CHAPTA 14
“Wi Ɔl Dɔn Disayd”
Aw di gɔvnin bɔdi bin mek wan disishɔn ɛn aw dat bin afɛkt di kɔngrigeshɔn dɛn
Dis chapta kɔmɔt na Akt 15:13-35
1, 2. (a) Us impɔtant kwɛstyɔn dɛn di gɔvnin bɔdi insay di fɔstɛm Kristian kɔngrigeshɔn bin gɛt fɔ ansa? (b) Wetin bin ɛp dɛn brɔda dɛn de fɔ no wetin fɔ disayd?
ƆLMAN bin de wet fɔ yɛri wetin di gɔvnin bɔdi dɔn disayd. Di apɔsul dɛn ɛn ɛlda dɛn bin de na wan rum na Jerusɛlɛm de wach dɛnsɛf, ɛn dɛn bin no se dɛn gɛt fɔ kam disayd fɔ du wan impɔtant tin. Di prɔblɛm bɔt fɔ sakɔmsayz bin kam wit impɔtant kwɛstyɔn dɛn. Fɔ se Kristian dɛn tide fɔ fala di Lɔ we Gɔd Bin Gi Mozis? Difrɛns fɔ de bitwin Ju ɛn Jɛntayl Kristian dɛn?
2 Di man dɛn we bin de bifo bin dɔn tek tɛm wach di ɛvidɛns dɛn we dɛn gɛt. Dɛn bin tink bɔt di tin dɛn we Gɔd bin tɛl in prɔfɛt dɛn fɔ rayt ɛn di tin dɛn we dɔn apin to dɛn we sho se Jiova de blɛs dɛn. Dɛn bin dɔn tɔk ɔl wetin dɛn no ɛn aw dɛn de fil bɔt di prɔblɛm. Di bɔku ɛvidɛns dɛn we dɛn bin dɔn gɛt bɔt dis prɔblɛm sho klia wan se Jiova in spirit de gayd dɛn. Fɔ se dɛn man dɛn ya go fala dis dayrɛkshɔn?
3. Aw wi go bɛnifit we wi stɔdi Akt chapta 15?
3 Dɛn bin rili nid fet ɛn maynd fɔ alaw di spirit fɔ gayd dɛn fɔ sɔlv dis prɔblɛm. Dɛn nɔ bin want di Ju bigman dɛn pan Gɔd biznɛs fɔ et dɛn mɔ. Ɛn dɛn bin gɛt fɔ dil wit man dɛn na di kɔngrigeshɔn we bin dɔn mekɔp dɛn maynd fɔ mek Gɔd in pipul dɛn bigin fɔ fala di Lɔ we Gɔd Bin Gi Mozis bak. Wetin di gɔvnin bɔdi go du? Lɛ wi si. As wi de lan bɔt dis, wi go si aw dɛn man ya sɛt fayn ɛgzampul fɔ di Gɔvnin Bɔdi fɔ Jiova Witnɛs dɛn tide. Na fayn ɛgzampul we Kristian dɛn tide nid fɔ fala we dɛn de disayd fɔ du sɔntin ɛn we prɔblɛm dɛn mit dɛn.
Dis “Gri wit Wetin di Prɔfɛt dɛn Bin Dɔn Se” (Akt 15:13-21)
4, 5. Us wɔd dɛn Jems bin kot frɔm di tin dɛn we Gɔd in prɔfɛt dɛn bin rayt we in ɛn di ɔda man dɛn bin de tɔk?
4 Jems we na bin disaypul ɛn Jizɔs in stɛp-brɔda bin tinap ɛn tɔk. a I tan lɛk se in na bin di chiaman fɔ dis mitin. I go bi se di wɔd dɛn we i bin tɔk gri wit wetin di grup bin dɔn disayd. Jems bin tɛl di man dɛn we gɛda se: “Simyɔn dɔn tɔk gud gud wan bɔt aw Gɔd dɔn tɔn in atɛnshɔn to di neshɔn dɛn fɔ di fɔs tɛm fɔ tek pipul dɛn we go gɛt in nem. Ɛn dis gri wit wetin di Prɔfɛt dɛn bin dɔn se.”—Akt 15:14, 15.
