1-3. (a) Wetin mek wi biliv se wi kin bi Gɔd in padi? (b) Udat dɛn wi go tɔk bɔt insay dis atikul?

 INSAY di Baybul, dɛn kɔl Ebraam Gɔd in padi tri tɛm. (Sɛkɛn Kronikul 20:​7; Ayzaya 41:​8; Jems 2:​23) Na in wangren di Baybul kɔl Gɔd in padi. Fɔ se na Ebraam na di wangren mɔtalman we dɔn bi Jiova in padi? Nɔ-o, nɔto so i bi. Di Baybul sho se wi ɔl kin bi Jiova in padi. Ɛn dis na big big ɔnɔ.

² Di Baybul gɛt bɔku ɛgzampul dɛn bɔt fetful man ɛn uman dɛn we bin de fred Jiova, we bin biliv am, ɛn we kam fɔ bi in tayt padi. (Rid Sam 25:​14, NW.) Dɛn fetful man ɛn uman ya na sɔm pan di bɔku bɔku pipul dɛn we Pɔl bin tɔk se “dɔn sho klia wan wetin fɔ biliv Gɔd, min.” Ɔl dɛn difrɛn pipul dɛn ya na bin Gɔd in padi dɛn.—Di Ibru Pipul Dɛn 12:​1.

³ Lɛ wi tɔk bɔt tri pan Jiova in padi dɛn we de insay di Baybul: (1) Ruth, wan yɔŋ uman na Moab we in man bin dɔn day, we nɔ bin kɔmɔt biɛn Jiova ɛn in mɔdɛnlɔ,  (2) Ɛzikaya, wan fetful Kiŋ na Juda, ɛn (3) Meri, Jizɔs in mama we bin ɔmbul. Wetin wi kin lan frɔm di we aw dɛn kam fɔ bi Gɔd in padi?

4, 5. Wetin Ruth bin gɛt fɔ disayd we nɔ bin izi fɔ am? Wetin mek i nɔ bin izi fɔ am? (Luk di pikchɔ nia dis atikul in taytul.)

⁴ Naomi, wit in tu dɔtɛnlɔ dɛn we nem Ruth ɛn Ɔpa, bin de waka frɔm Moab de go na Izrɛl. Frɔm Moab to Izrɛl bin fa. As dɛn bin de waka de go, Ɔpa bin disayd fɔ go bak na Moab usay in pipul dɛn de. Bɔt Naomi bin dɔn mekɔp in maynd fɔ go bak na Izrɛl, usay i bin kɔmɔt. Wetin Ruth bin disayd fɔ du? I bin gɛt fɔ disayd fɔ du sɔntin we nɔ rili izi fɔ am. I bin gɛt fɔ disayd if i go go bak na Moab fɔ go de wit in famili, ɔ if i fɔ de wit in mɔdɛnlɔ ɛn travul go na Bɛtliɛm.—Ruth 1:​1-8, 14.

⁵ Ruth in famili bin de na Moab. If i bin want, i fɔ dɔn go bak to dɛn ɛn sɔntɛm dɛn bin fɔ dɔn kia fɔ am. I bin no di pipul dɛn, di langwej, ɛn dɛn kɔlchɔ. Naomi nɔ bin ebul fɔ prɔmis Ruth se i go no ɔl dɛn tin ya na Bɛtliɛm. Ɛn Naomi bin de fred se i nɔ go ebul fɔ fɛn man fɔ am we i go mared. So Noami bin tɛl am fɔ go bak na Moab. As wi bin dɔn lan, Ɔpa “go bak to in pipul dɛn ɛn di gɔd dɛn we dɛn de wɔship.” (Ruth 1:​9-15) Bɔt Ruth bin disayd se i nɔ go go bak to in pipul dɛn ɛn dɛn lay lay gɔd dɛn.

6. (a) Us fayn tin Ruth bin disayd fɔ du? (b) Wetin mek Boaz bin tɔk se Ruth bin abop pan Jiova fɔ kɔba am?

⁶ I go mɔs bi se Ruth bin lan bɔt Jiova frɔm in man ɔ frɔm Naomi. I bin lan se Jiova nɔ tan lɛk di gɔd dɛn we de na Moab. I bin lɛk Jiova ɛn i bin no se na Jiova nɔmɔ i fɔ lɛk ɛn wɔship. So Ruth bin disayd fɔ du di rayt tin. I bin tɛl Naomi se: “In pipul go bi insɛf yon pipul ɛn di . . . GƆD we i de wɔship [na in] insɛf go wɔship.” (Ruth 1:​16) We wi tink bɔt di kayn lɔv we Ruth bin gɛt fɔ Noami, i kin rili tɔch wi at. Bɔt di tin we kin tɔch wi at mɔ na di kayn lɔv we Ruth bin gɛt fɔ Jiova. Na dis bak bin mek Boaz kɔle Ruth, we mek leta i bin prez am fɔ we i “abop pan” Jiova “fɔ kɔba am.” (Rid Ruth 2:​12.) Dɛn wɔd ya we Boaz bin tɔk kin mek wi mɛmba aw fɔl pikin kin go ɔnda in mama in fɛda fɔ lɛ i protɛkt am. (Sam 36:​7; 91:​1-4) Na da sem we de, Jiova bin protɛkt Ruth ɛn blɛs am fɔ in fet we i bin gɛt. Ruth nɔ bin ɛva rigrɛt wetin i disayd fɔ du.

