1. Us wɔnin di apɔsul Pɔl bin gi to di anɔyntɛd Kristian dɛn?

DI APƆSUL Pɔl bin wɔn di fɔstɛm Kristian dɛn we bin de na Rom se: “Una lɛf.” Lɛf fɔ du wetin? I bin tɛl dɛn fɔ “lɛf fɔ alaw di we aw tin dɛn de apin naw fɔ shep” dɛn. (Rom 12:​2, NW) Wetin mek Pɔl bin gi da kayn strɔng wɔnin to man ɛn uman dɛn we bin dɔn gi dɛn layf to Gɔd ɛn we dɛn bin dɔn anɔynt wit oli spirit?—Rom 1:​7.

2-3. Aw Setan de tray fɔ tɛmt wi fɔ tɔn wi bak pan Jiova? Aw wi go ebul fɔ lɛf fɔ tink bɔt ɛni bad abit we nɔ rili izi fɔ lɛf?

² Pɔl bin wɔri bikɔs di we aw pipul dɛn bin de tink na di wɔl we Setan de kɔntrɔl bin dɔn bigin fɔ afɛkt sɔm Kristian dɛn. (Ɛfi. 4:​17-19) Dat kin apin to ɛniwan pan wi. Na Setan de rul dis wɔl, ɛn i kin yuz difrɛn we dɛn fɔ tɛmt wi fɔ tɔn wi bak pan Jiova. Fɔ ɛgzampul, if wi want fɔ bi impɔtant pɔsin ɔ fɔ lɛ ɔlman sabi wi, Setan go yuz dat fɔ mek wi tɔn wi bak pan Jiova. Setan go tray bak fɔ yuz di tin dɛn we wi dɔn lan na os, na skul, ɛn di pipul dɛn we de arawnd wi fɔ mek wi tink di we aw i want wi fɔ tink.

³ Yu tink se i pɔsibul fɔ wi fɔ lɛ wi lɛf fɔ tink bɔt abit dɛn we nɔ rili izi fɔ lɛf? (2 Kɔr. 10:​4) Notis aw Pɔl bin ansa da kwɛstyɔn de. I bin se: “Wi de chenj di we aw pipul dɛn de  tink ɛn ɔl di tin dɛn we de mek i nɔ izi fɔ lɛ pipul dɛn no Gɔd, ɛn wi dɔn kapchɔ di we aw pipul dɛn de tink so dat dɛn go obe di Krays.” (2 Kɔr. 10:​5, NW) Jiova go ɛp wi fɔ chenj dɛn bad we dɛn ya we wi de tink. Jɔs lɛk aw mɛrɛsin kin kil pɔyzin so dat i nɔ go afɛkt di pɔsin we drink am, na so Gɔd in Wɔd kin ɛp wi fɔ lɛf di bad abit dɛn we Setan in wɔl dɔn mek wi gɛt.

4. Us chenj dɛn bɔku pan wi dɔn mek fɔ lɛ wi sav Jiova?

⁴ Tink bak bɔt di bad abit dɛn we yu bin nid fɔ lɛf we yu de lan bɔt wetin di Baybul de tich ɛn disayd fɔ sav Jiova. Fɔ lɛ wi go ebul fɔ sav Jiova, bɔku pan wi bin stɔp fɔ du di tin dɛn we nɔ fayn. (1 Kɔr. 6:​9-11) Wi rili gladi we Jiova bin ɛp wi fɔ stɔp fɔ du dɛn tin dɛn de!

5. Frɔm wetin de na Lɛta fɔ Rom 12:​2 (NW), us tu tin dɛn wi fɔ du?

⁵ Lɛ wi nɔ ɛva fil se wi nɔ go ɛva nid fɔ chenj sɔm tin dɛn na wi layf. Ilɛksɛf wi bin dɔn stɔp fɔ kɔmit siriɔs sin dɛn bifo wi baptayz, wi stil nid fɔ wok tranga wan fɔ avɔyd ɛnitin we go tɛmt wi fɔ kɔmit dɛn siriɔs sin dɛn de bak. Aw wi go du dat? Pɔl bin se: “Una lɛf fɔ alaw di we aw tin dɛn de apin naw fɔ shep una, bɔt una chenj bay we una chenj di we aw una de tink.” (Rom 12:​2, NW) So wi fɔ du tu tin dɛn. Fɔs, wi nid fɔ “lɛf fɔ alaw di we aw tin dɛn de apin” na dis wɔl “fɔ shep” wi. Sɛkɔn, wi nid fɔ “chenj di we aw [wi] de tink.”

