1. Aw wi fɔ si di ɔnɔ we wi gɛt fɔ pre to Jiova?

 DI WAN we mek di ɛvin ɛn di wɔl dɔn gi wi wan big big ɔnɔ, we na fɔ pre to am. Jɔs tink bɔt dis: Wi go ebul fɔ tɛl Jiova ɔl wetin de na wi at ɛnitɛm we wi want fɔ du dat ɛn insay ɛni langwej, ɛn wi nɔ nid fɔ mek apɔyntmɛnt wit am. Wi kin pre to am ilɛk wi de na ɔspitul bed ɔ wi de na prizin, ɛn wi gɛt kɔnfidɛns se wi Papa we lɛk wi go lisin to wi. Wi rili gladi fɔ dis gift we i dɔn gi wi.

2. Aw Kiŋ Devid bin sho se i valyu di ɔnɔ we i bin gɛt fɔ pre?

² Kiŋ Devid bin valyu di ɔnɔ we i bin gɛt fɔ pre. I bin siŋ to Jiova se: “Lɛ mi prea tan lɛkɛ insɛns we a de bɔn fɔ yu.” (Sam 141:​1, 2) Insay Devid in tɛm, dɛn bin de tek tɛm mek di oli insɛns we di prist dɛn bin de yuz. (Ɛks. 30:​34, 35) So we Devid tɔk bɔt insɛns, dat min se i bin want fɔ tek tɛm tink bɔt wetin i go se we i de pre to in Papa we de na ɛvin. Na dat wisɛf rili want fɔ du. Wi want fɔ mek Jiova gladi fɔ wi prea dɛn.

3. Aw wi fɔ pre to Jiova? Wetin mek?

³ We wi de pre to Jiova, wi fɔ tek tɛm lɛ wi nɔ tɔk to am lɛk se in na wi kɔmpin. Bifo dat, wi fɔ pre to am wit dip rɛspɛkt. Tink bɔt di fayn fayn vishɔn dɛn we Ayzaya, Izikɛl, Daniɛl, ɛn Jɔn bin si. Dɛn vishɔn dɛn de bin difrɛn, bɔt sɔntin de we bin mek dɛn ɔl fiba. Dɛn ɔl bin  sho Jiova as pawaful Kiŋ. Ayzaya bin ‘si PAPA GƆD [Jiova, NWT] sidɔm na tron we ay, ɛn i bin de pantap ɔltin.’ (Ayz. 6:​1-3) Izikɛl bin si Jiova sidɔm na in chariɔt ɔp ɛvin, ɛn “di braytnɛs we bin de rawnd am bin tan lɛk rembo.” (Izi. 1:​26-28) Daniɛl bin si “di wan we bin dɔn de lɔlɔntɛm” wɛr wayt klos, ɛn faya bin de kɔmɔt na In tron. (Dan. 7:​9, 10) Ɛn Jɔn bin si Jiova sidɔm na tron we bin gɛt sɔntin we tan lɛk fayn renbo we gɛt ɛmirald-grin kɔlɔ rawnd am. (Rɛv. 4:​2-4) As wi de tink bɔt Jiova in glɔri we no ɔda pɔsin nɔ gɛt, wi de mɛmba se na big big ɔnɔ wi gɛt fɔ pre to am, ɛn i rili impɔtant fɔ lɛ wi du am wit dip rɛspɛkt. Bɔt wetin wi fɔ pre fɔ?

4. Wetin wi lan frɔm di fɔs tin dɛn we Jizɔs tɔk we i bin de sho wi aw fɔ pre na Matyu 6:​9, 10?

⁴ Rid Matyu 6:​9, 10. We Jizɔs bin de tich ɔp wan mawntin, i bin tich in disaypul dɛn aw fɔ pre di kayn we we go mek Gɔd gladi. Afta Jizɔs bin se “na so una fɔ pre,” i bin stat fɔ pre bɔt impɔtant tin dɛn we gɛt fɔ du wit wetin Jiova want. I pre fɔ mek ɔlman tek Jiova in nem as sɔntin we oli; fɔ mek in Kiŋdɔm kam, ɛn na dis Kiŋdɔm go dɔnawe wit ɔl di wan dɛn we de agens Gɔd. I pre bak fɔ mek di gud tin dɛn we Gɔd go du fɔ di wɔl ɛn fɔ mɔtalman tumara bambay apin. We wi tɔk bɔt dɛn tin dɛn ya na wi prea, wi de sho se di tin dɛn we Gɔd want na tin dɛn we impɔtant to wi.

