1-2. (a) Wetin mek wi go se we wi gɛt prɔblɛm dɛn nɔto wi wangren de bia dɛn? (b) Wetin wi go tɔk bɔt insay dis atikul?

 WE WI gɛt prɔblɛm dɛn we nɔ rili izi, sɔntɛm wi go fil lɛk se na wi wangren de insay smɔl bot na si we rili rɔf. Bɔt nɔto wi wangren kin bia wi prɔblɛm dɛn. Wi Papa we lɛk wi we de na ɛvin nɔ jɔs de si wi prɔblɛm dɛn, bɔt i prɔmis bak fɔ ɛp wi fɔ bia dɛn. Jiova prɔmis in savant dɛn we nɔ de kɔmɔt biɛn am se: “A go ɛp [una].”​—Ayz. 41:10.

² Dis atikul go tɔk bɔt aw Jiova de ɛp wi (1) bay we i de gayd wi, (2) bay we i de gi wi di tin dɛn we wi nid, (3) bay we i de protɛkt wi, ɛn (4) bay we i de kɔrej wi. Jiova dɔn prɔmis wi se ilɛk uskayn prɔblɛm wi gɛt, i nɔ go ɛva fɔgɛt bɔt wi. I nɔ go ɛva lɛf wi. So wi nɔ ɛva de wi wangren.

JIOVA DE GAYD WI

3-4. Aw Jiova de gayd wi? (Sam 48:14)

³ Rid Sam 48:14. Jiova nɔ de ɛkspɛkt wi fɔ gayd wisɛf. Aw Jiova de gayd in fetful savant dɛn tide? Wan pan di tin dɛn we i de yuz fɔ gayd wi na in Wɔd di Baybul. (Sam 119:105) Jiova de yuz in Wɔd di Baybul fɔ ɛp wi fɔ disayd fɔ du di rayt tin dɛn ɛn fɔ gɛt kwaliti dɛn we go mek wi gɛt mɔ gladi-at naw ɛn layf we go de sote go tumara bambay. a Fɔ ɛgzampul, i de tich wi fɔ fɔgiv ɔda  pipul dɛn ɛn nɔ kip grɔj, fɔ ɔnɛs pan ɔltin, ɛn fɔ rili lɛk ɔda pipul dɛn wit ɔl wi at. (Sam 37:8; Ibru. 13:18; 1 Pit. 1:22) We wi de sho se wi gɛt dɛn kwaliti dɛn ya, wi go bi gud mama ɔ papa, maredman ɔ mareduman, ɛn padi dɛn.

⁴ Dɔn bak, Jiova bin mek dɛn rayt na in Wɔd di Baybul bɔt pipul dɛn we bin de trade we bin gɛt di sem kayn prɔblɛm dɛn we wi de gɛt ɛn we bin de fil lɛk aw wi de fil. (1 Kɔr. 10:13; Jems 5:17) Wi de bɛnifit bɔku we dɛn we wi rid bɔt dɛn pipul dɛn de ɛn aplay di lɛsin dɛn we wi lan frɔm dɛn. Bɔt lɛ wi tɔk bɔt tu pan di we dɛn we wi de bɛnifit. Fɔs, wi go no se nɔto wi wangren de; ɔda pipul dɛn bin dɔn gɛt di sem kayn prɔblɛm dɛn we wi de gɛt, ɛn dɛn bin ebul fɔ bia dɛn. (1 Pit. 5:9) Ɛn sɛkɔn, wi go lan bɔt aw fɔ bia wit wi prɔblɛm dɛn.​—Rom. 15:4.

5. Udat dɛn Jiova de yuz fɔ gayd wi?

⁵ Jiova dɔn arenj bak fɔ mek wi kɔmpin Kristian dɛn gayd wi. b Fɔ ɛgzampul, sakit ovasia dɛn kin go na difrɛn kɔngrigeshɔn dɛn ɔltɛm fɔ ɛnkɔrej wi. Di tɔk dɛn we dɛn kin gi kin ɛp wi fɔ gɛt strɔng fet ɛn ɛp wi fɔ kɔntinyu fɔ gɛt wanwɔd. (Akt 15:40–16:5) Di ɛlda dɛn bak na di kɔngrigeshɔn kin wok tranga wan fɔ ɛp di pɔblisha dɛn wan bay wan fɔ kɔntinyu fɔ gɛt tayt padi biznɛs wit Jiova. (1 Pit. 5:2, 3) Mama ɛn papa dɛn kin tich dɛn pikin dɛn fɔ lɛk Jiova, fɔ disayd fɔ du di rayt tin dɛn, ɛn fɔ gɛt gud abit dɛn. (Prɔv. 22:6) Ɛn machɔ Kristian uman dɛn de ɛp yɔŋ sista dɛn bay we dɛn de sɛt fayn ɛgzampul, gi dɛn fayn advays, ɛn ɛnkɔrej dɛn.​—Taytɔs 2:3-5.

