WƆRI kin tan lɛk ebi lod na wi at. (Prɔv. 12:​25) Yu dɔn ɛva sɔfa bikɔs yu de wɔri pasmak? Yu dɔn ɛva fil se yu nɔ go ebul bia igen? If na so i bi, nɔto yu wan dis dɔn apin to. Sɔntɛm bɔku pan wi de kia fɔ pɔsin we sik na wi famili, pɔsin we wi lɛk dɔn day, ɛn sɔm pan wi de sɔfa bikɔs ɔf nachɔral dizasta ɔ ɔda prɔblɛm dɛn we kin rili afɛkt wi we de mek wi taya, wɔri, ɛn gɛt pwɛlat. Bɔt wetin go ɛp wi fɔ gɛt pis ɛn gladi-at we wi de wɔri? a

Wi go lan bɔku tin bɔt aw fɔ gɛt pis ɛn gladi-at we wi de wɔri bay we wi tink bɔt Kiŋ Devid in ɛgzampul. I bin gɛt bɔku prɔblɛm dɛn na in layf, ɛn sɔntɛnde in layf bin ivin de pan denja. (1 Sam. 17:​34, 35; 18:​10, 11) Wetin bin ɛp Devid fɔ gɛt pis ɛn gladi-at we i bin de wɔri? Aw wi go falamakata in ɛgzampul?

Devid bin gɛt bɔku prɔblɛm dɛn di sem tɛm. Fɔ ɛgzampul, tink bɔt wetin bin apin we i bin de rɔnawe pan Kiŋ Sɔl we bin de tray fɔ kil am. We Devid ɛn in man dɛn kam bak na Ziklag, dɛn si se dɛn ɛnimi dɛn dɔn tif dɛn prɔpati dɛn, bɔn dɛn os dɛn, ɛn dɛn dɔn kapchɔ dɛn famili dɛn. Wetin Devid bin du? “Nɔto kɔmɔn kray Devid ɛn in man dɛn kray. Na so dɛn de ala te dɛn bɛlful ɛn nɔ ebul kray igen.” Devid in at bin pwɛl mɔ bikɔs in yon man dɛn we i bin abop pan bin de “tɔk bɔt fɔ ston am.” (1 Sam. 30:​1-6) Devid bin gɛt tri big prɔblɛm dɛn di sem tɛm: In famili bin de pan denja, in man dɛn bin want fɔ kil am, ɛn Kiŋ Sɔl bin stil de rɔnata am. Imajin aw Devid bin de wɔri!

Wetin na di nɛks tin we Devid bin du? Wantɛm wantɛm, Devid “luk ɔp to PAPA GƆD [“Jiova,” NWT] we nain PAPA GƆD.” Aw Devid go dɔn du dis? Wi no se Devid bin dɔn yus fɔ pre to Jiova fɔ ɛp am ɛn fɔ tink bɔt aw I bin dɔn ɛp am trade. (1 Sam. 17:​37; Sam 18:​2, 6) Devid bin si se i nid fɔ aks Jiova wetin fɔ du, so i bin du dat. Afta Jiova dɔn tɛl Devid wetin fɔ du, Devid bin du sɔntin wantɛm wantɛm. So dat bin mek Jiova blɛs Devid ɛn in man dɛn, ɛn dɛn bin ebul fri dɛn famili dɛn ɛn tek dɛn prɔpati dɛn bak. (1 Sam. 30:​7-9, 18, 19) Yu notis di tri tin dɛn we Devid bin du? I bin pre fɔ mek Jiova ɛp am, i tink bɔt aw Jiova bin dɔn ɛp am trade, ɛn i du wetin Jiova tɛl am. Aw wi go falamakata Devid? Lɛ wi tɔk bɔt tri we dɛn.

