A BIN bɔn 1923 na Ɛmswɔt, insay wan tɔŋ we dɛn kɔl Yɔkshia, na Ingland. A gɛt wan big brɔda we nem Bɔb. We a bin ol 9 ia, wi papa bin bay sɔm buk dɛn we de tɔk bɔt aw lay lay rilijɔn de ful pipul dɛn. Papa bin rili lɛk wetin i bin de rid. I nɔ bin lɛk we dɛn bigman dɛn pan Gɔd biznɛs bin de tich wan tin ɛn dɛn de du ɔda tin. Afta sɔm ia, Bɔb Atkinsin bin kam na wi os ɛn ple wan pan Brɔda Rutafɔd in tɔk dɛn. Wi kam fɔ no se dis tɔk ya kɔmɔt frɔm di sem pipul dɛn we mek di buk dɛn we Papa bin dɔn rid. Mi mama ɛn papa kin invayt Brɔda Atkinsin fɔ kam it to wi ɛni nɛt ɛn fɔ ansa di bɔku kwɛstyɔn dɛn we wi bin de aks bɔt di Baybul. I bin invayt wi fɔ atɛnd mitin na wan brɔda in os we nɔ bin de tu fa. Wi bigin fɔ go mitin ɔltɛm, ɛn wi bin mek wan smɔl kɔngrigeshɔn na Ɛmswɔt. I nɔ tu te, wi bin gɛt zon savant dɛn (we wi de kɔl tide sakit ovasia) we kam to wi ɛn payɔnia dɛn frɔm ɔda kɔngrigeshɔn we bin de kam it wit wi. Dɛn brɔda ɛn sista dɛn ya bin rili ɛp mi.

Da tɛm de, wi famili bin dɔn stat fɔ du biznɛs. Bɔt Papa bin tɛl mi brɔda se, “If yu want fɔ payɔnia wi go lɛf fɔ du dis biznɛs.” Bɔb bin gri, ɛn i lɛf os fɔ bigin fɔ payɔnia we i ol 21 ia. Afta tu ia, misɛf bigin fɔ payɔnia we a bin ol 16 ia. Na mi wan bin de wok plɛnti tɛm insay di wik, dɔn wikɛnd a bin de wok wit ɔda pipul dɛn. A bin de yuz gramafon ɛn tɛstimɔni kad, dat na wan smɔl kad we gɛt simpul ɛn shɔt Baybul mɛsej. Jiova bin blɛs mi wit wan Baybul studɛnt we bin de rili du wɛl. Bɔku pan dis mi Baybul studɛnt in fambul dɛn bin kam na di trut. Di ɔda ia, dɛn bin pik mi ɛn Meri Ɛnshal fɔ bi spɛshal payɔnia. Dɛn bin sɛn wi na wan say usay dɛn nɔ wande prich na wan kɔntri we dɛn kɔl Chɛshia.

Insay Wɔl Wɔ Tu, uman dɛn bin gɛt fɔ du wok we de sɔpɔt di wɔ. Dɛn nɔ bin de alaw ɔda bigman dɛn pan rilijɔn fɔ go fɛt wɔ, so wi bin tink se we wi na spɛshal payɔnia dɛn, dɛn go mek wi nɔ du di wok. Bɔt di kɔt nɔ gri, ɛn dɛn bin sɛn mi na jel fɔ 31 dez. Di ɔda ia, we a ol 19 ia, a bin gɛt fɔ go  na kɔt fɔ lɛk tu-tri tɛm bikɔs mi kɔnshiɛns nɔ bin stil alaw mi fɔ sɔpɔt wɔ. Bɔt ɛnitɛm we a go, di bigman dɛn bin de fri mi. We dis bin de apin, a bin kam fɔ no se di oli spirit de ɛp mi ɛn na Jiova de gi mi di trɛnk fɔ tinap tranga wan.—Ayzaya 41:​10, 13.

