1. Wetin Jiova prɔmis sina dɛn we ripɛnt?

 PAN ɔl we na Jiova mek wi, na In de gi wi lɔ, ɛn na wi Jɔj, in na wi Papa bak we de na ɛvin we rili lɛk wi. (Sam 100:​3; Ayz. 33:​22) We wi sin agens am ɛn rili ripɛnt, i nɔ jɔs ebul fɔ fɔgiv wi, bɔt i want fɔ fɔgiv wi. (Sam 86:​5) Jiova bin mek prɔfɛt Ayzaya rayt dɛn fayn wɔd dɛn ya: “Pan ɔl we una sin dɛn tan lɛk rɛd rɛd klos, a go mek dɛn wayt lɛk sno.”—Ayz. 1:​18, NWT.

2. If wi want fɔ ɛnjɔy pis wit ɔda pipul dɛn, wetin wi nid fɔ du?

² Bikɔs wi nɔ pafɛkt, wi ɔl kin se ɛn du tin dɛn we kin ɔfɛn ɔda pipul dɛn. (Jems 3:​2) Bɔt dat nɔ min se wi nɔ go ebul fɔ ɛnjɔy tayt padi biznɛs wit dɛn. Wi go ebul fɔ du dat if wi lan fɔ fɔgiv. (Prɔv. 17:​9; 19:​11; Mat. 18:​21, 22) If pɔsin se ɔ du sɔntin we nɔ tu siriɔs we mek wi fil bad, Jiova want wi fɔ fɔgiv am. (Kol. 3:​13) Wi gɛt gud rizin fɔ du dat. Afta ɔl, Jiova de fɔgiv wi fɔ “ɔltin.”—Ayz. 55:​7.

3. Wetin wi go tɔk bɔt insay dis atikul?

³ Insay dis atikul, wi go tɔk bɔt aw mɔtalman dɛn we nɔ pafɛkt kin falamakata Jiova ɛn fɔgiv ɔda pipul dɛn.  Us sin dɛn wi fɔ tɛl di ɛlda dɛn bɔt? Wetin mek Jiova want wi fɔ fɔgiv ɔda pipul dɛn? Ɛn wetin wi go lan frɔm sɔm pan wi brɔda ɛn sista dɛn we bin rili sɔfa bikɔs ɔf ɔda pipul dɛn sin?

4. (a) We wan pan Jiova in savant dɛn kɔmit siriɔs sin, wetin i nid fɔ du? (b) Wetin na di wok we di ɛlda dɛn gɛt we dɛn sidɔm fɔ tɔk wit di pɔsin we sin?

⁴ Wi fɔ tɛl di ɛlda dɛn we sɔmbɔdi kɔmit siriɔs sin. Sɔm pan dɛn siriɔs sin dɛn de, de na 1 Kɔrintians 6:​9, 10. Siriɔs sin dɛn na sin dɛn we rili bad ɛn we go agens Gɔd in lɔ. If Kristian kɔmit da kayn sin de, i nid fɔ pre to Jiova Gɔd ɛn tɛl di ɛlda dɛn na di kɔngrigeshɔn. (Sam 32:​5; Jems 5:​14) Wetin di ɛlda dɛn go du? Na Jiova nɔmɔ gɛt di pawa fɔ fɔgiv ɔl wi sin dɛn, ɛn dis pɔsibul bikɔs ɔf Jizɔs in sakrifays. * Bɔt Jiova dɔn gi di ɛlda dɛn di wok fɔ yuz di Baybul fɔ no if di sina go kɔntinyu fɔ de na di kɔngrigeshɔn. (1 Kɔr. 5:​12) Fɔ mek dɛn ebul fɔ du dis, wan pan di tin dɛn we dɛn kin du na fɔ tray fɔ gɛt ansa to dɛn kwɛstyɔn dɛn ya: Na bay wilful di pɔsin sin? Di pɔsin bin tray fɔ ayd di sin frɔm ɔda pipul dɛn? I bin dɔn de ripit di sin fɔ sɔm tɛm? Wetin impɔtant mɔ na dat, i de sho klia wan se i dɔn rili ripɛnt? Ɛni pruf de we sho se Jiova dɔn fɔgiv am?—Akt 3:​19.