1. Pre. Ɛnitɛm we wi stat fɔ wɔri, wi kin pre to Jiova fɔ ɛp wi ɛn gi wi sɛns. Wi go fil fayn we wi tɛl Jiova bɔt ɔl di tin dɛn we de mek wi wɔri. Ɔ wi kin pre shɔt wan na wi at if na dat nɔmɔ wi ebul fɔ du da tɛm de. Ɛnitɛm wi aks Jiova fɔ ɛp wi, wi de sho se wi biliv Jiova lɛk aw Devid bin biliv am we i tɔk se: “Yu na di wan we de kɔba mi, we a de to yu a de fil sef. Yu dɔn sev mi frɔm mi ɛnimi dɛn an, na yu na mi bakbon.” (Sam 18:​2) Yu tink se prea kin  rili ɛp? Wan payɔnia sista we nem Kalia tɔk se: “Afta a dɔn pre, a kin gɛt kolat. Prea kin ɛp mi fɔ tink mɔ lɛk aw Jiova de tink, ɛn fɔ abop pan am mɔ ɛn mɔ.” Fɔ tru, prea na pawaful gift we Jiova dɔn gi wi we de ɛp wi fɔ gɛt pis ɛn gladi-at we wi de wɔri.

2. Tink bɔt aw Jiova dɔn ɛp yu. We yu tink bɔt wetin dɔn apin to yu, yu ebul fɔ tink bɔt prɔblɛm dɛn we yu bin ebul fɔ bia bikɔs na Jiova nɔmɔ ɛp yu? We wi tink bɔt aw Jiova dɔn ɛp wi ɛn in savant dɛn trade, wi de gɛt kolat ɛn abop pan Jiova mɔ ɛn mɔ. (Sam 18:​17-19) Wan ɛlda we nem Jɔshwa tɔk se: “A gɛt wan list usay a rayt prea dɛn we Jiova dɔn ansa. Dis dɔn ɛp mi fɔ mɛmba di tɛm dɛn we a aks Jiova fɔ patikyula tin dɛn ɛn i gi mi jɔs wetin a bin nid.” Fɔ tru, we wi tink bɔt wetin Jiova dɔn ɔlrɛdi du fɔ wi, i go gi wi di trɛnk we wi nid fɔ mek wi stɔp fɔ wɔri.

3. Du sɔntin. Bifo wi disayd fɔ du sɔntin, wi fɔ luk na Gɔd in Wɔd fɔ advays we wi go abop pan. (Sam 19:​7, 11) Bɔku pipul dɛn dɔn kam fɔ si se we dɛn du risach bɔt wan patikyula skripchɔ, i kin ɛp dɛn fɔ ɔndastand aw da vas de aplay na dɛn layf. Wan ɛlda we nem Jarɔd ɛksplen se: “We a de du risach, dat kin ɛp mi fɔ lan mɔ bɔt di vas ɛn ɔndastand wetin Jiova de tɛl mi. Dis kin ɛp mi fɔ rili biliv wetin a de rid so dat a go ebul fɔ fala di advays.” We wi luk fɔ Jiova in advays frɔm di Baybul ɛn fala di dayrɛkshɔn we i de gi wi, wi go ebul fɔ gɛt pis ɛn gladi-at we wi de wɔri.

Devid bin no se fɔ mek i ebul gɛt pis ɛn gladi-at we i de wɔri, i go nid Jiova fɔ ɛp am. Devid bin rili gladi fɔ di ɛp we Jiova bin de ɛp am, na dat mek i bin tɔk se: “A go ivin ebul fɔ klem ay wɔl . . . bikɔs [Gɔd] de wit mi. In na PAPA GƆD we de gi mi trɛnk fɔ du ɔlkayn tin.” (Sam 18:​29, 32) Sɔntɛm wi go fil se i nɔ pɔsibul fɔ mek wi sɔlv ɔ bia wi prɔblɛm dɛn. Bɔt wit Jiova in ɛp, wi go ebul fɔ bia ɛni siriɔs prɔblɛm dɛn! Fɔ tru, we wi pre to Jiova fɔ ɛp wi, tink gud wan bɔt wetin i dɔn du fɔ wi, ɛn fala in advays, wi go gɛt kɔnfidɛns se i go gi wi di trɛnk ɛn sɛns we wi nid fɔ gɛt pis ɛn gladi-at we wi de wɔri!