1-2. Wetin wi go tɔk bɔt insay dis atikul?

I GO mɔs bi se sɔntɛnde, wi kin tink bɔt di we aw wi layf shɔt, ɛn di we aw wi gɛt “gɛt bɔku bɔku waala.” (Job 14:​1) So dis kin mek wi at pwɛl. Bɔku pan Jiova in savant dɛn we bin de di tɛm we dɛn bin de rayt di Baybul bin fil da we de. Sɔm pan dɛn bin ivin want fɔ day. (1 Kiŋ 19:​2-4; Job 3:​1-3, 11; 7:​15, 16) Bɔt dɛn bin abop pan Jiova, ɛn i bin de kɔntinyu fɔ ɛnkɔrej dɛn. Jiova mek dɛn rayt bɔt dɛn pipul dɛn ya dɛn stori so dat dɛn go ɛnkɔrej wi, ɛn wi go lan frɔm dɛn.—Rom. 15:​4.

² Insay dis atikul, wi go tɔk bɔt sɔm pan Jiova in savant dɛn we bin gɛt prɔblɛm dɛn we bin de mek dɛn at pwɛl. Dat na Jekɔb in pikin we na Josɛf, Naomi we in man bin dɔn day ɛn in dɔtɛnlɔ Rut, di Livayt we rayt Sam 73, ɛn apɔsul Pita. Aw Jiova bin ɛnkɔrej dɛn? Ɛn us lɛsin dɛn we wi go lan frɔm dɛn ɛgzampul? Di ansa dɛn to dɛn kwɛstyɔn dɛn ya go ɛp wi fɔ rili no se “PAPA GƆD [“Jiova,” NWT] de nia ɔl udat fil se i dɔn dɔn fɔ am” ɛn i “de ɛp udat fil se bɛtɛ nɔ de fɔ am igen.”—Sam 34:​18.

3-4. Wetin bin apin to Josɛf we in na bin yɔŋman?

³ Josɛf bin de arawnd 17 ia we Gɔd bin mek i drim tu drim dɛn. Dɛn drim dɛn de bin sho se Josɛf go bi impɔtant pɔsin we in famili go rɛspɛkt. (Jɛn. 37:​5-10) Bɔt shɔt tɛm afta we Josɛf bin drim dɛn drim dɛn de, bad tin dɛn bin apin to am. Da tɛm de, in brɔda dɛn nɔ bin rɛspɛkt am atɔl. So dɛn bin sɛl am, ɛn i bi slev to wan Ijipshian ɔfisa we nem Pɔtifa. (Jɛn. 37:​21-28) Josɛf in layf bin chenj kwik kwik wan. Insay shɔt tɛm, i nɔ bin de  na os igen wit in papa we lɛk am, bɔt in na bin slev we nɔ gɛt wan valyu na Ijipt. Ɛn i bin de wok fɔ wan man we nɔ bin sabi Jiova.—Jɛn. 39:​1.

⁴ Leta, Josɛf bin gɛt mɔ prɔblɛm dɛn, ɛn i bin ivin wɔs. Pɔtifa in wɛf bin lay se Josɛf tray fɔ rep am. Bifo Pɔtifa tray fɔ no di tru bɔt wetin apin, i mek dɛn put Josɛf na prizin, ɛn i mek dɛn chen am. (Jɛn. 39:​14-20; Sam 105:​17, 18) Josɛf bin yɔŋ da tɛm de, so imajin aw i go dɔn fil we Pɔtifa in wɛf bin lay pan am se i tray fɔ rep am. Ɛn tink bɔt aw da lay de go dɔn briŋ badnem pan Josɛf in Gɔd we na Jiova. Fɔ tru, ɔl dis na rizin we fɔ mek Josɛf in at pwɛl.

