1. Wetin kin mek wi rili gladi?

 JIOVA want wi fɔ gladi. Wi no dat bikɔs gladi-at na wan pan di kwaliti dɛn we in oli spirit de mek pɔsin gɛt. (Gal. 5:​22) Bikɔs we pɔsin gi i de gladi mɔ pas we dɛn gi am, wi kin rili gladi we wi de du wi bɛst na di prichin wok ɛn we wi de ɛp wi brɔda ɛn sista dɛn difrɛn we dɛn.—Akt 20:​35.

2-3. (a) Akɔdin to Galeshians 6:​4, us tu tin dɛn go ɛp wi fɔ kɔntinyu fɔ sav Jiova wit gladi-at? (b) Wetin wi go tɔk bɔt insay dis atikul?

² Akɔdin to Galeshians 6:​4, apɔsul Pɔl tɔk bɔt tu tin dɛn we go ɛp wi fɔ kɔntinyu fɔ gɛt gladi-at. (Rid.) Fɔs, wi gol fɔ bi fɔ gi Jiova wi bɛst. Wi fɔ gladi if wi de gi Jiova wi bɛst. (Mat. 22:​36-38) Sɛkɔn, wi fɔ avɔyd fɔ kɔmpia wisɛf wit ɔda pipul dɛn. I nɔ mata wetin wi ebul fɔ du bikɔs ɔf wi wɛlbɔdi, wi talɛnt, ɔ di trenin we wi dɔn gɛt, wi fɔ tɛl Jiova tɛnki. Afta ɔl, na in gi wi ɔl wetin wi gɛt. Bɔt if ɔda pipul dɛn de du mɔ pas wi na di prichin wok, wi fɔ gladi bikɔs dɛn de yuz dɛn talɛnt fɔ prez Jiova, nɔto fɔ lɛ dɛn go bifo ɔ put wetin dɛn want bifo. So bifo wi mek kɔmpitishɔn wit dɛn, wi fɔ lan frɔm dɛn.

³ Insay dis atikul, wi go si wetin go ɛp wi we wi at pwɛl bikɔs wi nɔ ebul du ɔl wetin wi want fɔ du fɔ Jiova. Wi go tɔk bak bɔt aw wi go yuz ɛni gift we wi gɛt di bɛst we ɛn wetin wi kin lan frɔm ɔda pipul dɛn ɛgzampul.

4. Wetin kin apin we kin mek wi at pwɛl? Gi wan ɛgzampul.

⁴ Sɔm pan wi nɔ ebul du ɔl wetin wi want fɔ du fɔ Jiova bikɔs wi dɔn de ol ɔ bikɔs wi gɛt wɛlbɔdi  prɔblɛm, ɛn dis kin mek wi at pwɛl. Na dat bin apin to Karɔl. Fɔs, i bin gɛt di chans fɔ prich usay dɛn bin nid mɔ pipul dɛn. Insay da tɛm de, i bin kɔndɔkt 35 Baybul stɔdi dɛn ɛn ɛp bɔku pan dɛn fɔ gi dɛn layf to Jiova ɛn baptayz. Karɔl bin de rili du wɛl pan in prichin wok. Bɔt i bin kam gɛt wɛlbɔdi prɔblɛm, ɛn bɔku tɛm i bin de de na os. Karɔl se, “A no se na bikɔs a gɛt wɛlbɔdi prɔblɛm na in mek a nɔ ebul fɔ du wetin ɔda pipul dɛn ebul fɔ du, bɔt a kin fil se a nɔ fetful lɛk dɛn. A nɔ ebul fɔ du ɔl wetin a want fɔ du, ɛn dis kin mek mi at pwɛl.” Karɔl want fɔ du ɔl wetin i ebul fɔ Jiova. Dat na sɔntin we rili fayn! Wi shɔ se wi Gɔd we gɛt sɔri-at gladi bikɔs i de du in bɛst.

5. (a) Wetin wi fɔ mɛmba if wi de fil bad bikɔs ɔf wetin wi nɔ ebul fɔ du? (b) As yu de si na di pikchɔ dɛn, aw di brɔda de kɔntinyu fɔ gi in bɛst na Jiova in savis?