7. Wetin go ɛp di wan dɛn we de fred fɔ gi dɛn layf to Jiova?

⁷ Bɔku pipul dɛn kin lan bɔt Jiova, bɔt dɛn kin disayd nɔ fɔ abop pan am. Dɛn kin fred fɔ gi dɛn layf to Jiova ɛn baptayz. If yu de fil da sem we de, tink bɔt wetin mek yu de fred. Ɔlman gɛt gɔd we i de sav. (Jɔshwa 24:​15) Di rayt tin we wi go disayd fɔ du na fɔ sav di tru Gɔd. We yu gi yu layf to Jiova, yu de sho se yu biliv se Jiova go protɛkt yu. Ɛn i go ɛp yu fɔ kɔntinyu fɔ sav am ilɛk uskayn prɔblɛm kam yu we. Na dat Gɔd bin du fɔ Ruth.

8. Tɔk smɔl bɔt Ɛzikaya in stori.

⁸ Ɛzikaya in stori bin difrɛn frɔm  Ruth in stori. Ɛzikaya na bin Izrɛlayt ɛn di Izrɛlayt dɛn bin dɔn gi dɛn layf to Gɔd. Bɔt nɔto ɔl di Izrɛlayt dɛn bin kɔntinyu fɔ du wetin Gɔd want. Ɛzikaya in papa, we na Kiŋ Eaz, bin wikɛd. I nɔ bin sho wan rɛspɛkt fɔ Gɔd in tɛmpul ɛn i bin mek di pipul dɛn wɔship ɔda gɔd dɛn. Eaz bin ivin bɔn sɔm pan Ɛzikaya in brɔda dɛn layf layf wan na faya fɔ mek sakrifays to wan lay lay gɔd. Di tin dɛn we bin apin arawnd Ɛzikaya di tɛm we i smɔl bin rili bad!—Sɛkɛn Kiŋ 16:​2-4, 10-17; Sɛkɛn Kronikul 28:​1-3.

9, 10. (a) Wetin fɔ dɔn mek Ɛzikaya vɛks? (b) Wetin mek wi nɔ fɔ vɛks pan Gɔd? (c) Wetin mek wi nɔ fɔ tink se di famili we wi kɔmɔt de sho di kayn pɔsin we wi go bi?

⁹ Eaz in bad ɛgzampul fɔ dɔn mek in pikin, Ɛzikaya, vɛks pan Jiova. Tide, sɔm pipul dɛn we bin dɔn bia smɔl tin we nɔ pas wetin Ɛzikaya bin bia kin fil se dɛn gɛt gud rizin fɔ “blem” Jiova ɔ vɛks pan in ɔganayzeshɔn. (Prɔvabs 19:​3) Ɔda pipul dɛn fil se di bad ɛgzampul na dɛn famili kin mek dɛn liv bad layf ɔ ripit di mistek dɛn we dɛn mama ɔ papa bin dɔn mek. (Izikɛl 18:​2, 3) Yu tink se dis we aw dɛn de tink kɔrɛkt?

¹⁰ Ɛzikaya in layf sho se di ansa to da kwɛstyɔn de na nɔ! No gud rizin nɔ de fɔ vɛks pan Jiova bikɔs i nɔ de mek bad tin apin to pipul dɛn. (Job 34:​10) Na tru se mama ɛn papa dɛn kin tich dɛn pikin dɛn fɔ du gud tin ɔ bad tin. (Prɔvabs 22:​6; Lɛta Fɔ Kɔlɔse 3:​21) Bɔt dis nɔ min se di famili we wi kɔmɔt na in go sho di kayn pɔsin we wi go bi. Wetin mek? Na bikɔs Jiova dɔn gi wi fridɔm fɔ disayd fɔ du gud tin ɔ bad tin. (Ditarɔnɔmi 30:​19) Aw Ɛzikaya bin yuz dis fridɔm?