5. I bad fɔ pre fɔ tin dɛn we wi nid?

⁵ Insay di nɛks pat pan di prea, Jizɔs bin sho wi se i nɔ bad fɔ pre fɔ tin dɛn we wi nid. Wi kin aks Jiova fɔ gi wi di it we wi nid fɔ di de, fɔ fɔgiv wi sin dɛn, fɔ mek tɛmteshɔn nɔ ebul wi, ɛn fɔ sev wi frɔm di wikɛd wan. (Mat. 6:​11-13) We wi aks Jiova fɔ dɛn tin dɛn ya, wi de sho am se wi no se wi nid am fɔ ɛp wi ɛn wi want fɔ mek i gladi.

6. Na di tin dɛn nɔmɔ we de insay di prea we Jizɔs bin tich wi, wi fɔ pre fɔ? Ɛksplen.

⁶ Jizɔs nɔ bin de ɛkspɛkt in disaypul dɛn fɔ jɔs de pre bɔt di tin dɛn we i bin  tɔk bɔt we i bin de sho wi aw fɔ pre. We Jizɔs bin de pre ɔda tɛm dɛn, i bin tɔk bɔt difrɛn tin dɛn we bin impɔtant to am dɛn tɛm dɛn de. (Mat. 26:​39, 42; Jɔn 17:​1-26) Semweso, wisɛf kin pre fɔ ɛnitin we de mek wi wɔri. We wi nid fɔ disayd fɔ du sɔntin, wi kin pre fɔ sɛns ɛn fɔ mek wi ɔndastand wetin fɔ du. (Sam 119:​33, 34) We wi want fɔ du wok we nɔ izi fɔ du, wi kin pre fɔ mek Jiova ɛp wi fɔ ɔndastand aw fɔ du am. (Prɔv. 2:​6) Mama ɛn papa dɛn kin pre fɔ dɛn pikin dɛn, pikin dɛn kin pre fɔ dɛn mama ɛn papa dɛn, ɛn wi ɔl fɔ pre fɔ wi Baybul studɛnt dɛn ɛn di wan dɛn we wi de prich to. Bɔt we wi de pre, wi nɔ fɔ jɔs de aks Jiova fɔ tin dɛn nɔmɔ.

7. Wetin mek wi fɔ prez Jiova we wi de pre?

⁷ Wi fɔ mɛmba fɔ prez Jiova we wi de pre. No ɔda pɔsin nɔ fit fɔ mek wi prez am pas wi Gɔd. I ‘gud ɛn rɛdi fɔ fɔgiv.’ Dɔn bak, in na Gɔd ‘we nays ɛn gɛt sɔri-at. I nɔ gɛt wamat ɛn di pasmak lɔv we i gɛt fɔ wi nɔ de chenj. Dɔn bak, i nɔ de kɔmɔt biɛn wi.’ (Sam 86:​5, 15) Wi rili gɛt gud rizin fɔ prez Jiova fɔ udat i bi ɛn di tin dɛn we i de du.

8. Wetin na sɔm tin dɛn we wi kin tɛl Jiova tɛnki fɔ? (Sam 104:​12-15, 24)

⁸ Apat frɔm we wi de prez Jiova we wi de pre to am, wi fɔ tɛl am tɛnki fɔ di fayn tin dɛn we i dɔn gi wi. Fɔ ɛgzampul, wi kin tɛl am tɛnki fɔ di fayn kɔlɔ we di flawa dɛn gɛt, di bɔku difrɛn tin dɛn we i dɔn gi wi fɔ it we rili swit, ɛn di tayt padi dɛn we wi kin gladi fɔ de wit. Wi Papa we lɛk wi dɔn gi wi dɛn tin dɛn ya ɛn bɔku ɔda tin dɛn jɔs fɔ mek wi gladi. (Rid Sam 104:​12-15, 24.) Bɔt di tin we impɔtant mɔ we wi fɔ tɛl Jiova tɛnki fɔ, na di bɔku tin dɛn we i de tich wi we de ɛp wi fɔ kɔntinyu fɔ gɛt strɔng fet pan am, ɛn di wɔndaful op we i dɔn gi wi fɔ tumara bambay.

9. Wetin go ɛp wi fɔ lɛ wi nɔ fɔgɛt fɔ tɛl Jiova tɛnki? (1 Tɛsalonians 5:​17, 18)

⁹ I kin rili izi fɔ lɛ wi fɔgɛt fɔ tɛl Jiova tɛnki fɔ ɔl di tin dɛn we i de du fɔ wi.  Bɔt wetin go ɛp yu fɔ lɛ yu nɔ fɔgɛt? Wan tin we yu kin du na fɔ rayt di patikyula tin dɛn we yu dɔn aks Jiova fɔ, ɛn leta chɛk di list we yu dɔn mek ɛn si aw Jiova dɔn ansa yu prea dɛn. Dɔn yu kin pre to Jiova fɔ tɛl am tɛnki fɔ we i ɛp yu. (Rid 1 Tɛsalonians 5:​17, 18.) Tink bɔt dis: Wi kin gladi ɛn fil gud we ɔda pipul dɛn de tɛl wi tɛnki. Semweso, we wi mɛmba fɔ tɛl Jiova tɛnki fɔ we i ansa wi prea dɛn, dat de mek i gladi. (Kol. 3:​15) Bɔt wetin na wan ɔda impɔtant rizin we fɔ mek wi tɛl wi Gɔd tɛnki?

