1. Us wok Jiova gi mama ɛn papa dɛn?

 JIOVA bin mek di fɔs man ɛn uman di kayn we we dɛn go want fɔ bɔn pikin dɛn. Di Baybul se: “Pikin na blɛsin we PAPA GƆD [“Jiova”, NWT] de gi.” (Sam 127:​3) Wetin dat min? Imajin se yu bɛst padi aks yu fɔ kip bɔku bɔku mɔni fɔ am. Aw yu go fil? Yu go fil gud bikɔs i trɔst yu. Bɔt yu go de wɔri aw yu go kip di mɔni sef wan. Jiova we na wi tayt tayt Padi dɔn gi mama ɛn papa dɛn sɔntin fɔ kia fɔ we valyu pas mɔni. I gi dɛn di wok fɔ kia fɔ dɛn pikin dɛn gud gud wan ɛn mek dɛn gladi.

2. Us kwɛstyɔn dɛn wi go tɔk bɔt?

² Udat fɔ disayd if maredman ɛn in wɛf fɔ bɔn pikin dɛn? Ustɛm dɛn fɔ bɔn pikin dɛn? Ɛn wetin mama ɛn papa dɛn fɔ du fɔ ɛp dɛn pikin dɛn fɔ gɛt gladi-at? Tink bɔt sɔm prinsipul dɛn we de na Gɔd in Wɔd we go ɛp maredman ɛn in wɛf we na Kristian dɛn fɔ disayd fɔ du di rayt tin.

3. (a) Udat fɔ disayd if di maredman ɛn in wɛf fɔ bɔn pikin dɛn? (b) Us Baybul prinsipul we padi dɛn ɛn fambul dɛn fɔ mɛmba?

³ Na sɔm kɔlchɔ dɛn, pipul dɛn kin si am se di wan dɛn we jɔs mared fɔ stat fɔ bɔn pikin dɛn wantɛm wantɛm. Dɛn fambul dɛn ɛn ɔda pipul dɛn kin mɔna di maredman ɛn in wɛf fɔ mek dɛn nɔ westɛm fɔ bɔn pikin dɛn. Wan brɔda we nem Jɛtro we de na Eshia bin tɔk se: “Insay di kɔngrigeshɔn, di wan dɛn we gɛt pikin dɛn kin mɔna  mared pipul dɛn we nɔ gɛt pikin dɛn fɔ bɔn.” Wan ɔda brɔda we nem Jɛfri we insɛf de na Eshia bin tɔk bak se: “Sɔm pipul dɛn kin tɛl di wan dɛn we nɔ gɛt pikin se dɛn nɔ go gɛt ɛnibɔdi fɔ kia fɔ dɛn di tɛm we dɛn dɔn ol if dɛn nɔ bɔn pikin dɛn.” Bɔt na di wan dɛn we mared gɛt fɔ disayd fɔ dɛnsɛf if dɛn fɔ bɔn pikin dɛn ɔ dɛn nɔ fɔ bɔn pikin dɛn. Na dɛnsɛf sɛf fɔ disayd, bikɔs na dɛn wok fɔ du dat. (Gal. 6:​5) Fɔ tru, padi dɛn ɛn fambul dɛn kin want di wan dɛn we jɔs mared fɔ gɛt gladi-at. Bɔt ɔlman nid fɔ mɛmba se na di man ɛn in wɛf gɛt fɔ disayd fɔ dɛnsɛf if dɛn go bɔn pikin dɛn ɔ dɛn nɔ go bɔn.—1 Tɛs. 4:​11.

4-5. Us tu kwɛstyɔn dɛn we mared pipul dɛn nid fɔ tɔk bɔt? Ustɛm na di bɛst tɛm we dɛn fɔ tɔk bɔt dat? Ɛksplen.

⁴ Maredman ɛn in wɛf we disayd fɔ bɔn pikin dɛn fɔ tɔk bɔt dɛn tu impɔtant kwɛstyɔn dɛn ya: Fɔs, ustɛm dɛn go want fɔ bɔn pikin dɛn? Sɛkɔn, ɔmɔs pikin dɛn go want fɔ bɔn? Ustɛm na di bɛst tɛm fɔ lɛ maredman ɛn in wɛf tɔk bɔt dis? Ɛn wetin mek dɛn tu kwɛstyɔn dɛn ya rili impɔtant?