Mi ɛn Atɔ Matyuz bin mit insay 1946. Da tɛm de Atɔ bin jɔs kɔmɔt na jɛl, dɛn bin sɛn am na jel fɔ tri mɔnt bikɔs i nɔ gri fɔ go fɛt wɔ. Jɔs afta we dɛn pul am na jel, i bin kam de wit in brɔda, Dɛnis, we na bin spɛshal payɔnia na Ɛmswɔt. Dɛn papa bin dɔn tich dɛn bɔt Jiova frɔm we dɛn bin smɔl smɔl, ɛn dɛn baptayz we dɛn bin yɔŋ. Jɔs afta dɛn bigin payɔnia togɛda, dɛn bin sɛn Dɛnis fɔ go na Ayriland. So Atɔ nɔ bin gɛt patna igen. Mi mama ɛn papa bin lɛk am bikɔs i bin de biev fayn ɛn i bin de wok tranga wan as payɔnia. So dɛn bin mek i go de wit dɛn. We a kin go fɛn dɛn, na mi ɛn Atɔ kin was di pan dɛn afta wi dɔn it. Dɔn leta, wi bigin rayt lɛta to wisɛf. Insay 1948, Atɔ bin gɛt fɔ go bak na jel fɔ tri mɔnt. Wi bin mared insay Janwari 1949, ɛn wi plan fɔ yuz bɔku pan wi tɛm fɔ sav Jiova te go. Wi bin de rili tek tɛm aw wi de spɛn wi mɔni, ɛn we wi gɛt ɔlide wi bin de pik frut fɔ gɛt sɔm mɔni. Jiova bin de blɛs wi, ɛn wi bin ebul fɔ kɔntinyu fɔ payɔnia.

Afta lɛk wan ia so, dɛn sɛn wi fɔ go na Nɔtan Ayriland, fɔs wi go na Amag, dɔn leta wi go na Nyuri, bɔt ɔl tu dɛn ples dɛn de na Katolik pipul dɛn de de. Bɔku pipul dɛn na da eria de fil se dɛn rilijɔn bɛtɛ pas ɔda pipul dɛn yon, so wi bin nid fɔ tek tɛm ɛn du tin wit sɛns we wi de prich to pipul dɛn. Wi bin de ol wi mitin na wan brɔda ɛn sista dɛn os we bin de lɛk 10 mayl (16 kilomita) frɔm usay wi bin de. Na lɛk et pipul dɛn kin atɛnd di mitin dɛn. Sɔntɛnde wi kin slip de. Wi kin slip na grɔn ɛn it bɔku mɔnitɛm it di nɛks de. Wi rili gladi fɔ no se bɔku Jiova Witnɛs dɛn de na da eria de naw.

Mi brɔda ɛn in wɛf Lɔti, bin dɔn de sav as spɛshal payɔnia dɛn na Nɔtan Ayriland, ɛn insay 1952 wi ɔl 4 bin atɛnd wan kɔnvɛnshɔn na Bɛlfast. Wan brɔda bin gi wi say fɔ de, so wi ɔl 4 bin de na in os wit Prays Iyuz, we na bin di branch savant na Briten. Wan nɛt, wi bin de tɔk bɔt wan nyu buk we nem God’s Way Is Love, we dɛn mek fɔ di pipul dɛn na Ayriland. Brɔda Iyuz bin ɛksplen se i nɔ izi fɔ prich to Katolik pipul dɛn na Ayriland. Dɛn bin fos bɔku brɔda dɛn fɔ lɛf usay dɛn bin de, ɛn na di prist dɛn bin de mek di pipul dɛn de atak di brɔda dɛn. Prays bin tɔk se, “Wi nid mared pipul dɛn we gɛt motoka fɔ jɔyn pan di spɛshal kampen fɔ gi smɔl smɔl buk dɛn ɔlsay na di kɔntri.” a (Luk di futnot.) Na da tɛm de wi se, “Wi go du am!”

 Payɔnia dɛn kin go de ɔltɛm to wan fetful sista we nem Ma Rutland in os na Dɔblin. Dis sista dɔn sav Jiova fɔ lɔng lɔng tɛm. Dɔn, wi ɔl 4 sidɔm pan Bɔb in bayk we gɛt smɔl motoka nia am fɔ go fɛn motaka fɔ bay. Wi ebul gɛt wan we nɔ bin gɛt prɔblɛm, ɛn wi bin aks di wan we de sɛl am fɔ kam wit am fɔ wi bikɔs wi nɔn nɔ bin sabi drayv. Ivintɛm, Atɔ sidɔm na di bed fɔ sɔm tɛm i de mek lɛk se i de chenj gia pan motoka. Na mɔnin we i bin de tray fɔ pul di motoka kɔmɔt na di garaj, wan mishɔnari we nem Mildrɛd Wilɛt (we leta mared to Jɔn Ba) bin kam. I bin sabi aw fɔ drayv! I tich wi aw fɔ drayv, ɛn afta dat wi rɛdi fɔ go.