5. Wetin Josɛf bin du fɔ lɛ in at nɔ pwɛl pasmak?

⁵ We Josɛf na bin slev ɛn prizina, i nɔ bin ebul du natin fɔ chenj wetin bin de apin to am. Bɔt wetin bin ɛp am fɔ tink di rayt we? Wɛl, i nɔ bin de tink bɔt ɔl di tin dɛn we i nɔ bin ebul fɔ du, bɔt i bin de du in bɛst fɔ du di wok dɛn we dɛn bin dɔn gi am fɔ du. Bɔt di tin we bin impɔtant pas ɔl na dat Josɛf bin de du ɔl wetin go mek Jiova gladi ɔltɛm. So dat bin mek Jiova bin de blɛs ɔl wetin Josɛf bin de du.—Jɛn. 39:​21-23.

6. Aw Josɛf in drim dɛn go dɔn ɛnkɔrej am?

⁶ I go bi se Josɛf bin de tink bɔt di drim dɛn we Jiova bin mek i drim, ɛn dat go dɔn ɛnkɔrej am. Dɛn drim dɛn de bin ɛp am fɔ no se i go si in famili bak, ɛn tin go fayn fɔ am leta. Ɛn na dat bin apin. We Josɛf bin de arawnd 37 ia, wɔndaful tin dɛn bin apin we sho se in drim dɛn bin dɔn stat fɔ kam tru.—Jɛn. 37:​7, 9, 10; 42:​6, 9.

7. Akɔdin to 1 Pita 5:​10, wetin go ɛp wi fɔ bia wi prɔblɛm dɛn?

⁷ Lɛsin dɛn fɔ wi. Josɛf in stori de mɛmba wi se pipul dɛn na dis wɔl go du wi bad, ɛn dɛn nɔ go trit wi fia wan.  Ɛn sɔntɛnde, ivin wi kɔmpin Kristian dɛn nɔ go trit wi fayn. Bɔt if wi mɛmba se na Jiova de kɔba wi, wi nɔ go stɔp fɔ sav am ɔ alaw wi at fɔ pwɛl pasmak. (Sam 62:​6, 7; rid 1 Pita 5:​10.) Mɛmba bak se Josɛf go dɔn de arawnd 17 ia we Jiova bin trit am spɛshal we. So dis sho wi se Jiova kin ivin gɛt kɔnfidɛns pan di yɔŋ wan dɛn we de sav am. Tide, bɔku yɔŋ wan dɛn tan lɛk Josɛf. Dɛnsɛf gɛt fet pan Jiova. Pipul dɛn dɔn mek sɔm pan dɛn ivin sɔfa na prizin bikɔs dɛn nɔ gri fɔ kɔmɔt biɛn dɛn Gɔd.—Sam 110:​3.

8. Wetin bin apin to Naomi ɛn Rut?

⁸ Bikɔs tin fɔ it bin rili shɔtin na Juda, Naomi ɛn in famili bin muf go na Moab. Naomi in man we nem Ɛlimilɛk bin day we dɛn bin de na Moab, so na Naomi ɛn in tu bɔypikin dɛn bin lɛf na di tɔŋ. Leta, Naomi in bɔypikin dɛn bin mared tu Moabayt uman dɛn we nem Rut ɛn Ɔpa. Afta lɛk tɛn ia, Naomi in pikin dɛn bak day, ɛn dɛn nɔ bin bɔn pikin dɛn. (Ruth 1:​1-5) Imajin aw dɛn tri uman dɛn de dɛn at go dɔn pwɛl. Na tru se Rut ɛn Ɔpa bin gɛt chans fɔ mared bak. Bɔt udat go kia fɔ Naomi we bin dɔn ol? Naomi in at bin so pwɛl dat i bin se “dɛn nɔ fɔ kɔl am Naomi igen, we min se i gladi, dɛn fɔ kɔl am Mara bikɔs in layf bita. PAPA GƆD Ɔlmayti nɔ mek i gladi igen.” Afta ɔl dɛn bad tin dɛn ya bin dɔn apin to Naomi, i bin disayd fɔ go bak na Bɛtliɛm, ɛn Rut bin go wit am.—Ruth 1:​7, 18-20.

