wit sɔntin; yu nɔ ivin want fɔ si am sɛf. Imajin aw yu go fil if pɔsin tɛl yu fɔ it rɔtin it. Sɔntɛm yu go ivin fil sik we yu tink bɔt am. Semweso, wi nɔ fɔ ivin tink bɔt fɔ du di tin dɛn we Jiova se bad.

13. Wetin mek wi fɔ protɛkt wi maynd?

¹³ Protɛkt yu maynd. Wetin wi de tink gɛt sɔntin fɔ du wit wetin wi de du. Na dat mek Jizɔs tich wi fɔ avɔyd fɔ tink bɔt tin dɛn we go mek wi kɔmit siriɔs sin. (Mat. 5:​21, 22, 28, 29) Wi want fɔ mek wi Papa we de na ɛvin gladi fɔ wi, nɔto so? So i rili impɔtant fɔ mek wi nɔ westɛm fɔ pul ɛni bad tin we kam na wi maynd.

14. Wetin di tin dɛn we wi de tɔk de sho bɔt wi? Us kwɛstyɔn dɛn wi fɔ ansa?

¹⁴ Kɔntrol wetin yu de tɔk. Jizɔs bin tɔk se: “Ɛnitin we kɔmɔt na pɔsin in mɔt kɔmɔt na in at.” (Mat. 15:​18) Fɔ tru, di tin dɛn we wi kin tɔk de sho udat wi rili bi insay. So aks yusɛf dɛn kwɛstyɔn dɛn ya: ‘A kin tɔk di tru pan ɔl we a no se dat go mek a gɛt prɔblɛm? As mared pɔsin, a kin tek tɛm lɛ a nɔ mek pɔsin we a nɔ mared to fil se a want am? A kin tray nɔ fɔ gɛt natin fɔ du wit rud rud tɔk dɛn? A kin tek tɛm tɔk we pɔsin mek a vɛks?’ I go rili fayn fɔ tek tɛm tink bɔt dɛn kwɛstyɔn dɛn de. Di tin dɛn we yu de tɔk tan lɛk bɔtin dɛn pan klos. If yu lus di bɔtin dɛn pan di klos, i go izi fɔ mek yu pul di klos. Semweso, if yu du yu bɛst fɔ pul kɔmɔt dɛn rud rud tɔk dɛn, bad wɔd, ɛn lay pan di tin dɛn we yu de tɔk, i go izi fɔ mek yu lɛf yu ol abit dɛn.

15. Wetin i min fɔ mek wi nel wi ol abit dɛn “na di tik”?

 ¹⁵ Rɛdi fɔ du sɔntin. Apɔsul Pɔl bin yuz pawaful wɔd dɛn fɔ tich wi se i rili impɔtant fɔ mek wi chenj wi layf. I bin rayt se wi nid fɔ nel wi ol abit dɛn “na di tik.” (Rom. 6:​6) Dis min se wi fɔ fala Krays in ɛgzampul. Wi nid fɔ kil bad abit dɛn ɛn tin dɛn we wi de du we Jiova et. Wi fɔ du dɛn tin dɛn ya fɔ mek wi gɛt klin kɔnshɛns ɛn gɛt di op fɔ ɛnjɔy layf we go de sote go. (Jɔn 17:​3; 1 Pit. 3:​21) Mɛmba se Jiova nɔ go chenj di we aw i de du tin fɔ mek wi gladi. Bifo dat, na wi nid fɔ chenj udat wi bi ɛn obe di tin dɛn we i de tɛl wi fɔ du.—Ayz. 1:​16-18; 55:​9.

