1. Aw yu go gɛt tayt padi biznɛs wit sɔmbɔdi?

 BƆKU tɛm, di fɔs tin we pɔsin fɔ du fɔ gɛt tayt padi biznɛs wit sɔmbɔdi, na we i spɛn tɛm wit da pɔsin de. We una de tɔk to unasɛf bɔt wetin una tink ɛn aw una de fil, una ɔltu go kam fɔ bi padi. Bɔt sɔntɛnde, i nɔ kin izi fɔ gɛt tayt padi biznɛs wit Jizɔs. Wetin mek wi se so?

2. Wetin na di fɔs tin we mek i nɔ izi fɔ bi Jizɔs in padi?

² Di fɔs tin we mek i nɔ izi na dat, wi nɔ wande si Jizɔs fes-to-fes. Bɔku Kristian dɛn we bin de insay di apɔsul dɛn tɛm bin gɛt di sem prɔblɛm. Bɔt di apɔsul Pita bin tɔk se: “Pan ɔl we una nɔ si Jizɔs yet, una lɛk am. Pan ɔl we una nɔ de si am naw, una biliv pan am.” (1 Pit. 1:​8) So i pɔsibul fɔ mek wi gɛt tayt padi biznɛs wit Jizɔs pan ɔl we wi nɔ wande si am.

3. Wetin na di sɛkɔn tin we mek i nɔ izi fɔ bi Jizɔs in padi?

³ Di sɛkɔn tin we mek i nɔ izi na dat, wi nɔ ebul fɔ tɔk to Jizɔs. We wi de pre, wi de tɔk to Jiova. Na tru se wi de yuz Jizɔs in nem we wi de pre, bɔt wi nɔ de tɔk to am. Infakt, Jizɔs nɔ want wi fɔ pre to am. Wetin mek? Na bikɔs prea de pat pan wi wɔship ɛn na Jiova nɔmɔ wi fɔ wɔship. (Mat. 4:​10) Bɔt wi kin stil sho se wi lɛk Jizɔs.

4. Wetin na di tɔd tin we mek i nɔ izi fɔ bi Jizɔs in padi? Wetin wi go tɔk bɔt insay dis atikul?

 ⁴ Di tɔd tin we mek i nɔ izi na dat, Jizɔs de na ɛvin, so wi nɔ go ebul fɔ spɛn tɛm wit am. Bɔt wi go stil ebul fɔ no bɔku tin dɛn bɔt am pan ɔl we wi nɔ de nia am. Wi go tɔk bɔt 4 tin dɛn we wi go du we go mek wi gɛt tayt padi biznɛs wit am. Fɔs, lɛ wi tɔk bɔt wetin mek i impɔtant fɔ gɛt tayt padi biznɛs wit Krays.

5. Wetin mek wi fɔ bi Jizɔs in padi? (Luk di bɔks dɛn we gɛt di taytul “ We Wi Bi Padi to Jizɔs, Wi Go Bi Padi to Jiova” ɛn “ Wetin Na di Rayt We fɔ Tink bɔt Jizɔs in Wok.”)

⁵ Wi fɔ bi padi to Jizɔs if wi want fɔ gɛt tayt padi biznɛs wit Jiova. Wetin mek wi se so? Lɛ wi tɔk bɔt tu rizin dɛn. Fɔs, Jizɔs bin tɛl in disaypul dɛn se: “Mi Papa insɛf lɛk una . . . bikɔs una lɛk mi.” (Jɔn 16:​27) I bin tɔk bak se: “Nɔbɔdi nɔ go kam to mi Papa pas di pɔsin pas tru mi.” (Jɔn 14:​6) If wi tray fɔ bi padi to Jiova pan ɔl we wi nɔ gɛt tayt padi biznɛs wit Jizɔs, i jɔs tan lɛk se wi de tray fɔ go insay wan os bɔt wi nɔ want fɔ pas na di domɔt. Jizɔs bin yuz di sem ɛgzampul we i bin kɔl insɛf “di domɔt fɔ di ship dɛn.” (Jɔn 10:​7, NWT) Di sɛkɔn rizin na dat Jizɔs de rili falamakata in Papa in kwaliti dɛn. Jizɔs bin tɛl in disaypul dɛn se: “Ɛnibɔdi we dɔn si mi, dɔn si mi Papa.” (Jɔn 14:​9) So wan impɔtant we we wi go kam fɔ no Jiova na bay we wi lan bɔt Jizɔs. Di mɔ we wi de lan bɔt Jizɔs na di mɔ wi go lɛk am. Ɛn di mɔ we wi de lɛk Jizɔs na di mɔ wi de lɛk in Papa.

