1-2. Wetin di Baybul tɛl wi bɔt sɔm pan di kiŋ dɛn na Izrɛl?

 I PAS 40 man dɛn we di Baybul tɛl wi bɔt we bin rul as kiŋ na Izrɛl. a I tɛl wi tru tin dɛn bɔt sɔm pan dɛn man dɛn ya. Fɔ ɛgzampul, i ivin tɔk se sɔm pan di gud kiŋ dɛn bin du bad tin dɛn. Lɛ wi tɔk bɔt Kiŋ Devid we na bin gud kiŋ. Jiova bin se: “Devid mi savant . . . bin de kip mi kɔmandmɛnt dɛn ɛn du wetin a want wit ɔl in at, na wetin rayt nɔmɔ na mi yay na in i bin de du.” (1 Kiŋ 14:8) Bɔt da man de bin du mami ɛn dadi biznɛs wit ɔda man in wɛf ɛn i bin mek plan fɔ lɛ dɛn kil di man pan wɔ.​—2 Sam. 11:4, 14, 15.

² Di Baybul tɛl wi bak se, bɔku pan di kiŋ dɛn we nɔ bin fetful bin du sɔm gud tin dɛn. Lɛ wi tɔk bɔt Rɛoboam in ɛgzampul. Jiova bin se Rɛoboam “bin de du wetin bad” na in yay. (2 Kro. 12:14) Bɔt, Rɛoboam bin obe we Gɔd tɛl am fɔ alaw tɛn trayb dɛn fɔ kɔmɔt pan in kiŋdɔm. I bin mek bak bɔku siti dɛn na in kiŋdɔm rili strɔng fɔ protɛkt Gɔd in pipul dɛn frɔm dɛn ɛnimi dɛn.​—1 Kiŋ 12:21-24; 2 Kro. 11:5-12.

3. Us impɔtant kwɛstyɔn go kam na wi maynd? Wetin wi go tɔk bɔt insay dis atikul?

³ Wan impɔtant kwɛstyɔn we go kam na wi maynd na: If di kiŋ dɛn na Izrɛl bin de du gud ɛn bad tin dɛn, wetin Jiova bin de wach fɔ no if ɛniwan pan dɛn bin fetful na In yay? Di ansa to da kwɛstyɔn de go ɛp wi fɔ ɔndastand wetin wi nid fɔ du fɔ mek Jiova gladi. Wi go tɔk bɔt tri tin dɛn we  Jiova bin de tink bɔt we bin ɛp am fɔ disayd if ɛniwan pan dɛn kiŋ dɛn de gud ɔ bad. Fɔs, i bin de wach if di kiŋ lɛk am wit ɔl in at. Sɛkɔn, i bin de wach if di kiŋ rili sɔri fɔ di bad tin we i du. Tɔd, i bin de wach if di kiŋ bin de wɔship am di rayt we.

DƐN BIN DE SAV JIOVA WIT ƆL DƐN AT

4. Us difrɛns bin de bitwin di kiŋ dɛn we bin fetful ɛn di wan dɛn we nɔ bin fetful?

⁴ Di kiŋ dɛn we bin mek Jiova gladi bin wɔship am wit ɔl dɛn at. b Jɛoshafat we na bin gud kiŋ bin de “luk fɔ Jiova wit ɔl in at.” (2 Kro. 22:9) We di Baybul de tɔk bɔt Josaya, i se: “Nɔ kiŋ nɔ bin de bifo am we tan lɛk am, we kam bak to Jiova wit ɔl in at.” (2 Kiŋ 23:25) Wetin wi go tɔk bɔt Sɔlɔmɔn we bin leta du wetin bad? Di Baybul se, i nɔ bin “de sav Jiova in Gɔd wit ɔl in at.” (1 Kiŋ 11:4) Ɛn di Baybul tɔk bɔt Abayjan we na ɔda kiŋ we nɔ bin fetful se: “I nɔ bin de sav in Gɔd we na Jiova wit ɔl in at.”​—1 Kiŋ 15:3.

5. Ɛksplen wetin i min fɔ sav Jiova wit ɔl yu at.