⁵ If sɔntɛnde yu de fil bad bikɔs ɔf di tin dɛn we yu nɔ ebul fɔ du, aks yusɛf, ‘Wetin Jiova want mi fɔ du?’ Jiova want yu fɔ du yu bɛst we yu ebul fɔ du rayt naw. Tink bɔt dis ɛgzampul: Wan sista we ol 80 ia kin fil bad bikɔs i nɔ ebul fɔ du bɛtɛ na di prichin wok lɛk aw i bin de du we i ol 40 ia. I de tink se pan ɔl we i de gi in bɛst, dat nɔ de mek Jiova gladi. Bɔt na so i bi? Tink bɔt dis. If dis sista bin de gi in bɛst we i bin ol 40 ia, ɛn i stil de gi in bɛst we i ol 80 ia, dat min se i nɔ ɛva stɔp fɔ gi in bɛst. If wi bigin fɔ fil se di we aw wi de sav Jiova nɔ de mek i gladi, wi nid fɔ mɛmba se na Jiova na di wan we de sho wetin de mek i gladi. If wi du wi bɛst, i tan lɛk Jiova go tɛl wi se: “Yu dɔn du wɛl!”—Luk Matyu 25:​20-23.

6. Wetin wi kin lan frɔm Maria in ɛgzampul?

⁶ I go izi fɔ mek wi gɛt gladi-at we wi pe atɛnshɔn pan wetin wi ebul fɔ du, pas fɔ pe atɛnshɔn pan wetin wi nɔ ebul fɔ du. Tink bɔt di ɛgzampul bɔt wan sista we nem Maria, we gɛt sik we de mek i nɔ ebul fɔ du bɛtɛ na di prichin wok. Fɔs, in at bin rili pwɛl ɛn i bin de fil se i nɔ gɛt yus. Bɔt i notis wan sista na in kɔngrigeshɔn we nɔ bin ebul kɔmɔt na bed, ɛn i bin disayd fɔ ɛp am. Maria tɔk se, “A mek arenjmɛnt fɔ prich wit am bay tɛlifon ɛn bay lɛta. Ɛnitɛm we wi wok togɛda, we a kam na os, a kin gladi ɛn a kin satisfay bikɔs a ebul fɔ ɛp mi sista.” Wisɛf kin gɛt mɔ gladi-at we wi pe atɛnshɔn pan wetin wi ebul fɔ du, pas pan wetin wi nɔ ebul fɔ du. Bɔt wetin wi go du if wi ebul du mɔ ɔ wi ebul fɔ du wɛl na sɔm eria dɛn na Jiova in savis?

7. Us fayn advays apɔsul Pita bin gi Kristian dɛn?

⁷ Insay apɔsul Pita in fɔs lɛta, i bin tɛl in brɔda dɛn fɔ yuz ɛni gift ɛn talɛnt we dɛn gɛt fɔ ɛnkɔrej dɛn brɔda ɛn sista dɛn. Pita bin rayt se: “Jɔs lɛk we una ɔl dɔn gɛt gift, una yuz am fɔ wok fɔ una kɔmpin dɛn bikɔs una na fayn savant dɛn fɔ Gɔd in spɛshal gudnɛs.” (1 Pit. 4:​10) Wi fɔ du wi bɛst fɔ yuz wetin wi ebul fɔ du ɛn nɔ wɔri se ɔda pipul dɛn go jɛlɔs ɔ fil bad. If wi du dat, wi nɔ go gi Jiova wi bɛst.

8. Akɔdin to 1 Kɔrintians 4:​6, 7, wetin mek wi fɔ avɔyd fɔ bost bɔt wi gift dɛn?

 ⁸ Wi nid fɔ yuz wi gift dɛn di bɛst we, bɔt wi fɔ tek tɛm mek wi nɔ bost bɔt dɛn. (Rid 1 Kɔrintians 4:​6, 7.) Fɔ ɛgzampul, sɔntɛm yu rili sabi aw fɔ stat Baybul stɔdi. Yu fɔ yuz da gift de! Bɔt na wan tin fɔ yuz di gift ɛn na ɔda tin fɔ bost bɔt am. Lɛ wi se dɛn biɛn tɛm ya yu gɛt fayn ɛkspiriɛns na di prichin wok we mek yu stat wan Baybul stɔdi. Yu rili want fɔ tɛl yu fil savis grup bɔt am. Bɔt we una de togɛda, wan sista de tɔk bɔt in yon ɛkspiriɛns we i leta ebul fɔ gi wan magazin. I gi wan magazin; yu stat Baybul stɔdi. Wetin yu go du? Yu no se yu ɛkspiriɛns go ɛnkɔrej ɔlman na di grup, bɔt sɔntɛm yu disayd fɔ wet fɔ ɔda tɛm we yu go ebul fɔ tɔk bɔt yu ɛkspiriɛns, so dat yu nɔ go mek yu sista we bin gi wan magazin fil bad. Na fayn tin fɔ du. Bɔt dat nɔ min se yu fɔ stɔp fɔ de tray fɔ gɛt Baybul stɔdi dɛn. Yu gɛt gift, yuz am!

