STƆDI ATIKUL 34
SIŊ 107 Di We Aw Gɔd Want Wi fɔ Sho Lɔv
Aw Ɛlda dɛn Go Sho Sɔri-At ɛn Lɔv to Pɔsin We Dɔn Sin?
“Gɔd gud na in mek i de tray fɔ mek yu ripɛnt.”—ROM. 2:4.
MEN PƆYNT
Aw ɛlda dɛn de tray fɔ ɛp brɔda ɛn sista dɛn we dɔn kɔmit siriɔs sin?
1. Wetin kin apin afta pɔsin kɔmit siriɔs sin?
INSAY di atikul bifo dis wan, wi bin lan bɔt wetin apɔsul Pɔl bin tɛl di kɔngrigeshɔn na Kɔrint fɔ du bɔt wan man we bin kɔmit siriɔs sin. Di man we bin kɔmit siriɔs sin nɔ bin gri fɔ ripɛnt, so dɛn bin pul am kɔmɔt na di kɔngrigeshɔn. Bɔt wi tim skripchɔ ɛp wi fɔ no se Gɔd kin ɛp pipul dɛn we dɔn kɔmit siriɔs sin fɔ ripɛnt. (Rom. 2:4) Aw di ɛlda dɛn go ɛp dɛn fɔ ripɛnt?
2-3. Wetin wi fɔ du if wi no se wi kɔmpin Kristian dɔn kɔmit siriɔs sin? Wetin mek?
2 If ɛlda dɛn nɔ no se pɔsin dɔn kɔmit siriɔs sin, dɛn nɔ go ebul fɔ ɛp am. So wetin wi fɔ du if wi no se wi kɔmpin Kristian dɔn kɔmit siriɔs sin we go mek dɛn pul am kɔmɔt na di kɔngrigeshɔn? Wi fɔ ɛnkɔrej am fɔ go tɔk to di ɛlda dɛn fɔ mek dɛn ɛp am.—Ayz. 1:18; Akt 20:28; 1 Pit. 5:2.
3 Wetin yu fɔ du if di pɔsin we dɔn kɔmit siriɔs sin nɔ gri fɔ go tɔk to di ɛlda dɛn? Yu kin go tɔk to di ɛlda dɛn fɔ mek di pɔsin gɛt di ɛp we i nid. Na da we de yu go sho se yu lɛk di pɔsin bikɔs yu nɔ want mek i stɔp fɔ sav Jiova. If di pɔsin kɔntinyu fɔ du di bad tin we i de du, i go pwɛl in padi biznɛs wit Jiova. I go mek di kɔngrigeshɔn sɛf gɛt badnem. So bikɔs wi lɛk Jiova ɛn di pɔsin we dɔn sin, wi nɔ go fred fɔ go mit di ɛlda dɛn ɛn tɛl dɛn wetin apin.—Sam 27:14.
AW DI ƐLDA DƐN KIN TRAY FƆ ƐP DI WAN DƐN WE DƆN KƆMIT SIRIƆS SIN?
4. Wetin na di men tin we di ɛlda dɛn go tray fɔ du we dɛn sidɔm fɔ tɔk wit pɔsin we dɔn kɔmit siriɔs sin?
4 We pɔsin na di kɔngrigeshɔn kɔmit siriɔs sin, di ɛlda dɛn kin pik tri ɛlda dɛn we kwalifay fɔ de na di kɔmiti. a Dɛn man dɛn ya fɔ no se nɔto ɔltin dɛn ebul fɔ du ɛn dɛn fɔ put dɛnsɛf dɔŋ. Pan ɔl we dɛn go tray fɔ ɛp di pɔsin we dɔn sin fɔ ripɛnt, dɛn no se dɛn nɔ go ebul fɔ fos am fɔ chenj. (Dyu. 30:19) Di ɛlda dɛn no se nɔto ɔlman we dɔn sin go ripɛnt lɛk aw Kiŋ Devid bin du. (2 Sam. 12:13) Sɔm pipul dɛn we dɔn sin kin disayd nɔ fɔ lisin to Jiova in advays. (Jɛn. 4:6-8) Bɔt di men tin we di ɛlda dɛn want na fɔ ɛp di pɔsin we dɔn sin fɔ ripɛnt if i pɔsibul. Us prinsipul dɛn ɛlda dɛn kin tink bɔt we dɛn sidɔm fɔ tɔk wit pɔsin we dɔn sin?