6. Wetin na wan ɔda rizin we mek wi fɔ gɛt tayt padi biznɛs wit Jizɔs? Ɛksplen.

 ⁶ Wi fɔ gɛt tayt padi biznɛs wit Jizɔs fɔ mek Jiova ansa wi prea dɛn. Dis min se we wi de pre, i nɔ jɔs du fɔ se “in Jizɔs nem.” Wi nid fɔ ɔndastand aw Jiova de yuz Jizɔs fɔ ansa wi prea dɛn. Jizɔs bin tɛl di apɔsul dɛn se: “If una tek mi nem pre fɔ ɛnitin, a go du di tin we una want.” (Jɔn 14:​13) Pan ɔl we Jiova na di wan we de yɛri ɛn ansa wi prea dɛn, i dɔn gi Jizɔs di pawa fɔ du wetin I dɔn disayd fɔ du. (Mat. 28:​18). So bifo Jiova ansa wi prea dɛn, i de chɛk fɔs if wi dɔn fala di advays we Jizɔs bin gi. Fɔ ɛgzampul, Jizɔs bin se: “If una padin ɔda pipul fɔ di bad we dɛn du una, una Papa we de na ɛvin insɛf go padin una. Bɔt if una nɔ padin ɔda pipul, una Papa we de na ɛvin insɛf nɔ go padin una fɔ di bad we una dɔn du.” (Mat. 6:​14, 15) So i impɔtant fɔ mek wi trit ɔda pipul dɛn di sem we aw Jiova ɛn Jizɔs de trit wi.

7. Udat dɛn go bɛnifit frɔm di day we Jizɔs day?

⁷ Na di wan dɛn nɔmɔ we gɛt tayt padi biznɛs wit Jizɔs na dɛn go bɛnifit frɔm di day we Jizɔs day. Aw wi kam fɔ no dis? Jizɔs bin se i go “day fɔ in padi” dɛn. (Jɔn 15:​13) Di fetful pipul dɛn we bin de sav Jiova ɛn liv bifo Jizɔs kam na di wɔl, go nid fɔ lan bɔt am ɛn lɛk am. Sɔm pan dɛn man ɛn uman dɛn ya na Ebraam, Sera, Mozis, ɛn Reab. Dɛn go gɛt layf bak, bɔt ivin dɛnsɛf go nid fɔ bi padi wit Jizɔs fɔ mek dɛn go gɛt layf we go de sote go.—Jɔn 17:​3; Akt 24:​15; Ibru 11:​8-12, 24-26, 31.

8-9. Frɔm wetin de na Jɔn 15:​4, 5, (NWT), wetin wi go ebul fɔ du if wi bi Jizɔs in padi? Wetin mek dat impɔtant?

⁸ Wi kin gladi we wi de wok wit Jizɔs fɔ prich ɛn tich di gud nyuz bɔt di Kiŋdɔm. Jizɔs na bin ticha we i bin de na di wɔl. Ɛn frɔm di tɛm we i go bak na ɛvin, na in de oba di kɔngrigeshɔn, ɛn i de kɔntinyu fɔ dayrɛkt di prichin ɛn tichin wok. I de si ɛn i valyu ɔl wetin wi de du fɔ ɛp bɔku pipul dɛn fɔ kam fɔ no bɔt in ɛn in Papa. Infakt, di wangren we we wi go ebul fɔ du dis wok na we Jiova ɛn Jizɔs ɛp wi.—Rid Jɔn 15:​4, 5, NWT.

⁹ Gɔd in Wɔd tich wi klia wan se wi fɔ kɔntinyu fɔ lɛk Jizɔs fɔ mek Jiova gladi. So lɛ wi tɔk bɔt 4 tin dɛn we wi go du fɔ mek wi bi Jizɔs in padi dɛn.