⁵ So, wetin i min fɔ sav Jiova wit ɔl yu at? Pɔsin we de sav Gɔd wit ɔl in at nɔ jɔs de sav am bikɔs i no se i fɔ sav am. Bɔt, i de sav am bikɔs i rili lɛk ɛn rɛspɛkt am. Ɛn i go kɔntinyu fɔ lɛk ɛn rɛspɛkt am te go.

6. Aw wi go kɔntinyu fɔ sav Jiova wit ɔl wi at? (Prɔvabs 4:23; Matyu 5:29, 30)

⁶ Aw wi go falamakata di kiŋ dɛn we bin fetful ɛn kɔntinyu fɔ sav Jiova wit ɔl wi at? Na we wi avɔyd ɛnitin we go pwɛl wi padi biznɛs wit Jiova. Fɔ ɛgzampul, ɛnjɔymɛnt we nɔ fayn kin mek wi nɔ sav Jiova wit ɔl wi at. Bad padi dɛn bak ɛn we wi nɔ de tink di rayt we bɔt mɔni ɛn prɔpati kin mek wi nɔ sav Jiova wit ɔl wi at. If wi notis ɛnitin we mek wi nɔ lɛk Jiova lɛk aw wi bin lɛk am trade, lɛ wi du sɔntin wantɛm wantɛm fɔ chenj di we aw wi de tink ɛn du tin.​—Rid Prɔvabs 4:23; Matyu 5:29, 30.

7. Wetin mek i impɔtant fɔ avɔyd ɛnitin we go pwɛl wi padi biznɛs wit Jiova?

⁷ Wi nɔ fɔ alaw ɛnitin fɔ mek wi nɔ lɛk Jiova wit ɔl wi at. If wi nɔ tek tɛm, wi go ful wisɛf ɛn tink se bikɔs wi bizi de du tin dɛn fɔ sav Jiova, natin nɔ go apin to wi we go pwɛl wi padi biznɛs wit am. Fɔ ɛgzampul, imajin se yu de ɔnda san ɛn di ples wam pasmak. Fɔ mek i nɔ mɔna yu tumɔs, yu disayd fɔ drink mɔ wata. Bɔt wetin go apin if yu kɔntinyu fɔ de ɔnda di san ol de ɛn nɔ luk fɔ ples we gɛt shed? Di san go mek yu tɔsti bak kwik kwik wan. Wetin na di pɔynt? I nɔ jɔs du fɔ lɛ wi du tin dɛn we go mek wi kam nia Jiova. Jɔs lɛk aw wi nɔ go want fɔ kɔntinyu fɔ de ɔnda di san we di ples wam pasmak, na so wi nid fɔ protɛkt wisɛf frɔm ɛnitin na dis wɔl we go pwɛl wi padi biznɛs wit Jiova.​—Ɛfi. 2:2.

DƐN BIN RIPƐNT FƆ DI SIN DƐN WE DƐN KƆMIT

8-9. Wetin Kiŋ Devid ɛn Kiŋ Ɛzikaya bin du we dɛn bin kɔrɛkt dɛn? (Luk na di frɔnt pej.)

⁸ Jɔs lɛk aw wi bin dɔn tɔk, Kiŋ Devid bin kɔmit siriɔs sin. Bɔt we prɔfɛt Netan tɛl Devid aw Jiova bin fil bɔt di sin we i dɔn kɔmit, i bin put insɛf dɔŋ ɛn ripɛnt. (2 Sam. 12:13) Di wɔd dɛn we i tɔk na Sam 51 mek wi no se i bin rili ripɛnt wit ɔl in at. Devid nɔ bin jɔs mek lɛk se i fil bad fɔ wetin i du fɔ ful Netan ɔ fɔ mek dɛn nɔ pɔnish am.​—Sam 51:3, 4, 17, di ɛdin.

 ⁹ Kiŋ Ɛzikaya sɛf bin sin agens Jiova. Di Baybul tɔk se: “I bin mek prawd ɛn dat mek Gɔd vɛks pan am ɛn pan di pipul dɛn na Juda ɛn Jerusɛlɛm.” (2 Kro. 32:25) Wetin bin mek Ɛzikaya bigin fɔ mek prawd? Sɔntɛm na bikɔs i bin jɛntri, i win di Asirian dɛn pan fɛt, ɔ bikɔs Jiova yuz mirekul fɔ men am we i bin sik siriɔs wan. Sɔntɛm na bikɔs i bin prawd mek i sho di Babilonian dɛn in jɛntri, ɛn dis bin mek prɔfɛt Ayzaya kɔrɛkt am. (2 Kiŋ 20:12-18) Bɔt jɔs lɛk Devid, Ɛzikaya bin put insɛf dɔŋ ɛn ripɛnt. (2 Kro. 32:26) Na dat mek Jiova bin si am as kiŋ we fetful we bin “kɔntinyu fɔ du wetin rayt.”​—2 Kiŋ 18:3.