5. Us advays ɛlda dɛn fɔ tink bɔt we dɛn sidɔm fɔ tɔk wit pɔsin we dɔn sin? (2 Timoti 2:24-26) (Luk bak di pikchɔ.)
5 Di ɛlda dɛn de si di pɔsin we dɔn sin as ship we dɔn lɔs we rili valyu. (Lyuk 15:4, 6) So we dɛn sidɔm fɔ tɔk wit di pɔsin, dɛn de tek tɛm tɔk ɛn biev fayn to am, dɛn nɔ de fil se ɔl wetin dɛn nid fɔ du na fɔ aks di pɔsin kwɛstyɔn dɛn bɔt wetin apin. Bifo dat, dɛn de sho se dɛn gɛt di kwaliti dɛn we 2 Timoti 2:24-26 tɔk bɔt. (Rid.) Di ɛlda dɛn de tek tɛm tɔk ɛn trit di pɔsin fayn we dɛn de tray fɔ ɛp am fɔ chenj di we aw i de tink.
Jɔs lɛk di shɛpad dɛn we bin de trade, di ɛlda dɛn de tray tranga wan fɔ fɛn di ship dɛn we dɔn lɔs (Luk na paregraf 5)
6. Aw ɛlda dɛn go tray fɔ tink di rayt we bifo dɛn sidɔm fɔ tɔk wit di pɔsin we dɔn sin? (Romans 2:4)
6 Di ɛlda dɛn kin tray fɔ tink di we aw Jiova de tink. Dɛn de tray fɔ falamakata Jiova we dɛn de tɔk wit di pɔsin we dɔn sin ɛn dɛn de mɛmba wetin Pɔl bin tɔk we i se: “Gɔd gud na in mek i de tray fɔ mek yu ripɛnt.” (Rid Romans 2:4.) Di ɛlda dɛn fɔ mɛmba se dɛn na shɛpad dɛn we de wok ɔnda Krays. (Ayz. 11:3, 4; Mat. 18:18-20) Bifo di ɛlda dɛn sidɔm fɔ tɔk wit di pɔsin we dɔn kɔmit siriɔs sin, dɛn de tek tɛm pre ɛn mɛmba se wetin dɛn want na fɔ ɛp di pɔsin we dɔn sin fɔ ripɛnt. Dɛn go yuz di Baybul ɛn wi pɔblikeshɔn dɛn fɔ du risach ɛn dɛn go pre fɔ mek Jiova gi dɛn sɛns fɔ ɔndastand di pɔsin ɛn wetin apin. Dɛn go tink bɔt wetin dɛn nid fɔ no bɔt di pɔsin we mek i tink di we aw i bin tink ɛn du wetin i bin du.—Prɔv. 20:5.
7-8. Aw di ɛlda dɛn go falamakata Jiova we dɛn sidɔm fɔ tɔk wit pɔsin we dɔn sin?
7 Di ɛlda dɛn de falamakata Jiova fɔ peshɛnt. Dɛn de mɛmba aw Jiova bin tray fɔ ɛp di wan dɛn we bin sin trade. Fɔ ɛgzampul, Jiova bin peshɛnt tɔk to Ken ɛn wɔn am bɔt di bad tin dɛn we go apin if i sin ɛn tɛl am bɔt di blɛsin dɛn we i go gɛt if i obe. (Jɛn. 4:6, 7) Jiova bin yuz prɔfɛt Netan fɔ kɔrɛkt Devid. Netan bin yuz ɛgzampul fɔ ɛp Devid fɔ ripɛnt. (2 Sam. 12:1-7) Ɛn Jiova bin “kɔntinyu fɔ sɛn” in prɔfɛt dɛn “bɔku bɔku tɛm” fɔ wɔn di trangayes Izrɛlayt dɛn. (Jɛr. 7:24, 25) I nɔ bin wet fɔ lɛ in pipul dɛn ripɛnt fɔs bifo i ɛp dɛn. Bifo dat, i bin de ɛnkɔrej dɛn fɔ ripɛnt.
8 Ɛlda dɛn de falamakata Jiova in ɛgzampul we dɛn de tray fɔ ɛp di wan dɛn we dɔn kɔmit siriɔs sin. “Di ɛlda dɛn de “rili peshɛnt” we dɛn de tɔk wit dɛn kɔmpin Kristian we dɔn sin, jɔs lɛk aw 2 Timoti 4:2 tɔk. So ɛlda fɔ tek tɛm tɔk ɛn peshɛnt ɔltɛm fɔ mek i go ebul ɛp di pɔsin we dɔn sin fɔ du di rayt tin. If di ɛlda vɛks, sɔntɛm di pɔsin nɔ go lisin to di advays we i de gi am ɔ sɔntɛm i nɔ go gri fɔ ripɛnt.”