⁵ Bɔku tɛm, bifo man ɛn uman mared, dɛn kin tɔk gud gud wan bɔt bɔn pikin biznɛs. Wetin mek? Na bikɔs i rili impɔtant fɔ lɛ dɛn ɔl tu tink di sem we bɔt dis tɔpik. Dɔn, dɛn go nid fɔ tink if dɛn dɔn rɛdi fɔ dat. Sɔm maredman ɛn dɛn wɛf dɛn dɔn disayd fɔ wet wan ɔ tu ia afta we dɛn mared bifo dɛn stat fɔ bɔn pikin dɛn, bikɔs dɛn go yuz bɔku tɛm ɛn ɛnaji fɔ mɛn di pikin dɛn. Dɛn kin tink se we dɛn wet fɔ sɔm tɛm, dɛn go gi dɛnsɛf tɛm fɔ ajɔst to mared layf ɛn dɛn go yus to dɛnsɛf mɔ ɛn mɔ.—Ɛfi. 5:​33.

6. Wetin sɔm maredman ɛn dɛn wɛf dɛn dɔn disayd fɔ du bikɔs wi de insay di tɛm we tin tranga?

⁶ Ɔda Kristian dɛn dɔn disayd fɔ falamakata Noa in tri bɔypikin dɛn ɛn dɛn wɛf dɛn. Noa in tri bɔypikin dɛn ɛn dɛn wɛf dɛn nɔ bin disayd fɔ bɔn pikin dɛn wantɛm wantɛm. (Jɛn. 6:​18; 9:​18, 19; 10:​1; 2 Pit. 2:​5) Jizɔs bin kɔmpia wi tɛm to di “tɛm we Noa bin de,” ɛn wi nɔ gɛt wan dawt fɔ se wi de insay di ‘tɛm we tin tranga.’ (Mat. 24:​37; 2 Tim. 3:​1) Na dat mek sɔm maredman ɛn dɛn wɛf dɛn dɔn disayd se dɛn nɔ go bɔn pikin dɛn naw so dat dɛn go gɛt mɔ tɛm  fɔ sav Jiova.

7. Aw di prisipul dɛn we de na Lyuk 14:​28, 29 (NWT) ɛn Prɔvabs 21:​5 go ɛp mared pipul dɛn?

⁷ We maredman ɛn in wɛf de disayd if dɛn fɔ bɔn pikin dɛn ɛn ɔmɔs pikin dɛn fɔ gɛt, di wan dɛn we gɛt sɛns de “sidɔm fɔs ɛn chɛk ɔmɔs [dɛn] gɛt fɔ spɛn.” (Rid Lyuk 14:​28, 29, NWT.) Di wan dɛn we dɔn bɔn pikin dɛn no se fɔ mɛn pikin dɛn nɔ jɔs min fɔ spɛn mɔni bɔt i min bak fɔ yuz bɔku pan dɛn tɛm ɛn ɛnaji. So i rili impɔtant fɔ lɛ maredman ɛn in wɛf tink bɔt dɛn kwɛstyɔn dɛn ya: ‘Wi ɔl tu nid fɔ wok so dat wi go bay di tin dɛn we wi famili go nid? Wi ɔl tu dɔn gri bɔt di “tin dɛn we wi famili go rili nid”? If na wi ɔl tu gɛt fɔ wok, udat go de kia fɔ di pikin dɛn? Udat in ɛzampul dɛn go de falamakata fɔ tink ɛn fɔ du tin dɛn?’ We mared pipul dɛn tɔk bɔt dɛn kwɛstyɔn dɛn ya, dat de sho se dɛn de fala wetin de na Prɔvabs 21:​5.—Rid.

8. Us prɔblɛm dɛn we maredman ɛn in wɛf fɔ ɛkspɛkt? Wetin maredman we lɛk in wɛf go du?

⁸ Pikin dɛn rili nid dɛn mama ɛn papa dɛn tɛm ɛn ɛnaji. So if maredman ɛn in wɛf bɔn bɔku pikin dɛn insay shɔt tɛm, i nɔ go izi fɔ dɛn fɔ pe atɛnshɔn to ɔl di pikin dɛn wan bay wan. Sɔm mared pipul dɛn we gɛt bɔku smɔl smɔl pikin dɛn dɔn tɔk se sɔntɛnde dɛn nɔ kin no wetin fɔ tɔk ɔ du. Bɔku tɛm di mama kin taya. Dat kin mek i nɔ kin gɛt ɛnaji fɔ stɔdi, pre, ɛn fɔ prich wit di pikin dɛn ɔltɛm. Wan ɔda tin we nɔ izi fɔ dɛn, na fɔ pe atɛnshɔn na mitin ɛn fɔ bɛnifit frɔm di mitin. Fɔ tru, maredman we lɛk in wɛf go ɛp in wɛf wit di pikin dɛn na mitin ɛn we dɛn de na os. Fɔ ɛgzampul, i go ɛp in wɛf fɔ du sɔm wok dɛn na os. I go tray tranga wan fɔ lɛ ɔlman bɛnifit frɔm di Famili Wɔship program we dɛn kin gɛt ɔltɛm. Ɛn i kin go wit in famili na fil savis ɔltɛm.