6. Frɔm wetin de na Matyu 12:​43-45, wetin wi lan frɔm di wɔd dɛn we Jizɔs bin tɔk?

⁶ Di chenj we Pɔl bin se wi fɔ chenj nɔ min di we aw pipul dɛn de si wi. I gɛt fɔ du wit ɔltin bɔt wi. (Luk di bɔks we gɛt  di taytul “Yu Dɔn Rili Chenj ɔ Yu De Mek Lɛk se Yu Dɔn Chenj?”) Wi nid fɔ rili chenj di we aw wi de tink, wi abit dɛn, di we aw wi de fil, ɛn di tin dɛn we wi kin want fɔ du. So wi ɔl nid fɔ aks wisɛf dis impɔtant kwɛstyɔn, ‘Fɔ se di chenj we a de chenj fɔ bi tru Kristian na jɔs pantap chenj, ɔ a rili dɔn chenj insay mi at fɔ bi tru Kristian?’ Frɔm wetin dɛn rayt na Matyu 12:​43-45, Jizɔs bin sho wetin wi nid fɔ du. (Rid.) Dɛn wɔd dɛn de de tich wi wan impɔtant lɛsin. Wi nɔ jɔs nid fɔ stɔp fɔ tink bɔt bad tin dɛn, bɔt wi nid fɔ tink di aw Gɔd want wi fɔ tink.

7. Aw wi go chenj di we aw wi de tink ɛn udat wi rili bi insay wi at?

⁷ Yu tink se i pɔsibul fɔ chenj di we aw wi de tink ɔ udat wi rili bi insay wi at? Gɔd in Wɔd tɛl wi se: “Una kɔntinyu fɔ de chenj di we aw una de tink, ɛn una fɔ gɛt di nyu abit dɛn we Gɔd mek akɔdin to wetin i want, ɛn dɛn nyu abit ya na tin dɛn we rili rayt ɛn fetful.” (Ɛfi. 4:​23, 24, NW) So i pɔsibul fɔ lɛ wi chenj udat wi rili bi insay wi at, bɔt na tin we nɔ izi fɔ du. Wi nɔ jɔs nid fɔ tinap tranga wan nɔ fɔ du bad tin dɛn. Bɔt wi nid fɔ ‘chenj di we aw wi de tink.’ Dat min se wi fɔ chenj di tin dɛn we wi want fɔ du, di we aw wi de biev, ɛn di rizin we mek wi de du tin dɛn. So wi fɔ kɔntinyu fɔ du ɔl wetin wi ebul.

8-9. Aw wan brɔda in ɛkspiriɛns ɛp wi fɔ si se wi nid fɔ chenj udat wi rili bi insay wi at?

⁸ Fɔ ɛgzampul, wan brɔda bin lɛk fɛt fɛt bifo i tek di trut. Afta we i bin stɔp fɔ de drink pasmak rɔm ɛn fɔ de fɛt pipul dɛn, i bin kwalifay fɔ baptayz. Dat na bin big witnɛs na di say we i de. Bɔt wan ivintɛm, jɔs afta we i bin dɔn baptayz, sɔntin bin apin we i nɔ bin de tink se go apin. Wan drɔnkɔman bin kam na in os ɛn chalenj am fɔ fɛt. Fɔs, di brɔda nɔ bin gri fɔ fɛt am. Bɔt we di man bin stat fɔ tɔk bad tin bɔt Jiova, di brɔda bin rili vɛks ɛn i nɔ bin ebul fɔ kɔntrol insɛf. I bin kam na do ɛn bit di man. Wetin mek i bin du dat? Pan ɔl we di stɔdi we i bin dɔn de stɔdi di Baybul ɛp am fɔ lɛ i stɔp fɔ fɛt, i nɔ bin dɔn ebul fɔ chenj di we aw i de tink. We min se i nɔ bin dɔn chenj udat i rili bi insay in at.

⁹ Bɔt dis brɔda nɔ bin giv-ɔp. (Prɔv. 24:​16) Di ɛlda dɛn bin ɛp am ɛn i bin kɔntinyu fɔ du wɛl. Leta, i bin bi ɛlda. Wan ivintɛm, di sem tin we bin apin to am trade bin apin bak bifo di Kiŋdɔm Ɔl. Wan drɔnkɔman bin want fɔ bit wan ɔda ɛlda. Wetin di brɔda bin du? I bin tɔk saful wan to di drɔnkɔman, mek in at kol, ɛn ɛp am fɔ go na os. Wetin bin apin? Wi brɔda dɔn chenj di we aw i de tink. Insay in at, i dɔn chenj fɔ bi pɔsin we de mek pis ɛn pɔsin we ɔmbul. Dis dɔn briŋ prez to Jiova!

