1. Wetin na wan pan di kwaliti dɛn we Jizɔs gɛt we wi rili lɛk bɔt am? Ɛksplen.

 WAN impɔtant kwaliti we Jizɔs gɛt we wi gladi fɔ na we i ebul fɔ ɔndastand di prɔblɛm dɛn we mɔtalman dɛn de gɛt. We Jizɔs bin de na di wɔl, i bin ebul fɔ “gladi wit pipul wɛn dɛn gladi” ɛn “sɔri wit pipul wɛn dɛn sɔri.” (Rom 12:​15) Fɔ ɛgzampul, we i sɛn in 70 disaypul dɛn fɔ go prich, “Gɔd in spirit mek Jizɔs gladi” afta we dɛn tɛl am bɔt aw dɛn bin ebul fɔ du di prichin wok fayn. (Lyuk 10:​17-21) Bɔt we Jizɔs si di we aw Lazarɔs in day afɛkt di wan dɛn we lɛk am, Jizɔs “fil am bad bad wan.”—Jɔn 11:​33.

2. Wetin bin ɛp Jizɔs fɔ sho sɔri-at to ɔda pipul dɛn?

² Wetin bin ɛp dis man we pafɛkt fɔ gɛt sɔri-at ɛn sho se i bisin bɔt aw mɔtalman dɛn we de sin de fil? Wan pan di impɔtant tin dɛn we ɛp Jizɔs pas ɔl, na we i lɛk pipul dɛn. Frɔm wetin wi tɔk na di atikul we de bifo dis, Jizɔs bin se “na mɔtalman [i] bin lɛk mɔ.” (Prɔv. 8:​31, NW) Di we aw i bin lɛk pipul dɛn ɛp am fɔ sabi di we aw mɔtalman de tink. Di apɔsul Jɔn ɛksplen se: “Jizɔs insɛf sɛf bin no wetin de na [mɔtalman] dɛn at.” (Jɔn 2:​25) Jizɔs bin rili de sɔri fɔ ɔda pipul dɛn. Pipul dɛn bin de rili si am se i lɛk dɛn, ɛn dat bin de mek dɛn lisin to di Kiŋdɔm mɛsej. Di mɔ wi de sɔri fɔ pipul dɛn, na di mɔ wi go ebul fɔ prich to dɛn fayn.—2 Tim. 4:​5.

3-4. (a) If wi gɛt sɔri-at fɔ ɔda pipul dɛn, aw dat go mek wi si di prichin wok? (b) Wetin wi go tɔk bɔt insay dis atikul?

³ Di apɔsul Pɔl bin no se i nid fɔ prich, ɛn wisɛf no se wi nid fɔ prich. (1 Kɔr. 9:​16) Bɔt if wi gɛt sɔri-at fɔ ɔda pipul  dɛn, wi nɔ go jɔs si di prichin wok as tin we wi fɔ du. Wi go want fɔ pruv se wi bisin bɔt pipul dɛn ɛn wi want fɔ ɛp dɛn. Wi no se: “Di pɔsin we de gi go gladi pas di pɔsin we dɛn gi.” (Akt 20:​35, NW) Di mɔ we wi de prich bikɔs wi want fɔ ɛp pipul dɛn, na di mɔ wi go gladi fɔ du di prichin wok.

⁴ Insay dis atikul, wi go lan bɔt aw wi go sho se wi bisin bɔt aw ɔda pipul dɛn de fil we wi de prich. Fɔs, wi go si wetin wi go lan frɔm di we aw Jizɔs bin fil bɔt ɔda pipul dɛn. Dɔn, wi go tɔk bɔt 4 we dɛn we wi go falamakata in ɛgzampul.—1 Pit. 2:​21.

5-6. (a) Na udat dɛn Jizɔs bin sho sɔri-at to? (b) Wetin mek Jizɔs bin rili fil sɔri fɔ di pipul dɛn we i bin de prich to jɔs lɛk wetin Ayzaya 61:​1, 2?