6. Wetin wi fɔ du fɔ mek wi go bɛnifit frɔm di gayd we Jiova de gayd wi?

⁶ Jiova dɔn gi wi ɔl di tin dɛn we wi nid fɔ gayd wi. Aw wi go sho se wi gladi fɔ wetin i dɔn du fɔ wi? Prɔvabs 3:5, 6 se: “Abop pan Jiova wit ɔl yu at ɛn nɔ abop pan yu yon sabi.” We wi du dat, “i go mek [wi] we klia.” Dat min se i go ɛp wi fɔ avɔyd bɔku prɔblɛm dɛn ɛn gɛt mɔ gladi-at. Wi rili gladi we Jiova de gi wi advays dɛn we de sho se i lɛk wi ɛn we de bɛnifit wi!—Sam 32:8.

JIOVA DE GI WI DI TIN DƐN WE WI NID

7. Wetin na sɔm we dɛn we Jiova de gi wi di tin dɛn we wi nid? (Filipians 4:19)

⁷ Rid Filipians 4:19. Apat frɔm we Jiova de gayd wi, i de blɛs bak di tranga wok we wi de du fɔ gɛt tin fɔ it, klos fɔ wɛr, ɛn say fɔ de. (Mat. 6:33; 2 Tɛs. 3:12) Pan ɔl we i nɔmal fɔ lɛ wi wɔri bɔt di tin dɛn we wi nid, Jiova de ɛnkɔrej wi fɔ lɛ wi nɔ wɔri pasmak bɔt dɛn tin dɛn de. (Luk di stɔdi not fɔ Matyu 6:25.) Wetin mek? Na bikɔs wi Papa nɔ go ɛva lɛf in fetful savant dɛn di tɛm we dɛn nid ɛp. (Mat. 6:8; Ibru. 13:5) Wi fɔ biliv am wit ɔl wi at we i se i go gi wi di tin dɛn we wi nid.

8. Wetin Jiova bin du fɔ Devid?

⁸ Tink bɔt aw Jiova bin ɛp Devid. Di tɛm we tin nɔ bin rili izi fɔ Devid bikɔs i bin de rɔnwe fɔ in layf, Jiova bin gi in ɛn in man dɛn di tin dɛn we dɛn bin nid fɔ liv. We Devid de tink bɔt aw Jiova bin de kia fɔ am, i rayt se: “A bin yɔŋ bɔt naw a dɔn ol, bɔt a nɔ wande si Gɔd lɛf di wan we de du wetin rayt, ɛn a nɔ wande si in pikin dɛn de luk fɔ tin fɔ it.” (Sam 37:25)  Sɔntɛm jɔs lɛk Devid, yusɛf dɔn si aw Jiova de kia fɔ in savant dɛn we fetful to am di tɛm dɛn we tin nɔ bin rili izi.

9. Aw Jiova de gi in pipul dɛn di tin dɛn we dɛn nid we dizasta apin insay wi yon tɛm? (Luk bak di pikchɔ dɛn.)

⁹ Jiova de gi in pipul dɛn bak di tin dɛn we dɛn nid we dizasta apin. Fɔ ɛgzampul, insay di fɔstɛm Kristian dɛn tɛm we tin fɔ it bin shɔtin na Jerusɛlɛm, Kristian dɛn we bin de na difrɛn say dɛn bin sɛn tin dɛn fɔ dɛn brɔda ɛn sista dɛn we bin nid ɛp. (Akt 11:27-30; Rom. 15:25, 26) Gɔd in pipul dɛnsɛf tide de sho se dɛn gɛt fri-an. We dizasta apin, Jiova kin yuz in pipul dɛn fɔ gi tin fɔ it, wata, klos, ɛn mɛrɛsin to di wan dɛn we di dizasta afɛkt. Kɔnstrɔkshɔn tim dɛn kin mek di os ɛn Kiŋdɔm Ɔl dɛn we pwɛl. Ɛn Jiova in savant dɛn nɔ kin westɛm fɔ yuz di Baybul fɔ kɔrej di wan dɛn we dɔn lɔs dɛn os, ɔ di wan dɛn we dɛn lɛk. c

10-11. Wetin yu lan frɔm Bɔris in ɛkspiriɛns?