9-10. Aw ɛlda dɛn go ɛp di pɔsin we sin fɔ tink bɔt di tin dɛn we i du we mek i sin?
9 Di ɛlda dɛn kin tray fɔ no di tin dɛn we apin we mek di pɔsin ɛnd-ɔp fɔ sin. Fɔ ɛgzampul, fɔ se di pɔsin in padi biznɛs wit Jiova nɔ bin tayt igen bikɔs i nɔ bin de du pasɔnal stɔdi ɔ go fil savis? Fɔ se i nɔ bin de pre to Jiova ɔltɛm lɛk aw i bin dɔn de du? Fɔ se i nɔ bin de tray fɔ avɔyd tin dɛn we bad? Fɔ se i dɔn de yuz tin dɛn we nɔ fayn fɔ ɛnjɔy insɛf ɔ i gɛt bad padi dɛn? Ɛn aw di tin dɛn we i bin disayd fɔ du afɛkt di we aw i de tink? I ɔndastand aw di tin dɛn we i bin disayd fɔ du ɛn di tin dɛn we i du afɛkt in Papa Jiova?
10 We di ɛlda dɛn tek tɛm aks kwɛstyɔn dɛn ɛn nɔ aks kwɛstyɔn bɔt tin dɛn we dɛn nɔ nid fɔ no bɔt, dɛn go ebul fɔ mek di pɔsin we dɔn sin tɔk to dɛn ɛn ɛp am fɔ tink bɔt di tin dɛn we mek i sin. (Prɔv. 20:5) Dɔn bak, di ɛlda dɛn kin yuz ɛgzampul fɔ ɛp di pɔsin fɔ tink ɛn ɔndastand aw di tin we i du rili bad jɔs lɛk aw Netan bin du we i go tɔk to Devid. Sɔntɛm, di fɔs tɛm we di ɛlda dɛn sidɔm wit di pɔsin, i go sho se i rili sɔri fɔ di tin dɛn we i dɔn du. Sɔntɛm i go ivin ripɛnt.
11. Aw Jizɔs bin de trit sina dɛn?
11 Di ɛlda dɛn de tray fɔ falamakata Jizɔs in ɛgzampul. We Jizɔs we bin dɔn gɛt layf bak bin de tɔk to Sɔl we kɔmɔt na Tasɔs, i bin aks am dis kwɛstyɔn fɔ mek i tink: “Sɔl, Sɔl, wetin mek yu de mek a sɔfa?” Di kwɛstyɔn we Jizɔs aks bin ɛp am fɔ no se wetin i de du bad. (Akt 9:3-6) We Jizɔs bin de tɔk bɔt “da uman Jezibɛl,” i bin tɔk se: “A . . . gi am tɛm fɔ ripɛnt.”—Rɛv. 2:20, 21.
12-13. Aw ɛlda dɛn kin gi pɔsin we dɔn sin tɛm fɔ ripɛnt? (Luk bak di pikchɔ.)
12 Di ɛlda dɛn de falamakata Jizɔs in ɛgzampul bay we dɛn nɔ de rɔsh fɔ disayd se di pɔsin nɔ want fɔ chenj di we aw i de tink ɛn di tin dɛn we i de du. Pan ɔl we sɔm pipul dɛn go ripɛnt di fɔs tɛm we di ɛlda dɛn sidɔm wit dɛn, ɔda pipul dɛn kin nid mɔ tɛm fɔ ripɛnt. So di ɛlda dɛn kin disayd fɔ tɔk wit di pɔsin pas wan tɛm. Sɔntɛm, afta di fɔs tɛm we dɛn sidɔm fɔ tɔk wit di pɔsin we dɔn sin, i go bigin fɔ tink siriɔs wan bɔt di tin dɛn we dɛn dɔn tɛl am. Sɔntɛm i go put insɛf dɔŋ ɛn pre to Jiova. (Sam 32:5; 38:18) So di nɛks tɛm we dɛn go sidɔm wit am, i nɔ go biev lɛk aw i bin biev di fɔs tɛm we dɛn bin sidɔm fɔ tɔk wit am.
