STƆDI ATIKUL 7
Aw Wi Fɔ Ɔndastand di Wok we di Wan dɛn we De Oba di Kɔngrigeshɔn De Du?
“Di Krays de oba di kɔngrigeshɔn, we na di bɔdi we i sev.”—ƐFI. 5:23.
SIŊ 137 Fetful Uman Dɛn
WETIN WI GO LAN? *
1. Wetin na wan rizin we mek Jiova in famili gɛt wanwɔd?
WI LƐK we wi de na Jiova in famili. Wetin mek wi famili gɛt pis ɛn wanwɔd? Wan rizin na dat wi ɔl de du wi bɛst fɔ rɛspɛkt di wan dɛn we Jiova dɔn put oba wi. Infakt, di mɔ we wi de ɔndastand dis arenjmɛnt we Jiova dɔn mek, na di mɔ wi go kɔntinyu fɔ gɛt wanwɔd.
2. Us kwɛstyɔn dɛn wi go ansa insay dis atikul?
2 Insay dis atikul, wi go tɔk bɔt udat dɛn Jiova dɔn put oba wi na di kɔngrigeshɔn. Dɔn bak, wi go ansa dɛn kwɛstyɔn dɛn ya we se: Us wok we Jiova dɔn gi sista dɛn? Na tru se ɔl di brɔda dɛn de oba ɔl di sista dɛn? Di rayt we Jiova dɔn gi ɛlda dɛn fɔ de oba di brɔda ɛn sista dɛn na di kɔngrigeshɔn na di sem wit di wan we i gi papa dɛn fɔ de oba dɛn wɛf ɛn pikin dɛn? Fɔs, lɛ wi tɔk bɔt aw wi fɔ si sista dɛn.
AW WI FƆ SI SISTA DƐN?
3. Wetin go ɛp wi fɔ valyu di wok we wi sista dɛn de du mɔ ɛn mɔ?
3 Wi valyu wi sista dɛn we de wok tranga wan fɔ kia fɔ dɛn famili, fɔ prich di gud nyuz, ɛn fɔ sɔpɔt di kɔngrigeshɔn. Wan tin we go ɛp wi fɔ valyu dɛn mɔ na we wi tink bɔt aw Jiova ɛn Jizɔs de si dɛn. Wi go lan bak bɔt aw fɔ si sista dɛn bay we wi go tɔk bɔt aw apɔsul Pɔl bin de trit uman dɛn.
4. Aw di Baybul sho se Jiova valyu uman ɛn man dɛn?
4 Di Baybul sho wi se Jiova valyu uman ɛn man dɛn. Fɔ ɛgzampul, i sho wi se insay di fɔstɛm Kristian dɛn tɛm, Jiova bin gi in oli spirit to uman ɛn man dɛn. Ɛn i bin gi dɛn di pawa fɔ du wɔndaful tin dɛn, lɛk fɔ tɔk difrɛn difrɛn langwej dɛn. (Akt 2:1-4, 15-18) Jiova dɔn yuz in oli spirit fɔ anɔynt uman ɛn man dɛn we go rul wit Krays. (Gal. 3:26-29) Na uman ɛn man dɛn go gɛt fɔ ɛnjɔy layf na dis wɔl sote go. (Rɛv. 7:9, 10, 13-15) Dɔn bak, na man ɛn uman dɛn Jizɔs gi di wok fɔ prich ɛn tich di gud nyuz. (Mat. 28:19, 20) Infakt, di Baybul buk we nem Akt bin tɔk bɔt di wok we wan sista we nem Prisila bin du. In ɛn in man we nem Akwila bin ɛksplen di tru tin dɛn fayn fayn wan to wan man we nem Apɔlɔs, we bin lan bɔku buk.—Akt 18:24-26.