⁵ Lɛ wi tɔk bɔt wan ɛgzampul bɔt aw Jizɔs bin sho se i gɛt sɔri-at. Wantɛm, Jizɔs ɛn in disaypul dɛn bin rili taya bikɔs dɛn bin dɔn de prich di gud nyuz ol de ɛn dɛn nɔ bin gɛt tɛm fɔ blo. Dɛn nɔ bin ivin “gɛt chans sɛf fɔ it.” So Jizɔs bin tek in disaypul dɛn “go na ples we pipul nɔ tap” fɔ “go blo” smɔl. Bɔt di pipul dɛn rɔn go bifo usay Jizɔs ɛn in disaypul dɛn bin de go. We Jizɔs bin rich de ɛn si di pipul dɛn, aw i bin fil ɛn wetin i bin du? Di Baybul se: “Jizɔs sɔri b fɔ dɛn, bikɔs dɛn bin jɛs de lɛkɛ ship we nɔ gɛt pɔsin fɔ mɛn dɛn, so i bigin fɔ lan dɛn plɛnti tin.”—Mak 6:​30-34.

⁶ Wetin mek Jizɔs bin fil sɔri fɔ di pipul dɛn? I bin notis se di pipul dɛn “bin jɛs de lɛkɛ ship we nɔ gɛt pɔsin fɔ mɛn dɛn.” Sɔntɛm Jizɔs bin si se sɔm pan di pipul dɛn bin po ɛn dɛn bin de wok tranga wan fɔ kia fɔ dɛn famili. Ɔ i go bi se ɔda wan dɛn bin de we dɛn at bin pwɛl bikɔs pɔsin we dɛn lɛk dɔn day. If na so i bi, Jizɔs go mɔs dɔn ɔndastand wetin bin de apin to dɛn. Jɔs lɛk aw wi bin dɔn tɔk na di atikul  bifo dis wan, Jizɔs insɛf bin gɛt sɔm pan dɛn prɔblɛm dɛn de. Jizɔs bin bisin bɔt ɔda pipul dɛn, ɛn dat bin mek i want fɔ gi dɛn mɛsej we go ɛnkɔrej dɛn.—Rid Ayzaya 61:​1, 2.

7. Aw wi go falamakata Jizɔs in ɛgzampul?

⁷ Wetin wi lan frɔm Jizɔs in ɛgzampul? Jɔs lɛk Jizɔs, di pipul dɛn we de arawnd wi tan lɛk “ship we nɔ gɛt pɔsin fɔ mɛn dɛn.” Dɛn gɛt bɔku bɔku prɔblɛm dɛn. Wi gɛt wetin dɛn nid, we na di mɛsej bɔt di Kiŋdɔm. (Rɛv. 14:​6) So wi de falamakata wi Masta ɛn wi de prich di gud nyuz bikɔs wi “gɛt sɔri-at fɔ poman.” (Sam 72:​13) Wi de fil sɔri fɔ di pipul dɛn ɛn wi want fɔ du sɔntin fɔ ɛp dɛn.

8. Wetin na wan we we wi go sho sɔri-at fɔ di wan dɛn we wi de prich to? Gi wan ɛgzampul.

⁸ Wetin go ɛp wi fɔ sho sɔri-at fɔ di wan dɛn we wi de prich to? Wi nid fɔ tink bɔt aw di pipul dɛn we wi de mit de tink ɛn fil, ɛn bak wi nid fɔ trit dɛn di we aw wi go want dɛn fɔ trit wi if di tin we de apin to dɛn apin to wi. c (Mat. 7:​12) Lɛ wi tɔk bɔt 4 we dɛn we wi go du dis. Fɔs, tink bɔt wetin ɛni wan pan di pipul dɛn we wi de prich to nid. Lɛ wi kɔmpia wetin wi de du we wi de prich to wetin dɔktɔ de du fɔ ɛp in peshɛnt dɛn. Gud dɔktɔ de tink bɔt wetin ɛni wan pan in peshɛnt dɛn nid. I de aks kwɛstyɔn dɛn ɛn tek tɛm lisin we di peshɛnt de tɛl am aw i de fil. Bifo di dɔktɔ gi di peshɛnt di fɔs mɛrɛsin we kam na in maynd, i go mek di peshɛnt du sɔm tɛst dɛn, dɔn afta dat i go gi am di rayt tritmɛnt. Semweso, wi nɔ fɔ tray fɔ yuz di sem we fɔ stat fɔ tɔk to ɔl di pipul dɛn we wi de prich to. Bifo dat, wi fɔ tray fɔ ɔndastand wetin de apin to ɛni wan pan di pipul dɛn we wi de prich to ɛn wetin dɛn de tink.

