Ɛnitɛm we bad bad tin kin apin sɔnsay, wi kin gɛda tin dɛn kwik kwik wan ɛn sɛn dɛn to wi brɔda dɛn. Dis de sho se wi rili lɛk wisɛf. (Jɔn 13:34, 35; Jɔn In Fɔs Lɛta 3:17, 18) Aw wi kin ɛp wi brɔda dɛn?

Wi kin gi mɔni. Trade trade we di apɔsul dɛn bin de, wan bad bad angri bin apin na Judia. Di Kristian dɛn we bin de na Antiɔk bin sɛn mɔni fɔ ɛp di brɔda dɛn na Judia. (Di Apɔsul Dɛn Wok [Akt] 11:27-30) Semweso tide, we wi yɛri se bad tin dɔn apin to wi brɔda dɛn, di difrɛn difrɛn kɔngrigeshɔn dɛn kin sɛn mɔni ɛn ɔda tin dɛn to dɛn.—Sɛkɛn Lɛta Fɔ Kɔrint 8:13-15.

Wi kin du bɔku tin fɔ ɛp dɛn. Di ɛlda dɛn we de usay di bad tin apin, kin go luk fɔ ɔlman fɔ mek shɔ se dɛn ɔl de ɛn natin nɔ du dɛn. Sɔm brɔda dɛn kin bigin sheb tin fɔ it ɛn klin wata fɔ drink. Dɛn kin fɛn ples we di brɔda dɛn go de ɛn gi dɛn mɛrɛsin. Bɔku brɔda ɛn sista dɛn we lan difrɛn difrɛn wok dɛn, kin yuz dɛn yon mɔni fɔ go ɛp di brɔda dɛn. Dɛn kin ɛp fɔ mek di os ɛn di Kiŋdɔm Ɔl dɛn we dɔn pwɛl ɛn du plɛnti ɔda tin dɛn. We prɔblɛm kin apin sɔnsay, wi kin gɛda tin dɛn fɔ sɛn de ɛn sɛn pipul dɛn de kwik kwik wan. Wi kin ebul du dis bikɔs wi gɛt wanwɔd na di ɔganayzeshɔn ɛn wi dɔn lan bɔku tin we wi kin wok wit wi brɔda dɛn. Nɔto “wi kɔmpin Kristiɛn dɛn” nɔmɔ wi kin ɛp, wi kin ivin ɛp ɔda pipul dɛn ilɛksɛf na ɔda rilijɔn dɛn de.—Lɛta Fɔ Galeshya 6:10.

Wi kin kɔrej dɛn. We bad tin kin apin sɔnsay, i kin fayn fɔ kɔrej di pipul dɛn we di bad tin dɔn apin to. We dɛn tin dɛn de kin apin, wi kin ebul fɔ bia bikɔs Jiova na Gɔd we “de kɔrej wi ɔltɛm.” (Sɛkɛn Lɛta Fɔ Kɔrint 1:3, 4) Wi kin gladi fɔ tɛl pipul dɛn bɔt di fayn fayn prɔmis dɛn we de na di Baybul. Wi kin tɛl dɛn se i nɔ go te igen Gɔd in Kiŋdɔm go kam pul ɔl di tin dɛn we de mek wi sɔfa.—Rɛvɛleshɔn 21:4.

• Wetin mek wi kin ebul fɔ ɛp wi brɔda dɛn we dɛn gɛt prɔblɛm?

• Aw wi kin kɔrej di wan dɛn we bad tin apin to?