5. Wetin Lyuk 10:38, 39, 42 ɛp wi fɔ no bɔt di we aw Jizɔs bin de si uman dɛn?
5 Jizɔs bin rɛspɛkt ɛn ɔnɔ uman dɛn. I nɔ bin de fala di Faresi dɛn we bin fil se man dɛn bɛtɛ pas uman dɛn, dɛn nɔ bin de tɔk to uman dɛn na pɔblik, ɛn dɛn nɔ bin de ɛva tɔk bɔt di Skripchɔ dɛn wit uman dɛn. Bifo dat, we Jizɔs bin de tɔk to in ɔda disaypul dɛn bɔt impɔtant tin dɛn we gɛt fɔ du wit Gɔd biznɛs, i bin de alaw uman dɛn fɔ de de. * (Rid Lyuk 10:38, 39, 42.) Dɔn bak, i bin alaw uman dɛn fɔ travul wit am we i bin de go prich na difrɛn difrɛn say dɛn. (Lyuk 8:1-3) Ɛn Jizɔs bin gi uman dɛn di big big ɔnɔ fɔ tɛl in apɔsul dɛn se i dɔn gɛt layf bak.—Jɔn 20:16-18.
6. Aw apɔsul Pɔl bin sho se i rɛspɛkt uman dɛn?
6 Apɔsul Pɔl bin mɛmba Timoti se i fɔ ɔnɔ uman dɛn. Pɔl bin tɛl am se i fɔ trit “uman dɛn we dɔn ol lɛk se na [in] mama dɛn” ɛn i fɔ si “yɔŋuman dɛn lɛk se na [in] sista dɛn.” (1 Tim. 5:1, 2) Pɔl bin rili ɛp Timoti fɔ bi machɔ Kristian, bɔt insɛf sɛf bin tɔk se na Timoti in mama ɛn in grani fɔs tich Timoti “di oli tin dɛn we dɛn rayt.” (2 Tim. 1:5; 3:14, 15) We Pɔl bin de rayt in lɛta to di Kristian dɛn na Rom, i bin kɔl sɔm patikyula sista dɛn nem dɛn we i bin de sɛn gritin fɔ. I nɔ bin jɔs notis di wok we dɛn sista dɛn ya bin de du, bɔt i bin tɛl dɛn tɛnki bak.—Rom. 16:1-4, 6, 12; Fil. 4:3.
7. Us kwɛstyɔn dɛn wi de kam tɔk bɔt?
7 Di paregraf dɛn we de bifo dis wan dɔn ɛp wi fɔ no se di Baybul nɔ tɔk se brɔda dɛn bɛtɛ pas sista dɛn. Dɛn wi sista dɛn ya we gɛt lɔv ɛn fri-an de rili ɛp di kɔngrigeshɔn, ɛn di ɛlda dɛn kin abop pan dɛn fɔ ɛp fɔ mek pis ɛn wanwɔd kɔntinyu fɔ de na di kɔngrigeshɔn. Bɔt wi nid fɔ ansa sɔm kwɛstyɔn dɛn: Wetin mek Jiova want lɛ sista dɛn kɔba dɛn ed sɔm patikyula tɛm dɛn? Bikɔs na brɔda dɛn nɔmɔ dɛn de pik fɔ bi ɛlda ɛn ministerial savant, fɔ se dat min se ɔl di brɔda dɛn de oba ɔl di sista dɛn na di kɔngrigeshɔn?
NA ƆL DI BRƆDA DƐN DE OBA ƆL DI SISTA DƐN?
8. Akɔdin to Ɛfishians 5:23, na ɔl di brɔda dɛn de oba ɔl di sista dɛn? Ɛksplen.
8 Di shɔt ansa na nɔ! Ɔl di brɔda dɛn nɔ de oba ɔl di sista dɛn, na Krays de oba dɛn. (Rid Ɛfishians 5:23.) Insay di famili, na di man de oba in wɛf. Bɔypikin we baptayz nɔ de oba in mama. (Ɛfi. 6:1, 2) Dɔn insay di kɔngrigeshɔn, di ɛlda dɛn jɔs de oba di brɔda ɛn sista dɛn we i kam to sɔm tin dɛn. (1 Tɛs. 5:12; Ibru. 13:17) Sista dɛn we nɔ mared ɛn we nɔ de wit dɛn mama ɛn papa igen de kɔntinyu fɔ rɛspɛkt dɛn mama ɛn papa dɛn ɛn di ɛlda dɛn. Bɔt jɔs lɛk di brɔda dɛn na di kɔngrigeshɔn, na Jizɔs nɔmɔ de oba dɛn sista dɛn ya.
