WI PADI dɛn na pipul dɛn we wi lɛk fɔ tɔk to ɛn spɛn tɛm wit. Bɔt i impɔtant fɔ mek wi gɛt gud padi dɛn. Udat yu tink se na di bɛst padi we wi go gɛt?— Yɛs, na Jiova Gɔd.

Yu tink se wi go rili bi Gɔd in padi?— Wɛl, di Baybul se Ebraam, we bin de trade trade, na bin ‘Jiova in padi.’ (Jems 2:23) Yu no wetin mek dɛn kɔl am Jiova in padi?— Di Baybul se Ebraam bin de obe Gɔd. I bin de obe ilɛksɛf di tin we Gɔd tɛl am fɔ du nɔ izi. So fɔ lɛ wi bi Jiova in padi, wi fɔ du wetin de mek i gladi, jɔs lɛk aw Ebraam bin du ɛn jɔs lɛk aw di Gret Ticha kin du ɔltɛm.—Jɛnɛsis 22:1-14; Jɔn 8:28, 29; Di Ibru Pipul Dɛn 11:8, 17-19.

 Jizɔs bin tɛl in apɔsul dɛn se: “Una na mi padi dɛn if una du wetin a tɛl una fɔ du.” (Na wi mek am italiks; Jɔn 15:14) Na Jiova tich Jizɔs ɔl wetin i fɔ tɛl pipul dɛn, so Jizɔs bin de se in padi dɛn na pipul dɛn we de du wetin Gɔd tɛl dɛn fɔ du. Ɔl in padi dɛn bin lɛk Gɔd.

Sɔm pan di Gret Ticha in tayt padi dɛn na in apɔsul dɛn. Dɛn pikchɔ de na pej 75 na dis buk. Dɛn bin de travul wit am ɛn ɛp am fɔ du di prichin wok. Jizɔs bin de spɛn bɔku tɛm wit dɛn man dɛn ya. Dɛn bin de it togɛda. Dɛn bin de tɔk bɔt Gɔd togɛda. Ɛn dɛn bin de du ɔda tin dɛn togɛda. Bɔt Jizɔs bin gɛt bɔku ɔda padi dɛn. I bin de lɔj to sɔm pan dɛn, ɛn dɛn bin de ɛnjɔy fɔ kip kɔmpin togɛda.

Wan famili we Jizɔs bin lɛk fɔ lɔj to bin de na wan smɔl tɔŋ we dɛn kɔl Bɛtani. Bɛtani bin de nia Jɛrusɛlɛm. Yu mɛmba dis famili?— Na bin Meri ɛn Mata ɛn dɛn brɔda, Lazarɔs. Jizɔs bin  kɔl Lazarɔs in padi. (Jɔn 11:1, 5, 11) Jizɔs bin lɛk dis famili, ɛn i bin de gladi fɔ de wit dɛn bikɔs dɛn bin lɛk Jiova ɛn dɛn bin de wɔship Am.

Dis nɔ min se Jizɔs nɔ bin lɛk pipul dɛn we nɔ bin de wɔship Gɔd. I bin lɛk dɛn. I bin de ivin go na dɛn os dɛn ɛn it wit dɛn. Dis mek sɔm pipul dɛn bin de tɔk se Jizɔs na “padi wit dɛn pipul we de gɛda taks ɛn dɛn Ju pipul we nɔ de kip di Ju Lɔ aw dɛn fɔ kip am.” (Matyu 11:19) Jizɔs bin de go na dɛn os dɛn bikɔs i want fɔ tɔk to dɛn bɔt Jiova, nɔto bikɔs i lɛk di we aw dɛn de liv dɛn layf. I bin de tray fɔ ɛp dɛn fɔ lɛf fɔ du bad ɛn wɔship Gɔd.

Dis bin apin wande na wan tɔŋ we dɛn kɔl Jɛriko. Jizɔs bin de pas fɔ go Jerusɛlɛm. Bɔku pipul dɛn bin de wit am ɛn wan man we nem Zakiɔs bin de midul di pipul dɛn. I bin want fɔ si Jizɔs. Bɔt Zakiɔs bin shɔt, so i nɔ bin ebul fɔ si Jizɔs bikɔs pipul dɛn bin bɔku. So i rɔn go bifo say na di rod ɛn klem wan stik so dat i go ebul fɔ si Jizɔs fayn we i de pas.