5. Aw di wok we di ɛlda dɛn de du de bɛnifit di kɔngrigeshɔn?

⁵ We di ɛlda dɛn sidɔm fɔ tɔk wit di sina, dɛn gol na fɔ mek shɔ se wetin dɛn disayd gri wit wetin Jiova dɔn ɔlrɛdi disayd. (Mat. 18:​18) Aw dis arenjmɛnt de bɛnifit di kɔngrigeshɔn? I de protɛkt di kɔngrigeshɔn bay we di ɛlda dɛn de mek shɔ se sina dɛn we nɔ gri fɔ ripɛnt nɔ kɔntinyu fɔ de na di kɔngrigeshɔn ɛn ambɔg Jiova in savant dɛn we i rili valyu. (1 Kɔr. 5:​6, 7, 11-13; Tay. 3:​10, 11) Sɔntɛm i go ivin ɛp di sina fɔ ripɛnt ɛn bɛnifit frɔm Jiova in fɔgivnɛs. (Lyuk 5:​32) Di ɛlda dɛn go pre fɔ di sina we dɔn ripɛnt ɛn aks Jiova fɔ ɛp am fɔ gɛt tayt padi biznɛs wit Am bak.—Jems 5:​15.

6. If pɔsin dɔn disfɛloship, i stil pɔsibul fɔ mek Jiova fɔgiv am? Ɛksplen.

⁶ Wetin go apin if di sina nɔ ripɛnt we di ɛlda dɛn sidɔm fɔ tɔk wit am? If dat apin, dɛn go disfɛloship am frɔm di kɔngrigeshɔn. If i dɔn kɔmit kraym we brok di lɔ na di kɔntri, di ɛlda dɛn nɔ go protɛkt am frɔm di tin dɛn we go apin to am bikɔs ɔf di bad tin we i du. Jiova dɔn alaw di gɔvmɛnt fɔ jɔj ɛn pɔnish ɛnibɔdi we brok di lɔ, ilɛksɛf di pɔsin ripɛnt ɔ i nɔ ripɛnt. (Rom. 13:​4) Bɔt if di pɔsin leta kam fɔ si se wetin i du bin rɔng, ɛn chenj di we aw i de tink ɛn di tin dɛn we i de du, Jiova rɛdi fɔ fɔgiv am. (Lyuk 15:​17-24) Dis na tru ilɛk di sin dɛn we i bin kɔmit bin rili siriɔs.—2 Kro. 33:​9, 12, 13; 1 Tim. 1:​15.

7. Wetin i min fɔ fɔgiv pɔsin we dɔn sin agens wi?

⁷ Wi rili gladi fɔ no se nɔto wi gɛt di wok fɔ disayd if Jiova go fɔgiv pɔsin we dɔn sin! Stil, sɔntin de we wi nid fɔ disayd. Wetin na da tin de? Sɔntɛnde, pɔsin kin sin agens wi, ivin siriɔs wan, bɔt i kin se i sɔri ɛn aks wi fɔ fɔgiv am. Ɔda tɛm dɛn, di pɔsin nɔ kin du dat. If dat apin, wi kin disayd fɔ fɔgiv di pɔsin we  min se wi de lɛf fɔ kip grɔj na wi at fɔ am ɛn wi nɔ de vɛks igen. Fɔ tɔk tru, sɔntɛm dis go tek tɛm ɛn wi go nid fɔ wok tranga wan, mɔ if di tin we di pɔsin du rili mek wi fil bad. Di Sɛptɛmba 15, 1994 Wachtawa tɔk se: “We yu fɔgiv sina, dat nɔ min se yu de ɛnkɔrej am fɔ sin. Kristian we de fɔgiv biliv se Jiova go jɔj wetin apin pafɛkt wan. In na di Wan we de jɔj di rayt we fɔ di wan ol wɔl, ɛn i go mek shɔ se wi gɛt jɔstis di rayt tɛm.” Wetin mek Jiova de ɛnkɔrej wi fɔ fɔgiv ɛn fɔ biliv se i go jɔj fia wan?

