1-3. Us prɔblɛm dɛn kin mek Jiova in pipul dɛn kray?

USTƐM las yu kray? Sɔntɛnde, wi kin kray bikɔs wi gladi. Bɔt bɔku tɛm, wi kin kray bikɔs wi at rili pwɛl. Fɔ ɛgzampul, wi kin kray we pɔsin we wi lɛk day. Wan sista we de na Amɛrika we nem Lɔrali bin rayt se: “We mi galpikin day, sɔntɛnde mi at kin so pwɛl dat i tan lɛk natin nɔ de kɔrej mi. Dɛn tɛm dɛn de, a bin de tink se a nɔ go ebul fɔ bia.” *

² Ɔda tin dɛn de we kin mek wi kray. Wan payɔnia sista na Jepan we nem Irɔmi bin se: “Sɔntɛnde mi at kin pwɛl bikɔs di pipul dɛn we a de prich to nɔ kin want fɔ no bɔt di Baybul. Sɔntɛnde a kin kray we a de aks Jiova lɛ i ɛp mi fɔ si sɔmbɔdi we want fɔ no bɔt di trut.”

³ Yusɛf kin fil dis sem kayn we lɛk dɛn sista dɛn ya? Bɔku pan wi kin fil di sem we. (1 Pit. 5:​9) Wi want fɔ ‘gladi we wi de sav Jiova,’ bɔt sɔntɛnde wi kin de kray bikɔs pɔsin we wi lɛk day, wi at pwɛl, ɔ sɔntɛnde wi kin gɛt prɔblɛm we kin mek i nɔ izi fɔ kɔntinyu fɔ fetful to Gɔd. (Sam 6:​6; 100:​2) Wetin wi kin du we wi de fil dis kayn we?

4. Wetin wi go tɔk bɔt insay dis atikul?

⁴ Wi kin lan frɔm Jizɔs in ɛgzampul. Sɔm tɛm dɛn bin de we Jizɔs insɛf bin “kray.” (Jɔn 11:​35; Lyuk 19:​41; 22:​44; Ibru. 5:​7) Lɛ wi tɔk bɔt dɛn tɛm dɛn de. As wi de du so, lɛ wi si wetin wi kin lan bɔt Jizɔs ɛn  in Papa, Jiova. Wi go tɔk bak bɔt ɔda tin dɛn we go ɛp wi we wi gɛt prɔblɛm dɛn we de mek wi kray.

5. Wetin wi lan bɔt Jizɔs frɔm wetin de na Jɔn 11:​32-36?

⁵ Insay di ia 32, Jizɔs in gud padi Lazarɔs bin sik ɛn day. (Jɔn 11:​3, 14) Lazarɔs bin gɛt tu sista dɛn, Meri ɛn Mata, ɛn Jizɔs bin rili lɛk dis famili. Meri ɛn Mata dɛn at bin rili pwɛl we dɛn brɔda bin day. Afta Lazarɔs bin dɔn day, Jizɔs bin travul go na Bɛtani usay Meri ɛn Mata bin de. We Mata yɛri se Jizɔs de kam, i rɔn go mit am. Imajin aw in at bin pwɛl we i se: “Masta, if yu bin de na ya, mi brɔda nɔ bin fɔ day.” (Jɔn 11:​21) Jɔs afta dat, we Jizɔs si Meri ɛn ɔda pipul dɛn de kray, insɛf bin “kray.”—Rid Jɔn 11:​32-36.

6. Wetin mek Jizɔs bin kray da tɛm de?

⁶ Wetin mek Jizɔs bin kray da tɛm de? Di buk we nem Insight on the Scriptures se: “Di day we Jizɔs in padi Lazarɔs day ɛn di kray we in sista dɛn bin de kray bin mek Jizɔs ‘fil am bad bad wan ɛn pini ɛn kray.’” * Jizɔs go dɔn tink bɔt di pen we in padi Lazarɔs bin de fil we i bin sik ɛn aw i bin fil we i no se i de kam day. Wan ɔda tin bak we go dɔn mek Jizɔs kray na we i si aw Meri ɛn Mata bin fil we dɛn brɔda day. If yu tayt padi ɔ fambul bin dɔn day, yu go mɔs dɔn fil dis sem kayn we. Lɛ wi tɔk bɔt tri lɛsin dɛn we wi go lan frɔm dis tin we bin apin.