9. Aw wi fɔ yuz wi gift?

⁹ Lɛ wi mɛmba se ɛnitin we wi sabi fɔ du na gift frɔm Gɔd. Wi fɔ yuz dɛn gift dɛn de fɔ ɛp di kɔngrigeshɔn, nɔto fɔ mek pipul dɛn pe atɛnshɔn to wi. (Fil. 2:​3) We wi yuz wi trɛnk ɛn wetin wi sabi fɔ du wetin Gɔd want, wi go gɛt rizin fɔ gladi, nɔto bikɔs wi sabi fɔ du tin pas ɔda pipul dɛn ɔ bikɔs wi impɔtant pas ɔda pipul dɛn, bɔt na bikɔs wi de yuz wi gift fɔ prez Jiova.

10. Wetin mek i nɔ fayn fɔ kɔmpia wisɛf wit ɔda pipul dɛn?

¹⁰ If wi nɔ tek tɛm, sɔntɛm wi go bigin fɔ kɔmpia wetin wi sabi du wit wetin ɔda pɔsin nɔ sabi du. Fɔ ɛgzampul, i go bi se wan brɔda kin gi fayn pɔblik tɔk dɛn. Na dat i sabi fɔ du. Bɔt sɔntɛm i go de tink se i bɛtɛ pas ɔda brɔda we nɔ sabi gi tɔk. Bɔt i go bi se da brɔda de rili sabi fɔ du gud to ɔda pipul dɛn, fɔ tren in pikin dɛn, ɔ fɔ du di prichin wok wit zil. Wi rili gladi fɔ gɛt bɔku brɔda ɛn sista dɛn we gɛt talɛnt, we de yuz dɛn gift fɔ sav Jiova ɛn ɛp ɔda pipul dɛn.

11. Wetin mek wi fɔ tray fɔ fala Jizɔs in ɛgzampul?

¹¹ Pan ɔl we wi fɔ avɔyd fɔ kɔmpia wisɛf wit ɔda pipul dɛn, wi go bɛnifit we  wi lan frɔm fetful wan dɛn ɛgzampul. Fɔ ɛgzampul, lɛ wi tɔk bɔt Jizɔs. Pan ɔl we i bin pafɛkt, wi kin lan frɔm in fayn kwaliti dɛn ɛn di we dɛn aw i bin de du tin. (1 Pit. 2:​21) We wi du wi bɛst fɔ fala in ɛgzampul gud gud wan, wi go ebul fɔ sav Jiova gud gud wan ɛn du mɔ na wi prichin wok.

12-13. Wetin wi kin lan frɔm Kiŋ Devid?

¹² Insay Gɔd in Wɔd, wi go fɛn bɔku ɛgzampul dɛn bɔt fetful man ɛn uman dɛn we wi go ebul fɔ falamakata, pan ɔl we dɛn nɔ bin pafɛkt. (Ibru. 6:​12) Tink bɔt Kiŋ Devid, we Jiova bin kɔl “man we de mek mi at gladi.” (Akt 13:​22) Bɔt Devid nɔ bin pafɛkt. Infakt, i bin mek siriɔs mistek dɛn. Pan ɔl dat, in na gud ɛgzampul we wi fɔ falamakata. Wetin mek? Na bikɔs we dɛn bin kɔrɛkt am, i nɔ bin tray fɔ gi ɛkskyuz. Bifo dat, i bin gri fɔ tek di advays, ɛn i bin rili fil bad fɔ wetin i bin du. So dat bin mek Jiova fɔgiv am.—Sam 51:​3, 4, 10-12.