8. Aw di fɔgiv we wi de fɔgiv de sho se wi gladi fɔ Jiova in sɔri-at?

⁸ We wi fɔgiv, wi de sho se wi gladi fɔ Jiova in sɔri-at. Insay wan parebul, Jizɔs bin kɔmpia Jiova to wan masta we bin mek in slev nɔ pe di bɔku bɔku dɛt we i bin fɔ pe bikɔs i nɔ go ebul fɔ pe am bak. Bɔt di slev we dɛn fɔgiv nɔ bin sho sɔri-at to wan slev we bin gɛt fɔ pe am smɔl mɔni. (Mat. 18:​23-35) Wetin Jizɔs bin de tich wi? If wi rili gladi fɔ di kayn sɔri-at we Jiova de sho wi, dat go muv wi fɔ fɔgiv ɔda pipul dɛn. (Sam 103:​9) Wan Wachtawa bin tɔk am dis we: “Ilɛk ɔmɔs tɛm wi fɔgiv wi kɔmpin dɛn, i nɔ go ɛva ikwal di fɔgiv we Gɔd de fɔgiv wi ɛn di sɔri-at we i de sho wi tru Krays.”

9. Udat Jiova de sho sɔri-at? (Matyu 6:​14, 15)

⁹ If wi fɔgiv ɔda pipul dɛn, Jiova go fɔgiv wi. Jiova de sho sɔri-at to di wan dɛn we gɛt sɔri-at. (Mat. 5:​7; Jems 2:​13) Jizɔs bin mek wi no dat klia wan we i bin tich in disaypul dɛn aw fɔ pre. (Rid Matyu 6:​14, 15.) Wi lan dis sem lɛsin frɔm wetin Jiova bin tɛl in savant, we na Job. Da fetful man de in at bin rili pwɛl bikɔs ɔf di ash wɔd dɛn we tri man dɛn we nem Ɛlifaz, Bildad, ɛn Zofa bin tɔk. Jiova bin tɛl Job fɔ pre fɔ dɛn. Afta Job bin du dat, Jiova bin blɛs am.—Job 42:​8-10.

10. Aw wi go ambɔg wisɛf we wi kip grɔj fɔ pɔsin? (Ɛfishians 4:​31, 32)

¹⁰ We wi kip grɔj, dat go ambɔg wi. Grɔj tan lɛk ebi lod, ɛn Jiova nɔ want lɛ wi de kip grɔj so dat wi go gɛt pis. (Rid Ɛfishians 4:​31, 32.) I de ɛnkɔrej wi fɔ “lɛf fɔ de vɛks ɛn nɔ alaw ɛnitin fɔ mek [wi] at wam.” (Sam 37:​8, NWT) If wi fala da advays de, i go ɛp wi. We wi kɔntinyu fɔ kip grɔj fɔ pɔsin we dɔn du wi bad, dat go ambɔg wi wɛlbɔdi ɛn wi maynd. (Prɔv. 14:​30) Jɔs lɛk aw i nɔ go ambɔg di pɔsin if wi drink pɔyzin, na so i nɔ go ambɔg di pɔsin if wi kɔntinyu fɔ kip grɔj fɔ am. Bɔt we wi fɔgiv ɔda pipul dɛn, wi de gi wisɛf gift. (Prɔv. 11:​17) Wi go gɛt kolat ɛn wi go ebul kɔntinyu fɔ sav Jiova.

11. Wetin di Baybul tɔk bɔt fɔ tɔn-am-gi? (Romans 12:​19-21)

¹¹ Na Jiova fɔ tɔn-am-gi. Jiova nɔ gi wi di rayt fɔ pɔnish pɔsin we dɔn sin agens wi. (Rid Romans 12:​19-21.) Bikɔs wi nɔ ebul no ɔltin, ɛn di we aw wi de si tin nɔ pafɛkt, wi nɔ ebul fɔ jɔj kɔrɛkt wan lɛk aw Gɔd de jɔj. (Ibru. 4:​13) Ɛn bak, sɔntɛnde di we aw wi de fil kin mek i nɔ izi fɔ no wetin na di rayt tin fɔ du. Jiova bin mek Jems rayt se: “Mɔtalman in wamat nɔ de mek wetin rayt na Gɔd in yay apin.” (Jems 1:​20) Wi shɔ  se Jiova go du di rayt tin ɛn mek shɔ se ɔlman gɛt jɔstis.