10. Akɔdin to 1 Pita 2:​21, wetin mek wi fɔ tɛl Jiova tɛnki fɔ we i sɛn Jizɔs kam na di wɔl?

¹⁰ Rid 1 Pita 2:​21. Wi fɔ tɛl Jiova tɛnki fɔ we i sɛn in Pikin we i lɛk fɔ kam tich wi. We wi stɔdi bɔt Jizɔs, wi de lan bɔku tin dɛn bɔt Jiova ɛn aw fɔ mek i gladi. If wi sho se wi gɛt fet pan Krays in sakrifays, wi go gɛt tayt padi biznɛs wit Jiova Gɔd ɛn ɛnjɔy pis wit Am.—Rom. 5:​1.

11. Wetin mek wi fɔ yuz Jizɔs in nem fɔ pre?

¹¹ Wi de tɛl Jiova tɛnki fɔ we wi ebul fɔ yuz in Pikin in nem fɔ pre to am. Na Jizɔs Jiova kin yuz fɔ gi wi wetin wi de aks fɔ. We wi yuz Jizɔs in nem fɔ pre, Jiova de lisin to wi prea dɛn ɛn ansa dɛn. Jizɔs bin ɛksplen se: “Ɛnitin we una yuz mi nem fɔ aks fɔ, a go du am, so dat di Papa go gɛt glori tru di Pikin.”—Jɔn 14:​13, 14.

12. Wetin na wan ɔda rizin we fɔ mek wi tɛl Jiova tɛnki fɔ in Pikin?

¹² Jiova de fɔgiv wi sin dɛn bikɔs Jizɔs bin dɔn sakrifays in layf fɔ wi. Di Baybul kɔl Jizɔs wi “ay prist [we] sidɔm na di Gret Gɔd we de na di tron na ɛvin, in raytan.” (Ibru. 8:​1) Jizɔs na di “pɔsin we de ɛp wi . . . we de wit di Papa.” (1 Jɔn 2:​1) Wi rili gladi we Jiova gi wi Ay Prist we gɛt sɔri-at, we de ɔndastand di say dɛn we wi wik, ɛn we “de beg fɔ wi”! (Rom. 8:​34; Ibru. 4:​15) Wi nɔ pafɛkt, so if Jizɔs nɔ bin fɔ dɔn sakrifays in layf fɔ wi, wi nɔ bin fɔ ebul pre to Jiova. Yu go mɔs gri se wi nɔ go ɛva ebul fɔ rili tɛl Jiova tɛnki fɔ di wɔndaful gift we i dɔn gi wi, we na in Pikin we i rili lɛk!

13. Di nɛt bifo Jizɔs day, aw i bin sho se i lɛk in disaypul dɛn?

¹³ Di nɛt bifo Jizɔs day, i bin spɛn lɔng tɛm de pre fɔ in disaypul dɛn ɛn fɔ aks in Papa fɔ “protɛkt dɛn bikɔs ɔf di wikɛd wan.” (Jɔn 17:​15) Dis sho se Jizɔs bin rili lɛk dɛn! Pan ɔl we i nɔ bin de fa igen fɔ lɛ i sɔfa siriɔs wan, i bin stil de wɔri bɔt in apɔsul dɛn.

14. Aw wi go sho se wi lɛk wi brɔda ɛn sista dɛn?

¹⁴ Jɔs lɛk Jizɔs, wi nɔ jɔs de pe atɛnshɔn pan wetin wi nid nɔmɔ. Bɔt wi de pre fɔ wi brɔda ɛn sista dɛn ɔltɛm. We wi du dat, wi de obe Jizɔs in lɔ fɔ lɛk wi kɔmpin dɛn, ɛn wi de sho Jiova se wi rili lɛk wi brɔda ɛn sista dɛn. (Jɔn 13:​34) Fɔ pre fɔ wi brɔda ɛn sista dɛn nɔto west ɔf taym. Gɔd in Wɔd tɛl wi se “we pɔsin we de du wetin rayt rili beg Gɔd, dat rili gɛt pawa.”—Jems 5:​16.

