Insay di Baybul, di Grik wɔd we dɛn translet as “du wetin rayt” min sɔntin we “rili gud ɔ we pɔsin du sɔntin we ɔnɛs.” I kin min bak sɔntin we rili fayn fɔ wach.

Kristian dɛn rili rɛspɛkt wetin di apɔsul Pɔl bin tɔk we i se: “Wi . . . want du wetin rayt ɔltɛm.” Wetin dat min?

Ɛni mɔnin, bɔku pipul dɛn kin luk dɛnsɛf na mirɔ bifo dɛn kɔmɔt na dɛn os. Wetin mek? Na bikɔs dɛn kin want fɔ luk fayn. But sɔntin de we mɔ impɔtant pas fɔ gɛt fayn bab, fayn ia stayl, ɔ fayn klos. Fɔ tru, di pɔsin we wi rili bi kin mek pipul dɛn lɛk wi ɔ nɔ lɛk wi.

Gɔd in Wɔd ɛp wi fɔ no klia wan se wi at kin want fɔ du wetin bad ɔltɛm. Jɛnɛsis 8:​21 tɔk se: “A nɔ se frɔm we [mɔtalman] smɔl na soso bad tin i de tink bɔt.” So fɔ lɛ wi go bi pɔsin we ɔnɛs, wi fɔ tray ɔltɛm lɛ wi nɔ de du di bad tin dɛn we wi at de tɛl wi fɔ du. Di apɔsul Pɔl ɛksplen to wi aw i nɔ bin izi fɔ am fɔ du di rayt tin, we i se: “Insay mi at, a lɛk fɔ du wetin Gɔd in lɔ se mɔtalman fɔ du. Bɔt di lɔ we mi bɔdi de fala difrɛn frɔm di lɔ we mi at tɛl mi se na di rayt wan. Na dat mek a tan lɛkɛ jelman to di lɔ we mi bɔdi de fala, we de mek a sin.”—Lɛta Fɔ Rom 7:​22, 23.

Fɔ ɛgzampul, we wi at tɛl wi fɔ du sɔntin we bad ɛn wi rili want fɔ du sɔntin we nɔ ɔnɛs, wi nɔ fɔ alaw wi at fɔ kɔntrol wi. Wi stil gɛt fɔ disayd if wi go du wetin rayt ɔ wetin nɔ rayt. We wi nɔ du di bad tin we wi at de tɛl wi fɔ du, wi go bi ɔnɛs pɔsin ilɛksɛf di pipul dɛn we de arawnd wi nɔ ɔnɛs.

Fɔ bi ɔnɛs pɔsin, wi nid fɔ no wetin rili rayt ɛn wetin rɔng. Bɔt i sɔri fɔ no se bɔku pipul dɛn kin spɛn mɔ tɛm fɔ disayd aw fɔ drɛs pas fɔ tink bɔt wetin rayt ɔ rɔng. Dis kin mek dɛn gi sɔm rizin dɛn we mek dɛn nɔ kin ɔnɛs pan sɔm tin dɛn. Wan buk we nem The (Honest) Truth About Dishonesty tɔk se: “Wi kin du sɔntin we kruk di we we go mek pipul dɛn stil si wi as pɔsin we ɔnɛs.” Ɛnitin de we go ɛp wi fɔ disayd if wi fɔ kruk smɔl ɔ wi nɔ fɔ kruk atɔl? Tɛl Gɔd tɛnki, sɔntin de we go ɛp wi.

Ɔlsay na di wɔl, bɔku bɔku pipul dɛn dɔn kam fɔ si se di Baybul de rili ɛp dɛn. Di Baybul go ɛp pɔsin fɔ no wetin rayt ɛn wetin rɔng pas ɛni ɔda buk. (Sam 19:​7) I de gi fayn advays dɛn bɔt famili layf, wok biznɛs, di we aw fɔ liv wi layf, ɛn aw fɔ wɔship Gɔd. Frɔm trade trade, di Baybul  dɔn de ɛp pipul dɛn te naw. In lɔ ɛn advays dɛn de wok fɔ ɔlkayn pipul dɛn, ilɛk us kɔntri ɔ trayb we dɛn kɔmɔt, ɔ di kɔlɔ we dɛn gɛt. We wi tek tɛm rid di Baybul, tink gud wan bɔt wetin i tɔk, ɛn fala di advays dɛn we i gi, wi go ebul fɔ du tin stret wan.