10. Wetin na di fɔs tin we wi go du fɔ gɛt tayt padi biznɛs wit Jizɔs?

¹⁰ (1) Tray fɔ no Jizɔs. Wi go ebul fɔ du dis bay we wi de rid di Baybul buk dɛn we nem Matyu, Mak, Lyuk, ɛn Jɔn. As wi de tink gud wan bɔt dɛn Baybul buk dɛn ya we tɔk bɔt Jizɔs in layf, wi go kam fɔ lɛk ɛn rɛspɛkt Jizɔs fɔ di kayn we aw i bin de trit pipul dɛn. Fɔ ɛgzampul, pan ɔl we in na bin dɛn Masta, i nɔ bin trit in disaypul dɛn as slev dɛn. Bifo dat, i bin de tɛl dɛn wetin i bin de tink ɛn aw i bin de fil. (Jɔn 15:​15) We dɛn nɔ bin gladi, Jizɔs insɛf nɔ bin gladi. (Jɔn 11:​32-36) Ivin di wan dɛn we nɔ bin lɛk Jizɔs, bin kam fɔ no se in na bin padi to di wan dɛn we bin de lisin to in mɛsej. (Mat. 11:​19) We wi falamakata di kayn we aw Jizɔs bin trit  in disaypul dɛn, wi padi biznɛs wit ɔda pipul dɛn go go bifo, wi go gladi mɔ, ɛn wi go kam fɔ lɛk ɛn rɛspɛkt Jizɔs mɔ.

11. Wetin na di sɛkɔn tin we wi fɔ du fɔ bi Jizɔs in padi? Wetin mek i impɔtant?

¹¹ (2) Falamakata di we aw Jizɔs de tink ɛn du tin. Di mɔ we wi no ɛn falamakata di we aw Jizɔs de tink, na di mɔ wi go gɛt tayt padi biznɛs wit am. (1 Kɔr. 2:​16) Aw wi go falamakata Jizɔs? Tink bɔt wan ɛgzampul. Jizɔs bin de tink mɔ fɔ ɛp ɔda pipul dɛn pas fɔ du tin fɔ insɛf. (Mat. 20:​28; Rom 15:​1-3) Bikɔs i bin de tink da we de, i bin de fɔgiv ɛn i nɔ bin jɔs bisin bɔt insɛf. I nɔ bin de vɛks kwik we pipul dɛn bin de tɔk bad bɔt am. (Jɔn 1:​46, 47) Ɛn i nɔ bin de alaw di mistek we ɔda pipul dɛn bin dɔn du trade fɔ afɛkt di we aw i de trit dɛn. (1 Tim. 1:​12-14) Jizɔs bin se: “If una lɛk una kɔmpin, ɔlman go no se una na mi lanin bɔy dɛn.” (Jɔn 13:​35) Aks yusɛf dis kwɛstyɔn, “A de fala Jizɔs in ɛgzampul bay we a de du ɔl wetin a ebul fɔ kɔntinyu fɔ gɛt pis wit mi brɔda ɛn sista dɛn?”

12. Wetin na di tɔd tin we wi fɔ du fɔ bi Jizɔs in padi? Aw wi go du dat?

¹² (3) Sɔpɔt Krays in brɔda dɛn. We wi du ɛnitin fɔ Jizɔs in anɔyntɛd brɔda dɛn, i de si am se na in wi de du am fɔ. (Mat. 25:​34-40) Di men we aw wi go sɔpɔt di anɔyntɛd dɛn, na bay we wi de prich bɔt di Kiŋdɔm ɛn mek disaypul dɛn lɛk aw Jizɔs bin tɛl wi fɔ du. (Mat. 28:​19, 20; Akt 10:​42) Na di “ɔda ship” dɛn de ɛp Krays in brɔda dɛn fɔ prich di gud nyuz ɔlsay na di wɔl. (Jɔn 10:​16) If yu na wan pan di ɔda ship, ɛni tɛm we yu du di prichin wok, yu de sho se yu lɛk Jizɔs ɛn di anɔyntɛd dɛn.