¹⁰ Jiova de gi pipul dɛn bak we nɔ bigin fɔ wɔship am yet di tin dɛn we dɛn nid. Semweso, wisɛf fɔ luk fɔ we dɛn fɔ du gud to di wan dɛn we wi ɔl nɔ biliv di sem tin. (Gal. 6:10) We wi du dis, sɔntɛm wi go ebul ɛp dɛn fɔ lan mɔ bɔt wi ɛn Jiova. Lɛ wi tɔk bɔt Bɔris we na prinsipal na wan skul na Yukren in ɛkspiriɛns. Pan ɔl we Bɔris nɔto Jiova Witnɛs, i bin de trit in studɛnt dɛn we na Jiova Witnɛs dɛn fayn ɛn sho se i rɛspɛkt di tin dɛn we dɛn  biliv. We Bɔris bin disayd fɔ rɔnawe kɔmɔt usay di wɔ bin de ɛn go na say we sef, wi brɔda dɛn bin ɛp am. Leta, Bɔris bin atɛnd di Mɛmorial fɔ Krays in day. We Bɔris bin de tink bɔt di tin dɛn we di brɔda ɛn sista dɛn du fɔ am, i tɔk se: “Jiova Witnɛs dɛn bin rili gud to mi ɛn kia fɔ mi. A gladi fɔ wetin Jiova Witnɛs dɛn bin du fɔ mi.”

¹¹ Wisɛf go ebul fɔ falamakata wi Papa we de na ɛvin we gɛt sɔri-at bay we wi de du tin dɛn fɔ sho se wi lɛk pipul dɛn we nid ɛp, ilɛk wi biliv di sem tin ɔ wi nɔ biliv di sem tin. (Lyuk 6:31, 36) Wi op se di tray we wi de tray tranga wan fɔ sho se wi lɛk pipul dɛn go mek dɛn want fɔ bi Krays in disaypul dɛn. (1 Pit. 2:12) Bɔt ilɛk wetin apin, wi go gladi mɔ we wi de gi.​—Akt 20:35.

JIOVA DE PROTƐKT WI

12. Uskayn we Jiova prɔmis fɔ protɛkt in pipul dɛn as grup? (Sam 91:1, 2, 14)

¹² Rid Sam 91:1, 2, 14. Tide, Jiova prɔmis se i go protɛkt wi frɔm tin dɛn we go pwɛl wi padi biznɛs wit am. I nɔ go ɛva alaw Setan fɔ stɔp in pipul dɛn fɔ mek dɛn nɔ wɔship am di rayt we. (Jɔn 17:15) Ɛn we “da big big trɔbul” go bigin, wi gɛt kɔnfidɛns se Jiova nɔ go jɔs du wetin i bin dɔn prɔmis we na fɔ ɛp wi fɔ gɛt strɔng fet, bɔt i go sev wi bak.​—Rɛv. 7:9, 14.

13. Us we dɛn Jiova de protɛkt wi wan bay wan?

¹³ Aw Jiova de protɛkt wi wan bay wan? Jiova dɔn gi wi di Baybul so dat wi go no wetin rayt ɛn rɔng. (Ibru. 5:14) We wi de aplay di prinsipul dɛn we de insay Gɔd in Wɔd, wi de protɛkt wisɛf frɔm tin dɛn we go pwɛl wi padi biznɛs wit Jiova, ɛn wi go disayd fɔ du di rayt tin dɛn we go mek wi gɛt mɔ gladi-at ɛn wɛlbɔdi. (Sam 91:4) Dɔn, Jiova de yuz di kɔngrigeshɔn bak fɔ protɛkt wi. (Ayz. 32:1, 2) We wi de wit pipul dɛn we lɛk Jiova ɛn we de du wetin i de tich dɛn, dat de ɛnkɔrej wi ɛn ɛp wi fɔ avɔyd tin dɛn we bad.​—Prɔv. 13:20.