Di wan dɛn we nɔ mared ɛn we nɔ de liv wit dɛn mama ɛn papa dɛn igen de ɔnda Jizɔs (Luk na paregraf 8)
9. Wetin mek sɔm patikyula tɛm dɛn de we sista dɛn go nid fɔ kɔba dɛn ed?
9 Jiova dɔn gi man dɛn di wok fɔ de bifo fɔ tich ɛn wɔship am na di kɔngrigeshɔn, ɛn i nɔ gi uman dɛn da wok de. (1 Tim. 2:12) Wetin mek? Na fɔ di sem rizin we mek i pik Jizɔs fɔ de oba di man dɛn, dat na fɔ mek in famili go ɔganayz. If sɔntin apin we mek na sista fɔ du di wok we brɔda dɛn kin du, Jiova want lɛ i kɔba in ed we i de du am. * (1 Kɔr. 11:4-7) Jiova nɔ de tɛl sista dɛn fɔ du dis bikɔs i fil se dɛn nɔ gɛt wan valyu, bɔt na fɔ lɛ dɛn gɛt we fɔ sho se dɛn rɛspɛkt di wan dɛn we i dɔn put oba dɛn. Wit ɔl dis we wi dɔn tɔk, lɛ wi ansa dis kwɛstyɔn we se: Wetin-ɛn-wetin di wan dɛn we de oba dɛn famili ɛn di ɛlda dɛn gɛt rayt fɔ du?
WETIN DI WAN DƐN WE DE OBA DƐN FAMILI ƐN DI ƐLDA DƐN GƐT RAYT FƆ DU?
10. Wetin go mek wan ɛlda go want fɔ mek lɔ dɛn fɔ di kɔngrigeshɔn?
10 Di ɛlda dɛn lɛk Krays, ɛn dɛn lɛk di “ship dɛn” we Jiova ɛn Jizɔs dɔn tɛl dɛn fɔ kia fɔ. (Jɔn 21:15-17) Bikɔs ɛlda dɛn bisin bɔt di kɔngrigeshɔn, sɔntɛm wan pan dɛn go de fil se in na papa fɔ di brɔda ɛn sista dɛn. So sɔntɛm i go de tink se bikɔs di wan dɛn we de oba dɛn famili gɛt rayt fɔ mek lɔ fɔ protɛkt dɛn famili, insɛf gɛt rayt fɔ mek lɔ we i tink se go protɛkt Gɔd in ship dɛn. Ɛn sɔntɛm, sɔm brɔda ɛn sista dɛn kin ɛnkɔrej ɛlda dɛn fɔ du dis kayn tin bay we dɛn kin aks di ɛlda dɛn fɔ ɛp dɛn fɔ disayd wetin dɛn fɔ du. Bɔt fɔ se di ɛlda dɛn na di kɔngrigeshɔn ɛn di wan dɛn we de oba dɛn famili gɛt di sem rayt fɔ du di sem tin dɛn?
Ɛlda dɛn de ɛp di kɔngrigeshɔn fɔ gɛt tayt padi biznɛs wit Jiova, ɛn dɛn de sho se dɛn bisin bɔt di kɔngrigeshɔn. Jiova dɔn gi dɛn di wok fɔ pul ɛni sina we nɔ gri fɔ ripɛnt na di kɔngrigeshɔn (Luk na paregraf 11 ɛn 12)
11. Aw di tin dɛn we di wan dɛn we de oba dɛn famili gɛt rayt fɔ du fiba di tin dɛn we ɛlda dɛn bak gɛt rayt fɔ du?
11 Apɔsul Pɔl bin sho wi se sɔm pan di tin dɛn we di wan dɛn we de oba dɛn famili gɛt rayt fɔ du fiba sɔm tin dɛn we di ɛlda dɛn bak gɛt rayt fɔ du. (1 Tim. 3:4, 5) Fɔ ɛgzampul, Jiova want fɔ lɛ wɛf ɛn pikin dɛn obe di wan we de oba dɛn na di famili. (Kol. 3:20) Ɛn i want di wan dɛn we de na di kɔngrigeshɔn fɔ obe di ɛlda dɛn. Jiova de ɛkspɛkt se di wan dɛn we de oba dɛn famili ɛn di ɛlda dɛn de mek shɔ se dɛn tich di wan dɛn we de ɔnda dɛn fɔ gɛt tayt padi biznɛs wit Jiova. Dɛn ɔl tu nid fɔ sho di wan dɛn we de ɔnda dɛn se dɛn bisin bɔt dɛn. Ɛn jɔs lɛk di wan dɛn we de oba dɛn famili di rayt we, di ɛlda dɛn kin mek shɔ se di wan dɛn we de ɔnda dɛn de gɛt di ɛp we dɛn nid ɛnitɛm we dɛn gɛt prɔblɛm. (Jems 2:15-17) Pantap dat, Jiova de ɛkspɛkt ɛlda dɛn ɛn di wan dɛn we de oba dɛn famili fɔ ɛp ɔda pipul dɛn fɔ obe in lɔ dɛn ɛn fɔ fala “di tin dɛn we dɛn dɔn rayt” na di Baybul.—1 Kɔr. 4:6.