We Jizɔs rich nia di stik, i luk ɔp ɛn se: ‘Zakiɔs, kam dɔŋ wantɛm bikɔs a go slip na yu os tide.’ Bɔt Zakiɔs  na bin jɛntriman we dɔn du bɔku bad bad tin dɛn. So, wetin mek Jizɔs bin want fɔ go na dis kayn man in os?—

Jizɔs bin go de fɔ go tɔk to Zakiɔs bɔt Gɔd; i nɔ bin go na in os bikɔs i bin lɛk di we aw Zakiɔs de liv in layf. I bin si aw di man dɔn tray tranga wan fɔ si am. So i bin no se Zakiɔs go mɔs lisin. Dis na bin fayn tɛm fɔ tɔk to am bɔt di we aw Gɔd se pipul dɛn fɔ liv dɛn layf.

So as wi de si na di pikchɔ, wetin apin we Jizɔs du dat?— Zakiɔs lɛk di tin dɛn we Jizɔs bin de tich. I fil bad fɔ di we aw i dɔn kruk pipul dɛn, ɛn i prɔmis se i go gi di mɔni we i nɔ bin gɛt rayt fɔ tek. Afta dat, insɛf bi Jizɔs in disaypul. Afta Zakiɔs du dis, na da tɛm de in ɛn Jizɔs kam bi padi.—Lyuk 19:1-10.

Frɔm wetin wi lan frɔm di Gret Ticha, yu tink se wi fɔ go fɛn pipul dɛn we nɔto wi padi dɛn?— Yɛs. Bɔt wi nɔ go go na dɛn os dɛn bikɔs wi lɛk di we aw dɛn de liv. Ɛn wi nɔ go jɔyn dɛn fɔ du bad tin. Wi go go na dɛn os fɔ tɔk to dɛn bɔt Gɔd.

 Wi tayt padi dɛn na di wan dɛn we wi rili lɛk fɔ spɛn tɛm wit. Wan tin we go ɛp wi fɔ no udat na gud padi, na dat i fɔ bi pɔsin we Gɔd lɛk. Sɔm pan dɛn nɔ kin ivin no udat na Jiova. Bɔt if dɛn want fɔ lan bɔt am, wi kin ɛp dɛn. Ɛn we dɛn lɛk Jiova lɛk aw wi lɛk am, da tɛm de wi go bi tayt padi.

Wan ɔda tin de we go ɛp wi fɔ no if sɔmbɔdi go bi gud padi. Wach di tin dɛn we i de du. Aks yusɛf dɛn kwɛstyɔn ya, Na pɔsin we kin du bad tin to ɔda pipul dɛn ɛn laf dɛn? I nɔ fayn fɔ du dat, nɔto so?— Na pɔsin we kin gɛt trɔbul ɔltɛm? Wi nɔ go want fɔ mek wi ɛn in gɛt di trɔbul, nɔto so?— Ɔ i kin du bad tin dɛn bay wilful ɛn tink se i gɛt sɛns we nɔbɔdi nɔ si am? Ivin if pɔsin nɔ si am, Gɔd si wetin i du, nɔto so?— Yu tink se pipul dɛn we de du dɛn kayn bad tin dɛn de go bi gud padi dɛn fɔ wi?—

Duya tek yu Baybul. Lɛ wi si wetin di Baybul se bɔt aw wi padi dɛn kin afɛkt wi. Di skripchɔ de na Fɔs Lɛta Fɔ Kɔrint chapta 15, vas 33. Yu dɔn si am?— I se: “Una nɔ mek ɛnibɔdi mek una ful. ‘Bad kɔmpin de pwɛl pɔsin.’” Dis min se if wi kip kɔmpin wit bad pipul dɛn, wisɛf go bigin du bad tin. Bɔt if wi kip kɔmpin wit gud pipul dɛn, dɛn go ɛp wi fɔ gɛt gud abit dɛn.

Lɛ wi nɔ ɛva fɔgɛt se di Pɔsin we impɔtant pas ɔlman na wi layf na Jiova. Wi nɔ want fɔ du ɛnitin we go pwɛl wi padi biznɛs wit am, nɔto so?— So wi fɔ tek tɛm we wi de mek padi, ɛn wi fɔ mek padi wit di wan dɛn nɔmɔ we lɛk Gɔd.