13 Di ɛlda dɛn kin sho sɔri-at ɛn tɔk fayn to di pɔsin we dɔn sin ɛn ɛp am fɔ ripɛnt. Dɛn kin op ɛn pre se Jiova go blɛs di tranga wok we dɛn de du fɔ ɛp di pɔsin we dɔn sin fɔ no se wetin i du bad ɛn ripɛnt.—2 Tim. 2:25, 26.
Di ɛlda dɛn go sidɔm wit di pɔsin we kɔmit siriɔs sin pas wan tɛm fɔ gi am tɛm fɔ ripɛnt (Luk na paregraf 12)
14. Udat fɔ gɛt di prez we pɔsin we sin ripɛnt? Wetin mek?
14 If di pɔsin we sin ripɛnt, wi go gladi pasmak! (Lyuk 15:7, 10) Udat fɔ gɛt di prez? Na di ɛlda dɛn? Mɛmba wetin Pɔl bin rayt bɔt sina dɛn. I se: “Sɔntɛm Gɔd go alaw dɛn fɔ ripɛnt.” (2 Tim. 2:25) Wan stɔdi not fɔ dis vas tɔk se: “We di pɔsin chenj di we aw i de tink ɛn biev, nɔto ɛni mɔtalman fɔ gɛt di prez, bɔt na Jiova fɔ gɛt di prez bikɔs na in ɛp di Kristian we nɔ bin de tek advays fɔ chenj di we aw i bin de biev. Pɔl bin kɔntinyu fɔ tɔk bɔt sɔm pan di fayn fayn tin dɛn we kin apin we pɔsin ripɛnt. I se, i de mek di pɔsin we sin no di tru tin dɛn na di Baybul mɔ ɛn mɔ, i de ɛp am fɔ bigin tink di rayt we bak, ɛn dis go ɛp am lɛ i nɔ fɔdɔm na Setan in trap.”—2 Tim. 2:26.
15. Aw ɛlda dɛn go kɔntinyu fɔ ɛp pɔsin we dɔn ripɛnt?
15 We pɔsin we dɔn sin ripɛnt, di ɛlda dɛn we bin de na di kɔmiti go kɔntinyu fɔ de du shɛpadin visit fɔ mek di pɔsin kɔntinyu fɔ gɛt di ɛp we i nid fɔ fɛt agens Setan in trap dɛn, ɛn fɔ mek stret rod dɛn fɔ in fut. (Ibru. 12:12, 13) As wi ɔl no, di ɛlda dɛn nɔ de tɛl ɔda pipul dɛn wetin di pɔsin du we mek i sin. Bɔt wetin di kɔngrigeshɔn go nid fɔ no?
“KƆRƐKT” DI PƆSIN “BIFO ƆLMAN”
16. Akɔdin to 1 Timoti 5:20, udat dɛn Pɔl bin de tɔk bɔt we i se “bifo ɔlman”?
16 Rid 1 Timoti 5:20. Pɔl bin rayt dis lɛta to in kɔmpin ɛlda we na Timoti we i de tɔk bɔt wetin fɔ du to di wan dɛn we dɔn mek am abit fɔ de sin. Wetin i bin min? I go bi se nɔto di wan ol kɔngrigeshɔn i bin de tɔk bɔt we i se “bifo ɔlman.” Bɔt i bin de tɔk bɔt di wan dɛn we ɔlrɛdi no bɔt di sin we di pɔsin dɔn kɔmit. I kin bi di wan dɛn we si wetin apin ɔ we di pɔsin tɛl bɔt wetin i du. Di ɛlda dɛn kin mek dɛn pipul dɛn de no se dɛn dɔn tɔk to di pɔsin ɛn dɛn dɔn kɔrɛkt am.
17. If bɔku pipul dɛn na di kɔngrigeshɔn dɔn ɔlrɛdi no bɔt di siriɔs sin we pɔsin kɔmit ɔ sɔntɛm dɛn go no leta, us anawnsmɛnt dɛn go mek? Wetin mek?
17 Sɔntɛnde, bɔku pipul dɛn na di kɔngrigeshɔn kin dɔn ɔlrɛdi no bɔt di bad tin we di pɔsin du ɔ sɔntɛm dɛn go no leta. If na so i bi, dat min se di wɔd dɛn “bifo ɔlman” go min di wan ol kɔngrigeshɔn. So wan ɛlda go mek anawnsmɛnt fɔ mek di kɔngrigeshɔn no se dɛn dɔn ripruv di brɔda ɔ di sista. Wetin mek? Pɔl bin ansa. I se: “Fɔ lɛ i bi wɔnin to di ɔda wan dɛn” fɔ mek dɛn nɔ go kɔmit siriɔs sin.