9-10. Us impɔtant tin we mama ɛn papa dɛn fɔ du fɔ ɛp dɛn pikin dɛn?

⁹ Wetin na sɔm pan di tin dɛn we mama ɛn papa dɛn fɔ du fɔ ɛp dɛn pikin dɛn fɔ lɛk Jiova? Aw dɛn go protɛkt dɛn pikin dɛn frɔm di bad tin dɛn we de na dis wɔl? Lɛ wi tɔk bɔt sɔm tin dɛn we mama ɛn papa dɛn fɔ du.

¹⁰ Pre to Jiova fɔ ɛp. Tink bɔt di ɛgzampul we Manoa ɛn in wɛf sɛt we dɛn bɔn Samsin. We Manoa bin kam fɔ no se in ɛn in wɛf go bɔn bɔypikin, i bin beg Jiova fɔ lɛ i go tich dɛn aw fɔ mɛn di pikin we dɛn go bɔn.

11. Frɔm wetin de na Di Jɔj Dɛm 13:​8, aw mama ɛn papa dɛn kin falamakata Manoa in ɛgzampul?

 ¹¹ Nayad ɛn Alma we kɔmɔt na Bɔznia ɛn Ɛzigovina bin lan frɔm Manoa in ɛgzampul. Dɛn bin tɔk se: “Jɔs lɛk Manoa, wi bin beg Jiova fɔ tich wi aw fɔ bi gud mama ɛn papa. Ɛn Jiova bin yuz difrɛn difrɛn we dɛn fɔ ansa wi prea dɛn. I bin yuz di Skripchɔ dɛn, wi buk ɛn magazin dɛn, wi mitin dɛn, ɛn kɔnvɛnshɔn dɛn.”—Rid Di Jɔj Dɛm 13:​8.

12. Us ɛgzampul we Josɛf ɛn Meri bin sɛt fɔ dɛn pikin dɛn?

¹² Tich bay yu ɛgzampul. Wetin yu de tɔk impɔtant, bɔt di tin dɛn we yu de du kin rili afɛkt yu pikin. Wi shɔ se Josɛf ɛn Meri bin sɛt fayn ɛgzampul fɔ Jizɔs ɛn dɛn ɔda pikin dɛn. Josɛf bin de wok tranga wan fɔ kia fɔ in famili. Dɔn, i bin de ɛnkɔrej dɛn fɔ sav Jiova. (Dit. 4:​9, 10) Pan ɔl we di Lɔ nɔ bin se Josɛf fɔ de kɛr in famili wit am na Jerusɛlɛm “ɛvri ia” fɔ sɛlibret di Pasova, i bin stil de du am. (Lyuk 2:​41, 42) Sɔntɛm ɔda papa dɛn bin de tink se fɔ kɛr dɛn wanol famili na Jerusɛlɛm nɔ go izi, dɛn go tek bɔku tɛm, ɛn dɛn go spɛn bɔku mɔni. Bɔt Josɛf bin valyu di tin dɛn we i de du fɔ sav Jiova ɛn i bin tich in pikin dɛn fɔ du di sem tin. Dɔn bak, Meri bin sabi di Skripchɔ dɛn gud gud wan. Wi shɔ se i bin tich in pikin dɛn fɔ lɛk Gɔd in Wɔd bay di tin dɛn we i bin de tɔk ɛn du.

13. Aw wan maredman ɛn in wɛf bin falamakata Josɛf ɛn Meri dɛn ɛgzampul?

¹³ Nayad ɛn Alma, we wi bin tɔk bɔt fɔs bin want fɔ falamakata Josɛf ɛn Meri dɛn ɛgzampul. Aw dat bin ɛp dɛn fɔ mɛn dɛn bɔypikin fɔ lɛk Gɔd ɛn sav am? Dɛn bin tɔk se: “Bay di we aw wi de liv wi layf, wi bin tray tranga wan fɔ sho wi bɔypikin se i fayn fɔ fala Jiova in prinsipul dɛn pan ɛnitin we i de du.” Nayad bin kɔntinyu fɔ tɔk se: “Na fɔ bi di kayn pɔsin we yu want yu pikin fɔ bi.”

