Yu de si di man dɛn na di pikchɔ?— Dɛn nem dɛn na Matyu, Mak, Lyuk, Jɔn, Pita, Jems, Jud, ɛn Pɔl. Dɛn ɔl bin de di tɛm we Jizɔs bin de na di wɔl, ɛn dɛn rayt bɔt Jizɔs. Lɛ wi tɔk smɔl bɔt dɛn.

Tri pan dɛn na bin apɔsul dɛn we bin de prich wit Jizɔs. Yu sabi dɛn nem dɛn?— Dɛn nem dɛn na Matyu, Jɔn, ɛn Pita. Di apɔsul Matyu ɛn Jɔn bin sabi  Jizɔs gud gud wan, ɛn dɛn bin rayt buk dɛn bɔt am. Di apɔsul Jɔn bin rayt wan ɔda buk we dɛn kɔl Rɛvɛleshɔn ɛn tri lɛta dɛn we dɛn kɔl Jɔn In Fɔs Lɛta, Jɔn In Sɛkɛn Lɛta, ɛn Jɔn In Tɔd Lɛta. Di apɔsul Pita bin rayt tu lɛta dɛn we de na di Baybul. Dɛn kɔl dɛn lɛta ya Pita In Fɔs Lɛta ɛn Pita In Sɛkɛn Lɛta. Insay Pita in sɛkɔn lɛta, i rayt bɔt di tɛm we Jiova bin tɔk bɔt Jizɔs se: ‘Dis na mi pikin. A lɛk am, ɛn a gladi fɔ am.’

Di ɔda man dɛn na di pikchɔ dɛnsɛf tich wi bɔt Jizɔs na di buk dɛn we dɛn rayt. Wan pan dɛn na Mak. I go mɔs bi se i bin de usay dɛn ol Jizɔs, ɛn i bin si ɔltin we apin. Di ɔda wan in nem na Lyuk. In na bin dɔktɔ, ɛn i go mɔs bi se i bi Kristian afta Jizɔs day.

Tu pan di man dɛn we yu de si na di pikchɔ na Jizɔs in smɔl brɔda dɛn. Yu sabi dɛn nem dɛn?— Dɛn nem dɛn na Jems ɛn Jud. Fɔs, dɛn nɔ bin biliv Jizɔs. Dɛn bin ivin fil se in ed nɔ de. Bɔt leta, dɛn biliv Jizɔs ɛn bi Kristian.

Di ɔda pɔsin we yu de si na di pikchɔ na Pɔl. Bifo i bi Kristian, in nem na bin Sɔl. I bin et Kristian dɛn, ɛn i bin de du bad bad tin to dɛn. Yu no wetin mek Pɔl bi Kristian?— Wan de, Pɔl bin de travul na wan rod we i yɛri sɔmbɔdi tɔk to am frɔm ɛvin. Yu no udat bin de tɔk to am? Na Jizɔs bin de tɔk to am! I bin aks Pɔl se: ‘Wetin mek yu de du bad to di wan dɛn we biliv mi?’ Afta dat, Pɔl chenj ɛn bi Kristian. Pɔl rayt 14 pan di buk dɛn na di Baybul, dat na frɔm Lɛta Fɔ Rom te to Di Ibru Pipul Dɛn.

Wi de rid di Baybul ɛvride, nɔtɔ so?— Wi de lan bɔku tin bɔ Jizɔs we wi de rid di Baybul. Yu go want fɔ lan mɔ bɔt Jizɔs?—