16. Wetin mek yu fɔ mekɔp yu maynd fɔ kɔntinyu fɔ fɛt fɔ avɔyd di bad tin dɛn we di bɔdi want?

¹⁶ Kɔntinyu fɔ fɛt fɔ avɔyd di bad tin dɛn we di bɔdi want. Ivin we yu dɔn baptayz, yu go nid fɔ kɔntinyu fɔ fɛt fɔ avɔyd di bad tin dɛn we di bɔdi want. Tink bɔt di ɛkspiriɛns bɔt wan man we nem Marisio. We i bin yɔŋ, i stat fɔ put an pan omo biznɛs. Leta, i bin mit Jiova in pipul dɛn ɛn bigin fɔ stɔdi di Baybul. Afta i mek sɔm chenj dɛn na in layf, i bin baptayz insay 2002. Pan ɔl we Marisio dɔn de sav Jiova fɔ lɔng tɛm naw, i se: “Fɔ tɔk tru, tɛm dɛn de we a kin nid fɔ fɛt fɔ avɔyd di bad tin dɛn we di bɔdi want.” Bɔt i nɔ de alaw dis fɔ pwɛl in at. Bifo dat, i tɔk se: “A kin gladi bikɔs a no se we a nɔ du di bad tin dɛn we di bɔdi want, dat de mek Jiova gladi fɔ mi.” d

17. Wetin ɛnkɔrej yu bɔt Nabia in ɛkspiriɛns?

¹⁷ Pre fɔ mek Jiova ɛp yu, ɛn abop pan in spirit, nɔto pan yu yon trɛnk. (Gal. 5:​22; Fil. 4:​6) Wi nid fɔ mekɔp wi maynd fɔ lɛf di ol abit dɛn, ɛn nɔ gɛt dɛn bak. Tink bɔt wan uman we nem Nabia in ɛkspiriɛns. In papa bin lɛf am we i bin jɔs ol siks ia. I tɔk se: “Dis bin mek mi at rili pwɛl.” We Nabia bin de gro ɔp, i bin de vɛks kwik, ɛn i bin gɛt bad bad wamat. I bin bigin fɔ sɛl drɔgs, dɛn bin arɛst am, ɛn i bin spɛn sɔm tɛm na prizin. Jiova Witnɛs dɛn we bin de go na di prizin bin bigin fɔ stɔdi di Baybul wit am. Nabia stat fɔ mek big chenj dɛn na in layf. I tɔk se: “I bin izi fɔ mek a lɛf sɔm pan mi bad  abit dɛn. Bɔt fɔ lɛf fɔ smok nɔ bin izi atɔl.” I pas wan ia we Nabia bin de fɛt fɔ lɛf fɔ smok, ɛn i bin faynali ebul fɔ stɔp. Aw i bin du am? I tɔk se: “Di men tin we bin ɛp mi fɔ stɔp na we a bin de pre to Jiova ɔltɛm.” Naw i de tɛl ɔda pipul dɛn se: “A gɛt kɔnfidɛns se if a ebul fɔ mek chenj dɛn fɔ mek Jiova gladi, ɛnibɔdi kin du am.” e

18. Akɔdin to 1 Kɔrintians 6:​9-11, wetin bɔku pan Gɔd in savant dɛn dɔn ebul fɔ du?

¹⁸ Insay di fɔstɛm Kristian dɛn tɛm, sɔm pan di wan dɛn we Jiova bin pik fɔ rul wit Krays bin dɔn du bad bad tin dɛn. Fɔ ɛgzampul, dɛn bin de lɛf dɛn wɛf ɔ man ɛn go du mami ɛn dadi biznɛs wit ɔda pɔsin, dɛn bin de du mami ɛn dadi biznɛs wit dɛn kɔmpin man ɔ uman, ɛn dɛn na bin tifman dɛn. Bɔt Gɔd in oli spirit bin ɛp dɛn fɔ chenj dɛn bad abit dɛn. (Rid 1 Kɔrintians 6:​9-11.) Semweso tide, di Baybul dɔn ɛp bɔku bɔku pipul dɛn fɔ mek chenj dɛn na dɛn layf. f Dɛn dɔn ebul fɔ lɛf bad abit dɛn we nɔ bin izi fɔ lɛf. Dɛn ɛgzampul pruv se yusɛf go ebul fɔ lɛf yu bad abit dɛn so dat yu go kwalifay fɔ baptayz.

19. Wetin wi go tɔk bɔt insay di nɛks atikul?

¹⁹ Apat frɔm fɔ tray fɔ lɛf di ol abit dɛn, di wan dɛn we want fɔ baptayz fɔ wok tranga wan fɔ gɛt di nyu abit dɛn. Di nɛks atikul go tɔk bɔt aw wi go du dat ɛn aw ɔda pipul dɛn go ɛp wi.