WETIN wi go du fɔ mek Gɔd gladi? Yu tink se wi go ebul gi am ɛnitin?— Jiova se: “Ɔl di animal dɛn na bush na mi yon.” I tɔk bak se “nain gɛt di silva ɛn di gold dɛn.” (Sam 24:1; 50:10; Egay 2:8) Bɔt sɔntin de we wi go gi Gɔd. Wetin na da tin de?—

Jiova alaw wi fɔ disayd if wi want fɔ wɔship am ɔ wi nɔ want fɔ wɔship am. I nɔ de fos wi fɔ du wetin i want. Lɛ wi tray fɔ si wetin mek Gɔd alaw wi fɔ disayd if wi want fɔ wɔship am ɔ wi nɔ want fɔ wɔship am.

Yu no wetin na rɔbɔt? Na mashin we dɛn mek fɔ du ɛnitin we di pɔsin we mek am want lɛ i du. So di rɔbɔt nɔ ebul disayd fɔ insɛf. If Jiova bin want, i fɔ dɔn mek wi ɔl lɛk rɔbɔt fɔ lɛ wi de du wetin nɔmɔ i want wi fɔ du. Bɔt nɔto dat i du. Yu no wetin mek?— Wɛl, sɔm tɔys dɛn de we na rɔbɔt. We yu prɛs bɔtin, dɛn de du wetin di pɔsin we mek dɛn want mek dɛn du. Yu dɔn wande si tɔys lɛk dat?— Sɔntɛnde, pipul dɛn kin taya fɔ ple wit tɔys we jɔs de du wetin dɛn mek am fɔ du. Gɔd nɔ want wi fɔ obe  am lɛk rɔbɔt we jɔs de du wetin dɛn mek am fɔ du. Jiova want lɛ wi wɔship am bikɔs wi lɛk am ɛn wi want fɔ obe am.

Aw yu tink se wi Papa we de na ɛvin de fil we wi obe am bikɔs wi want fɔ obe am?— Wɛl, tɛl mi, aw di we we yu de biev de mek yu mama ɛn papa fil?— Di Baybul se pikin we gɛt sɛns de “mek in papa in ed big,” bɔt di wan we ful “de pwɛl in mama in at.” (Prɔvabs 10:1) We yu du wetin yu mama ɛn papa se, dat kin mek dɛn gladi, nɔto so?— Bɔt aw dɛn kin fil we yu nɔ obe dɛn?—

Naw lɛ wi tink bɔt wi Papa we de na ɛvin, Jiova. I tɛl wi aw wi go mek i gladi. Duya tek yu Baybul ɛn tɔn to Prɔvabs 27:11 (NW). Ya so Gɔd de tɔk to wi se: “Mi pikin, sho se yu gɛt sɛns ɛn mek mi at gladi, so dat a go ansa di pɔsin we de provok mi.” Yu no wetin i min fɔ provok pɔsin?— Wɛl, pɔsin go provok yu we i laf yu ɛn tɛl yu se yu nɔ ebul du wetin yu se yu go du. Aw Setan de provok Jiova?— Mek wi si.

Mɛmba se wi bin dɔn lan na Chapta 8 insay dis buk se Setan want fɔ de bifo pan ɔltin, ɛn i want ɔlman fɔ obe am. Setan se pipul dɛn de wɔship Jiova jɔs bikɔs i go gi dɛn layf we  go de sote go if dɛn wɔship am. Afta we Setan bin mek Adam ɛn Iv nɔ obe Jiova, Setan bin chalenj Gɔd. I tɛl Gɔd se: ‘Pipul dɛn de wɔship yu jɔs fɔ di tin dɛn we dɛn de gɛt frɔm yu. Jɔs gi mi chans, a go mek ɔlman tɔn dɛn bak pan yu.’

Na tru se dɛn patikyula wɔd dɛn ya nɔ de insay di Baybul. Bɔt we wi rid Job in stori, wi de si klia wan se Setan tɔk sɔntin lɛk dat to Gɔd. So i bin rili impɔtant to Setan ɛn to Jiova if Job go kɔntinyu fɔ de biɛn Gɔd ɔ i go kɔmɔt biɛn am. Lɛ wi opin wi Baybul na Job chapta 1 ɛn 2 ɛn si wetin apin.