Jiova dɔn gi di wan dɛn we de oba dɛn famili di rayt fɔ de bifo na di famili. We pɔsin we de oba in famili ɛn we lɛk dɛn want fɔ disayd fɔ du sɔntin, i kin tɔk fɔs wit in wɛf (Luk na paregraf 13)
12-13. Akɔdin to Romans 7:2, aw di rayt we pɔsin we de oba in famili gɛt difrɛn frɔm di rayt we ɛlda dɛn gɛt?
12 Ɔda impɔtant tin dɛn de we ɛlda dɛn gɛt rayt fɔ du we difrɛn frɔm wetin di wan dɛn we de oba dɛn famili gɛt rayt fɔ du. Fɔ ɛgzampul, Jiova dɔn gi ɛlda dɛn di wok fɔ bi jɔj ɛn fɔ pul ɛni sina na di kɔngrigeshɔn we nɔ gri fɔ ripɛnt.—1 Kɔr. 5:11-13.
13 Bɔt Jiova dɔn gi di wan dɛn we di oba dɛn famili di rayt fɔ du sɔm tin dɛn we ɛlda dɛn nɔ gɛt rayt fɔ du. Fɔ ɛgzampul, i dɔn gi pɔsin we de oba in famili di rayt fɔ mek lɔ fɔ in famili, ɛn fɔ mek shɔ se in famili fala dɛn lɔ dɛn de. (Rid Romans 7:2.) Wan pan di tin dɛn we pɔsin we de oba in famili gɛt rayt fɔ du na fɔ disayd ɔmɔs oklɔk in pikin dɛn fɔ kam na os na nɛt. I gɛt di rayt bak fɔ pɔnish in pikin dɛn if dɛn nɔ obe da lɔ de. (Ɛfi. 6:1) Ɛn wi no se we pɔsin we de oba in famili ɛn we lɛk dɛn want fɔ mek lɔ na di os, i kin tɔk fɔs wit in wɛf bikɔs dɛn ɔl tu na “wan bɔdi.” *—Mat. 19:6.
RƐSPƐKT KRAYS BIKƆS NA IN DE OBA DI KƆNGRIGESHƆN
Jizɔs de ɔnda Jiova, ɛn i de dayrɛkt di Kristian kɔngrigeshɔn (Luk na paregraf 14)
14. (a) Akɔdin to wetin de na Mak 10:45, wetin mek i rili fayn we Jiova pik Jizɔs fɔ de oba di kɔngrigeshɔn? (b) Us wok we di Gɔvnin Bɔdi gɛt? (Luk di bɔks we gɛt di taytul, “ Us Wok we di Gɔvnin Bɔdi Gɛt?”)
14 Bikɔs Jizɔs bin kam day fɔ wi, Jiova dɔn bay ɔlman we de na di kɔngrigeshɔn, ɛn ɛni ɔda pɔsin we go put fet pan Jizɔs in day. (Rid Mak 10:45; Akt 20:28; 1 Kɔr. 15:21, 22) So i rili fayn we Jiova pik Jizɔs we gi in layf fɔ wi fɔ bi di wan we de oba di kɔngrigeshɔn. Bikɔs na Jizɔs de oba wi, i gɛt di rayt fɔ mek lɔ dɛn bɔt wetin pipul dɛn, famili dɛn, ɛn di wan ol kɔngrigeshɔn fɔ du, ɛn i gɛt di rayt bak fɔ mek shɔ se wi obe dɛn lɔ dɛn de. (Gal. 6:2) Bɔt Jizɔs nɔ jɔs de mek lɔ dɛn fɔ wi. I de fid ɛniwan pan wi ɛn ol wi fayn.—Ɛfi. 5:29.