18. Wetin di ɛlda dɛn go du if baptayz pɔblisha we nɔ rich 18 ia yet kɔmit siriɔs sin? (Luk bak di pikchɔ.)
18 Wetin fɔ du if pikin we dɔn baptayz we nɔ rich 18 ia yet kɔmit siriɔs sin? Di ɛlda dɛn go mek arenjmɛnt fɔ mek tu ɛlda dɛn sidɔm wit di pikin ɛn in mama ɛn papa we na Kristian. b Di ɛlda dɛn go tray fɔ no wetin di mama ɛn papa dɔn du fɔ ɛp di pikin fɔ ripɛnt. If di pikin biev fayn ɛn in mama ɛn papa ebul fɔ ɛp am, di tu ɛlda dɛn go disayd se nid nɔ de fɔ mek kɔmiti fɔ tɔk wit di pikin ɛn in mama ɛn papa. Afta ɔl, na dɛn Gɔd dɔn gi di wok fɔ kɔrɛkt dɛn pikin dɛn di we we de sho se dɛn lɛk dɛn. (Dyu. 6:6, 7; Prɔv. 6:20; 22:6; Ɛfi. 6:2-4) Di ɛlda dɛn go de tɔk to di pikin in mama ɛn papa fɔ mek shɔ se di pikin de gɛt di ɛp we i nid. Bɔt wetin fɔ du if pikin we nɔ rich 18 ia yet we dɔn baptayz nɔ gri fɔ ripɛnt? Da tɛm de, di ɛlda dɛn go mek kɔmiti fɔ tɔk wit di pikin ɛn in mama ɛn papa we na Kristian.
We baptayz pɔblisha we nɔ rich 18 ia yet kɔmit siriɔs sin, tu ɛlda dɛn go sidɔm wit in ɛn in mama ɛn papa we na Kristian (Luk na paregraf 18)
“JIOVA RILI LƐK WI ƐN I GƐT SƆRI-AT”
19. Aw ɛlda dɛn go tray fɔ falamakata Jiova we dɛn sidɔm fɔ tɔk wit pɔsin we dɔn kɔmit siriɔs sin?
19 Di ɛlda dɛn we dɛn pik fɔ de na di kɔmiti gɛt di wok fɔ mek di kɔngrigeshɔn kɔntinyu fɔ klin na Jiova in yay. (1 Kɔr. 5:7) Dɛn want bak mek di pɔsin we dɔn sin ripɛnt if i pɔsibul. So we di ɛlda dɛn de tray fɔ ɛp di pɔsin, dɛn de kɔntinyu fɔ op se i go ripɛnt. Wetin mek? Na bikɔs dɛn want fɔ falamakata Jiova we “rili lɛk wi ɛn gɛt sɔri-at.” (Jems 5:11) Notis aw apɔsul Jɔn bin sho se i lɛk di brɔda ɛn sista dɛn. I bin rayt se: “Mi smɔl pikin dɛn, a de rayt to una dɛn tin ya so dat una nɔ go sin. Bɔt stil, if ɛnibɔdi sin, wi gɛt pɔsin we de ɛp wi, we na Jizɔs Krays, we de wit di Papa, ɛn we de du wetin rayt.”—1 Jɔn 2:1.
20. Wetin wi go tɔk bɔt insay di las atikul na dis siriz?
20 I sɔri fɔ no se, sɔntɛnde sɔm brɔda ɛn sista dɛn nɔ kin gri fɔ ripɛnt. If dat apin dɛn fɔ pul dɛn kɔmɔt na di kɔngrigeshɔn. Wetin ɛlda dɛn go du we dɛn gɛt kes dɛn we siriɔs lɛk dat? Wi go tɔk bɔt dat insay di las atikul na dis siriz.
SIŊ 103 Man dɛn—We Na Gift
a Trade, dɛn bin de kɔl dɛn grup dɛn ya judishal kɔmiti. Bɔt bikɔs fɔ jɔj ɔda pipul dɛn na jɔs wan pan di wok dɛn we ɛlda dɛn de du, wi nɔ go kɔl dɛn grup dɛn de judishal kɔmiti igen. Bifo dat, wi go jɔs kɔl dis grup ɛlda kɔmiti.
b Di tin we dɛn tɔk fɔ mama ɛn papa dɛn de bak fɔ di wan dɛn we de adɔpt pikin akɔdin to di lɔ ɔ di wan dɛn we de kia fɔ pikin dɛn we nɔ rich 18 ia yet.