7. Wetin wi lan bɔt Jiova frɔm di kray we Jizɔs bin kray fɔ in padi dɛn?

⁷ Jiova de ɔndastand aw yu de fil. Jizɔs “rili tan lɛk” in Papa. (Ibru. 1:​3) We Jizɔs bin kray, i sho aw Jiova de fil  we pɔsin we wi lɛk day. (Jɔn 14:​9) If yu gɛt pɔsin we yu lɛk we bin dɔn day, yu fɔ biliv se Jiova nɔ jɔs de si di pwɛl we yu at pwɛl, bɔt i de fil sɔri fɔ yu bak. I want fɔ mɛn ɔl di wan dɛn we dɛn at sik.—Sam 34:​18; 147:​3.

8. Wetin mek wi fɔ biliv tranga wan se Jizɔs go gi layf bak to di wan dɛn we wi lɛk we dɔn day?

⁸ Jizɔs want fɔ gi layf bak to di wan dɛn we wi lɛk we dɔn day. Jɔs bifo Jizɔs bin kray, i bin tɛl Mata se: “Yu brɔda go gɛt layf bak.” Mata bin biliv Jizɔs. (Jɔn 11:​23-27) Bikɔs Mata bin de wɔship Jiova, i no se prɔfɛt Ilayja ɛn prɔfɛt Ilaysha bin gi layf bak to pipul dɛn trade. (1 Kiŋ 17:​17-24; 2 Kiŋ 4:​32-37) Ɛn sɔntɛm i go dɔn yɛri bɔt we Jizɔs bin gi ɔda pipul dɛn layf bak. (Lyuk 7:​11-15; 8:​41, 42, 49-56) Yusɛf fɔ biliv tranga wan se di wan dɛn we yu lɛk we dɔn day go gɛt layf bak. So wetin wi lan frɔm di kray we Jizɔs kray we i bin de kɔrej in padi dɛn bikɔs pɔsin we dɛn lɛk dɔn day? Wi lan se i rili want fɔ gi layf bak to di wan dɛn we dɔn day.

9. Lɛk Jizɔs, aw wi go ɛp di wan dɛn we dɛn at pwɛl? Gi wan ɛgzampul.

⁹ Yu kin ɛp di wan dɛn we dɛn at pwɛl bikɔs pɔsin we dɛn lɛk dɔn day. Jizɔs nɔ bin jɔs kray wit Mata ɛn Meri, bɔt i bin lisin to dɛn ɛn ɛnkɔrej dɛn. Wisɛf kin du di sem tin fɔ di wan dɛn we dɛn at pwɛl. Wan ɛlda we de na Ɔstrelia we nem Dan bin se: “We mi wɛf bin day, a bin nid ɛp. Bɔku brɔda ɛn dɛn wɛf dɛn bin rɛdi ɔltɛm fɔ de lisin to mi. Dɛn bin alaw mi fɔ mek a kray, ɛn dɛn nɔ bin shem we a du dat. Dɛn ɛp mi bak fɔ du ɔda tin dɛn lɛk fɔ was mi motoka, fɔ bay-bay, ɛn fɔ kuk fɔ mi we a nɔ bin ebul fɔ du dɛn tin dɛn de. Ɛn dɛn bin de pre wit mi bɔku tɛm. Dɛn bin tan lɛk tru tru padi dɛn ɛn brɔda dɛn we dɛn ‘bɔn fɔ di tɛm dɛn we prɔblɛm kin de.’”—Prɔv. 17:​17, NWT.

10. Tɔk bɔt di tin dɛn we de na Lyuk 19:​36-40.

¹⁰ Jizɔs rich na Jerusɛlɛm Naysan 9, insay di ia 33. As i de go nia di siti, bɔku bɔku pipul dɛn gɛda ɛn di pipul dɛn prɛd dɛn klos dɛn na di rod bifo am fɔ sho se dɛn si am as dɛn Kiŋ. Fɔ tru, na bin tɛm we pipul dɛn bin gladi. (Rid Lyuk 19:​36-40.) So in disaypul dɛn nɔ go dɔn ɛkspɛkt wetin apin nɛks. “We [Jizɔs] go nia di siti, i luk am ɛn kray fɔ am.” Jizɔs bin de kray we i bin de tɔk bɔt di bad bad tin dɛn we gɛt fɔ apin to di pipul dɛn na Jerusɛlɛm.—Lyuk 19:​41-44.

11. Wetin mek Jizɔs bin kray fɔ di pipul dɛn na Jerusɛlɛm?

¹¹ Jizɔs in at bin pwɛl bikɔs i bin no se bɔku pan di Ju dɛn nɔ go lisin to di mɛsej we i de prich bɔt di Kiŋdɔm pan ɔl we bɔku pan dɛn bin gladi fɔ am da de de. Bikɔs ɔf dat, dɛn go dɔnawe wit Jerusɛlɛm, ɛn di Ju dɛn we nɔ day, dɛn go kɛr dɛn go as slev. (Lyuk 21:​20-24) I sɔri fɔ no se jɔs lɛk aw Jizɔs bin tɔk, bɔku pan di pipul dɛn nɔ bin lisin to am. Wetin bɔku pipul dɛn usay yu de kin du we yu go prich bɔt di Kiŋdɔm to dɛn? If na wan-wan de lisin we yu go tich dɛn di trut, wetin yu kin lan frɔm  di tɛm we Jizɔs bin kray? Lɛ wi si tri mɔ lɛsin dɛn.