Di nɛks tin we wi bin nid fɔ du, na fɔ fɛn say fɔ de. Di brɔda dɛn bin tɛl wi fɔ avɔyd fɔ de na kɔntena dɛn we pipul dɛn bin de yuz as os bikɔs di wan dɛn we nɔ lɛk di prichin wok kin bɔn am. So wi fɛn fɛn say fɔ de bɔt wi nɔ bin ebul gɛt. Da nɛt de wi ɔl 4 slip insay di motoka. Di nɛks de na wan smɔl kɔntena we gɛt tu smɔl ɔp-garɛt bed dɛn, na in nɔmɔ wi bin ebul fɔ gɛt. Na de wi bin de. Wi bin sɔprayz we sɔm fama dɛn bin de alaw wi fɔ pak wi kɔntena os na dɛn land dɛn. Wi kin prich na wan eria we kin de lɛk 10 to 15 mayl (16 to 24 kilomita) frɔm wi kɔntena. Afta we wi muf go na ɔda eria, wi kin kam bak fɔ prich to di pipul dɛn usay wi kɔntena bin pak.

Wi bin go fɛn di pipul dɛn na ɔl di os dɛn we de bitwin di sawt ɛn ist pat na di Ayrish Ripɔblik ɛn dɛn nɔ bin ambɔg wi bɛtɛ. Wi bin gi pas 20,000 smɔl smɔl buk dɛn, ɛn wi sɛn na di branch ɔfis na Briten ɔl di pipul dɛn nem we want fɔ no mɔ. Na big blɛsin fɔ gɛt bɔku bɔku witnɛs dɛn na da eria de na Ayriland tide!

Afta sɔm tɛm, dɛn bin sɛn wi na di sawt pat na Lɔndɔn. Afta sɔm wik, brɔda dɛn frɔm di branch ɔfis na Briten bin kɔl Atɔ ɛn tɛl am fɔ bigin wok as sakit ovasia di nɛks de! Dɛn bin tren wi fɔ wan wik, dɔn wi travul go na di say usay wi fɔ du wi sakit wok na Skɔtland, so Atɔ nɔ bin gɛt bɛtɛ tɛm fɔ pripia in tɔk dɛn. Bɔt i bin rɛdi ɔltɛm fɔ du ɛni wok we dɛn gi am na Gɔd in savis pan ɔl we i nɔ kin izi. In ɛgzampul bin rili ɛnkɔrej mi. Wi bin rili ɛnjɔy wi asaynmɛnt na di sakit wok. Na bin blɛsin fɔ de wit bɔku brɔda ɛn sista dɛn afta wi dɔn prich na say usay kɔngrigeshɔn nɔ de fɔ lɔng tɛm.

Wi bin gɛt wan impɔtant tin fɔ disayd di tɛm we dɛn kɔl Atɔ fɔ go Giliad Skul. Di skul go las fɔ 10 mɔnt, bɔt a nɔ go go wit am bikɔs dɛn nɔ invayt mi. Wi bin disayd se i go fayn fɔ mek Atɔ go di skul. Dat bin mek, di branch sɛn mi bak na Ɛmswɔt as spɛshal payɔnia bikɔs a nɔ gɛt payɔnia patna. Afta wan ia, Atɔ bin kam bak ɛn dɛn sɛn wi fɔ go du distrikt wok. Di say dɛn we wi bin de prich na, Skɔtland, di nɔt pat na Ingland, ɛn di Nɔtan Ayriland.

Insay 1964, dɛn bin mek Atɔ di branch savant na di Ayrish Ripɔblik. Fɔs, a nɔ bin gladi fɔ go  Bɛtɛl bikɔs a bin de rili ɛnjɔy di travlin wok. Bɔt we a de tink bɔt am naw, a rili gladi we a bin ebul fɔ wok na Bɛtɛl. A biliv se if yu gri fɔ du ɛni wok ilɛk yu fil se yu nɔ go ebul du da wok de, Jiova go blɛs yu ɔltɛm. A bin de du ɔfis wok na Bɛtɛl, a bin de pak buk ɛn magazin dɛn, a bin de kuk, ɛn a bin de klin. Fɔ sɔm tɛm, wi bin de du di distrikt wok ɛn wi bin ebul fɔ mit wit brɔda dɛn ɔlsay na di kɔntri. We wi de mit wit wi brɔda dɛn ɛn we wi de si se wi Baybul studɛnt dɛn de go bifo na di trut, dat mek wi gɛt tayt padi biznɛs wit wi brɔda ɛn sista dɛn na Ayriland. Dat na big blɛsin!