11. Wetin bin mek Ɛzikaya bi wan pan di bɛst kiŋ dɛn na Juda?

¹¹ Ivin we Ɛzikaya in papa na bin wan pan di bad kiŋ dɛn na Juda, Ɛzikaya in bin bi wan pan di bɛst kiŋ dɛn. (Rid Sɛkɛn Kiŋ 18:​5, 6.) I bin disayd nɔ fɔ fala in papa in bad ɛgzampul. Bifo dat, i bin disayd fɔ tek tɛm lisin to Jiova in prɔfɛt dɛn, lɛk Ayzaya, Mayka, ɛn Ozea. I bin de lisin gud wan to dɛn  advays ɛn lisin we dɛn bin de kɔrɛkt am. Dis bin mek i ebul fɔ sɔlv bɔku prɔblɛm dɛn we in papa bin briŋ kam. I bin klin di tɛmpul, i beg Gɔd fɔ lɛ i fɔgiv di pipul dɛn sin dɛn, ɛn i pwɛl ɔl di aydɔl dɛn na di land. (Sɛkɛn Kronikul 29:​1-11, 18-24; 31:​1) Leta, we di Asirian kiŋ we nem Sɛnakarib, bin trɛtin fɔ atak Jerusɛlɛm, Ɛzikaya bin sho se i rili gɛt maynd ɛn fet. I bin abop pan Jiova fɔ protɛkt am ɛn i bin kɔrej di pipul dɛn fɔ lɛ dɛn nɔ fred. (Sɛkɛn Kronikul 32:​7, 8) Tɛm bin kam we Ɛzikaya bigin fɔ mek prawd, bɔt we Jiova kɔrɛkt am, i bin put insɛf dɔŋ. (Sɛkɛn Kronikul 32:​24-26) Wi dɔn si klia wan se Ɛzikaya na fayn ɛgzampul fɔ lɛ wi falamakata. I nɔ bin mek di famili we i kɔmɔt mek i du bad tin. Bifo dat, i bin sho se in na Jiova in padi.

12. Jɔs lɛk Ɛzikaya, aw bɔku pipul dɛn tide dɔn sho se dɛn na Jiova in padi?

¹² Tide bɔku pipul dɛn na di wɔl wikɛd ɛn dɛn nɔ de sho lɔv, ɛn bɔku pikin dɛn nɔ kin gɛt mama ɛn papa we lɛk dɛn ɛn we de kia fɔ dɛn as dɛn de gro ɔp. (Sɛkɛn Lɛta To Timoti 3:​1-5) Pan ɔl we bɔku Kristian dɛn kɔmɔt na famili dɛn we nɔ de du di rayt tin, dɛn dɔn disayd fɔ mek padi biznɛs wit Jiova. Jɔs lɛk Ɛzikaya, dɛn dɔn sho se dɛn famili nɔ go disayd uskayn pɔsin we dɛn go bi tumara bambay. Gɔd dɔn gi wi di fridɔm fɔ disayd wetin wi want fɔ du, ɛn wi kin disayd fɔ sav am ɛn ɔnɔ am, jɔs lɛk aw Ɛzikaya bin du.

13, 14. Wetin go dɔn mek Meri in wok nɔ izi fɔ am? Wetin i bin du afta enjɛl Gebrɛl tɔk to am?

¹³ Afta lɔng tɛm we Ɛzikaya day, wan yɔŋ uman bin de we nem Meri. I bin ɔmbul ɛn i bin gɛt spɛshal padi biznɛs wit Jiova ɛn Jiova bin gi am wan spɛshal wok. Di spɛshal wok na dat Meri go gɛt bɛlɛ, bɔn Gɔd in Pikin, ɛn mɛn am! Jiova go mɔs dɔn lɛk Meri ɛn biliv am we mek i gi am da kayn big ɔnɔ de. Bɔt wetin i bin du di fɔs tɛm we i  yɛri bɔt di wok we Jiova gɛt fɔ am?

¹⁴ Bɔku tɛm wi kin tɔk bɔt di big big ɔnɔ we Jiova bin gi Meri. Bɔt wetin na sɔm tin dɛn we go dɔn mek Meri fred? Fɔ ɛgzampul, enjɛl Gebrɛl bin tɛl am se i go gɛt bɛlɛ pan ɔl we i nɔ go du mami ɛn dadi biznɛs. Bɔt enjɛl Gebrɛl nɔ bin ɛksplen to in famili ɛn neba dɛn bɔt aw i go gɛt bɛlɛ. Wetin in famili ɛn neba dɛn go tink? Aw i go mek Josɛf biliv se i nɔ du mami ɛn dadi biznɛs wit ɔda pɔsin? Apat frɔm dat, i go gɛt big wok fɔ mɛn Gɔd in Pikin afta we i bɔn am!  Wi nɔ no ɔl wetin bin de mek Meri wɔri, bɔt wi no wetin i du afta we enjɛl Gebrɛl bin tɔk to am. Meri tɔk se: “Mi na Gɔd in savant, mek ɔl wetin yu dɔn tɔk se go bi to mi, bi.”—Lyuk 1:​26-38.

