Kwɛstyɔn dɛn we Pipul dɛn Kin Aks
Fɔ se Devid bin de mek tin big ɔ i bin de tɔk bɔt tin we nɔ pɔsibul we i rayt na Sam 61:8 se i go prez Gɔd in nem “sote go”?
Nɔ. Wetin Devid bin rayt na tru ɛn i pɔsibul.
Lɛ wi tɔk bɔt wetin i bin rayt na da vas de ɛn vas dɛn we fiba am. I bin se: “A go siŋ ɛn prez yu sote go ɛn mek shɔ se a du wetin a dɔn prɔmis ɛvride.” “PAPA GƆD [“Jiova,” NWT], mi waŋren PAPA GƆD, a go prez yu nem [sote go] wit ɔl mi at.” “A go prez yu sote go.”—Sam 61:8; 86:12; 145:1, 2.
We Devid bin de rayt dɛn wɔd dɛn ya, i nɔ bin de tink se i nɔ go ɛva day. Devid bin no se Jiova dɔn tɔk se mɔtalman go day bikɔs ɔf sin, ɛn i bin no se in na sina. (Jɛn. 3:3, 17-19; Sam 51:4, 5) I bin no se ivin man dɛn we Gɔd bin gladi fɔ, lɛk Ebraam, Ayzak, ɛn Jekɔb bin dɔn day. Ɛn Devid bin no se insɛf go gɛt fɔ day. (Sam 37:25; 39:4) Bɔt di wɔd dɛn we Devid rayt na Sam 61:8 sho se i bin dɔn mekɔp in maynd ɛn i want fɔ prez Gɔd sote go, dat na, wans i de alayv.—2 Sam. 7:12.
Sɔntɛnde, Devid bin de rayt bɔt tin dɛn we bin de apin to am, jɔs lɛk aw wi de si na di wɔd dɛn we de ɔp Sam 18, 51, ɛn 52. Insay Sam 23, Devid bin tɔk bɔt Jiova as shɛpad we de gayd, protɛkt, ɛn mek in pipul dɛn fil fayn. Devid na bin da kayn shɛpad de. Ɛn i bin want fɔ sav Gɔd ‘sote i day.’—Sam 23:6.
Mɛmba bak se na Jiova dayrɛkt Devid fɔ rayt ɔl wetin i rayt. Di tin dɛn we i bin rayt gɛt prɔfɛsi dɛn bɔt tin dɛn we gɛt fɔ apin tumara bambay. Fɔ ɛgzampul, na Sam 110, Devid bin rayt bɔt tɛm we in Masta go “sidɔm na [Gɔd in] raytan” na ɛvin ɛn gɛt bɔku pawa. Fɔ du wetin? Fɔ win Gɔd in ɛnimi dɛn ɛn “jɔj di neshɔn dɛn” we de na di wɔl. Devid na bin gret gret granpa to di Mɛsaya, di wan we go rul frɔm ɛvin, we go bi “man we de mek sakrifays fɔ pipul [dɛn] sin sote go.” (Sam 110:1-6) Jizɔs bin se na in di prɔfɛsi we de na Sam 110 tɔk bɔt, ɛn wetin de na di prɔfɛsi go apin tumara bambay.—Mat. 22:41-45.
Gɔd bin dayrɛkt Devid fɔ rayt bɔt in tɛm ɛn tumara bambay we i go gɛt layf bak ɛn ɛnjɔy fɔ prez Jiova sote go. Dis ɛp wi fɔ si se Sam 37:10, 11, 29 de tɔk bɔt tin dɛn we bin de apin trade na Izrɛl, ɛn wetin go apin tumara bambay ɔlsay na di wɔl we Gɔd go du di tin dɛn we i dɔn prɔmis.—Luk na paregraf 8 na di atikul we gɛt di taytul, “Yu Go De wit Mi na Paradays” we de insay dis Wachtawa.
So, Sam 61:8 ɛn ɔda vas dɛn we fiba am sho se Devid bin want fɔ prez Jiova na Izrɛl trade te i day. Ɛn dɛn de sho wetin Devid go ebul fɔ du tumara bambay we Jiova go gi am layf bak.