15-16. Wetin yu lan frɔm di tin dɛn we wan sista we nem Mali ɛn wan brɔda we nem Bɛnjamin tɔk?
15 Sista dɛn de sho se dɛn rɛspɛkt Krays bay we dɛn de du wetin di man dɛn we i dɔn put oba dɛn tɛl dɛn fɔ du. Wan sista we nem Mali we de na Amɛrika tɔk sɔntin we bɔku ɔda sista dɛn gri wit. I se: “A rili valyu di wok we a gɛt fɔ du as wɛf ɛn sista na di kɔngrigeshɔn. A kin gɛt fɔ tray tranga wan ɔltɛm fɔ lɛ a sho se a rɛspɛkt di wan dɛn we Jiova dɔn put oba mi. Bɔt mi man ɛn di brɔda dɛn na di kɔngrigeshɔn dɔn mek i izi fɔ lɛ a du dat bikɔs dɛn rɛspɛkt mi ɛn dɛn kin tɛl mi se dɛn gladi fɔ di wok we a de du.”
16 Brɔda dɛn de sho se dɛn ɔndastand di arenjmɛnt we Jiova mek fɔ put sɔm pipul dɛn oba ɔda pipul dɛn bay we dɛn de rɛspɛkt ɛn ɔnɔ sista dɛn. Wan brɔda we nem Bɛnjamin we de na Ingland se: “A dɔn lan bɔku tin frɔm di kɔmɛnt dɛn we sista dɛn kin mek na mitin ɛn frɔm di tin dɛn we dɛn kin tɛl mi bɔt aw fɔ prich ɛn tich fayn fayn wan. Dɛn de rili du impɔtant wok.”
17. Wetin mek wi fɔ rɛspɛkt di arenjmɛnt we Jiova mek fɔ put sɔm pipul dɛn oba ɔda pipul dɛn?
17 We ɔlman na di kɔngrigeshɔn, ilɛk wi na man, uman, pɔsin we de oba in famili, ɛn ɛlda dɛn ɔndastand se Jiova dɔn put sɔm pipul dɛn oba ɔda pipul dɛn, ɛn wi rɛspɛkt da arenjmɛnt de, di kɔngrigeshɔn go ɛnjɔy pis. Ɛn di tin we impɔtant mɔ na dat wi go mek Jiova we na wi Papa we de na ɛvin, gladi.—Sam 150:6.
SIŊ 123 Lɛ Wi Nɔ Ɛva Kɔmɔt Ɔnda Gɔd
^ par. 5 Us wok we Jiova dɔn gi sista dɛn na di kɔngrigeshɔn? Na ɔl di brɔda dɛn de oba ɔl di sista dɛn? Fɔ se di ɛlda dɛn ɛn di wan dɛn we de oba dɛn famili dɛn gɛt di sem rayt fɔ du di sem tin dɛn? Insay dis atikul, wi go yuz ɛgzampul dɛn we de na di Baybul fɔ ansa dɛn kwɛstyɔn dɛn ya.
^ par. 5 Rid paregraf 6 na di atikul we gɛt di taytul, “Sɔpɔt Kristian Sista Dɛn,” we de na di Sɛptɛmba 2020 Wachtawa.
^ par. 9 Luk di bɔks we gɛt di taytul, “ Ustɛm Sista Fɔ Kɔba In Ed?”
^ par. 13 Fɔ no bɔt udat fɔ disayd us kɔngrigeshɔn we di famili go de, rid paregraf 17 to 19 na di atikul we gɛt di taytul, “Rɛspɛkt di Wok we Ɔda Pipul dɛn Gɛt na Jiova in Kɔngrigeshɔn,” we de na di Ɔgɔst 2020 Wachtawa.
^ par. 59 Fɔ no mɔ bɔt dis tɔpik, rid pej 209 to 212 na di buk we gɛt di taytul “Kɔntinyu fɔ Du Wetin Go Mek Gɔd Lɛk Yu.”
^ par. 64 Fɔ no mɔ bɔt di wok we di Gɔvnin Bɔdi gɛt, rid pej 20 to 25 na di Julay 15, 2013, Wachtawa.