12. Wetin wi go lan bɔt Jiova frɔm di kray we Jizɔs bin kray fɔ in neba dɛn?

¹² Jiova bisin bɔt pipul dɛn. Di kray we Jizɔs bin kray de mɛmba wi bɔt aw Jiova rili bisin bɔt pipul dɛn. “I nɔ want fɔ dɔnawe wit ɛnibɔdi, i want mek ɔlman ripɛnt.” (2 Pit. 3:​9) Tide, wi de sho se wi lɛk wi neba dɛn bay we wi de tray fɔ ɛp dɛn ɔltɛm fɔ lan bɔt di gud nyuz bɔt di Kiŋdɔm.—Mat. 22:​39. *

13-14. Aw Jizɔs bin sho se i gɛt sɔri-at fɔ pipul dɛn, ɛn aw wisɛf kin falamakata am?

¹³ Jizɔs bin du in bɛst na di prichin wok. I bin sho se i lɛk di pipul dɛn bay we i kɔntinyu fɔ yuz ɛni chans we i gɛt fɔ tich dɛn. (Lyuk 19:​47, 48) Wetin mek i du dat? Jizɔs bin fil sɔri fɔ dɛn. Sɔntɛnde, di pipul dɛn we bin want fɔ lisin to Jizɔs bin so bɔku dat in ɛn in disaypul dɛn “nɔ bin ivin ebul fɔ it.” (Mak 3:​20) Ɛn we wan man bin want fɔ tɔk to Jizɔs na nɛt, i bin rɛdi fɔ tɔk to di man. (Jɔn 3:​1, 2) Bɔku pan di wan dɛn we bin fɔs lisin to Jizɔs nɔ bin bi in disaypul dɛn. Bɔt ɔl di wan dɛn we bin lisin to am bin gɛt di chans fɔ yɛri di gud nyuz. Tide, wisɛf want fɔ gi ɔlman di chans fɔ yɛri di gud nyuz. (Akt 10:​42) Fɔ mek wi go ebul fɔ du dis, wi nid fɔ ajɔst di we aw wi de prich.

¹⁴ Rɛdi fɔ ajɔst. If wi de prich di sem tɛm ɔltɛm, wi nɔ go ebul fɔ prich to di wan dɛn we rili want fɔ lisin to di gud nyuz. Wan payɔnia we nem Matilda tɔk se: “Mi ɛn mi man kin tray fɔ prich to pipul dɛn difrɛn tɛm dɛn. Ali mɔnin, wi kin go prich na dɛn biznɛs ples dɛn. Aftanun, we bɔku pipul dɛn kin de waka na strit, wi kin yuz kat. Ivintɛm, wi kin rili ebul fɔ mit mɔ pipul dɛn na dɛn os dɛn.” Wi nɔ fɔ jɔs prich di tɛm we fayn fɔ wi, bifo dat wi fɔ rɛdi fɔ ajɔst so dat wi go prich di tɛm we wi  ebul fɔ mit mɔ pipul dɛn. We wi du so, wi no se Jiova go gladi fɔ wi.

15. Akɔdin to Lyuk 22:​39-44, wetin bin apin di nɛt bifo Jizɔs day?

¹⁵ Wan ivintɛm insay Naysan 14 na di ia 33, Jizɔs bin go na di gadin na Gɛtsimani. We i bin de de, i pre to Jiova wit ɔl in at. (Rid Lyuk 22:​39-44.) Dɛn tɛm dɛn de we tin nɔ bin rili izi fɔ Jizɔs, ‘i bin de tɔk lawd wan ɛn kray we i de rili beg Gɔd.’ (Ibru. 5:​7) Wetin Jizɔs bin pre fɔ di las nɛt bifo i day? I bin pre fɔ lɛ Jiova ɛp am fɔ kɔntinyu fɔ fetful ɛn fɔ du wetin I want. Jiova bin yɛri we in Pikin bin de pre to am wit ɔl in at, ɛn i bin sɛn wan enjɛl fɔ kɔrej am.