9. Akɔdin to Ruth 1:​16, 17, 22, aw Rut bin ɛnkɔrej Naomi?

⁹ Wetin bin ɛp Naomi? Na lɔv we nɔ de chenj. Fɔ ɛgzampul, Rut bin sho se i gɛt lɔv we nɔ de chenj fɔ Naomi bay we i bin kɔntinyu fɔ de wit am. (Rid Ruth 1:​16, 17, 22.) We dɛn bin de na Bɛtliɛm, Rut bin de wok tranga wan fɔ gɛda wan it we dɛn kɔl bali fɔ in ɛn Naomi. Dis tin we Rut bin de du bin mek ɔlman kam fɔ no se in na gud uman we de wok tranga wan.—Ruth 3:​11; 4:​15.

10. Aw Jiova bin sho se i lɛk di po wan dɛn lɛk Naomi ɛn Rut?

¹⁰ Jiova bin gi di Izrɛlayt dɛn wan lɔ we sho se i de sɔri fɔ di po wan dɛn lɛk Naomi ɛn Rut. I bin tɛl in pipul dɛn se we dɛn de avɛst di tin dɛn we dɛn plant, dɛn fɔ lɛf di tin dɛn we de na di ɛj pat na di fil fɔ di po wan dɛn. (Lɛv. 19:​9, 10) So Naomi ɛn Rut bin ebul fɔ gɛt tin fɔ it, ɛn dɛn nɔ bin nid fɔ beg.

11-12. Aw Boaz bin mek Naomi ɛn Rut gladi?

¹¹ Na Boaz we na bin wan jɛntriman bin gɛt di fil usay Rut bin de go gɛda tin fɔ it. I bin rili kɔle di we aw Rut nɔ bin kɔmɔt biɛn Naomi, ɛn aw i bin sho se i lɛk am. So Boaz bin mared Rut, ɛn i bay di land we Naomi in famili bin gɛt so dat Rut in yon pikin dɛn go gɛt dɛn land dɛn de leta. (Ruth 4:​9-13) Boaz ɛn Rut bin bɔn wan pikin we nem Obɛd, we bin leta bi Kiŋ Devid in granpa.—Ruth 4:​17.

¹² Imajin aw Naomi go dɔn gladi we i tot Obɛd, ɛn we i de pre to Jiova fɔ tɛl am tɛnki. Bɔt we Naomi ɛn Rut go gɛt layf bak, dɛn go gladi mɔ fɔ no se Obɛd na bin di Mɛsaya we na Jizɔs Krays in gret gret granpa.

13. Us fayn lɛsin dɛn wi kin lan frɔm Naomi ɛn Rut dɛn stori?

¹³ Lɛsin dɛn fɔ wi. Sɔntɛnde we wi kin gɛt prɔblɛm, wi at kin pwɛl, ɛn wi kin ivin fil se ɔltin dɔn dɔn fɔ wi. Sɔntɛm wi go de fil se wi prɔblɛm dɛn nɔ go ɛva  dɔn. Ɛnitɛm we wi fil da we de, wi fɔ abop pan wi Papa we de na ɛvin wit ɔl wi at ɛn kɔntinyu fɔ de nia wi kɔmpin Kristian dɛn. Na tru se Jiova nɔ go pul ɔl wi prɔblɛm dɛn pan wi. Fɔ ɛgzampul, i nɔ bin gi layf bak to Naomi in man ɛn in pikin dɛn. Bɔt i go ɛp wi fɔ bia, ɛn sɔntɛnde i kin yuz wi brɔda ɛn sista dɛn fɔ sho wi se in lɔv nɔ de chenj fɔ wi.—Prɔv. 17:​17, NWT.