Insay Job chapta 1, Setan bin de na ɛvin we di enjɛl dɛn kam bifo Jiova. So Jiova aks Setan se: ‘Usay yu kɔmɔt?’ Setan ansa Jiova se i bin jɔs de waka waka na di wɔl. So Jiova aks am se: ‘Yu dɔn notis se Job de wɔship mi ɛn i nɔ de du bad?’—Job 1:6-8.

 Wantɛm wantɛm Setan bigin gi ɛkskyuz. I tɛl Jiova se: ‘Job de wɔship yu jɔs bikɔs trɔbul nɔ de mit am. If yu alaw bad tin fɔ mit am ɛn yu lɛf fɔ blɛs am, i go kɔs yu bifo yu fes.’ So Jiova ansa am se: ‘Ok, Setan, du ɛnitin we yu want du, bɔt nɔ du natin to insɛf sɛf.’—Job 1:9-12.

Wetin Setan du?— I mek pipul dɛn tif Job in kaw ɛn dɔnki dɛn ɛn kil di wan dɛn we de kia fɔ dɛn. Laytin flash ɛn kil di ship dɛn ɛn di wan dɛn we de kia fɔ dɛn. Leta pipul dɛn kam tif di kamɛl dɛn ɛn kil di wan dɛn we de kia fɔ dɛn. Dɔn Setan mek wan big big briz ib di os usay Job in tɛn pikin dɛn bin de, ɛn i kil dɛn ɔl. Bɔt pan ɔl dis, Job bin stil de wɔship Jiova.—Job 1:13-22.

Di nɛks tɛm we Jiova si Setan, Jiova tɛl am se Job stil de wɔship am. Setan mek ɛkskyuz bak se: ‘If yu jɔs alaw mi fɔ mek i sik, i go kɔs yu bifo yu fes.’ So Jiova alaw Setan fɔ mek Job sik, bɔt i wɔn Setan se mek i nɔ kil am.

Setan mek sofut kɔmɔt na Job in wan ol bɔdi. I bin de smɛl bad bad  wan ɛn nɔbɔdi nɔ bin want fɔ kam nia am. Ivin Job in wɛf sɛf tɛl am se: ‘Kɔs Gɔd ɛn day!’ Di wan dɛn we bin mek lɛk se dɛn na Job in padi dɛn we kam fɛn am bin mek Job fil bad mɔ ɛn mɔ. Aw dɛn du dat? Na bay we dɛn tɔk se Job go mɔs dɔn du bad bad tin dɛn, na dat mek dɛn kayn trɔbul ya de mit am. Pan ɔl di trɔbul ɛn pen we Setan mek Job sɔfa, Job nɔ bin stil kɔmɔt biɛn Jiova.—Job 2:1-13; 7:5; 19:13-20.

Aw yu tink se Jiova fil we Job nɔ kɔmɔt biɛn am?— Jiova go dɔn gladi bikɔs i bin ebul fɔ tɛl Setan se: ‘Luk Job! I de wɔship mi bikɔs i want fɔ wɔship mi.’ Yu tink se yu go ebul fɔ tan lɛk Job, so dat yu go bi sɔmbɔdi we Jiova go pɔynt to fɔ pruv to Setan se na lay i de lay?— Na big big ɔnɔ wi gɛt fɔ ansa Setan we bin tɔk se i go mek ɔlman lɛf fɔ wɔship Jiova. Jizɔs bin si am se na big big ɔnɔ.

Di Gret Ticha nɔ bin ɛva alaw Setan fɔ mek I du tin dɛn we nɔ rayt. Jɔs tink bɔt aw in ɛgzampul bin mek Gɔd fil! Jiova bin ebul pɔynt to Jizɔs ɛn tɛl Setan se: ‘Luk mi Pikin! I nɔ ɛva kɔmɔt biɛn mi bikɔs i lɛk mi!’ Tink bak bɔt di kayn gladi at we Jizɔs bin gɛt we i mek in Papa gladi. Na dat mek Jizɔs bin bia pan ɔl we dɛn bin kil am pan di stik.—Di Ibru Pipul Dɛn 12:2, NW.

Yu want fɔ bi lɛk di Gret Ticha ɛn mek Jiova gladi, nɔto so?— Kɔntinyu fɔ lan bɔt wetin Jiova want yu fɔ du, ɛn mek Jiova gladi bay we yu du wetin yu dɔn lan!