9. Wetin wi fɔ avɔyd? Ɛksplen.

⁹ We wi mit pɔsin we wi de prich, wi fɔ avɔyd fɔ tink se wi no wetin de apin to am ɔ wetin i biliv ɛn wetin mek i biliv am. (Prɔv. 18:​13) Bifo dat, tek tɛm aks kwɛstyɔn dɛn we go mek yu no sɔntin bɔt di pɔsin ɛn wetin i biliv. (Prɔv. 20:​5) Aks am bɔt in wok, in famili, di tin dɛn we bin dɔn apin to am, ɛn wetin i tink bɔt wetin una de tɔk if i fayn fɔ du dat insay una kɔlchɔ. We wi no wetin de apin to dɛn, dat go mek wi sho sɔri-at fɔ dɛn ɛn gi dɛn di ɛp we dɛn nid, jɔs lɛk aw Jizɔs bin du.—Luk Fɔs Lɛta Fɔ Kɔrint 9:​19-23.

10-11. Frɔm wetin de na Sɛkɛn Lɛta Fɔ Kɔrint 4:​7, 8, wetin na di sɛkɔn we we wi go sho sɔri-at? Gi wan ɛgzampul.

¹⁰ Sɛkɔn, tray fɔ imajin aw dɛn layf tan lɛk. Sɔntɛm, wi go ɔndastand wetin  de apin to dɛn. Bikɔs wi nɔ pafɛkt, wisɛf kin gɛt prɔblɛm dɛn. (1 Kɔr. 10:​13) Wi no se insay dis tɛm we wi de, layf nɔ kin rili izi. Na Jiova nɔmɔ de ɛp wi fɔ bia. (Rid Sɛkɛn Lɛta Fɔ Kɔrint 4:​7, 8.) Tink bɔt di wan dɛn we nɔ gɛt tayt padi biznɛs wit Jiova. I nɔ go rili izi fɔ dɛn fɔ liv na dis wɔl if Jiova nɔ ɛp dɛn. Jɔs lɛk Jizɔs, wi de fil sɔri fɔ dɛn, ɛn dat de mek wi want fɔ tɛl dɛn di “nyuz bɔt gud tin.”—Ayz. 52:​7.

¹¹ Tink bɔt wan brɔda we nem Saje in ɛgzampul. Bifo Saje lan di trut, i bin kwayɛt ɛn i bin de shem. I nɔ bin rili izi fɔ am fɔ tɔk to ɔda pipul dɛn. Leta, i bin gri fɔ stɔdi di Baybul. Saje bin tɔk se: “As a bin de stɔdi di Baybul, a kam fɔ lan se Kristian dɛn fɔ tɛl ɔda pipul dɛn wetin dɛn biliv. Fɔ tru, a bin de tink se a nɔ go ɛva du dat.” Bɔt dis brɔda bin de tink bɔt di wan dɛn we nɔ yɛri bɔt di trut yet, ɛn i bin kam fɔ no se dɛn layf nɔ rili izi bikɔs dɛn nɔ no Jiova. Saje kɔntinyu fɔ tɔk se: “Di nyu tin dɛn we a bin de lan bin mek a rili gladi ɛn gɛt kolat. A bin no se ɔda pipul dɛn bak nid fɔ lan dɛn tru tin dɛn ya.” As Saje de gɛt mɔ sɔri-at fɔ pipul dɛn, na di mɔ i bin de gɛt maynd fɔ prich. I tɔk se: “A bin rili sɔprayz fɔ no se we a de tɔk to ɔda pipul dɛn bɔt di Baybul, dat de mek a gɛt kɔnfidɛns mɔ ɛn mɔ. Ɛn fɔ tɔk to ɔda pipul dɛn bɔt wetin a biliv de mek a gɛt mɔ fet.” d

12-13. Wetin mek wi nid fɔ peshɛnt wit di wan dɛn we wi de tich? Gi ɛgzampul.