14. Wetin mek mama ɛn papa dɛn nid fɔ no udat dɛn pikin dɛn de kip kɔmpin wit?

¹⁴ Ɛp yu pikin dɛn fɔ pik gud padi dɛn. Mama ɛn papa nid fɔ no udat dɛn pikin dɛn de kip kɔmpin wit ɛn wetin dɛn de du. Dis min se mama ɛn papa dɛn nid fɔ no udat dɛn pikin dɛn de tɔk wit na fon ɔ na Intanɛt sayt dɛn we de mek ɔda pipul dɛn no mɔ bɔt pɔsin. Dɛn padi dɛn de kin rili afɛkt di we aw di pikin dɛn de tink ɛn du tin.—1 Kɔr. 15:​33.

15. Wetin mama ɛn papa dɛn kin lan frɔm Jɛsi in ɛgzampul?

¹⁵ Wetin mama ɛn papa dɛn fɔ du if dɛn nɔ no bɛtɛ tin bɔt kɔmpyuta dɛn ɔ fon dɛn? Wan papa we nem Jɛsi we de na di Filipins bin tɔk se: “Wi nɔ no bɛtɛ tin bɔt kɔmpyuta, fon, ɔ tablɛt dɛn. Bɔt dat nɔ stɔp wi fɔ tich wi pikin dɛn bɔt di bad tin dɛn bɔt kɔmpyuta, fon, ɔ tablɛt dɛn.” Jɛsi nɔ bin stɔp in pikin dɛn fɔ yuz dɛn tin dɛn de jɔs bikɔs i nɔ sabi bɛtɛ tin bɔt dɛn. I bin tɔk se: “A bin tɛl mi pikin dɛn se i fayn fɔ yuz dɛn kɔmpyuta, fon ɔ tablɛt dɛn fɔ lan nyu langwej, fɔ pripia fɔ di mitin dɛn, ɛn fɔ de rid di Baybul ɛvride.” If yu na mama ɔ papa, yu dɔn rid ɛn ɛksplen to yu pikin dɛn bɔt di fayn advays we de na jw.org^® ɔnda di say we se “Teenagers” we de tɔk bɔt fɔ sɛn tɛks mɛsej dɛn ɛn pikchɔ dɛn na di Intanɛt? Yu dɔn mek dɛn wach di fim dɛn we gɛt di taytul Yu ɛn Yu Fon ɔ Tablɛt, Udat De Kɔntrol in Kɔmpin? ɛn Tek Tɛm we Yu De  Yuz Soshial Nɛtwɔk? b Dɛn fim dɛn ya rili impɔtant as yu de tich yu pikin dɛn aw fɔ yuz kɔmpyuta, fon, ɔ tablɛt di rayt we.—Prɔv. 13:​20.

16. Wetin bɔku mama ɛn papa dɛn dɔn du? Wetin dɔn apin we dɛn du dat?

¹⁶ Bɔku mama ɛn papa dɛn de tray tranga wan fɔ mek dɛn pikin dɛn gɛt di chans fɔ kip kɔmpin wit di wan dɛn we de sɛt fayn ɛgzampul fɔ sav Gɔd. Fɔ ɛgzampul, Dini ɛn Bɔmin we de na Ayvri Kost bin tɔk se bɔku tɛm, dɛn kin invayt di sakit ovasia fɔ de wit dɛn na dɛn os. Dini bin tɔk se: “Dis tin we dɛn bin de du bin rili afɛkt dɛn fɔs bɔypikin. I bin bigin fɔ payɔnia ɛn naw in na sɔbstityut sakit ovasia.” Yu nɔ tink se yu kin arenj fɔ lɛ yu pikin dɛn kip kɔmpin wit dɛn kayn pipul dɛn ya?

17-18. Ustɛm mama ɛn papa dɛn fɔ stat fɔ tren dɛn pikin dɛn?

¹⁷ Stat fɔ tren yu pikin dɛn frɔm we dɛn smɔl. We mama ɛn papa dɛn de stat fɔ tren dɛn pikin dɛn frɔm we dɛn smɔl, na di mɔ i go izi fɔ dɛn fɔ tren dɛn. (Prɔv. 22:​6) Lɛ wi tɔk bɔt Timoti we leta bin de travul wit di apɔsul Pɔl. Timoti in mama we nem Yunis ɛn in grani we nem Lɔys bin tren am frɔm we i “smɔl.”—2 Tim. 1:​5; 3:​15.