14. Wetin bin mek wan Livayt in at rili pwɛl?

¹⁴ Di man we rayt Sam 73 na bin Livayt. So i bin gɛt di ɔnɔ fɔ wok na Jiova in os. Bɔt tɛm bin de we in at bin rili pwɛl. Wetin mek? Na bikɔs i bin stat fɔ milɛ di wikɛd pipul dɛn ɛn di wan dɛn we bin de kak. I nɔ bin de milɛ dɛn bikɔs i bin want fɔ du bad tin dɛn, bɔt na bikɔs i bin tan lɛk se dɛn layf bin bɛtɛ pas in yon. (Sam 73:​2-9, 11-14) I bin tan lɛk se dɛn bin gɛt ɔl wetin pɔsin fɔ gɛt. Dɛn bin jɛntri, dɛn bin de liv gud layf, ɛn dɛn nɔ bin de wɔri fɔ natin. We di Livayt bin si dis, in at bin rili pwɛl, ɛn i bin se: “Na fɔ natin a bin de mek gud bɔy; ɛn nɔ miks pan bad.” Dis we aw i bin de tink fɔ bin dɔn mek i lɛf fɔ wɔship Jiova.

15. Akɔdin to Sam 73:​16-19, 22-25, wetin bin ɛp di Livayt we rayt dis sam fɔ lɛ in at nɔ kɔntinyu fɔ pwɛl pasmak?

¹⁵ Rid Sam 73:​16-19, 22-25. Di Livayt bin “go insay PAPA GƆD in os.” We i bin de de wit in kɔmpin dɛn we de wɔship Jiova, i bin ebul fɔ gɛt kolat, ɛn fɔ tink ɛn pre bɔt wetin de apin to am. Dat bin mek i kam fɔ no se di we aw i bin de tink nɔ bin mek sɛns, ɛn i fɔ bin dɔn ambɔg in padi biznɛs wit Jiova. I bin kam fɔ no bak se di wikɛd pipul dɛn de “na slipul ples,” ɛn dɛn go “fɔdɔm bad wan.” Di Livayt bin nid fɔ tink di we aw Jiova de tink fɔ lɛ in at nɔ kɔntinyu fɔ pwɛl, ɛn lɛ i nɔ milɛ di wikɛd pipul dɛn. Da tin de we i du bin mek in at nɔ bin pwɛl igen, ɛn i bin gladi. I bin se: “We a gɛt [Jiova]. . . , a nɔ nid natin igen na [di] wɔl.”

16. Us lɛsin dɛn wi kin lan frɔm wan Livayt?

 ¹⁶ Lɛsin dɛn fɔ wi. Wi nɔ fɔ ɛva milɛ wikɛd pipul dɛn bikɔs i tan lɛk se dɛn de ɛnjɔy bɛtɛ layf pas wi. Di gladi-at we dɛn gɛt nɔ go te, ɛn dɛn nɔ go gɛt layf we go de sote go. (Ɛkli. 8:​12, 13) If wi stat fɔ milɛ dɛn, wi at go pwɛl, ɛn i go ivin ambɔg wi padi biznɛs wit Jiova. So if yu si se yu dɔn stat fɔ milɛ wikɛd pipul dɛn fɔ wetin dɛn de ɛnjɔy, du wetin di Livayt bin du. Lisin to Gɔd in fayn advays, ɛn mek padi wit pipul dɛn we de du wetin Jiova want. We yu lɛk Jiova pas ɛni ɔda tin, yu go gɛt tru tru gladi-at. Ɛn yu go kɔntinyu fɔ waka na di rod we go mek yu gɛt “di rial layf.”—1 Tim. 6:​19.

17. Wetin-ɛn-wetin bin apin we mek Pita in at pwɛl?

¹⁷ Apɔsul Pita na man we bin rili gɛt zil. Bɔt sɔntɛnde i bin de tɔk ɛn du tin dɛn we i nɔ bin de tink bɔt. Ɛn leta, i kin rigrɛt dɛn tin dɛn de we i kin tɔk ɛn du. Fɔ ɛgzampul, we Jizɔs bin tɛl in apɔsul dɛn se i go sɔfa ɛn day, Pita bin tɔk pan am ɛn se: “Dis nɔ go apin to yu.” (Mat. 16:​21-23) Bɔt Jizɔs bin kɔrɛkt Pita. We wan grup bin kam fɔ arɛst Jizɔs, Pita nɔ bin tink bifo i kɔt di ay prist in slev in yes. (Jɔn 18:​10, 11) Jizɔs bin kɔrɛkt am bak. Apat frɔm dat, Pita bin bost se if di ɔda apɔsul dɛn lɛf Jizɔs, in nɔ go ɛva lɛf am. (Mat. 26:​33) Bɔt Pita nɔ bin gɛt di kayn maynd we i bin fil se i gɛt. Leta da nɛt de, i bin fred, ɛn i bin dinay se i nɔ sabi Jizɔs tri tɛm. Da tin de we Pita du bin mek in at rili pwɛl, so i bin “go na do ɛn kray bita bita wan.” (Mat. 26:​69-75) I go dɔn wɔnda if Jizɔs go ɛva fɔgiv am.