13. Aw wi go du wetin de na Lyuk 16:​9, NWT?

¹³ Wi kin bi padi to Jiova ɛn Jizɔs bak bay we wi gi mɔni fɔ sɔpɔt di wok we dɛn de dayrɛkt. (Rid Lyuk 16:​9, NWT.) Fɔ ɛgzampul, wi kin gi mɔni fɔ sɔpɔt di wok we de bi ɔlsay na di wɔl; ɛn dɛn mɔni dɛn de, de ɛp fɔ sɔpɔt di prichin wok na fa fa say dɛn, fɔ ɛp fɔ bil ɛn kia fɔ say dɛn we wi de yuz fɔ wɔship, ɛn fɔ ɛp di wan dɛn we nid ɛp afta we dɛn gɛt dizasta. Wi kin gi mɔni bak fɔ pe fɔ di tin dɛn we wi nid na di kɔngrigeshɔn ɛn fɔ ɛp di wan dɛn we nid ɛp. (Prɔv. 19:​17) Dis na sɔm we dɛn we wi kin sɔpɔt Krays in brɔda dɛn.

14. Frɔm wetin de na Ɛfishians 4:​15, 16, NWT, wetin na di nɔmba 4 tin we wi fɔ du fɔ bi Jizɔs in padi?

¹⁴ (4) Sɔpɔt di arenjment dɛn na di kɔngrigeshɔn. Wi go bi gud padi to Jizɔs we de oba di kɔngrigeshɔn if wi sɔpɔt di wan dɛn we i dɔn pik fɔ kia fɔ wi. (Rid Ɛfishians 4:​15, 16, NWT.) Fɔ ɛgzampul, wi de tray fɔ du ɔl wetin wi ebul fɔ yuz wi Kiŋdɔm Ɔl dɛn di bɛst we. Na dat mek sɔm kɔngrigeshɔn dɛn dɔn kam togɛda wit ɔda kɔngrigeshɔn dɛn ɛn ajɔst di tɛritri dɛn. Dis arenjmɛnt dɔn mek di ɔganayzeshɔn dɔn sev bɔku mɔni. So bikɔs ɔf dis arenjmɛnt, sɔm pɔblisha dɛn go nid fɔ ajɔst. I go bi se dɛn fetful pɔblisha dɛn ya bin dɔn de na dɛn kɔngrigeshɔn fɔ lɔng tɛm ɛn sɔntɛm dɛn dɔn gɛt tayt padi biznɛs wit dɛn brɔda ɛn sista dɛn. Bɔt naw dɛn dɔn tɛl dɛn fɔ go na difrɛn kɔngrigeshɔn.  Jizɔs de rili gladi fɔ si we dɛn fetful brɔda ɛn sista dɛn ya de sɔpɔt dis fayn arenjmɛnt.

15. Aw wi padi biznɛs wit Jizɔs go go bifo tumara bambay?

¹⁵ Di wan dɛn we dɛn dɔn anɔynt wit oli spirit gɛt di op fɔ de wit Jizɔs sote go fɔ rul wit am na Gɔd in Kiŋdɔm. Dɛn go de wit Krays. Dɛn go si am, tɔk wit am, ɛn spɛn tɛm wit am. (Jɔn 14:​2, 3) Jizɔs go lɛk ɛn pe atɛnshɔn bak to di wan dɛn we gɛt di op fɔ de na dis wɔl. Pan ɔl we dɛn nɔ go si Jizɔs, dɛn go stil bi padi to am as dɛn de ɛnjɔy di layf we Jiova ɛn Jizɔs dɔn gi dɛn.—Ayz. 9:​6, 7.

16. Us blɛsin dɛn wi go gɛt we wi gɛt tayt padi biznɛs wit Jizɔs?

¹⁶ We wi gri fɔ bi Jizɔs in padi dɛn, wi go gɛt bɔku blɛsin dɛn. Fɔ ɛgzampul, wi de bɛnifit frɔm in lɔv ɛn di sɔpɔt we i de sɔpɔt wi rayt naw. Wi gɛt di chans fɔ de sote go. Ɛn di wan we pas ɔl na dat, wi padi biznɛs wit Jizɔs go mek wi gɛt tayt padi biznɛs wit in Papa, we na Jiova. Na big big ɔnɔ wi gɛt fɔ mek dɛn kɔl wi Jizɔs in padi dɛn!