10. Wetin Kiŋ Amazaya bin du we dɛn kɔrɛkt am?

¹⁰ Kiŋ Amazaya we bin de na Juda bin difrɛn frɔm Kiŋ Devid ɛn Kiŋ Ɛzikaya. I bin du wetin rayt “bɔt i nɔ bin du am wit ɔl in at.” (2 Kro. 25:2) Us bad tin i bin du? Afta Jiova ɛp Amazaya fɔ win di Idɔmayt dɛn pan fɛt, i bin bigin fɔ wɔship dɛn gɔd dɛn. c Ɛn we Jiova in prɔfɛt go fɔ tɔk to di kiŋ bɔt wetin apin, i nɔ bin gri fɔ lisin ɛn i drɛb di prɔfɛt.​—2 Kro. 25:14-16.

11. Akɔdin to 2 Kɔrintians 7:9, 11, wetin wi fɔ du fɔ mek Jiova fɔgiv wi? (Luk bak di pikchɔ dɛn.)

¹¹ Wetin wi lan frɔm dɛn ɛgzampul dɛn ya? Wi nid fɔ ripɛnt fɔ di sin dɛn we wi dɔn kɔmit ɛn du ɔl wetin wi ebul fɔ lɛ wi nɔ ripit dɛn sin dɛn de igen. Wetin wi go du if di ɛlda dɛn na di kɔngrigeshɔn gi wi advays bɔt sɔntin we wi nɔ tink se rili siriɔs? Wi nɔ fɔ fil se Jiova ɔ di ɛlda dɛn nɔ lɛk wi. Ivin di gud kiŋ dɛn na Izrɛl bin nid pɔsin fɔ advays ɛn kɔrɛkt dɛn. (Ibru. 12:6) We dɛn kɔrɛkt wi, wi fɔ (1) biev di kayn we we de sho se wi ɔmbul, (2) mek di chenj dɛn we wi nid fɔ mek, ɛn (3) wi fɔ kɔntinyu fɔ sav Jiova wit ɔl wi at. If wi ripɛnt fɔ di sin dɛn we wi dɔn kɔmit, Jiova go fɔgiv wi.​—Rid 2 Kɔrintians 7:9, 11.

DƐN BIN WƆSHIP JIOVA DI RAYT WE

12. Us patikyula tin bin mek di kiŋ dɛn we bin fetful difrɛn frɔm di wan dɛn we nɔ bin fetful?

¹² Di kiŋ dɛn we bin fetful na Jiova in yay bin de wɔship am di rayt we. Ɛn dɛn bin ɛnkɔrej di wan dɛn we dɛn bin de rul oba fɔ du di sem tin. As wi ɔl no, dɛn bin mek mistek dɛn. Bɔt na Jiova nɔmɔ dɛn bin de wɔship ɛn dɛn bin wok tranga wan fɔ dɔnawe wit di aydɔl dɛn na di land. d

13. Wetin mek Jiova bin jɔj Kiŋ Eab as pɔsin we nɔ fetful?

¹³ Wetin wi go se bɔt di kiŋ dɛn we Jiova bin jɔj as pipul dɛn we nɔ fetful? Di tru na dat, nɔto ɔltin we dɛn du bin bad. Ivin Kiŋ Eab we bin wikɛd sho se i ɔmbul fɔ shɔt tɛm ɛn rigrɛt we dɛn kil Nebɔt fɔ in sek. (1 Kiŋ 21:27-29) I bin bil siti dɛn bak ɛn win fɛt dɛn fɔ di Izrɛlayt dɛn. (1 Kiŋ 20:21, 29; 22:39) Bɔt Eab bin du sɔntin we bin rili bad. In wɛf bin mek i bigin fɔ wɔship lay lay gɔd dɛn ɛn ɛnkɔrej ɔda pipul dɛn fɔ du di sem tin. I nɔ bin ɛva ripɛnt fɔ dis sin we i kɔmit.​—1 Kiŋ 21:25, 26.