12. Aw wi go sho se wi gɛt kɔnfidɛns pan Jiova in jɔstis?

¹² We wi fɔgiv ɔda pipul dɛn, dat de sho se wi gɛt kɔnfidɛns pan Jiova in jɔstis. We wi biliv se Jiova go jɔj fia wan, i de sho se wi gɛt kɔnfidɛns se i go pul ɔl di prɔblɛm dɛn we dɔn apin bikɔs ɔf sin. Insay in nyu wɔl we i dɔn prɔmis, “nɔbɔdi nɔ go mɛmba” di tin dɛn we de mek wi fil pen, ɛn dɛn nɔ go “ivin kam na [wi] maynd” igen. (Ayz. 65:​17) Bɔt if i bi se di tin we apin to wi mek wi rili fil bad, fɔ se i rili pɔsibul fɔ lɛ wi nɔ kɔntinyu fɔ vɛks ɛn kip grɔj na wi at? Lɛ wi tɔk bɔt aw sɔm pipul dɛn dɔn ebul fɔ du dat.

13-14. Wetin yu lan bɔt fɔgivnɛs frɔm Toni ɛn Oze dɛn ɛkspiriɛns?

¹³ Bɔku pan wi Kristian brɔda ɛn sista dɛn bin disayd fɔ fɔgiv pan ɔl we dɛn rili fil bad fɔ di tin dɛn we ɔda pipul dɛn bin du dɛn. Us blɛsin dɛn dɔn gɛt bikɔs dɛn disayd fɔ du dat?

¹⁴ Lɔng tɛm bifo Toni * we de na di Filipins bin lan di trut, i bin kam fɔ no se na wan man we nem Oze bin kil wan pan in big brɔda dɛn. Da tɛm de, Toni na bin pɔsin we rili gɛt wamat ɛn we lɛk fɛt-fɛt, ɛn i bin want fɔ tɔn-am-gi. Dɛn bin arɛst Oze ɛn put am na prizin fɔ in kraym. Leta, we Oze kɔmɔt na prizin, Toni bin swɛ se i go fɛn am ɛn kil am. I ivin bay gɔn fɔ du dat. Bɔt da tɛm de, Toni bigin fɔ stɔdi di Baybul wit Jiova Witnɛs dɛn. I tɔk se, “We a bin de stɔdi, a kam fɔ lan se a nid fɔ chenj mi abit dɛn ɛn di tin dɛn we a de du, ɛn dat min se a fɔ lɛf mi wamat.” Afta sɔm tɛm, Toni bin baptayz ɛn i leta bi ɛlda na di kɔngrigeshɔn. Imajin aw i bin sɔprayz we i lan se Oze sɛf dɔn baptayz. We dɛn tu bin mit, dɛn bin ɔg dɛnsɛf tayt wan, ɛn Toni tɛl Oze se i dɔn fɔgiv am. Toni se di fɔgiv we i fɔgiv Oze bin mek i rili gladi, ɛn i nɔ bin izi fɔ tɔk bɔt di  wɔndaful we aw i bin de fil. Fɔ tru, Jiova bin blɛs Toni fɔ we i bin rɛdi fɔ fɔgiv.

15-16. Wetin yu lan bɔt fɔgivnɛs frɔm Pita ɛn Su dɛn ɛkspiriɛns?

¹⁵ Insay 1985, Pita ɛn Su bin de na mitin na Kiŋdɔm Ɔl we wan big bɔm ɛksplod. Na wan man bin put bɔm na di Kiŋdɔm Ɔl. Su bin sɔfa siriɔs wan, ɛn bikɔs ɔf dat in yay ɛn in yes bin damej. Dɔn bak, i nɔ ebul fɔ smɛl igen. * Bɔku tɛm, Pita ɛn Su kin aks dɛnsɛf, ‘Udat go du dis kayn wikɛd tin?’ Di pɔsin we bin du dat nɔto Jiova Witnɛs. Afta lɔng tɛm, dɛn bin arɛst di man, ɛn i go de na prizin te i day. We dɛn bin aks Pita ɛn Su if dɛn dɔn fɔgiv dis man, dɛn bin tɔk se: “Jiova de tich wi se fɔ kip grɔj ɛn fɔ kɔntinyu fɔ vɛks na sɔntin we go ambɔg wi wɛlbɔdi, di we aw wi de fil, ɛn wi maynd. So jɔs afta da tin de bin apin, wi aks Jiova fɔ ɛp wi mek wi nɔ vɛks ɔ kip grɔj so dat wi go gɛt kolat.”