¹² Tɔd, na fɔ peshɛnt wit di wan dɛn we yu de tich. Mɛmba se dɛn nɔ ɛva tink bɔt sɔm pan di tru tin dɛn we de na di Baybul we wi sabi gud gud wan. Ɛn bɔku pan dɛn rili lɛk wetin dɛn biliv. Dɛn kin fil se dɛn rilijɔn na wan impɔtant tin we de mek dɛn de nia dɛn famili, dɛn kɔlchɔ, ɛn di pipul dɛn we de usay dɛn de. Aw wi go ɛp dɛn?

 ¹³ Tink bɔt dis ɛgzampul: Wetin kin apin we wan ol brij dɔn pwɛl ɛn dɛn nid fɔ mek ɔda wan? Bɔku tɛm, dɛn kin mek nyu brij di tɛm we pipul dɛn stil de yuz di ol wan. Ɛn we dɛn dɔn fɔ mek di nyu wan, dɛn kin dɔnawe wit di ol wan. Semweso, bifo wi tɛl pipul dɛn fɔ stɔp fɔ biliv di “ol” tin dɛn we dɛn bin biliv fɔs, wi fɔ ɛp dɛn fɔs fɔ gladi fɔ di nyu trut we dɛn dɔn lan. Dɛn Baybul trut dɛn ya na wan dɛn we dɛn nɔ bin sabi. Afta dat, dɛn go rɛdi fɔ stɔp fɔ biliv di tin dɛn we dɛn bin biliv fɔs. I kin tek sɔm tɛm fɔ mek pipul dɛn mek dɛn chenj dɛn ya.—Rom 12:​2.

14-15. Aw wi go ɛp di wan dɛn we nɔ no bɛtɛ tin ɔ we nɔ ivin no ɛnitin bɔt di op fɔ de sote go na Paradays na dis wɔl? Gi wan ɛgzampul.

¹⁴ If wi peshɛnt wit pipul dɛn we wi de prich to, wi nɔ go fil se dɛn fɔ ɔndastand ɔ gri wit di trut dɛn we de na di Baybul di fɔstɛm we dɛn yɛri am. Bifo dat, sɔri-at go mek wi want fɔ ɛp dɛn fɔ yuz sɔm tɛm fɔ tink bɔt wetin dɛn dɔn lan frɔm di Baybul. Fɔ ɛgzampul, tink bɔt aw yu go ɛp sɔmbɔdi fɔ tink bɔt di op we wi gɛt fɔ gɛt layf sote go na Paradays na dis wɔl. Bɔku pipul dɛn nɔ no bɛtɛ tin bɔt dis tichin ɔ sɔntɛm dɛn nɔ ivin no ɛnitin bɔt am. Dɛn kin biliv se we pɔsin day ɔltin dɔn dɔn. Ɔ dɛn go de tink se ɔl gud pipul dɛn de go na ɛvin. Aw wi go ɛp dɛn?

¹⁵ Lɛ wi tɔk bɔt aw wan brɔda kin ɛp pipul dɛn fɔ ɔndastand di op we wi gɛt fɔ de sote go na dis wɔl. Fɔs, i kin rid Jɛnɛsis 1:​28. Dɔn, i kin aks di pɔsin we i de prich to usay Gɔd bin want mɔtalman dɛn fɔ de ɛn uskayn layf i want dɛn fɔ liv. Bɔku pipul dɛn kin ansa se, “Na dis wɔl, ɛn i bin want dɛn fɔ gɛt gladi-at.” Afta dat, di brɔda kin rid Ayzaya 55:​11 ɛn aks if wetin Gɔd bin want dɔn chenj. Bɔku tɛm, di pɔsin we i kin tɔk to kin ansa se nɔ. Dɔn, di brɔda kin rid Sam 37:​10, 11 ɛn aks aw tumara bambay go tan lɛk fɔ mɔtalman. We dis brɔda kin yuz di Baybul dis kayn we, i dɔn ebul fɔ ɛp bɔku pipul dɛn fɔ ɔndastand se Gɔd stil want gud pipul dɛn fɔ liv sote go na Paradays na dis wɔl.

16-17. We wi tink bɔt wetin de na Prɔvabs 3:​27, wetin na sɔm tin dɛn we wi go du fɔ sho se wi gɛt sɔri-at fɔ pipul dɛn? Gi wan ɛgzampul.