18. Aw Jizɔs bin ɛp Pita fɔ lɛ in at nɔ kɔntinyu fɔ pwɛl pasmak?

¹⁸ Bɔt Pita nɔ bin alaw in pwɛlat fɔ mek i lɛf fɔ sav Jiova. Afta we i mek da  mistek de, i bin kɔntinyu fɔ sav Jiova, ɛn wi lan se i bin de bak wit di ɔda apɔsul dɛn. (Jɔn 21:​1-3; Akt 1:​15, 16) Wetin bin ɛp am? Wɛl, i mɛmba se Jizɔs bin dɔn pre fɔ lɛ i nɔ lɛf fɔ gɛt fet. Ɛn Jizɔs bin ɛnkɔrej am fɔ kam bak ɛn ɛnkɔrej in brɔda dɛn. Jiova bin ansa da prea de. Leta, Jizɔs bin apia to Pita fɔ ɛnkɔrej am. (Lyuk 22:​32; 24:​33, 34; 1 Kɔr. 15:​5) Jizɔs bin apia to di apɔsul dɛn afta we dɛn bin dɔn fishin ol nɛt ɛn dɛn nɔ kech natin. Da tɛm de, Jizɔs bin gi Pita di chans fɔ tɛl am se i rili lɛk am. Jizɔs bin dɔn fɔgiv dis in gud padi, ɛn i bin gi am mɔ wok fɔ du.—Jɔn 21:​15-17.

19. Aw Sam 103:​13, 14 de ɛp wi fɔ si aw Jiova de tink bɔt wi we wi sin?

¹⁹ Lɛsin dɛn fɔ wi. Di we aw Jizɔs bin trit Pita sho se Jizɔs gɛt sɔri-at, ɛn i de falamakata in Papa pafɛkt wan. So ɛnitɛm we wi mek mistek, wi nɔ fɔ tɛl wisɛf se Jiova nɔ go ɛva fɔgiv wi. Wi fɔ mɛmba se na da we de Setan want lɛ wi fil. Wi fɔ tink gud wan bɔt di aw Jiova lɛk wi, i ɔndastand se wi nɔ pafɛkt, ɛn i want fɔ fɔgiv wi. Ɛn wi fɔ falamakata am we ɔda pipul dɛn du wi bad.—Rid Sam 103:​13, 14.

20. Wetin wi go tɔk bɔt insay di nɛks atikul?

²⁰ Josɛf, Naomi ɛn Rut, di Livayt, ɛn apɔsul Pita dɛn ɛgzampul dɔn ɛp wi fɔ si se “PAPA GƆD [“Jiova,” NWT] de nia ɔl udat fil se i dɔn dɔn fɔ am.” (Sam 34:​18) Sɔntɛnde, i kin alaw sɔm prɔblɛm dɛn fɔ mit wi ɛn fɔ mek wi gɛt pwɛlat. Bɔt we Jiova kin ɛp wi fɔ bia wi prɔblɛm dɛn, dat kin mek wi fet strɔng mɔ ɛn mɔ. (1 Pit. 1:​6, 7) Insay di nɛks atikul, wi go tɔk mɔ bɔt aw Jiova kin sɔpɔt in fetful savant dɛn we dɛn at kin pwɛl bikɔs ɔf di mistek dɛn we dɛn de mek, ɔ bikɔs dɛn gɛt tin dɛn we de mɔna dɛn.