14. (a) Wetin mek Jiova bin si Kiŋ Rɛoboam as pɔsin we nɔ fetful? (b) Us bad tin bɔku pan di kiŋ dɛn we nɔ bin fetful bin du?

¹⁴ Lɛ wi tɔk bɔt wan ɔda kiŋ we nɔ bin  fetful we na Rɛoboam. Lɛk aw wi bin dɔn tɔk, i bin du sɔm gud tin dɛn we i bin de rul. Bɔt we in kiŋdɔm bin dɔn tinap tranga wan, i bin lɛf fɔ obe Jiova in Lɔ ɛn bigin fɔ wɔship lay lay gɔd dɛn. (2 Kro. 12:1) Frɔm da tɛm de, i bin de wɔship Jiova sɔntɛnde ɛn ɔda tɛm dɛn i bin de wɔship lay lay gɔd dɛn. (1 Kiŋ 14:21-24) Nɔto Rɛoboam ɛn Eab nɔmɔ bin lɛf fɔ wɔship Jiova di rayt we. Infakt, bɔku pan di kiŋ dɛn we nɔ bin fetful bin de wɔship lay lay gɔd dɛn ɛn dɛn bin de ɛnkɔrej ɔda pipul dɛn fɔ du di sem tin. Dis mek wi no klia wan se to Jiova fɔ wɔship am di rayt we na wan pan di men tin dɛn we go sho if kiŋ gud ɔ bad.

15. Wetin mek i rili impɔtant to Jiova fɔ mek pɔsin wɔship am di rayt we?

¹⁵ Wetin mek di we aw pipul dɛn bin de wɔship rili impɔtant to Jiova? Wan rizin na bikɔs na di kiŋ dɛn bin gɛt di wok fɔ ɛp Gɔd in pipul dɛn fɔ wɔship am di rayt we. Dɔn bak, we pipul dɛn de wɔship lay lay gɔd dɛn, dat de mek dɛn kɔmit ɔda siriɔs sin dɛn ɛn trit ɔda pipul dɛn bad. (Osia 4:1, 2) Pantap dat, di kiŋ dɛn ɛn di pipul dɛn we dɛn bin de rul oba na bin Jiova in pipul dɛn. Na dat mek di Baybul kɔmpia di wɔship we dɛn bin de wɔship lay lay gɔd dɛn to we maredman ɔ mareduman go du mami ɛn dadi biznɛs wit ɔda pɔsin we i nɔ mared to. (Jɛr. 3:8, 9) We maredman ɔ mareduman du mami ɛn dadi biznɛs wit ɔda pɔsin, i nɔ fetful to di wan we i fɔ fetful to pas ɛni ɔda pɔsin, ɛn di tin we i du go mek in man ɔ wɛf in at rili pwɛl. Semweso, if pɔsin we dɔn gi in layf to Jiova wɔship lay lay gɔd dɛn,  i dɔn sin agens Jiova ɛn dat go mek Gɔd in at rili pwɛl. e​—Dit. 4:23, 24.

16. Wetin na di men tin we de sho di difrɛns bitwin pɔsin we de du wetin rayt ɛn pɔsin we wikɛd na Jiova in yay?

¹⁶ Us lɛsin dɛn wi lan? Wan dawt nɔ de se, wi fɔ mek-ɔp mi maynd fɔ avɔyd lay lay wɔship. Bɔt wi fɔ wɔship Jiova bak di rayt we ɛn kɔntinyu fɔ wɔship am ɔltɛm. Prɔfɛt Malakay bin ɛksplen klia wan di difrɛns bitwin pɔsin we gud ɛn pɔsin we bad na Jiova in yay. I bin tɔk se: “Una go si bak di difrɛns bitwin pɔsin we de du wetin rayt ɛn pɔsin we wikɛd, ɛn di difrɛns bitwin pɔsin we de sav Gɔd ɛn di wan we nɔ de sav am.” (Mal. 3:18) So, lɛ wi nɔ alaw ɛnitin, ivin di pafɛkt we wi nɔ pafɛkt ɛn di mistek dɛn we wi de mek fɔ mek wi at pwɛl te wi lɛf fɔ sav Gɔd. If wi lɛf fɔ sav Jiova, dat sɛf na siriɔs sin.