5 Di tin dɛn we Simyɔn ɔ Saymɔn Pita bin tɔk ɛn di ɛvidɛns dɛn we Banabas ɛn Pɔl bin gi go dɔn mɛmba Jems bɔt impɔtant skripchɔ dɛn we tɔk mɔ bɔt dis tɔpik we dɛn bin de tɔk bɔt. (Jɔn 14:26) Afta Jems tɔk se dis “gri wit wetin di Prɔfɛt dɛn bin dɔn se,” i kot Emɔs 9:11, 12. Dis buk de pat pan di Ibru Skripchɔ dɛn we dɛn bin de kɔl “di Prɔfɛt dɛn.” (Mat. 22:40; Akt 15:16-18) Tide, yu go notis se wetin Jems kot difrɛn smɔl frɔm wetin de na di Baybul buk we nem Emɔs. I go bi se Jems bin kot frɔm di Septuagint, we na wan Grik transleshɔn fɔ di Ibru Skripchɔ dɛn.
6. Aw di Skripchɔ dɛn mek dɛn ɔndastand klia wan wetin dɛn bin de tɔk bɔt?
6 Jiova bin yuz prɔfɛt Emɔs fɔ rayt se tɛm go kam we I go es “David in Kiŋdɔm,” ɛn na da layn de di Kiŋdɔm we di Mɛsaya go rul go kɔmɔt. (Izi. 21:26, 27) Fɔ se na di Ju pipul dɛn nɔmɔ Jiova go pik as in neshɔn lɛk aw i bin dɔn du? Nɔ. Di prɔfɛsi tɔk bak se “pipul dɛn na ɔl di neshɔn dɛn” go kam togɛda as “pipul dɛn we gɛt [Gɔd in] nem.” Mɛmba se, Pita bin jɔs dɔn tɔk se Gɔd “nɔ trit wi [Ju Kristian dɛn] ɛn dɛn [Jɛntayl Kristian dɛn] difrɛn we, bɔt i dɔn klin dɛn at bikɔs dɛn gɛt fet.” (Akt 15:9) Dis min se Gɔd want fɔ mek Ju ɛn Jɛntayl Kristian dɛn rul na in Kiŋdɔm. (Rom. 8:17; Ɛfi. 2:17-19) Dɛn prɔfɛsi dɛn ya nɔ tɔk se di Jɛntayl Kristian dɛn fɔ sakɔmsayz fɔs ɔ jɔyn di Ju rilijɔn bifo dɛn go ebul fɔ rul na Gɔd in Kiŋdɔm.
7, 8. (a) Wetin Jems bin ɛnkɔrej di brɔda dɛn fɔ du? (b) Aw wi fɔ ɔndastand di tin dɛn we Jems bin tɔk?
7 We Jems si di ɛvidɛns dɛn na di Baybul ɛn di pawaful tin dɛn we i dɔn yɛri, dat bin mek i tɔk dɛn wɔd dɛn ya: “So a tink se i nɔ go fayn fɔ ambɔg di pipul dɛn na di neshɔn dɛn we de tɔn to Gɔd, bɔt lɛ wi rayt to dɛn fɔ avɔyd tin dɛn we aydɔl dɛn dɔn dɔti, mami ɛn dadi biznɛs di we aw Gɔd nɔ want, animal we dɛn nɔ kɔt in trot we dɛn de kil am, ɛn blɔd. Frɔm trade trade, pipul dɛn de prich na difrɛn siti dɛn bɔt wetin Mozis rayt, ɛn dɛn de rid di tin dɛn we i rayt lawd wan na di sinagɔg dɛn ɛni sabat.”—Akt 15:19-21.
8 We Jems tɔk se “so a tink se,” fɔ se i bin de yuz di pawa we i gɛt as chiaman fɔ di mitin fɔ tɛl di ɔda brɔda dɛn wetin fɔ du? Nɔto dat i bin de du! Di Grik wɔd dɛn we dɛn yuz fɔ “so a tink se” kin min bak “a jɔj” ɔ “a tɔk wetin a tink.” So Jems in wangren nɔ bin de disayd wetin fɔ du, bifo dat, i bin de ɛnkɔrej dɛn fɔ yuz di ɛvidɛns dɛn we dɛn dɔn yɛri ɛn wetin di Baybul se bɔt di prɔblɛm fɔ disayd wetin dɛn fɔ du.