¹⁶ Yu tink se i izi fɔ mek dɛn fɔgiv dis man? Nɔ, i nɔ izi ɔltɛm. Dɛn kɔntinyu fɔ tɔk se: “Sɔntɛnde, we Su de sɔfa bikɔs ɔf wetin bin apin, dat de mek wi vɛks bak. Bɔt wi nɔ kin kɔntinyu fɔ tink bɔt dat, so wi kin stɔp fɔ fil da we de kwik kwik wan. Infakt, wi ebul fɔ tɔk wit ɔl wi at se if di man we bin put di bɔm na di Kiŋdɔm Ɔl kam fɔ bi wi brɔda, wi go wɛlkɔm am. Dis ɛkspiriɛns dɔn tich wi se we wi aplay Baybul prinsipul dɛn, dat de mek wi fri. Infakt, i de fri wi pas aw wi tink se wi go fri. Dɔn bak, wi kin gɛt kɔrej bikɔs wi no se i nɔ go te igen, Jiova go pul ɔl di prɔblɛm dɛn we de naw.”

17. Wetin yu lan bɔt fɔgivnɛs frɔm Mayra in ɛkspiriɛns?

¹⁷ Mayra bin lan di trut afta i bin dɔn mared ɛn bɔn tu smɔl pikin dɛn. In man nɔ bin gri fɔ tek di trut. Afta sɔm tɛm,  in man bin du mami ɛn dadi biznɛs wit ɔda uman, ɛn i lɛf di famili. Mayra tɔk se: “We mi man lɛf mi ɛn mi tu pikin dɛn, a bin fil di we aw bɔku pipul dɛn kin fil we pɔsin we dɛn lɛk kɔmɔt biɛn dɛn. A bin shɔk, i bin at fɔ biliv, mi at bin pwɛl, a bin rigrɛt, a bin de blem misɛf, ɛn a bin vɛks.” Pan ɔl we di mared dɔn dɔn, i bin stil de fil am bikɔs in man bin lɛf am. Mayra kɔntinyu fɔ tɔk se: “A kɔntinyu fɔ wɔri ɛn vɛks fɔ sɔm tɛm, ɛn a kam fɔ si se di we aw a bin de fil bin de afɛkt mi padi biznɛs wit Jiova ɛn ɔda pipul dɛn.” Naw Mayra se i dɔn lɛf fɔ vɛks ɛn i nɔ want fɔ mek ɛni bad tin apin to in man trade. Mayra de op se wande i go kam nia Jiova. Mayra dɔn ebul fɔ pe atɛnshɔn pan Jiova in prɔmis dɛn fɔ tumara bambay. In wan dɔn mɛn in tu pikin dɛn ɛn ɛp dɛn fɔ sav Jiova. Tide, Mayra gladi as i de sav Jiova wit in pikin dɛn ɛn dɛn famili dɛn.

18. Us kɔnfidɛns wi gɛt pan Jiova as di Jɔj we pas ɔl di ɔda jɔj dɛn?

¹⁸ Wi rili gladi fɔ no se nɔto wi gɛt fɔ disayd aw dɛn fɔ jɔj pɔsin. As di Jɔj we pas ɔl di ɔda jɔj dɛn, Jiova go du dis impɔtant wok. (Rom. 14:​10-12) Wi gɛt kɔnfidɛns se bikɔs Jiova no pafɛkt wan wetin rayt ɛn rɔng, i go yuz dat ɔltɛm we i de jɔj. (Jɛn. 18:​25; 1 Kiŋ 8:​32) I nɔ go ɛva du sɔntin we nɔ rayt.

19. Wetin go apin bikɔs ɔf Jiova in pafɛkt jɔstis?

¹⁹ Wi de rili wet fɔ di tɛm we Jiova go pul ɔl di bad tin dɛn we dɔn apin bikɔs ɔf sin ɛn di pafɛkt we mɔtalman nɔ pafɛkt. Da tɛm de, ɔl di tin dɛn we de mɔna wi nɔ go de igen. (Sam 72:​12-14; Rɛv. 21:​3, 4) Wi nɔ go ɛva mɛmba dɛn igen. As wi de wet fɔ da wɔndaful tɛm de, wi de tɛl Jiova bɔku tɛnki bikɔs i dɔn mek wi ebul fɔ falamakata am fɔ fɔgiv.