10. Wetin wi fɔ du so dat wi go chenj udat wi rili bi insay wi at?

¹⁰ Dɛn chenj dɛn ya nɔ kin apin wantɛm wantɛm ɔ i nɔ kin jɔs apin lɛk dat. Wi nid fɔ wok tranga wan fɔ lɔng tɛm. (2 Pit. 1:​5) Dɛn chenj dɛn ya nɔ go apin jɔs bikɔs wi dɔn de sav Jiova fɔ lɔng tɛm. Wi nid fɔ tray tranga wan fɔ chenj udat wi rili bi insay wi at. Sɔm impɔtant tin dɛn de we go ɛp wi fɔ du dat. Lɛ wi tɔk bɔt sɔm pan dɛn.

11. Aw prea de ɛp wi fɔ chenj di we aw wi de tink?

¹¹ Prea na impɔtant tin we wi nid fɔ du. Wi nid fɔ pre lɛk aw wan pan di man dɛn we rayt di Sam buk bin du. I bin se: “E Gɔd, duya gi mi at we klin, ɛn ɛp mi fɔ bigin du wetin yu want, so dat a go tinap tranga wan.” (Sam 51:​10, NW) Wi fɔ no se wi nid fɔ chenj di we aw wi de tink ɛn aks Jiova fɔ ɛp wi. Aw wi shɔ se Jiova go ɛp wi fɔ chenj di we aw wi de tink? Di tin we go ɛnkɔrej wi na we wi mɛmba di prɔmis we Jiova bin gi to di Izrɛlayt dɛn insay Izikɛl in tɛm. I bin se: “A go gi dɛm ɔl di sem maynd, ɛn put nyu spirit insay dɛm . . . ɛn gi dɛn at we na flɛsh,” dat na at we de fala wetin Gɔd se. (Izi. 11:​19) Jiova bin rɛdi fɔ ɛp dɛn Izrɛlayt dɛn de fɔ chenj, ɛn i rɛdi fɔ ɛp wi bak.

12-13. (a) Frɔm wetin de na Sam 119:​59, wetin wi nid fɔ tink gud gud wan bɔt? (b) Us kwɛstyɔn dɛn yu fɔ aks yusɛf?

¹² Di sɛkɔn impɔtant tin we wi nid fɔ du na fɔ de tek tɛm tink gud gud wan bɔt wetin wi de rid. We wi de rid Gɔd in Wɔd, di Baybul ɛvride, wi nid fɔ tek tɛm tink gud gud wan bɔt wetin wi de rid so dat wi go ebul no di say we wi nid fɔ chenj. (Rid Sam 119:​59; Ibru 4:​12; Jems 1:​25) Wi fɔ tray fɔ no if di tin dɛn we wi de tink bɔt ɛn di we aw wi de fil de sho se di we aw pipul dɛn de tink na di wɔl de afɛkt wi. Wi nid fɔ gri se wi gɛt abit dɛn fɔ chenj, ɛn wi fɔ tray tranga wan fɔ lɛf dɛn abit dɛn de.

¹³ Fɔ ɛgzampul, aks yusɛf dɛn kwɛstyɔn dɛn ya: ‘Fɔ se a de jɛlɔs ɔ milɛ ɔda pɔsin na mi at?’ (1 Pit. 2:​1) ‘A de fil se a bɛtɛ pas ɔda pipul dɛn bikɔs ɔf usay a kɔmɔt, di buk we a lan, ɔ di mɔni we a gɛt?’ (Prɔv. 16:​5) ‘A de tink se di wan dɛn we nɔ gɛt di tin dɛn we a gɛt ɔ we gɛt difrɛn kɔlɔ nɔ impɔtant?’ (Jems 2:​2-4) ‘A lɛk di tin dɛn we Setan in wɔl de gi?’ (1 Jɔn 2:​15-17) ‘A kin ɛnjɔy misɛf wit tin dɛn we gɛt fɔ du wit mami ɛn dadi biznɛs ɛn fɛt fɛt?’ (Sam 97:​10; 101:​3; Emɔs 5:​15) We wi ansa dɛn kwɛstyɔn dɛn ya, wi go no di say dɛn we wi nid fɔ chenj. We wi tray tranga wan fɔ lɛf fɔ tink bɔt abit dɛn we nɔ rili izi fɔ lɛf, dat go mek wi Papa we de na ɛvin gladi.—Sam 19:​14.