Bɔt fɔ lɛ wi bi ɔnɛs pɔsin, wi nɔ fɔ jɔs no di tru tin dɛn we de na di Baybul nɔmɔ. Wi fɔ mɛmba se di wɔl we wi de liv insay tide kɔrɔpt ɛn di pipul dɛn na di wɔl kin want lɛ wisɛf kɔrɔpt. Na dat mek wi nid fɔ pre to Gɔd fɔ lɛ i ɛp ɛn sɔpɔt wi. (Lɛta Fɔ Filipay 4:​6, 7) We wi du so, wi go gɛt di maynd fɔ tinap tranga wan fɔ du wetin rayt ɔltɛm.

Itoshi, we wi bin tɔk bɔt na di fɔs atikul bin bɛnifit we dɛn no am as pɔsin we ɔnɛs. Naw, di bɔsman we Itoshi de wok fɔ lɛk am bikɔs i ɔnɛs. Itoshi bin tɔk se: “A tɛl Gɔd tɛnki we a ebul fɛn wok we de alaw mi fɔ gɛt klin kɔnshɛns.”

Ɔda pipul dɛn dɔn si se dis na tru. Lɛ wi tɔk bɔt sɔm pipul dɛn we dɔn fala di Baybul in advays fɔ “du wetin rayt ɔltɛm.”

• Klin Kɔnshɛns

  “A lɛf skul we a ol 13 ia fɔ wok wit tifman dɛn. So, bɔku pan di mɔni we a bin gɛt na frɔm dis tif biznɛs a gɛt am. Leta, a mared, dɔn mi ɛn mi man bigin fɔ stɔdi di Baybul wit Jiova Witnɛs dɛn. Wi kam fɔ lan se Jiova a Gɔd et pipul dɛn we de du tin dɛn we nɔ ɔnɛs, so wi disayd fɔ chenj wi layf. Insay 1990 wi gi wi layf to Jiova ɛn baptayz fɔ bi Jiova Witnɛs.”—Prɔvabs 6:​16-19.

  “Trade, ɔl di prɔpati dɛn we a bin gɛt insay mi os na bin tif tin dɛn, bɔt naw dɛn tin dɛn de nɔ de igen na mi os; ɛn dis dɔn mek a gɛt klin kɔnshɛns. We a kin tink bɔt di tɛm we a nɔ bin bi ɔnɛs pɔsin, a kin tɛl Jiova tɛnki fɔ we i sɔri fɔ mi. A kin fil fayn we a kin go slip ɛni nɛt bikɔs a no se Jiova gladi fɔ mi naw.”—Chɛril, Ayriland.

  “We mi bɔsman bin kam fɔ no se a nɔ tek brayb na wan kɔstɔma in an, i bin tɛl mi se: ‘Yu Gɔd dɔn mek yu bi pɔsin we ɔlman kin biliv! Na big big blɛsin fɔ gɛt yu na wi kɔmni.’ Bikɔs a ɔnɛs pan ɔltin, dat dɔn ɛp mi fɔ gɛt klin kɔnshɛns bifo Jiova Gɔd. I dɔn mek a ebul fɔ ɛp mi famili ɛn ɔda pipul dɛn bak fɔ du di sem tin.”—Sɔni, Ɔŋ Kɔŋ.

• Kolat At

  “A de wok na wan intanashɔnal bank ɛn mi na big man na di bank. Insay dis biznɛs, pipul dɛn kin si am se fɔ jɛntri i impɔtant pas fɔ bi ɔnɛs pɔsin. Bɔku pipul dɛn tink se, ‘Natin nɔ bad fɔ lɛ pɔsin du smɔl kruk if dat go mek i jɛntri ɛn ɛp di kɔntri fɔ gɛt mɔni.’ Bɔt bikɔs a ɔnɛs, a gɛt kolat. A dɔn mekɔp mi maynd fɔ bi ɔnɛs pɔsin ilɛk wetin apin. Mi bɔs dɛn no se a nɔ go lay to dɛn ɛn a nɔ go lay fɔ dɛn.”—Tɔm, Amɛrika.

• Pipul dɛn Go Rɛspɛkt Yu

  “Di pɔsin we kin dayrɛkt mi we a de wok bin ɛnkɔrej mi fɔ lay bɔt sɔm tin dɛn we bin lɔs na wi wokples, bɔt a nɔ bin du am. We dɛn bin kech di tifman dɛn, mi bɔs bin tɛl mi tɛnki fɔ we a bi ɔnɛs pɔsin. Fɔ bi ɔnɛs pɔsin na dis wɔl usay pipul dɛn nɔ ɔnɛs, wi fɔ gɛt maynd. Bɔt as tɛm de go, pipul dɛn go biliv wi ɛn rɛspɛkt wi.”—Kaori, Jepan.

Wi dɔn si klia wan se we pɔsin ɔnɛs, i kin mek i gɛt klin kɔnshɛns, kolat, ɛn pipul dɛn go rɛspɛkt am. Yu nɔ gri?