16. Wetin mek Jizɔs in at bin pwɛl we i bin de pre na di gadin na Gɛtsimani?

¹⁶ Jizɔs go mɔs dɔn kray we i de pre na di gadin na Gɛtsimani bikɔs pipul dɛn go si am as pɔsin we nɔ gɛt wan rɛspɛkt fɔ Gɔd in nem. I bin no se i rili impɔtant fɔ lɛ i kɔntinyu fɔ fetful ɛn pul di badnem we de pan in Papa. If yu gɛt prɔblɛm dɛn we de mek i nɔ izi fɔ lɛ yu kɔntinyu fɔ fetful to Jiova, wetin yu kin lan frɔm di kray we Jizɔs bin kray? Lɛ wi tɔk bɔt tri ɔda lɛsin dɛn we wi kin lan.

17. Wetin wi lan bɔt Jiova we i ansa Jizɔs in prea?

¹⁷ Jiova de lisin we wi rili beg am. Jiova bin lisin we Jizɔs bin rili beg am. Wetin mek? Na bikɔs di men tin we Jizɔs bin bisin bɔt na fɔ kɔntinyu fɔ fetful to in Papa ɛn fɔ pul di badnem we de pan Am. If di men tin we wi bisin bɔt na fɔ kɔntinyu fɔ fetful to Jiova ɛn pul di badnem we de pan am, i go ansa wi we wi pre to am fɔ ɛp.—Sam 145:​18, 19.

18. Aw Jizɔs tan lɛk padi we ɔndastand wi?

¹⁸ Jizɔs ɔndastand aw wi de fil. We wi gɛt tin we de mɔna wi, wi kin gladi fɔ gɛt padi we ɔndastand aw wi de fil, mɔ di wan we bin dɔn gɛt di kayn prɔblɛm we wi de gɛt. Jizɔs na da kayn  padi de. I no aw i tan lɛk fɔ fil wik ɛn we yu nid pɔsin fɔ ɛp yu. I ɔndastand aw Jiova mek wi, ɛn i go mek shɔ se wi gɛt di ɛp we wi nid “di rayt tɛm.” (Ibru. 4:​15, 16) Jɔs lɛk aw Jizɔs bin tek di ɛp we wan enjɛl bin gi am na di gadin na Gɛtsimani, na so wisɛf fɔ rɛdi fɔ tek di ɛp we Jiova Gɔd de ɛp wi ilɛksɛf na frɔm wan pɔblikeshɔn, vidio, tɔk, ɔ we wan ɛlda ɔ machɔ brɔda ɔ sista kam fɛn wi.

19. Wetin go ɛp yu we yu gɛt prɔblɛm we de mek i nɔ izi fɔ kɔntinyu fɔ fetful to Gɔd? Gi wan ɛgzampul.

¹⁹ Jiova go gi yu “di pis we [i] de gi.” Aw Jiova go ɛp wi? We wi pre, wi go gɛt “di pis we Gɔd de gi we mɔtalman nɔ ebul ɔndastand.” (Fil. 4:​6, 7) Di pis we Jiova de gi de mek wi at kam dɔŋ ɛn ɛp wi fɔ tink di rayt we. Na dis bin apin to wan sista we nem Lus. I se: “Bɔku tɛm, a kin fil lɛk se na mi wangren de. Sɔntɛnde, di we aw a de fil kin mek a tink se Jiova nɔ lɛk mi. Bɔt we dat apin, a kin tɛl Jiova aw a de fil wantɛm wantɛm. Prea kin ɛp mi fɔ fil fayn.” Frɔm wetin dis sista se, prea kin ɛp wi fɔ gɛt pis.

20. Us lɛsin dɛn wi dɔn lan frɔm di kray we Jizɔs bin kray?

²⁰ Wi dɔn lan fayn fayn lɛsin dɛn we go kɔrej wi frɔm di kray we Jizɔs bin kray. Dis atikul dɔn mɛmba wi se wi fɔ ɛp wi padi dɛn we dɛn at pwɛl bikɔs pɔsin we dɛn lɛk dɔn day, ɛn wi fɔ abop se Jiova ɛn Jizɔs go ɛp wi we pɔsin we wi lɛk day. Dis atikul dɔn ɛnkɔrej wi fɔ prich ɛn tich wit sɔri-at bikɔs Jiova Gɔd ɛn Jizɔs Krays dɔn sho dis fayn kwaliti. Wi dɔn gɛt kɔrej we wi no se Jiova ɛn in Pikin ɔndastand aw wi de fil, dɛn ɔndastand di say dɛn we wi wik, ɛn dɛn want fɔ ɛp wi fɔ bia. Lɛ wi kɔntinyu fɔ du wetin wi dɔn lan te di de we Jiova go du wetin i dɔn prɔmis, dat na, ‘fɔ wep ɔl di kray wata na wi yay’!—Rɛv. 21:​4.