Yu tink se i at fɔ du wetin rayt?— Na so bɔku pipul dɛn tink. Di Baybul tɛl wi se i bin rili at fɔ lɛ wan bɔbɔ we nem Josaya, du wetin rayt. Bɔt i bin gɛt gud padi dɛn we bin ɛp am. Lɛ wi tɔk smɔl bɔt Josaya ɛn in padi dɛn.

Josaya in papa nem Amɔn. Amɔn na bin kiŋ na Juda. I bin bad pasmak, ɛn i bin de wɔship aydɔl. We i day, na Josaya bi di kiŋ na Juda. Bɔt Josaya bin tu smɔl, i bin ol et ia! Yu tink se Josaya bin bad lɛk in papa?— Nɔ, i nɔ bin bad atɔl!

Pan ɔl we Josaya bin smɔl, i bin want fɔ obe Jiova. So i bin mek padi nɔmɔ wit di wan dɛn we lɛk Jiova. Ɛn dɛn pipul ya bin ɛp am fɔ du wetin rayt. Udat na sɔm pan di pipul dɛn we na bin Josaya in padi dɛn?

Wan pan Josaya in padi dɛn na bin Zɛfinaya. Zɛfinaya na bin prɔfɛt we bin  de wɔn di pipul dɛn na Juda se bad tin go apin to dɛn if dɛn wɔship aydɔl. Josaya bin lisin to Zɛfinaya ɛn, i nɔ bin de wɔship aydɔl. I bin de wɔship Jiova.

Wan ɔda padi we Josaya bin gɛt na Jɛrimaya. I go bi se dɛn ɔl tu na bin di sem ej, ɛn we dɛn bin de gro, dɛn bin de liv nia nia. Dɛn na bin tayt padi dɛn. So we Josaya day, Jɛrimaya bin rayt wan spɛshal siŋ bɔt aw i fil am we in padi day. Jɛrimaya ɛn Josaya bin de ɛp dɛnsɛf fɔ du wetin rayt ɛn fɔ de obe Jiova.

Us lɛsin yu lan frɔm Josaya in ɛgzampul?— Pan ɔl we Josaya na bin smɔl bɔbɔ, i bin stil want fɔ du wetin rayt. I bin no se i fɔ mek padi wit pipul dɛn we lɛk Jiova. Mek shɔ se yusɛf mek padi wit pipul dɛn we lɛk Jiova ɛn we go ɛp yu fɔ du wetin rayt.