9. Us bɛnifit dɛn di tin we Jems bin ɛnkɔrej di brɔda dɛn fɔ du bin kam wit?
9 Fɔ se na gud tin Jems bin ɛnkɔrej di brɔda dɛn fɔ du? Wan dawt nɔ de se na gud tin bikɔs na dat di apɔsul dɛn ɛn di ɛlda dɛn bin disayd fɔ du leta. Wetin na bin di bɛnifit? Wan bɛnifit na dat dis tin we dɛn bin disayd fɔ du nɔ bin “ambɔg” di Jɛntayl Kristian dɛn ɔ fos dɛn fɔ fala di tin dɛn we de insay di Lɔ we Gɔd Bin Gi Mozis. (Akt 15:19) Di ɔda bɛnifit we dɛn bin gɛt na dat dɛn disishɔn sho se dɛn rɛspɛkt di Ju Kristian dɛn kɔnshɛns; dɛn Kristian dɛn ya bin dɔn de yɛri we “dɛn de rid di tin dɛn we [Mozis] rayt lawd wan na di sinagɔg dɛn ɛni sabat.” b (Akt 15:21) Di tin we dɛn bin disayd go mek di padi biznɛs we de bitwin di Ju ɛn Jɛntayl Kristian dɛn tayt mɔ ɛn mɔ. Di bɛnifit we pas ɔl na dat, i go mek Jiova Gɔd gladi bikɔs di tin we dɛn disayd bin gri wit wetin i want. Dis na bin fayn we fɔ sɔlv di prɔblɛm we bin ambɔg di wanwɔd na di wan ol kɔngrigeshɔn usay Gɔd in pipul dɛn de! Ɛn dis na fayn ɛgzampul fɔ di Kristian kɔngrigeshɔn we de tide!
Albat Shroda de gi tɔk na wan intanashɔnal kɔnvɛnshɔn insay di ia 1998
10. Aw di Gɔvnin Bɔdi we de tide de fala di ɛgzampul we di gɔvnin bɔdi we bin de insay di fɔstɛm Kristian dɛn tɛm bin sɛt?
10 As wi bin dɔn tɔk na di chapta bifo dis wan, jɔs lɛk di gɔvnin bɔdi insay di fɔstɛm Kristian dɛn tɛm, di Gɔvnin Bɔdi fɔ Jiova Witnɛs dɛn tide de luk to Jiova we de pantap ɔlman ɛn Jizɔs Krays we de oba di kɔngrigeshɔn fɔ dayrɛkt dɛn pan ɔl wetin dɛn de du. c (1 Kɔr. 11:3) Aw dɛn kin du dat? Albat D. Shroda we bin de pat pan di Gɔvnin Bɔdi frɔm 1974 te i dɔn in wok na dis wɔl insay Mach 2006 bin ɛksplen se: “Di Gɔvnin Bɔdi kin gɛt mitin ɛni Wɛnsde. Dɛn kin stat di mitin wit prea fɔ aks Jiova fɔ yuz in spirit fɔ dayrɛkt dɛn. Dɛn kin tray tranga wan fɔ mek shɔ se ɛni prɔblɛm we dɛn dil wit ɛn ɛnitin we dɛn disayd fɔ du gri wit wetin de na Gɔd in Wɔd di Baybul.” Miltin G. Ɛnshɛl bak we bin de pat pan di Gɔvnin Bɔdi fɔ lɔng tɛm te i dɔn in wok na dis wɔl insay Mach 2003 bin aks di studɛnt dɛn we bin de na di 101 klas na di Watchtower Bible School of Gilead wan impɔtant kwɛstyɔn. I bin aks dɛn se, “Ɛni ɔda ɔganayzeshɔn de na di wɔl we dɛn Gɔvnin Bɔdi kin stɔdi Gɔd in Wɔd di Baybul bifo dɛn disayd fɔ du impɔtant tin dɛn?” Wan dawt nɔ de se di ansa na nɔ.