17. Aw di pɔsin we wi go disayd fɔ mared go afɛkt wi wɔship to Jiova?

¹⁷ If yu na pɔsin we nɔ mared yet ɛn de tink bɔt fɔ mared, yu ebul si aw di wɔd dɛn we Malakay tɔk bɔt fɔ sav Gɔd gɛt sɔntin fɔ du wit di pɔsin we yu go disayd fɔ mared? Sɔntɛm pɔsin go gɛt sɔm fayn kwaliti dɛn, bɔt if da pɔsin de nɔ de sav di tru Gɔd, yu tink se rayt naw Jiova de si am as pɔsin we de du wetin rayt? (2 Kɔr. 6:14) If yu mared to dis pɔsin, yu tink se i go ɛp yu fɔ kɔntinyu fɔ sav Jiova fetful wan? Tink bɔt dis: Sɔntɛm, Kiŋ Sɔlɔmɔn in wɛf dɛn we bin de sav lay lay gɔd dɛn bin gɛt sɔm fayn kwaliti dɛn, bɔt dɛn nɔ bin de wɔship Jiova, so smɔl smɔl dɛn mek Sɔlɔmɔn bigin fɔ wɔship lay lay gɔd dɛn.​—1 Kiŋ 11:1, 4.

18. Wetin mama ɛn papa dɛn fɔ tich dɛn pikin dɛn?

 ¹⁸ Mama ɛn papa dɛn, una kin yuz di ɛgzampul dɛn bɔt di kiŋ dɛn na di Baybul fɔ ɛp una pikin dɛn fɔ gɛt zil fɔ sav Jiova. Ɛp dɛn fɔ ɔndastand se di kiŋ dɛn we Jiova bin gladi fɔ na di wan dɛn we bin de wɔship am ɛn we bin de ɛnkɔrej di pipul dɛn fɔ wɔship am. Yuz wetin yu de tɔk ɛn yu ɛgzampul fɔ tich yu pikin dɛn se tin dɛn lɛk fɔ stɔdi di Baybul, fɔ go di mitin dɛn, ɛn fɔ go fil savis impɔtant pas ɛni ɔda tin we dɛn go du. (Mat. 6:33) If yu nɔ du dat, sɔntɛm yu pikin dɛn go tink se dɛn fɔ bi Jiova Witnɛs bikɔs dɛn “fambul dɛn na Jiova Witnɛs.” Sɔntɛm, dat go mek dɛn nɔ si se fɔ wɔship Jiova na sɔntin we rili impɔtant ɔ sɔntɛm dɛn go ivin stɔp fɔ sav Jiova.

19. Us op de fɔ ɛnibɔdi we dɔn lɛf fɔ sav Jiova? (Luk bak di bɔks we gɛt di taytul “ Yu Go Ebul Kam Bak to Jiova!”)

¹⁹ Fɔ se pɔsin we dɔn lɛf fɔ sav Jiova nɔ go ɛva ebul fɔ sav am igen? Nɔ, nɔto so i bi, bikɔs i go ebul ripɛnt ɛn wɔship Jiova bak di rayt we. Fɔ du dat, sɔntɛm i go nid fɔ put insɛf dɔŋ ɛn gri fɔ mek di ɛlda dɛn na di kɔngrigeshɔn ɛp am. (Jems 5:14) Bɔt if i wok tranga wan fɔ bi Jiova in padi bak, i go si di bɛnifit!

20. If wi falamakata di kiŋ dɛn we bin fetful, aw Jiova go si wi?

²⁰ Us lɛsin dɛn wi dɔn lan frɔm di kiŋ dɛn na Izrɛl? Wi go ebul bi lɛk di kiŋ dɛn we bin fetful if wi kɔntinyu fɔ sav Jiova wit ɔl wi at. Lɛ wi lan frɔm di mistek dɛn we wi dɔn mek, ripɛnt, ɛn mek di chenj dɛn we wi nid fɔ mek. Ɛn lɛ wi mɛmba se i rili impɔtant fɔ lɛ wi wɔship di wangren tru Gɔd. If yu nɔ lɛf Jiova, i go si yu as pɔsin we de du wetin rayt na in yay.