¹⁸ Wan ɔda maredman we nem Jen-Klɔd ɛn in wɛf we nem Pis we de na Ayvri Kost bin ebul fɔ mɛn ɔl dɛn siks pikin dɛn fɔ lɛk Jiova ɛn sav am. Wetin bin ɛp dɛn fɔ du dat? Na we dɛn falamakata Yunis ɛn Lɔys dɛn ɛgzampul. Dɛn bin tɔk se: “Wi bin stat fɔ tich wi pikin dɛn bɔt Gɔd in Wɔd frɔm we dɛn smɔl, wi bin de du dis frɔm we dɛn yɔŋbebi.”—Dit. 6:​6, 7.

19. Wetin i min fɔ tich yu pikin dɛn Gɔd in Wɔd?

¹⁹ Wetin i min fɔ “tich” yu pikin dɛn bɔt Jiova in Wɔd? Fɔ “tich” min fɔ ripit sɔntin. Fɔ du dis, mama ɛn papa dɛn nid fɔ spɛn tɛm wit dɛn pikin dɛn ɔltɛm. Sɔntɛnde, dɛn at kin pwɛl bikɔs dɛn nid fɔ ripit di sem tin to dɛn pikin dɛn. Bɔt mama ɛn papa dɛn fɔ si dis as chans fɔ ɛp dɛn pikin dɛn fɔ ɔndastand Gɔd in Wɔd ɛn fala wetin dɛn de lan.

20. Ɛksplen aw yu go fala wetin de na Sams 127:​4 (NWT) fɔ mɛn yu pikin dɛn.

 ²⁰ No yu pikin dɛn gud gud wan. Sam 127 se pikin dɛn tan lɛk aro dɛn. (Rid Sams 127:​4, NWT.) Jɔs lɛk aw dɛn de yuz difrɛn difrɛn tin dɛn fɔ mek aro dɛn ɛn dɛn de bay difrɛn sayz dɛn, na so ɔl pikin dɛn difrɛn. So mama ɛn papa dɛn fɔ no aw dɛn fɔ tren ɔl dɛn pikin dɛn wan bay wan. Wan maredman ɛn in wɛf we de na Izrɛl bin ebul fɔ ɛp dɛn tu pikin dɛn fɔ sav Jiova, ɛn dɛn sho wetin bin ɛp dɛn fɔ du dat. Dɛn tɔk se: “Wi bin de stɔdi di Baybul wit dɛn wan bay wan.” Na di wan we de oba di famili go disayd if nid de fɔ stɔdi da we de ɔ if i pɔsibul.

21. Aw Jiova de ɛp mama ɛn papa dɛn?

²¹ Sɔntɛnde, mama ɛn papa dɛn kin fil se i nɔ rili izi fɔ tich dɛn pikin dɛn. Bɔt pikin dɛn na gift frɔm Jiova. I rɛdi ɔltɛm fɔ ɛp. I rɛdi fɔ lisin to mama ɛn papa dɛn prea dɛn. Ɛn i de ansa dɛn prea dɛn de bay we i de yuz di Baybul, wi buk ɛn magazin dɛn, ɛn ɛkspiriɛns ɛn advays dɛn frɔm machɔ pipul dɛn na di kɔngrigeshɔn.

22. Wetin na di bɛst tin dɛn we mama ɛn papa dɛn go gi dɛn pikin dɛn?

²² Sɔm pipul dɛn se i de tek 20 ia fɔ mɛn pikin, bɔt mama ɛn papa dɛn nɔ de ɛva stɔp fɔ mɛn dɛn pikin dɛn. Di bɛst tin dɛn we mama ɛn papa dɛn go gi dɛn pikin dɛn na dɛn lɔv, dɛn tɛm, ɛn trenin frɔm di Baybul. Ɔl pikin gɛt difrɛn we fɔ tek trenin. Bɔt bɔku pan dɛn we mɛn na famili we lɛk Jiova kin fil lɛk aw wan sista we nem Joana Me we de na Eshia bin fil we i tɔk se: “We a tink bɔt di trenin we mi mama ɛn papa gi mi, a kin rili gladi fɔ we dɛn bin de kɔrɛkt mi ɛn tich mi fɔ lɛk Jiova. Dɛn nɔ jɔs gi mi layf, bɔt dɛn gi mi layf we gɛt minin.” (Prɔv. 23:​24, 25) Bɔku pan wi brɔda dɛn ɛn sista dɛn kin fil dis sem kayn we.