14. (a) Wetin mek Gɔd nɔ de protɛkt wi frɔm prɔblɛm dɛn ɔltɛm? (b) Us kɔnfidɛns Sam 9:10 gi wi? (Luk bak di futnot.)

¹⁴ Sɔntɛnde, Jiova bin de protɛkt in savant dɛn trade fɔ mek bad tin nɔ apin to dɛn ɔ fɔ mek dɛn nɔ kil dɛn. Bɔt i nɔ bin de du dat ɔltɛm. Sɔntɛnde, ‘tin dɛn we wi nɔ no se go apin kin apin to wi tɛm we wi nɔ de ɛkspɛkt.’ (Ɛkli. 9:11) Frɔm trade trade, Jiova dɔn de alaw pipul dɛn fɔ mek in savant dɛn sɔfa ɛn ivin kil dɛn so dat dɛn go pruv se Setan na layman. (Job 2:4-6; Mat. 23:34) Na di sem tin de apin tide. Pan ɔl we sɔntɛm Jiova nɔ go pul wi prɔblɛm dɛn, wi gɛt kɔnfidɛns se i nɔ go ɛva lɛf di wan dɛn we lɛk am. d​—Sam 9:10.

JIOVA DE KƆREJ WI

15. Aw prea, Gɔd in Wɔd, ɛn wi kɔmpin Kristian dɛn kin kɔrej wi? (2 Kɔrintians 1:3, 4)

¹⁵ Rid 2 Kɔrintians 1:3, 4. Sɔntɛnde, tin dɛn kin apin to wi we kin mek wi at pwɛl, wɔri, ɔ strɛs. Sɔntɛm, sɔntin de apin to yu rayt naw we de mek yu strɛs ɛn mek yu fil se na yu wangren de. Fɔ se ɛnibɔdi ɔndastand aw yu de fil? Jiova ɔndastand. I nɔ jɔs de fil wi pen, bɔt i de “kɔrej wi ɔltɛm we wi gɛt prɔblɛm.” Aw i de du dat? We wi pre to Jiova ɛn tɛl am ɔl wetin de na wi at, i de gi wi “di pis we Gɔd de gi we mɔtalman nɔ ebul  ɔndastand.” (Fil. 4:6, 7) Wi kin gɛt kɔrej bak we wi rid di tin dɛn we Jiova de tɛl wi insay in Wɔd di Baybul. Jiova de yuz in Wɔd di Baybul fɔ mek wi no aw i rili lɛk wi, i de tich wi fɔ du tin wit sɛns, ɛn i de gi wi op. Wi de gɛt kɔrej bak we wi atɛnd di mitin dɛn usay wi de lan tin dɛn frɔm di Baybul we de ɛnkɔrej wi, ɛn we wi de wit wi brɔda ɛn sista dɛn we lɛk wi.

16. Wetin yu lan frɔm Netan ɛn Prisila dɛn ɛkspiriɛns?

¹⁶ Fɔ sho aw Jiova de yuz in Wɔd fɔ kɔrej wi, lɛ wi tɔk bɔt Netan ɛn Prisila we de na Amɛrika dɛn ɛkspiriɛns. Dɛn bin disayd fɔ go usay dɛn bin nid mɔ pipul dɛn fɔ prich, ɛn lɔng tɛm dɔn pas frɔm we dɛn bin disayd fɔ du dat. Netan tɔk se: “Wi bin biliv se Jiova go mek ɔltin kɔmɔt fayn.” Bɔt afta dɛn bigin dɛn nyu asaynmɛnt, dɛn bin gɛt wɛlbɔdi ɛn mɔni prɔblɛm we dɛn nɔ bin de ɛkspɛkt. As tɛm de go, dɛn bin disayd fɔ go bak usay dɛn kɔmɔt, ɛn dɛn bin stil kɔntinyu fɔ gɛt mɔni prɔblɛm. Netan tɔk se: “A bin de wɔnda wetin mek Gɔd nɔ blɛs wi di we aw wi bin de ɛkspɛkt. A bin ivin bigin fɔ tink if a dɔn du sɔntin we bad.” Bɔt as tɛm de go, Netan ɛn Prisila bin kam fɔ si se Gɔd nɔ bin lɛf dɛn di tɛm we dɛn bin nid ɛp. Netan tɔk se: “Dɛn tɛm dɛn de we tin nɔ bin izi, di Baybul bin tan lɛk padi we gɛt sɛns we bin de gi wi di ɛnkɔrejmɛnt we wi bin nid ɛn gayd wi. Bikɔs wi bin de pe atɛnshɔn to aw Jiova bin ɛp wi fɔ bia da tɛm de we tin nɔ bin izi ɛn nɔ pe atɛnshɔn pan di prɔblɛm, dat bin mek wi gɛt kɔnfidɛns se Jiova go kɔntinyu fɔ ɛp wi tumara bambay.”