¹⁶ Di nɔmba 4 we, na fɔ tink bɔt wetin yu go du fɔ sho pipul dɛn se yu bisin bɔt dɛn. Fɔ ɛgzampul, wetin wi fɔ du if wi go prich to pipul dɛn di tɛm we nɔ fayn fɔ dɛn? Wi kin tɛl dɛn se wi sɔri ɛn wi go kam bak di tɛm we fayn fɔ dɛn. Wetin wi go du if di pɔsin we wi de prich to nid pɔsin fɔ ɛp am fɔ du sɔntin? Ɔ wetin wi go du if wi mit pɔsin we nɔ ebul kɔmɔt insay in os bikɔs i sik ɔ i dɔn ol ɛn i nid sɔmbɔdi fɔ ɛp am du sɔntin? If wi mitɔp tin lɛk dis, wi go ebul fɔ ɛp di pɔsin.—Rid Prɔvabs 3:​27.

 ¹⁷ Gud tin bin apin we wan sista bin du gud we ɔda pipul dɛn nɔ tink se impɔtant. Bikɔs i bin gɛt sɔri-at, i bin rayt lɛta to wan famili we dɛn bɔypikin bin day. Insay di lɛta, i put sɔm Baybul vas dɛn we go ɛnkɔrej di famili. Aw dis lɛta bin afɛkt di famili? Di mama bin rayt se: “Yɛstade mi de nɔ bin gud. A nɔ shɔ se yu no aw yu lɛta bin rili ɛp mi. A nɔ go ebul tɛl yu tɛnki ɔ ivin bigin fɔ tɔk bɔt aw yu lɛta ɛnkɔrej wi. I go mɔs bi se a rid da lɛta de pas 20 tɛm yɛstade. A nɔ ebul biliv di we aw di lɛta gud ɛn aw i ɛnkɔrej wi. Wi rili want fɔ tɛl yu plɛnti tɛnki.” Wi nɔ gɛt wan dawt fɔ se gud tin kin apin if wi tray fɔ ɔndastand wetin de apin to pipul dɛn we de sɔfa ɛn wi tray fɔ du sɔntin fɔ ɛp dɛn.

18. Frɔm wetin de na Fɔs Lɛta Fɔ Kɔrint 3:​6, 7, wetin wi fɔ mɛmba we wi de prich? Wetin mek?

¹⁸ Fɔ tru, wi want fɔ tink di rayt we bɔt wi prichin wok. Wi de ɛp pipul dɛn fɔ lan bɔt Gɔd, bɔt nɔto wi de du di tin we impɔtant pas ɔl pan di wok. (Rid Fɔs Lɛta Fɔ Kɔrint 3:​6, 7.) Na Jiova de mek pipul dɛn de kam to am. (Jɔn 6:​44) Dɔn, na wetin de na di pɔsin in at go mek i lisin to di gud nyuz ɔ nɔ lisin. (Mat. 13:​4-8) Mɛmba se bɔku pipul dɛn nɔ bin gri fɔ lisin to Jizɔs in mɛsej, ɛn in na di gret Ticha we dɔn ɛva liv! So wi at nɔ fɔ pwɛl if bɔku pipul dɛn nɔ gri fɔ lisin to wi mɛsej.

19. Us fayn fayn bɛnifit dɛn wi go gɛt we wi sho sɔri-at we wi de prich?

¹⁹ Wi go si fayn fayn bɛnifit dɛn we wi sho sɔri-at to pipul dɛn we wi de prich. Wi go ɛnjɔy wi prichin wok mɔ ɛn mɔ. Wi go ɛnjɔy di gladi-at we pɔsin kin gɛt we wi de prich. Ɛn wi go mek am izi fɔ di wan dɛn “we rili sho se dɛn want fɔ gɛt layf we go de sote go” fɔ lisin to di gud nyuz. (Akt 13:​48, NW) So “ɛnitɛm we una gɛt di chans, una fɔ du gud to ɔlman.” (Gal. 6:​10) Dɔn, wi go gladi fɔ briŋ glori to wi Papa we de na ɛvin.—Mat. 5:​16.