15. Wetin mek wi nid fɔ pre fɔ wi brɔda ɛn sista dɛn?

¹⁵ Wi nid fɔ pre fɔ wi brɔda ɛn sista dɛn bikɔs dɛn kin gɛt bɔku prɔblɛm  dɛn. Wi kin aks Jiova fɔ lɛ i ɛp dɛn fɔ bia siknɛs, nachɔral dizasta, wɔ, we pipul dɛn de mek dɛn sɔfa, ɔ ɔda prɔblɛm dɛn. Wi kin pre bak fɔ wi brɔda ɛn sista dɛn we de put wetin dɛn want na kɔna ɛn wok tranga wan fɔ ɛp di wan dɛn we nid ɛp. I go bi se yu sabi sɔm brɔda ɛn sista dɛn we gɛt dɛn kayn prɔblɛm dɛn ya. Yu nɔ tink se i go fayn fɔ kɔl dɛn nem we yu de pre? Wi de sho se wi rili lɛk wi brɔda ɛn sista dɛn bay we wi de aks Jiova fɔ ɛp dɛn fɔ bia dɛn prɔblɛm dɛn.

16. Wetin mek wi fɔ pre fɔ di wan dɛn we de bifo na di kɔngrigeshɔn?

¹⁶ Di wan dɛn we de bifo na di kɔngrigeshɔn kin gladi we wi de pre fɔ dɛn, ɛn dɛn prea dɛn de kin ɛp dɛn. Apɔsul Pɔl bin no se dis na tru. I bin rayt se: “Una pre fɔ mi bak mek a no wetin fɔ tɔk we a opin mi mɔt, so dat a go gɛt maynd fɔ prich di oli sikrit bɔt di gud nyuz.” (Ɛfi. 6:​19) Tide bak, wi gɛt bɔku brɔda dɛn we de bifo na di kɔngrigeshɔn we de wok tranga wan. Wi go sho se wi lɛk dɛn bay we wi de pre to Jiova fɔ blɛs dɛn wok.

17-18. Ustɛm-ɛn-ustɛm dɛn kin aks wi fɔ pre fɔ ɔda pipul dɛn? Wetin wi fɔ mɛmba?

¹⁷ Sɔntɛnde, dɛn kin aks wi fɔ pre fɔ ɔda pipul dɛn. Fɔ ɛgzampul, sɔntɛm wan sista we de kɔndɔkt Baybul stɔdi go aks di ɔda sista we go wit am fɔ pre. I go bi se di ɔda sista nɔ sabi di studɛnt gud gud wan, so sɔntɛm i go si am se i bɛtɛ lɛ i pre we di stɔdi dɔn. Bay da we de, i go ebul fɔ no wetin fɔ se we i de pre fɔ di studɛnt.

¹⁸ I go bi se dɛn go aks wan brɔda fɔ pre fɔ mitin fɔ fil savis ɔ na kɔngrigeshɔn mitin. Brɔda dɛn we gɛt da ɔnɔ de fɔ mɛmba wetin di mitin de fɔ. Dɛn nɔ fɔ yuz dɛn prea fɔ kɔrɛkt ɔ tich di kɔngrigeshɔn ɔ fɔ mek anawnsmɛnt. Fɔ bɔku kɔngrigeshɔn dɛn, na fayv minit dɛn gɛt fɔ siŋ ɛn pre, so di brɔda we de pre nɔ nid fɔ yuz “bɔku wɔd dɛn,” mɔ we di mitin want fɔ stat.—Mat. 6:​7.

19. Wetin go ɛp wi fɔ rɛdi fɔ di de we Jiova go jɔj?

¹⁹ Wi nid fɔ mek prea bi sɔntin we rili impɔtant na wi layf, mɔ we i bi se Jiova in de fɔ jɔj de kam jisnɔ. Na dat mek Jizɔs bin se: “So una nɔ slip, ɛn una go de rili beg Gɔd ɔltɛm so dat una go sev we ɔl dɛn tin ya de apin.” (Lyuk 21:​36) If wi de pre ɔltɛm, wi fet go strɔng ɛn wi go rɛdi we Jiova in de go kam.

20. Aw wi prea dɛn go tan lɛk insɛns we gɛt fayn sɛnt?

²⁰ Wetin wi dɔn lan? Wi rili valyu di ɔnɔ we wi gɛt fɔ pre. Di men tin dɛn we wi fɔ pre fɔ na tin dɛn we gɛt fɔ du wit wetin Jiova want. Wi fɔ pre bak fɔ tɛl Gɔd tɛnki fɔ in Pikin ɛn in Kiŋdɔm, ɛn wi fɔ pre fɔ wi brɔda ɛn sista dɛn. Jiova want wi bak fɔ pre fɔ di tin dɛn we wi nid ɛvride ɛn fɔ mek i ɛp wi fɔ kɔntinyu fɔ gɛt strɔng fet. We wi tek tɛm tink bɔt wetin wi de tɔk we wi de pre, wi de sho se wi valyu dis big big ɔnɔ we wi gɛt. Wi wɔd dɛn go tan lɛk insɛns we gɛt fayn sɛnt to Jiova we de mek i “gladi.”—Prɔv. 15:​8.