¹³ Wi kin lan frɔm Devid bay we wi aks wisɛf: ‘Wetin a kin du we dɛn advays mi? A kin kwik fɔ gri se a dɔn mek mistek, ɔ a kin tray fɔ gi ɛkskyuz? A kin kwik fɔ blem ɔda pipul dɛn? A kin tray tranga wan nɔ fɔ ripit mi mistek dɛn we a bin dɔn mek?’ Yu kin aks yusɛf dɛn kayn kwɛstyɔn dɛn ya we yu de rid bɔt ɔda fetful man ɛn uman dɛn na di Baybul. Yu de gɛt prɔblɛm dɛn we dɛn bin de gɛt? Us fayn kwaliti dɛn, dɛn bin gɛt? We yu de rid bɔt ɛniwan pan dɛn, i fayn fɔ aks yusɛf: ‘Aw a go bi lɛk Jiova dis in fetful savant?’

14. Aw wi go bɛnifit we wi tek tɛm luk aw wi brɔda ɛn sista dɛn de du tin?

¹⁴ Wi go bɛnifit bak we wi tek tɛm luk aw wi kɔmpin Kristian dɛn de du tin, ilɛk dɛn yɔŋ ɔ ol. Fɔ ɛgzampul, yu ebul tink bɔt pɔsin na yu kɔngrigeshɔn we de bia prɔblɛm dɛn fetful wan? Sɔntɛm in kɔmpin dɛn de prɛzhɔ am, in famili de agens am, ɔ i nɔ gɛt bɛtɛ wɛlbɔdi. Yu ebul fɔ si dis pɔsin in fayn kwaliti dɛn we yu go lɛk fɔ falamakata? We yu tink bɔt in fayn ɛgzampul, sɔntɛm yu go lan fayn we dɛn fɔ bia yu yon prɔblɛm dɛn. Wi rili gladi bikɔs dɛn brɔda ɛn sista dɛn ya na fayn  ɛgzampul dɛn we wi kin ebul fɔ falamakata.—Ibru. 13:​7; Jems 1:​2, 3.

15. Us advays apɔsul Pɔl bin gi we go ɛp wi fɔ kɔntinyu fɔ gladi we wi de sav Jiova?

¹⁵ Fɔ mek pis ɛn wanwɔd go de na di kɔngrigeshɔn, ɔlman nid fɔ gi in bɛst. Lɛ wi tɔk bɔt di ɛgzampul bɔt di fɔstɛm Kristian dɛn. Dɛn bin gɛt difrɛn difrɛn gift ɛn wok dɛn. (1 Kɔr. 12:​4, 7-11) Bɔt dis nɔ bin mek dɛn bin mek kɔmpitishɔn ɔ fɛt wit dɛn kɔmpin dɛn. Bɔt Pɔl bin ɛnkɔrej dɛn ɔl fɔ du wetin dɛn ebul “fɔ ɛp Krays in bɔdi fɔ tinap tranga wan.” Pɔl bin rayt to di Kristian dɛn na Ɛfisɔs se: “We ɔl di pat dɛn de wok fayn, dis de ɛp di bɔdi fɔ gro ɛn tinap tranga wan ɛn gɛt lɔv.” (Ɛfi. 4:​1-3, 11, 12, 16) Di wan dɛn we bin du wetin Pɔl se bin ɛp fɔ mek pis ɛn wanwɔd kɔntinyu fɔ de na di kɔngrigeshɔn, ɛn na dat wi de si na wi kɔngrigeshɔn dɛn tide.

16. Wetin wi fɔ mekɔp wi maynd fɔ du? (Ibruz 6:​10)

¹⁶ Mekɔp yu maynd fɔ avɔyd fɔ kɔmpia yusɛf wit ɔda pipul dɛn. Bifo dat, lan frɔm Jizɔs, ɛn tray tranga wan fɔ falamakata in kwaliti dɛn. Bɛnifit frɔm ɛgzampul dɛn we de na di Baybul ɛn insay wi yon tɛm bɔt pipul dɛn we gɛt strɔng fet. As yu de kɔntinyu fɔ du yu bɛst, gɛt kɔnfidɛns se Jiova “nɔ de du wetin nɔ rayt, so i nɔ go fɔgɛt [yu] wok.” (Rid Ibruz 6:​10.) Kɔntinyu fɔ gɛt gladi-at we yu de sav Jiova ɛn no se i gladi we i de si yu de du yu bɛst fɔ mek i gladi.