15. Wetin mek Meri bin rili gɛt fet?

¹⁵ Meri bin rili gɛt fet! I bin rɛdi fɔ du ɛnitin we dɛn tɛl am jɔs lɛk ɛni savant. I bin biliv se Jiova go kia fɔ am ɛn protɛkt am. Wetin go dɔn mek Meri gɛt dis kayn fet? Dɛn nɔ bɔn wi wit fet. Bɔt wi kin gɛt fet if wi du di tin dɛn we go mek wi gɛt am ɛn beg Gɔd fɔ blɛs wi fɔ di tray we wi de tray fɔ gɛt fet. (Lɛta Fɔ Galeshya 5:​22, NW; Lɛta Fɔ Ɛfisɔs 2:​8) Meri bin wok tranga wan fɔ gɛt mɔ fet. Aw wi no dis? Lɛ wi tɔk bɔt aw i bin de lisin ɛn wetin i bin tɔk bɔt.

16. Wetin sho se Meri bin de lisin gud wan?

¹⁶ Aw Meri bin lisin? Di Baybul tɔk se: “Una fɔ shap una yes fɔ yɛri wetin pipul de tɔk, bɔt una fɔ tek tɛm tɔk.” (Jems 1:​19) Meri bin de lisin gud wan. Di Baybul sho wi se Meri bin de tek tɛm lisin to di tin dɛn we i bin de yɛri, mɔ di tin dɛn we i bin de lan bɔt Jiova. I bin de tek in tɛm fɔ tink gud wan bɔt dɛn impɔtant tin ya. Wan ɛgzampul na di tɛm we Meri bin bɔn Jizɔs we di shɛpad dɛn bin tɛl Meri bɔt wetin wan enjɛl bin tɛl dɛn. Leta, we Jizɔs bin ol 12 ia, i bin tɔk sɔntin we bin mek Meri rili sɔprayz. Insay dɛn tu ɛgzampul ya, Meri bin lisin, i mɛmba, ɛn i bin tink gud wan bɔt wetin i yɛri.—Rid Lyuk 2:​16-19, 49, 51.

17. Wetin wi kin lan bɔt Meri frɔm di we aw i bin tɔk?

¹⁷ Wetin Meri bin tɔk bɔt? Di Baybul nɔ tɛl wi ɔltin we Meri bin tɔk. Di wangren say we Meri tɔk fɔ lɔng tɛm de na Lyuk 1:​46-55. Di tin dɛn we Meri bin tɔk de sho se i sabi di Ibru Skripchɔ dɛn gud gud wan. Wetin mek wi se so? Di wɔd dɛn we Meri bin tɔk fiba di wɔd dɛn we Ana, we na Samiɛl in mama, bin yuz we i de pre. (Fɔs Samiɛl 2:​1-10) I tan lɛk se Meri bin kot di Skripchɔ dɛn lɛk 20 tɛm so we i bin de tɔk. Dis sho klia wan se i bin lɛk fɔ tɔk bɔt di tru tin dɛn we i bin dɔn lan frɔm in bɛst Padi, we na Jiova.

18. Aw wi go falamakata di kayn fet we Meri bin gɛt?

¹⁸ Jɔs lɛk Meri, sɔntɛnde, Jiova kin gi wi wok dɛn we wi kin tink se i nɔ go izi fɔ du. Lɛ wi falamakata Meri in ɛgzampul bay we wi put wisɛf dɔŋ ɛn rɛdi fɔ du di wok, ɛn biliv se Jiova go ɛp wi. Wi kin falamakata Meri in fet bak we wi tek tɛm lisin to Jiova ɛn tink gud wan bɔt wetin wi dɔn lan bɔt am ɛn di tin dɛn we i want fɔ du. If wi du dis, wi go gladi fɔ tɛl ɔda pipul dɛn bɔt wetin wi dɔn lan.—Sam 77:​11, 12; Lyuk 8:​18; Lɛta Fɔ Rom 10:​15.

19. We wi falamakata pipul dɛn insay di Baybul we bin rili gɛt fet, us bɛnifit wi go gɛt?

¹⁹ Wi dɔn si klia wan se Ruth, Ɛzikaya, ɛn Meri na bin Jiova in padi dɛn, jɔs lɛk aw Ebraam na bin Jiova in padi. Dɛn na sɔm pan di pipul dɛn we “dɔn sho klia wan wetin fɔ biliv Gɔd, min” ɛn dɛnsɛf dɔn gɛt di ɔnɔ fɔ bi Gɔd in padi. Lɛ wi kɔntinyu fɔ falamakata dɛn pipul ya we bin rili gɛt fet. (Di Ibru Pipul Dɛn 6:​11, 12) If wi du dat, wi go gɛt di chans fɔ bi Jiova in padi sote go!