14. Wetin mek i rili impɔtant fɔ pik gud padi dɛn?

¹⁴ Fɔ pik gud padi dɛn na di tɔd impɔtant tin. Wi padi dɛn kin rili afɛkt wetin wi de du ilɛksɛf wi notis am ɔ wi nɔ notis am. (Prɔv. 13:​20) Di pipul dɛn we de arawnd wi na wokples ɔ na skul na pipul dɛn we nɔ de ɛp wi fɔ tink di rayt we aw Gɔd want wi fɔ tink. Bɔt wi kin ebul fɔ gɛt gud padi dɛn na wi Kristian mitin dɛn. Na de dɛn go ɛnkɔrej wi fɔ “lɛk wi kɔmpin dɛn ɛn du gud to dɛn.”—Ibru 10:​24, 25.

15-16. Aw Setan de tray fɔ chenj di we aw wi de tink?

¹⁵ Mɛmba se Setan rili want fɔ chenj di we aw wi de tink. I de yuz ɔlkayn lay lay tichin dɛn fɔ pwɛl di gud tin dɛn we Gɔd in Wɔd de mek wi de tink.

¹⁶ Setan de kɔntinyu fɔ aks di sem kwɛstyɔn we i bin aks Iv di tɛm we dɛn bin de na di gadin we bin de na Idɛn. I bin aks se: “Fɔ tru tru PAPA GƆD tɛl una se . . . ?” (Jɛn. 3:​1) Insay dis wɔl we  Setan de kɔntrol, bɔku tɛm wi kin gɛt kwɛstyɔn dɛn we kin mek wi dawt wetin wi biliv. Kwɛstyɔn dɛn lɛk: ‘Fɔ se Gɔd nɔ rili want man ɛn man ɔ uman ɛn uman fɔ mared? Fɔ se Gɔd nɔ rili want yu fɔ sɛlibret Krismas ɛn batde dɛn? Fɔ se yu Gɔd nɔ rili want yu fɔ tek blɔd? Fɔ se di Gɔd we lɛk wi nɔ rili want yu fɔ kip kɔmpin wit fambul ɛn padi dɛn we disfɛloship?’

17. Wetin wi go du if sɔmbɔdi aks wi kwɛstyɔn bɔt wetin wi biliv fɔ mek wi dawt? Wetin Lɛta fɔ Kɔlɔse 2:​6, 7, (NW) se kin apin?

¹⁷ Wi nid fɔ biliv tranga wan di tin dɛn we wi biliv. If wi nɔ fɛn di ansa dɛn to dɛn impɔtant kwɛstyɔn dɛn ya bɔt wetin wi biliv, wi go stat fɔ dawt if wetin wi biliv na tru. Smɔl smɔl, dɛn dawt dɛn ya go ambɔg di we aw wi de tink ɛn mek wi nɔ gɛt fet igen. So wetin wi nid fɔ du? Gɔd in Wɔd tɛl wi se wi fɔ chenj di we aw wi de tink so dat wi go pruv to wisɛf “wetin gud, wetin Gɔd de tek, ɛn di pafɛkt tin we Gɔd want.” (Rom 12:​2, NW) Wi kin pruv to wisɛf se na di tru tin dɛn wi de lan na di Baybul bay we wi de stɔdi di Baybul ɛvride. If wi du dis, wi go biliv tranga wan se di tin dɛn we wi de rid na di Baybul na di tru tin dɛn. Dɔn, jɔs lɛk tik we gɛt strɔng rut, na so di fet we wi gɛt pan ‘Krays go mek wi strɔng.’—Rid Lɛta fɔ Kɔlɔse 2:​6, 7, NW.

18. Wetin go ɛp wi fɔ protɛkt wisɛf frɔm di bad tin dɛn we de na Setan in wɔl?

¹⁸ Nɔbɔdi nɔ go mek wi fet strɔng fɔ wi. So kɔntinyu fɔ chenj di we aw yu de tink. Pre ɔltɛm ɛn beg Jiova fɔ gi yu in oli spirit. Tink gud gud wan bɔt wetin yu de rid; kɔntinyu fɔ chɛk di we aw yu de tink ɛn di rizin we mek yu de du sɔntin. Fɛn gud padi dɛn; kip kɔmpin wit di wan dɛn we go ɛp yu fɔ chenj di we aw yu de tink. We yu du dat, yu go ebul chenj ɛn protɛkt yusɛf frɔm di bad tin dɛn we de na Setan in wɔl. Dɔn, yu go ebul chenj “di we aw pipul dɛn de tink ɛn ɔl di tin dɛn we de mek i nɔ izi fɔ lɛ pipul dɛn no Gɔd.”—2 Kɔr. 10:​5, NW.