“Pik Sɔm Man dɛn ɛn Sɛn Dɛn” (Akt 15:22-29)
11. Aw dɛn bin tɛl di kɔngrigeshɔn dɛn wetin di gɔvnin bɔdi dɔn disayd?
11 Di gɔvnin bɔdi na Jerusɛlɛm bin kam togɛda ɛn disayd wetin fɔ du bɔt di prɔblɛm bɔt fɔ sakɔmsayz. Bɔt fɔ mek di brɔda dɛn na di kɔngrigeshɔn dɛn du tin wit wanwɔd, di gɔvnin bɔdi bin nid fɔ tɛl dɛn wetin dɛn dɔn disayd klia wan, ɛn di kayn we we go ɛnkɔrej dɛn. Aw dɛn go du dat? Di Baybul ɛksplen se: “So di apɔsul dɛn, di ɛlda dɛn, ɛn di wan ol kɔngrigeshɔn disayd fɔ pik sɔm man dɛn ɛn sɛn dɛn na Antiɔk wit Pɔl ɛn Banabas; dɛn sɛn Judas we dɛn de kɔl Basabas, ɛn Saylas. Na dɛn man ya bin de bifo di brɔda dɛn.” Pantap dat, dɛn bin rayt wan lɛta ɛn gi dɛn man dɛn ya so dat dɛn go rid am na ɔl di kɔngrigeshɔn dɛn na Antiɔk, Siria, ɛn Silishia.—Akt 15:22-26.
12, 13. Us gud tin bin apin we dɛn sɛn (a) Judas ɛn Saylas? (b) wan lɛta frɔm di gɔvnin bɔdi?
12 Judas ɛn Saylas we bin “de bifo di brɔda dɛn,” bin kwalifay fɔ go tɔk fɔ di gɔvnin bɔdi. Di sɛn we dɛn sɛn di 4 man dɛn mek di pipul dɛn no klia wan se di mɛsej we dɛn kam wit nɔto jɔs ansa to di kwɛstyɔn we dɛn bin aks bɔt fɔ sakɔmsayz, bɔt na nyu dayrɛkshɔn frɔm di gɔvnin bɔdi. Dɛn man dɛn ya we dɛn “pik” go ɛp fɔ mek di Ju Kristian dɛn na Jerusɛlɛm ɛn di Jɛntayl Kristian dɛn gɛt tayt padi biznɛs. Dis arenjmɛnt we dɛn mek bin sho se dɛn gɛt sɛns ɛn dɛn rili lɛk di brɔda dɛn. Wan dawt nɔ de se dat bin mek Gɔd in pipul dɛn gɛt pis ɛn wanwɔd.
13 Di lɛta nɔ bin jɔs sho di Jɛntayl Kristian dɛn wetin dɛn fɔ du we i kam to fɔ sakɔmsayz, bɔt i ɛp dɛn fɔ no wetin dɛn nid fɔ du fɔ mek Jiova gladi fɔ dɛn ɛn blɛs dɛn. Di men pat pan di lɛta tɔk se: “Wi ɛn di oli spirit nɔ want fɔ ad ɛni ɔda lod pan una pas dɛn impɔtant tin ya: una kɔntinyu fɔ avɔyd tin dɛn we dɛn de sakrifays to aydɔl, fɔ avɔyd blɔd, animal we dɛn nɔ kɔt in trot we dɛn de kil am, ɛn mami ɛn dadi biznɛs di we aw Gɔd nɔ want. If una tek tɛm avɔyd dɛn tin ya, tin go fayn fɔ una. Mek una gɛt wɛlbɔdi!”—Akt 15:28, 29.
14. Aw i pɔsibul fɔ mek Jiova in pipul dɛn wok togɛda wit wanwɔd insay dis wɔl we pipul dɛn nɔ de tink di sem we?
14 Tide, Jiova Witnɛs dɛn we pas 8,000,000 pipul dɛn ɛn we de insay pas 100,000 kɔngrigeshɔn dɛn ɔlsay na di wɔl biliv di sem tin dɛn ɛn gɛt wanwɔd. Aw i pɔsibul fɔ gɛt dis kayn wanwɔd pan ɔl we pipul dɛn ɔlsay na di wɔl tide de fɛt dɛnsɛf ɛn nɔ de tink di sem we? Di men rizin we mek wanwɔd de na bikɔs ɔf di klia dayrɛkshɔn we Jizɔs Krays we de oba di kɔngrigeshɔn de gi tru di “slev we fetful ɛn gɛt sɛns,” dat na, di Gɔvnin Bɔdi. (Mat. 24:45-47) Wi gɛt wanwɔd bak bikɔs ɔf di we aw wi brɔda dɛn ɔlsay na di wɔl rɛdi fɔ fala di dayrɛkshɔn we di Gɔvnin Bɔdi de gi.