Insay di ia 1965, dɛn bin gɛt dɛn fɔs intanashɔnal kɔnvɛnshɔn na Ayriland insay Dɔblin. b (Luk di futnot.) Pan ɔl we dɛn bin de tray fɔ stɔp dɛn, dɛn bin stil ebul fɔ gɛt di kɔnvɛnshɔn. Na 3,948 pipul dɛn bin atɛnd di kɔnvɛnshɔn, ɛn na 65 pipul dɛn bin baptayz. Na 3,500 brɔda ɛn sista dɛn we kɔmɔt na ɔda kɔntri kam ɛn dɛn bin de to sɔm pipul dɛn na Dɔblin fɔ di kɔnvɛnshɔn. Ɔl di wan dɛn we bin alaw dɛn brɔda ɛn sista dɛn ya fɔ de na dɛn os fɔ di kɔnvɛnshɔn bin gɛt lɛta fɔ tɛl dɛn tɛnki. Ɛn dɛn ɔl we bin kip dɛn brɔda ɛn sista ya na dɛn os bin prez dɛn fɔ di fayn we we dɛn biev. Rili, dis na fayn tin we bin apin na Ayriland.

Insay 1966, di nɔt pat ɛn sawt pat na Ayriland bin kam de ɔnda di Dɔblin branch ɔfis. Dis wanwɔd ya we bin de de bin difrɛn frɔm wetin de apin na di ayland, bikɔs pɔlitiks ɛn rilijɔn dɔn mek pipul dɛn nɔ gɛt wanwɔd. Wi bin gladi fɔ si we bɔku Katolik dɛn de kam na di trut ɛn sav Jiova wit dɛn brɔda dɛn we na bin protɛstant dɛn.

Insay 2011, wi layf bin rili chenj we dɛn jɔyn di Briten ɛn Ayriland branch togɛda ɛn dɛn bin sɛn wi go na Lɔndɔn Bɛtɛl. Na da sem tɛm de a bin bigin fɔ wɔri bɔt Atɔ in wɛlbɔdi biznɛs. Dɔktɔ bin se i gɛt wan sik we dɛn kɔl Pakinsin diziz. Bɔt o-ya, mi padi we a bin dɔn de wit fɔ 66 ia bin day Me 20, 2015.

Insay di ia dɛn we dɔn pas, mi at kin pwɛl pasmak, a kin wɔri tumɔs, ɛn a kin kray. Trade, Atɔ kin de wit mi ɔltɛm fɔ kia fɔ mi. A rili mis am! Bɔt we dɛn kayn tin ya kin mit yu, yu de kam nia Jiova mɔ ɛn mɔ. We a kin yɛri bɔt aw ɔda pipul dɛn lɛk Atɔ, dat kin mek a gladi. A dɔn gɛt lɛta dɛn frɔm mi brɔda ɛn sista dɛn na Ayriland, Briten, ɛn ivin Amɛrika. Dɛn lɛta dɛn ya, ɛn di fayn fayn wɔd dɛn we Atɔ in brɔda Dɛnis, wit in wɛf, Mevis, mi nis dɛn we na Rut ɛn Judi, bin de tɔk bin ɛnkɔrej mi ɛn rili ɛp mi.

Wan skripchɔ we rili ɛnkɔrej mi na Ayzaya 30:​18. I se: “PAPA GƆD [“Jiova,” NW] de wet fɔ sho una gres, fɔseka dat, i es insɛf ɔp fɔ sho una masi. Bikɔs PAPA GƆD [“Jiova,” NW] na Gɔd we de jɔj rayt; ɛnibɔdi we wet fɔ am, go gɛt blɛsin.” A kin rili gladi fɔ no se Jiova de wet fɔ di tɛm we i go sɔlv ɔl wi prɔblɛm dɛn ɛn fɔ gi wi wok dɛn we wi go gladi fɔ du insay di nyu wɔl.

We a kin tink bɔt wetin bin dɔn de apin trade, a kin si se Jiova dɔn gayd ɛn blɛs di prichin wok na Ayriland! A fil gud fɔ bi wan pan di pipul dɛn we ɛp fɔ du dis wok. Na tru se we wi du wetin Jiova want we go gɛt blɛsin ɔltɛm.