17. Wetin bin kɔrej wan sista we nem Ɛlga? (Luk bak di pikchɔ.)

¹⁷ Wi brɔda ɛn sista dɛnsɛf kin kɔrej wi. Aw dɛn kin du dat? Lɛ wi tɔk bɔt wan sista we nem Ɛlga, we de na Ɔngari in ɛkspiriɛns. Fɔ lɔng tɛm, i dɔn gɛt prɔblɛm dɛn we nɔ rili izi we bin de mek i strɛs ɛn fil se i nɔ gɛt valyu. Bɔt we i tink bɔt ɔl dɛn  tɛm dɛn de, i si aw Jiova bin yuz di kɔngrigeshɔn fɔ kɔrej am. I rayt se: “Jiova bin de ɛp mi ɔltɛm we i si se a nɔ gɛt bɛtɛ trɛnk bikɔs ɔf mi wok, we a de kia fɔ mi pikin we nɔ bin wɛl, ɛn ɔda prɔblɛm dɛn. No de nɔ de insay di 30 ia we dɔn pas we Jiova nɔ kip in prɔmis fɔ kɔrej mi. Bɔku tɛm, i de yuz di fayn wɔd dɛn we ɔda pipul dɛn de tɔk fɔ kɔrej mi. Bɔku tɛm, dɛn kin sɛn mɛsej, kad, ɔ tɛl mi tɛnki di rayt tɛm.”

18. Aw wi go kɔrej ɔda pipul dɛn?

¹⁸ Wi gɛt di ɔnɔ fɔ falamakata wi Gɔd bay we wi de kɔrej ɔda pipul dɛn. Aw wi go ebul du dat? Wi kin peshɛnt lisin to dɛn, tɔk fayn to dɛn, ɛn du tin dɛn fɔ ɛp dɛn. (Prɔv. 3:27) Wi de tray fɔ kɔrej ɔl di wan dɛn we de sɔfa, ivin di wan dɛn we nɔ bigin sav Gɔd yet. We wi neba dɛn sik, gɛt bɛrin, ɔ wɔri, wi kin go fɛn dɛn, lisin to dɛn, ɛn yuz di Baybul fɔ ɛnkɔrej dɛn. We wi de falamakata Jiova we na “di Gɔd we de kɔrej pɔsin pan ɔltin,” wi nɔ jɔs de ɛp wi kɔmpin Kristian dɛn fɔ bia wit dɛn prɔblɛm dɛn, bɔt sɔntɛm wi go ɛp bak di wan dɛn we nɔ de sav Gɔd fɔ want fɔ lan bɔt am.​—Mat. 5:16.

JIOVA DE ƐP WI ƆLTƐM

19. Wetin Jiova de du fɔ wi? Aw wi go falamakata am?

¹⁹ Jiova rili bisin bɔt ɔl di wan dɛn we lɛk am. I nɔ de lɛf wi di tɛm dɛn we wi gɛt prɔblɛm. Jɔs lɛk mama ɔ papa we rili bisin bɔt in pikin, na so Jiova bisin bɔt in fetful savant dɛn. I de gayd wi, gi wi di tin dɛn we wi nid, protɛkt wi, ɛn kɔrej wi. Wi go falamakata wi Papa we de na ɛvin we lɛk wi we wi sɔpɔt ɛn ɛnkɔrej ɔda pipul dɛn we dɛn gɛt prɔblɛm. Pan ɔl we wi go gɛt prɔblɛm dɛn ɛn tin dɛn go apin we go mek wi at pwɛl, wi gɛt kɔnfidɛns se Jiova de wit wi. Afta ɔl, i dɔn prɔmis wi se: “Nɔ fred, bikɔs a de wit yu.” (Ayz. 41:10) Dis de rili gi wi kɔnfidɛns! Fɔ tru, wi nɔ ɛva de wi wangren.