Nɔ-o. Setan nɔ bin tɛl Iv se if i it di frut we Gɔd se dɛn nɔ fɔ it, in bɔdi go day (we sɔm pipul dɛn tink se na di sol we nɔ de day) bɔt in spirit go kɔntinyu fɔ liv ɔdasay. We Setan yuz di snek fɔ tɔk to Iv, i tɛl Iv se if i it di frut na da tik de, ‘i nɔ go day’ atɔl. I bin de tray fɔ tɛl am se i go kɔntinyu fɔ liv, i go ɛnjɔy in layf mɔ na di wɔl, ɛn i nɔ go abop pan Gɔd fɔ ɛnitin.—Jɛn. 2:​17; 3:​3-5.

If di lay lay tichin we dɛn de tich tide bɔt di sol we nɔ de day nɔ bigin na Idɛn, ustɛm i bigin? Wi nɔ shɔ ustɛm i bigin. Bɔt wetin wi no na dat ɔl lay lay wɔship bin dɔn we Gɔd mek Flɔd kam insay Noa in tɛm. Na Noa ɛn in famili nɔmɔ bin sev we di Flɔd kam ɛn dɛn ɔl bin de wɔship Gɔd di rayt we, so nɔbɔdi nɔ bin de tich lay lay tin dɛn.

So di lay lay tichin tide fɔ se mɔtalman sol nɔ de day go dɔn kam afta di Flɔd. We Gɔd kɔnfyuz di langwej dɛn na Babɛl ɛn pipul dɛn skata “ɔlsay na di wɔl,” dɛn go mɔs dɔn go wit di aydia se mɔtalman gɛt sol we nɔ de day. (Jɛn. 11:​8, 9) So ilɛk ustɛm dis lay lay tichin bigin, wi shɔ se na “di papa pan lay,” we na Setan di Dɛbul, bin de biɛn dis lay ɛn i go dɔn gladi we i si se bɔku pipul dɛn biliv dis lay.—Jɔn 8:​44, NWT.