Yu go mɛmba Gel we wi bin tɔk bɔt insay di sɛkɔn atikul, we bin de dawt if i go ɛva bia di pen we in man, Rɔb, day. I de wet fɔ si am bak insay di nyu wɔl we Gɔd dɔn prɔmis. Gel tɔk se: “Mi bɛst skripchɔ na Rɛvɛleshɔn 21:​3, 4.” Da skripchɔ de se: “Gɔd insɛf go de wit dɛn ɔltɛm. I go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen, bikɔs dɛn tin we bin de fɔs nɔ go de igen.”

Gel tɔk se: “Dis prɔmis go sɔlv ɔl wi prɔblɛm dɛn. A kin rili fil am fɔ pipul dɛn we dɛn pɔsin dɔn day bɔt we nɔ no se dɛn go si dɛn pɔsin bak.” Gel bin sho se i biliv se di wan dɛn we dɔn day go gɛt layf bak. I bin sho dis bay we i bin de yuz ɔl in tɛm fɔ prich, ɛn tɛl pipul dɛn se Gɔd dɔn prɔmis wi se tumara bambay mɔtalman “nɔ go day igen.”

Sɔntɛm, yu go se, ‘A nɔ biliv!’ Bɔt lɛ wi tɔk bɔt wan man we nem Job. I bin sik bad bad wan. (Job 2:​7) Pan ɔl we Job bin want fɔ day, i bin stil gɛt fet se Gɔd gɛt pawa fɔ gi am layf bak na dis wɔl. Job bin so biliv dat, i tɔk se: “Ayd mi usay dɛn dayman dɛn de . . . Yu go kɔl mi, ɛn a go ansa yu; yu go dɔn aŋri fɔ si di wan we na yu mek.” (Job 14:​13, 15) Job bin biliv se Gɔd go mis am, ɛn i go want fɔ gi am layf bak kwik kwik wan.

I nɔ go te igen, Gɔd go gi layf bak to Job ɛn bɔku ɔda pipul dɛn we di wɔl go dɔn bi Paradays. (Lyuk 23:​42, 43, NW) Di Baybul buk we nem di Di Apɔsul Dɛn Wok [Akt] 24:​15 tɔk se di wan dɛn we dɔn day go “rayz frɔm dɛn grev.” Jizɔs bin tɔk se: “Wetin a jɛs tɛl una so nɔ fɔ mek una wɔnda, di tɛm de kam we ɔl dɛn pipul we dɔn day go yɛri wetin di Pikin de tɔk, ɛn dɛn go rayz frɔm dɛn grev.” (Jɔn 5:​28, 29) Job go si we dis prɔmis go apin. I go gɛt di chans fɔ “yɔŋ bak” ɛn in bɔdi go “trɔŋ” bak sote go. (Job 33:​24, 25) Di sem tin go apin to ɔl di wan dɛn we de sho se dɛn gladi fɔ we Gɔd go mek di wan dɛn dɔn day gɛt layf bak na dis wɔl. Dis tin we Gɔd prɔmis fɔ du sho se i rili gɛt sɔri-at.

If sɔmbɔdi we yu lɛk bin dɔn day, sɔntɛm di tin dɛn we wi dɔn tɔk bɔt nɔ go pul ɔl di pen we de na yu at. Bɔt if yu de tink gud wan bɔt Gɔd in prɔmis dɛn we de na di Baybul, yu go rili gɛt op we go ɛp yu fɔ kɔntinyu fɔ bia.—Fɔs Lɛta Fɔ Tɛsalonayka 4:​13.

Yu go lɛk fɔ no mɔ bɔt wetin go ɛp yu fɔ bia we yu pɔsin day? Ɔ yu want fɔ gɛt ansa to kwɛstyɔn dɛn lɛk, “Wetin mek Gɔd de alaw bad tin dɛn fɔ apin ɛn wetin mek wi de sɔfa?” Duya go na wi Wɛbsayt, we na jw.org, fɔ si aw di Baybul gi wi ansa dɛn we go ɛp wi ɛn kɔrej wi.