“Dɛn Gladi fɔ di Ɛnkɔrej we Dɛn Ɛnkɔrej Dɛn” (Akt 15:30-35)
15, 16. Wetin-ɛn-wetin bin apin afta dɛn sɔlv di prɔblɛm bɔt fɔ sakɔmsayz? Wetin mek dɛn gɛt da kayn rizɔlt de?
15 Di Baybul buk we nem Akt kɔntinyu fɔ tɛl wi se we di brɔda dɛn we dɛn sɛn we kɔmɔt na Jerusɛlɛm rich na Antiɔk, “dɛn gɛda di wan ol grup ɛn gi dɛn di lɛta.” Wetin di brɔda dɛn bin du bɔt di dayrɛkshɔn we dɛn bin gɛt frɔm di gɔvnin bɔdi? “We dɛn dɔn fɔ rid [di lɛta], dɛn gladi fɔ di ɛnkɔrej we dɛn ɛnkɔrej dɛn.” (Akt 15:30, 31) Pantap dat, Judas ɛn Saylas “gi plɛnti tɔk fɔ ɛnkɔrej di brɔda dɛn ɛn ɛp dɛn fɔ tinap tranga wan.” Dis bin mek dɛn kɔl di tu man dɛn “prɔfɛt dɛn,” jɔs lɛk aw dɛn bin de kɔl Banabas, Pɔl, ɛn ɔda wan dɛn. Dɛn bin de yuz di wɔd “prɔfɛt dɛn” fɔ tɔk bɔt di wan dɛn we bin de tɔk bɔt wetin Gɔd want.—Akt 13:1; 15:32; Ɛks. 7:1, 2.
16 Wan dawt nɔ de se Jiova in blɛsin bin de pan ɔl di tin dɛn we dɛn bin du fɔ sɔlv di prɔblɛm di bɛst we. Wetin na di men tin we dɛn bin du fɔ mek ɔltin kɔmɔt fayn? Na di klia dayrɛkshɔn we di gɔvnin bɔdi bin gi di rayt tɛm we kɔmɔt frɔm Gɔd in Wɔd ɛn di gayd we di oli spirit bin gayd dɛn. Fɔ ad to dat, na di fayn we we dɛn bin tɛl di kɔngrigeshɔn dɛn wetin di gɔvnin bɔdi dɔn disayd.
17. Us ɛgzampul di brɔda dɛn lɛf fɔ sakit ovasia dɛn insay wi yon tɛm?
17 Di Gɔvnin Bɔdi fɔ Jiova Witnɛs dɛn tide de fala da sem ɛgzampul de fɔ gi dayrɛkshɔn to di brɔda dɛn ɔlsay na di wɔl di rayt tɛm. We dɛn kin disayd fɔ du sɔntin, dɛn kin tɛl di kɔngrigeshɔn dɛn di kayn we we klia ɛn dayrɛkt. Wan we we dɛn kin du dat na we dɛn kin sɛn sakit ovasia dɛn. Dɛn brɔda dɛn ya we de put wetin ɔda pipul dɛn want bifo wetin dɛn want de go na difrɛn kɔngrigeshɔn dɛn fɔ gi dayrɛkshɔn ɛn ɛnkɔrejmɛnt. Lɛk Pɔl ɛn Banabas, dɛn kin spɛn bɔku tɛm pan di prichin wok fɔ “tich ɛn tɔk bɔt di gud nyuz bɔt Jiova in wɔd wit bɔku ɔda pipul dɛn.” (Akt 15:35) Jɔs lɛk Judas ɛn Saylas, dɛn de “gi plɛnti tɔk” fɔ ɛnkɔrej di brɔda dɛn ɛn ɛp dɛn fɔ tinap tranga wan.
18. Wetin Gɔd in pipul dɛn de du fɔ kɔntinyu fɔ gɛt Jiova in blɛsin?
18 Wetin yu go se bɔt di kɔngrigeshɔn dɛn? Wetin go ɛp di kɔngrigeshɔn dɛn ɔlsay na di wɔl fɔ kɔntinyu fɔ ɛnjɔy pis ɛn wanwɔd insay dis wɔl we pipul dɛn nɔ de tink di sem we? Mɛmba se na Jems we na bin disaypul leta rayt se: “Fɔst-ɔf-ɔl, di sɛns we de kɔmɔt ɔp de mek pɔsin klin, dɔn i de mek i lɛk fɔ mek pis, i de mek i nɔ de pin, i de mek i rɛdi fɔ obe . . . Pantap dat, wetin rayt de apin usay pis de fɔ di wan dɛn we de mek pis.” (Jems 3:17, 18) Wi nɔ no if Jems bin de tink bɔt di mitin na Jerusɛlɛm ɔ i nɔ bin de tink bɔt am we i tɔk dɛn wɔd ya. Bɔt we wi tink bɔt wetin de na Akt chapta 15, wi si klia wan se na we wanwɔd de ɛn pipul dɛn de wok togɛda nain nɔmɔ go mek wi gɛt Jiova in blɛsin.
19, 20. (a) Aw wi no klia wan se pis ɛn wanwɔd bin de na di kɔngrigeshɔn na Antiɔk? (b) Wetin Pɔl ɛn Banabas bin gɛt chans fɔ du?
19 I bin izi fɔ si klia wan di pis ɛn wanwɔd we bin de naw na di kɔngrigeshɔn na Antiɔk. Di brɔda dɛn na Antiɔk nɔ bin agyu wit di brɔda dɛn we kɔmɔt Jerusɛlɛm, bifo dat, dɛn bin rili gladi fɔ di fɛn we Judas ɛn Saylas go fɛn dɛn. Di akawnt se: “Afta we dɛn dɔn tek sɔm tɛm de, di brɔda dɛn tɛl dɛn sef jɔni ɛn mek dɛn go bak to di wan dɛn we sɛn dɛn,” dat na fɔ go bak na Jerusɛlɛm. d (Akt 15:33) Wi shɔ se di brɔda dɛn na Jerusɛlɛm dɛnsɛf bin gladi we dɛn yɛri wetin di tu man dɛn tɛl dɛn bɔt wetin apin we dɛn travul. Dɛn tɛl Jiova tɛnki fɔ in spɛshal gudnɛs we mek dɛn bin ebul fɔ du wetin dɛn sɛn dɛn fɔ du fayn fayn wan!
20 Bikɔs Pɔl ɛn Banabas bin kɔntinyu fɔ de na Antiɔk, dɛn bin ebul fɔ pe atɛnshɔn mɔ fɔ sɛt fayn ɛgzampul fɔ de bifo pan di prichin wok jɔs lɛk aw sakit ovasia dɛn de du tide bay we dɛn de go fɛn kɔngrigeshɔn dɛn we dɛn de kia fɔ. (Akt 13:2, 3) Dis na big blɛsin fɔ Jiova in pipul dɛn! Bɔt aw Jiova bin kɔntinyu fɔ yuz dɛn tu brɔda dɛn ya we de prich wit zil ɛn blɛs dɛn? Wi go tɔk bɔt dis insay di nɛks chapta.
Kristian dɛn tide de bɛnifit frɔm di spirichwal tin dɛn we di Gɔvnin Bɔdi ɛn di wan dɛn we de ɛp dɛn de gi wi
a Luk di bɔks we gɛt di taytul “ Jems, ‘We Na di Masta in Brɔda.’”
b Jems bin yuz sɛns fɔ tɔk bɔt di tin dɛn we Mozis bin rayt we nɔ jɔs gɛt fɔ du wit di Lɔ, bɔt di tin dɛn we Gɔd dɔn du ɛn di tin dɛn we sho wetin I want we kam bifo di Lɔ. Fɔ ɛgzampul, insay Jɛnɛsis, wi si klia wan aw Gɔd de si blɔd, fɔ du mami ɛn dadi biznɛs wit pɔsin we nɔto yu man ɔ wɛf, ɛn fɔ wɔship aydɔl. (Jɛn. 9:3, 4; 20:2-9; 35:2, 4) So Jiova sho prinsipul dɛn we ɔlman fɔ fala ilɛk na Ju ɔ Jɛntayl.
c Luk di bɔks we gɛt di taytul “ Aw di Gɔvnin Bɔdi we De Tide Ɔganayz?”
d Insay vas 34, sɔm Baybul transleshɔn dɛn ad wɔd dɛn fɔ sho se Saylas bin disayd fɔ kɔntinyu fɔ de na Antiɔk. (King James Version) Bɔt i tan lɛk se na leta dɛn bin ad dɛn wɔd dɛn de.
